Joseph and famili bilong hem, witim olketa fren and relative, olketa redi for go long Jerusalem. Olketa savve go long there evri year for celebratem Pasova, olsem Law hem talem. (Deuteronomy 16:16) Jerusalem hem stap samting olsem 120 kilometer from Nazareth. Hem taem wea evriwan savve busy mekem olketa redi for datfala gogo and olketa hapi tu. Jesus, wea hem 12 year, hem barava luk forward long datfala hipap and chance for go moa long temple.

Long tingting bilong Jesus and famili bilong hem, datfala Pasova celebration hem no samting for wanfala day nomoa. Day bihaen long Pasova, hem start bilong olketa day for kaikaim bred wea no garem yeast, wea bae gohed for sevenfala day. (Mark 14:1) Olketa ting long datwan olsem part long Pasova tu. For olketa go long Jerusalem go kasem taem olketa arrive bak long hom bilong olketa, hem samting olsem tufala week. Bat long disfala gogo, taem olketa go bak long Nazareth olketa delay lelebet bikos long samting wea happen long Jesus.

Taem olketa lusim Jerusalem for go bak long hom, Joseph and Mary tingse Jesus hem wakabaot witim olketa relative and fren. Bat taem olketa stop for rest long naet, olketa no lukim hem. So tufala askem olketa relative and olketa narawan sapos olketa lukim hem, bat olketa no faendem hem! So Joseph and Mary go bak long Jerusalem moa for lukaotem hem.

Olketa lukaotem hem for wan full day, bat olketa no faendem hem. Long mek-tu day, olketa no faendem hem tu. Gogo, long mek-thri day nao olketa faendem son bilong tufala long temple. Jesus hem sidaon witim olketa bigman long there. Hem lisin long wanem olketa talem, hem gohed askem kwestin long olketa, and olketa barava sapraes long bigfala savve wea hem garem.

Mary sei long hem: “Pikinini bilong mi, why nao iu duim olsem long mitufala? Mi and dadi bilong iu lukaotem iu long evri ples and mitufala barava wari fogud.”—Luke 2:48.

Jesus hem sapraes and sei: “Hao nao iufala lukaotem mi? Iufala shud savve finis, mi mas stap long haos bilong Dadi bilong mi ia!”—Luke 2:49.

Jesus go bak long Nazareth witim Joseph and Mary and gohed for obeyim tufala. Hem start for big nao and gohed for garem gudfala tingting. Nomata hem young, God barava hapi long hem and olketa man tu hapi long hem. Start taem hem pikinini, Jesus showimaot nambawan example long wei for interest long spiritual samting, and for respectim dadi and mami bilong hem.