Jesus storyim finis long olketa disaepol wanfala tokpiksa abaotem why hem important for gohed prea and no givap. (Luke 11:5-13) Distaem maet hem long Samaria or Galilee, and hem talem nara tokpiksa for strongim moa why hem important for gohed prea and no givap.

Hem sei: “Wanfala judge hem stap long wanfala taon. Hem man wea no fraet long God and hem no savve respectim eni man tu. Wanfala widow woman tu stap long datfala taon. Hem go olowe nao long datfala judge and sei long hem, ‘Mi garem problem witim wanfala man. Man hia brekem law and mi laekem iu for mas stretem datwan.’ For lelebet longtaem datfala judge hem no willing for helpem hem. Bat gogo hem sei long hemseleva, ‘Mi man wea no fraet long God and no savve respectim eni man tu, bat from disfala widow woman askem mi olowe mi mas stretem disfala problem for hem. Sapos nomoa, bae hem kam long mi olowe and gogo bae mi krangge nao.’”—Luke 18:2-5.

Jesus storyim mining bilong datfala tokpiksa olsem: “Hao, iufala herem samting wea disfala judge wea no raeteous hem talem? So sapos datfala judge savve duim stret samting, God bae barava duim stret samting for olketa wea hem chusim and wea singaot long hem evritaem for helpem olketa. Hem bae patient witim olketa tu.” (Luke 18:6, 7) Long disfala tokpiksa, Jesus showimaot wanem samting abaotem Dadi bilong hem?

Samting wea Jesus talem no minim Jehovah God hem olsem datfala judge wea no raeteous. Bat hem showimaot sapos judge wea no raeteous bae duim samting for man wea ask olowe, God bae barava willing for duim samting for olketa wea gohed askem hem. God hem raeteous and gud and sapos olketa man wea worshipim hem gohed prea and no givap, bae hem ansarem olketa. Iumi luksavve long datwan from wanem Jesus talem. Hem sei: “Iu savve, God bae kwiktaem duim stret samting for olketa.”—Luke 18:8.

Plande taem, pipol no duim stret samting for olketa man nating and pipol wea poor, bat olketa favorim pipol wea rich and garem paoa. Bat God no olsem. Long taem wea hem markem, bae hem mek sure nogud pipol kasem panis and pipol bilong hem kasem laef olowe.

Hu nao garem faith olsem datfala widow woman? Waswe, olketa barava bilivim God bae “kwiktaem duim stret samting for olketa”? Jesus storyim finis tokpiksa abaotem why hem important for gohed prea and no givap. Then hem storyim why hem important for man bilivim God savve ansarem olketa prea. Hem sei: “Taem Son bilong man hem kam, waswe, pipol long earth bae garem diskaen faith?” (Luke 18:8) Diswan showimaot maet no staka pipol garem kaen faith olsem taem Christ hem kam.

Samfala wea lisin long Jesus tingse God hapi long olketa. Olketa tingse olketa nao raeteous, and olketa ting daonem olketa narawan. Jesus  storyim narafala tokpiksa for pipol wea garem tingting olsem.

Hem sei: “Tufala man go for prea long temple. Narawan hem Pharisee and narawan hem man wea tekem tax. Datfala Pharisee hem standap seleva and prea olsem, ‘God, mi thankiu tumas long iu bikos mi no olsem olketa narawan wea demandim selen, duim samting wea no stret, duim adultery, and mi no olsem disfala man wea tekem tax tu. Mi markem tufala taem long week nao for no kaikai, and mi givim smol haf long evri samting wea mi kasem olsem Law hem talem.’”—Luke 18:10-12.

Hem wei bilong olketa Pharisee for duim olketa samting mekem pipol lukim and tinghae long olketa. Monday and Thursday nao staka pipol savve kam long olketa market long taon, so olketa Pharisee markem tufala day hia for no kaikai mekem staka pipol lukim olketa. Olketa strict tumas tu for givim smol haf long olketa smol plant. (Luke 11:42) Tu-thri month bifor, olketa showimaot olketa ting daonem olketa man nating taem olketa sei: “God no hapi long olketa pipol hia wea nating savve long Law.”—John 7:49.

Jesus gohed storyim datfala tokpiksa. Hem sei: “Bat datfala man wea tekem tax hem standap farawe go lelebet. Hem shame for luk go ap long heven, and hem gohed hitim chest bilong hem and sei, ‘God, plis iu kaen long mi, bikos mi man wea mi sin ia.’” Datfala man wea tekem tax hem hambol for talemaot hem man wea sin. Then Jesus hem sei: “Iu savve, long tingting bilong God disfala man hem raeteous winim nara man wea mekhae long hemseleva. Diswan hem bikos man wea mekhae long hemseleva bae God mekem hem for hambol, bat man wea hambol bae God mekhae long hem.”—Luke 18:13, 14.

So Jesus showimaot hem important tumas for hambol. Datfala kaonsel hem barava fitim olketa disaepol wea growap long ples wea olketa Pharisee mekhae long paoa and position. And hem gudfala kaonsel for evri disaepol bilong Jesus distaem tu.