Bihaen Jesus baptaes and hem no startim yet ministry bilong hem wanfala enemy kam for againstim hem. Hem nao Satan wea gohed for traem Jesus bikos hem laekem tumas for spoelem hem. Gogo, Jesus sei olsem abaotem Satan: “Man wea rulim disfala world hem kakam nao. Hem no garem paoa ovarem mi.”—John 14:30.

Aposol John lukim insaed long vision wanem bae happen long “datfala snek bilong bifor kam wea nem bilong hem Devil and Satan,” wea hem nao enemy bilong olketa man. Olketa bae torowem hem go daon long earth, and bae “hem kros fogud from hem savve hem garem lelebet taem nomoa.” (Revelation 12:9, 12) Olketa Christian distaem luksavve olketa stap insaed long datfala “lelebet taem” wea Satan garem. Klosap nao wanfala angel bae torowem “datfala snek bilong bifor kam” insaed hol wea deep tumas. Satan bae stap insaed datfala hol and no duim eni samting for 1,000 year. Long semtaem Jesus bae rul long Kingdom bilong God.—Revelation 20:1, 2.

Long datfala taem, earth bae hem hao? Hu nao bae stap long earth, and laef bae hao? Jesus ansarem olketa kwestin hia long tokpiksa bilong hem abaotem olketa sheepsheep and olketa goat. Hem storyim wanem bae happen long olketa wea raeteous wea olsem olketa sheepsheep and wea sapotim olketa brata bilong Jesus and duim gud samting long olketa. Hem talem stret tu wanem bae happen long olketa wea no duim datwan and wea olsem olketa goat. Jesus sei: “Olketa hia [olketa goat] bae dae and no laef moa, bat olketa wea raeteous [olketa sheepsheep] bae kasem laef olowe.”—Matthew 25:46.

Diswan helpem iumi for minim toktok wea Jesus talem long datfala criminal wea hange saed  long hem. Jesus no sei datfala man bae rul insaed long Kingdom bilong God, wea hem nao hem promisim long olketa faithful aposol bilong hem. Bat hem sei long datfala man: “Mi talem iu tru samting, iu bae stap witim mi long Paradaes.” (Luke 23:43) Datfala man garem hope for stap long Paradaes long earth. Long future, taem Jesus judgem pipol, olketa wea olsem sheepsheep and kasem “laef olowe” bae stap tu long datfala Paradaes.

Aposol John storyim laef bilong pipol long earth long datfala taem. Hem sei: “Tent bilong God hem stap witim olketa man. Hem bae stap witim olketa and olketa bae kamap pipol bilong hem, and God nao bae stap witim olketa. Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:3, 4.

For datfala criminal stap long Paradaes, hem mas laef bak. Staka nara pipol tu bae laef bak. Jesus sei: “Taem bae kam wea evriwan wea stap insaed long grev bae herem toktok bilong hem and laef bak. Olketa wea duim gud samting bae kasem laef olowe, bat olketa wea duim nogud samting bae kasem judgment.”—John 5:28, 29.

Bat waswe long olketa faithful aposol and olketa narawan wea bae stap witim Jesus long heven? Bible sei: “Bae olketa hia kamap olketa priest bilong God and bilong Christ, and bae olketa kamap olketa king and rul witim hem for datfala 1,000 year.” (Revelation 20:6) Olketa hia hem olketa man and woman wea stap long earth bifor, so taem olketa rul ovarem earth bae olketa kaen long pipol and minim olketa.—Revelation 5:10.

Jesus bae iusim sakrifaes bilong hem for finisim sin wea olketa man kasem from Adam. Jesus and olketa narawan wea bae rul witim hem bae helpem olketa man wea faithful for kamap perfect. Long datfala taem, olketa man bae kasem datfala laef wea God laekem olketa for garem long firstaem taem hem talem Adam and Eve for garem olketa pikinini and mekem full earth kamap paradaes. Dae wea olketa man kasem from sin bilong Adam bae nomoa tu!

Long datfala taem, Jesus finisim nao evri waka wea Jehovah askem hem for duim. Long end bilong datfala wan thousand year wea Jesus hem rul, hem bae givim datfala Kingdom and olketa man wea perfect go long Dadi bilong hem. Aposol Paul storyim disfala samting wea Jesus duim wea showimaot hem barava hambol. Hem sei: “Bihaen God hem putim evri samting anda long paoa bilong Son bilong hem, then Son hia bae putim hemseleva anda long paoa bilong God, wea hem nao putim evri samting anda long paoa bilong Son. Diswan hem for God nomoa rul ovarem evriwan.”—1 Corinth 15:28.

Jesus duim barava important waka for mekem olketa nambawan plan bilong God kamap tru. Taem olketa nambawan plan hia gohed for kamap tru long niu world, Jesus bae datfala ‘road, truth, and laef’ for olowe.—John 14:6.