Samfala man travel kam from East. Olketa man hia savve lukluk long olketa star for trae savve long samting wea bae happen long laef bilong pipol. (Isaiah 47:13) Taem olketa stap long hom bilong olketa long East, olketa lukim wanfala “star” and olketa followim datwan for plande handred kilometer. Bat datfala star leadim olketa go long Jerusalem firstaem, no long Bethlehem.

Taem olketa arrive long Jerusalem, olketa ask olsem: “Wea nao disfala pikinini wea bae hem king bilong olketa Jew? Mifala lukim star bilong hem taem mifala stap long East, and mifala kam for baodaon long hem.”—Matthew 2:1, 2.

Taem King Herod wea stap long Jerusalem herem diswan hem barava feel nogud. So hem kolem kam olketa hed priest and olketa nara bigman bilong olketa Jew and askem olketa wea nao bae datfala Christ hem born. Olketa ansa followim samting wea Bible talem, and sei: “Long Bethlehem.” (Matthew 2:5; Micah 5:2) Then Herod talem olketa man from East for kam long hem, bat olketa mas kam haed. Hem sei long olketa: “Go lukaotem datfala pikinini, and taem iufala faendem hem, kam bak and talem mi, mekem mi tu savve go and baodaon long hem.” (Matthew 2:8) Bat Herod hem laea nomoa. Hem lukaotem datfala pikinini for killim hem dae!

Bihaen olketa man hia go, datfala “star” wea olketa lukim taem olketa long East hem go firstaem long olketa. Diswan hem no wanfala star nating, bat samwan nao mas iusim datfala star for leadim olketa. Olketa man hia followim datfala star, gogo hem stop antap long haos wea Joseph and Mary stap witim smol boy bilong tufala.

Taem olketa go insaed long haos olketa lukim Mary witim wanfala pikinini, wea hem nao Jesus. Olketa man hia baodaon long Jesus and givim hem olketa present. Olketa present hia nao hem gold, frankincense, and myrrh. Bihaen, taem olketa laek for go bak long Herod, God warnim olketa insaed wanfala dream for no duim datwan. So olketa go bak long hom bilong olketa followim difren road.

Hu nao iusim datfala “star” wea leadim olketa man hia? Olsem iumi storyim finis, datfala star hem no leadim olketa go stret long Jesus long Bethlehem, bat hem leadim olketa go long Jerusalem long King Herod, wea hem laek for killim dae Jesus. Bat God warnim olketa man hia for no talem Herod ples wea Jesus stap. Satan, wea hem enemy bilong God, hem nao laek for killim dae Jesus, and hem nao iusim datfala star for trae duim wanem hem laekem.