Olsem iumi storyim finis, taem Mary start for babule hem go visitim relative bilong hem Elizabeth long wanfala taon long olketa maunten long Judea long south. Bat distaem, Mary stap long hom bilong hem, Nazareth, and hem kasem mek-foa month bilong hem nao. Klosap nao pipol bae luksavve hem babule, and masbi Mary hem barava wari abaotem wanem bae happen!

Mary engage finis witim Joseph, wea hem wanfala carpenter. Hem savve finis Law wea God givim long olketa Israelite hem sei olketa mas sutim dae long ston eni woman wea engage finis wea sleep witim nara man. (Deuteronomy 22:23, 24) So nomata Mary hem no durong witim eniwan, maet hem ting raonem wanem nao bae happen and hao nao bae hem explainim long Joseph wei wea hem babule.

Masbi Joseph hem barava laek for lukim Mary bikos for thrifala month hem stap long Judah. Luk olsem Mary mas storyim long Joseph wanem hem happen and traem best for explainim long hem paoa bilong holy spirit nao mekem hem babule. Bat diswan hem hard samting for Joseph minim and bilivim.

Joseph hem savve Mary hem gudfala woman and nara pipol tinghae long gudfala wei bilong hem. Hem barava lovem Mary. Nomata wanem Mary hem talem, long tingting bilong Joseph masbi nara man nao givim pikinini long hem. Joseph no laekem olketa for sutim hem dae long ston or for mek shame long hem, so hem disaed for divorcem hem. Long datfala taem, pipol ting long tufala wea engage olsem olketa  marit finis, and tufala mas divorce for finisim datwan.

Bihaen, taem Joseph gohed for ting raonem evri samting hia, hem sleep. Angel bilong Jehovah kam long hem insaed wanfala dream, and sei: “No fraet for tekem waef bilong iu Mary go long haos bilong iu, bikos paoa bilong holy spirit nao mekem hem for babule. Hem bae bornem wanfala baby boy and iu mas nemim hem Jesus, from hem bae sevem pipol bilong hem from sin bilong olketa.”—Matthew 1:20, 21.

Joseph hem wekap and hem hapi from hem minim nao samting wea happen! Long semtaem nomoa hem duim samting wea angel talem and tekem Mary long haos bilong hem. Diswan showimaot long evriwan Joseph and Mary tufala marit nao. Nomata olsem, Joseph no sleep witim Mary go kasem taem hem bornem Jesus.

Samfala month bihaen, taem Mary hem babule big, tufala mas lusim Nazareth. Wea nao tufala mas go long taem olsem?