Long Perea, Jesus storyim finis hao “plande wea first bae last, and olketa wea last bae first.” (Matthew 19:30) Distaem Jesus storyim wanfala tokpiksa abaotem olketa man wea waka long planteison for showimaot datfala toktok hem tru.

Hem sei: “Kingdom bilong God hem olsem wanfala man wea ownim grape planteison. Hem go aot early long morning for lukaotem samfala man for waka long planteison bilong hem. Hem talem olketa man hia hem bae peim olketa wanfala denarius for wanfala day, then hem talem olketa for go waka long planteison bilong hem. Taem hem go aot moa long mek-thri hour, hem lukim olketa narawan wea no garem waka olketa standap nating long market. Hem sei long olketa, ‘Iufala go waka long planteison tu, and mi bae peim iufala wanem nao hem fitim.’ So olketa go nao. Long mek-six hour and long mek-naen hour hem go aot and duim sem samting moa. Then long mek-eleven hour hem go and lukim samfala moa wea standap nating, and hem sei long olketa, ‘Why nao iufala standap nating for full day and no duim eni waka?’ Olketa sei long hem, ‘Bikos no eniwan givim mifala eni waka for duim.’ Hem sei long olketa, ‘Iufala go waka long planteison tu.’”—Matthew 20:1-7.

Taem Jesus storyim “Kingdom bilong God” and “man wea ownim planteison,” maet olketa wea lisin tingim Jehovah God. Long olketa Holy Raeting, Jehovah hem olsem man wea ownim wanfala grape planteison, wea piksarem nation bilong Israel. (Psalm 80:8, 9; Isaiah 5:3, 4) Olketa wea insaed datfala Law agreement, olketa olsem olketa man wea waka long grape planteison. Bat tokpiksa bilong Jesus hem no abaotem samting wea happen bifor. Hem story abaotem wanem hem happen long taem bilong hem.

Hem responsibility bilong olketa bigman bilong olketa Jew and olketa Pharisee for evritaem busy long waka bilong God. Olketa olsem olketa man wea waka full taem wea shud kasem full pei, wea minim for wanfala day olketa savve tekem wanfala denarius.

Long tingting bilong olketa priest and olketa nara bigman, olketa nara Jew duim lelebet waka nomoa, olsem olketa waka part taem long grape planteison bilong God. Long tokpiksa bilong Jesus, olketa man hia nao start waka “long mek-thri hour” (9:00 a.m.) or bihaen long mek-six, mek-naen, or mek-eleven hour (5:00 p.m.).

Olketa Pharisee ting long olketa man and woman wea followim Jesus olsem ‘pipol wea nating savve long Law.’ (John 7:49) Samfala hia man for fishing or duim olketa nara waka for klosap full laef bilong olketa. Then long 29 C.E., “man wea ownim planteison” sendem Jesus for go kolem olketa hia for kamap disaepol bilong Christ wea waka for God. Jesus sei olketa hia nao “last,” wea minim olketa kam for waka long planteison long mek-eleven hour.

Long end bilong tokpiksa, Jesus storyim wanem hem happen long end long day. Hem sei: “Long evening, man wea ownim planteison sei long boss bilong olketa wakaman, ‘Kolem kam olketa wakaman and peim olketa. Peim firstaem olketa wea kam long mek-eleven hour. Then peim olketa narawan, and olketa last wan for peim nao hem olketa wea kam long morning.’ Taem olketa wakaman wea start waka long mek-eleven hour olketa kam, hem peim wanfala denarius for wanfala man. So taem olketa wea start waka long morning olketa kam, olketa tingse bae olketa kasem big pei winim olketa hia, bat olketa tu kasem wanfala denarius. Taem olketa kasem datwan, olketa komplenim nao man wea ownim planteison and sei, ‘Olketa man hia kam bihaen, and waka wan hour nomoa. Mifala nao waka full day long hot sun! Hao nao olketa kasem sem pei  wea mifala kasem?’ Bat hem sei olsem long wanfala wakaman hia, ‘Fren, mi no ravem iu. Iu agree for mi peim iu wanfala denarius, iaman? Tekem pei bilong iu and go. Mi laek givim olketa hia sem pei wea mi givim long iu. Selen bilong mi ia! Mi savve iusim for eni samting wea mi laekem. Or hao, iu jealous bikos mi duim gudfala samting?’ Long wei olsem olketa wea last bae first, and olketa wea first bae last.”—Matthew 20:8-16.

Maet olketa disaepol laek for savve long mining bilong last part bilong datfala tokpiksa bilong Jesus. Long wanem wei nao olketa bigman bilong olketa Jew wea tingse olketa “first” bae “last,” and long wanem wei nao olketa disaepol bilong Jesus bae “first”?

Olketa disaepol bilong Jesus, wea olketa Pharisee and olketa narawan tingse bae “last,” olketa nao “first,” wea minim olketa nao first wan wea bae kasem full pei. Taem Jesus hem dae, God bae rejectim nation bilong Israel and bae hem chusim wanfala niu nation, wea hem nao “Israel bilong God.” (Galatia 6:16; Matthew 23:38) John Baptaesa showimaot hu nao olketa wea insaed datfala “Israel bilong God” taem hem storyim hao samfala bae baptaes long holy spirit. Olketa wea “last” olketa nao olketa first wan for baptaes long holy spirit and for talem pipol abaotem Jesus “long evri farawe ples long earth.” (Acts 1:5, 8; Matthew 3:11) Sapos olketa disaepol luksavve long bigfala change wea Jesus storyim, maet olketa luksavve tu olketa bigman wea bae “last” bae barava kros and againstim olketa.