Olketa Jew wea stap long northwest saed long Sea long Galilee herem Jesus kam bak from Decapolis. Maet staka herem Jesus stopem bigfala wind and mekem sea hem fine. Maet samfala savve tu hem healim tufala man wea demon stap long olketa. So “staka pipol” hipap kam long saedsea for welkamim Jesus. Luk olsem diswan long Capernaum. (Mark 5:21) Taem Jesus go shore nomoa, olketa barava interest for lukim wanem nao hem bae duim.

Jairus, wea hem wanfala bigman bilong sinagog hem barava laek for lukim Jesus. Hem baodaon long Jesus and staka taem nao hem sei: “Smol gele bilong mi hem barava sik big. Plis iu savve kam firstaem and putim hand bilong iu long hem mekem hem gud bak and no dae.” (Mark 5:23) Disfala dota bilong Jairus hem 12 year nomoa, and hem nomoa wanfala pikinini bilong hem. Waswe, bae Jesus duim samting for helpem disfala pikinini wea Jairus lovem tumas?—Luke 8:42.

Nara samting hem happen taem Jesus gogo for haos bilong Jairus. Staka pipol wea followim Jesus laekem nomoa for lukim sapos hem bae duim narafala mirakol, bat wanfala woman warim nomoa nogud sik wea kasem hem.

Disfala Jew woman garem sik wea blood hem ran olowe for 12-fala year finis. Hem go lukim staka doctor and spendem evri selen bilong hem finis, bat treatment wea olketa givim hem no finisim sik bilong hem bat hem just mekem hem “worse go moa.”—Mark 5:26.

Kaen sik olsem savve mekem woman wik and shame tu, and hem no samting for storyim long nara pipol. Law bilong Moses tu sei woman hem no klin taem blood hem ran. Eniwan wea tasim hem or kaleko bilong hem wea dirty mas swim and bae hem no klin go kasem evening.—Leviticus 15:25-27.

Disfala woman “herem olketa samting wea pipol talem abaotem Jesus” so hem go lukaotem hem. From hem no klin hem trae for kam haed long Jesus, and hem gohed for sei long hemseleva: “Sapos mi tasim nomoa kaleko bilong hem bae mi gud bak nao.” Taem hem tasim kaleko bilong hem nomoa, hem feelim blood hem stop! Datfala “nogud sik hem finis from hem nao.”—Mark 5:27-29.

Jesus hem sei: “Hu nao tasim mi?” Masbi datfala woman barava fraet taem Jesus tok olsem. Peter sei long Jesus: “Staka pipol nao hipap raonem iu and pushpush kam long iu.” So why nao Jesus ask abaotem hu nao tasim hem? Jesus sei: “Samwan tasim mi ia, bikos mi savve paoa hem go aot from mi.” (Luke 8:45, 46) Diswan showimaot samting wea happen hem affectim strong bilong Jesus.

Taem woman hia luksavve hard for hem haed from Jesus, hem barava seksek fogud and kam nildaon front long hem. Hem storyim front long evriwan why hem tasim Jesus, and hem talem tu sik bilong hem finis nao. Jesus tok kaen long hem and sei: “Dota bilong mi, faith bilong iu mekem iu gud bak. Iu go and no wari moa, bikos sik hia hem finis nao.”—Mark 5:34.

Diswan showimaot man wea God chusim for rulim earth hem kaen and tingim feeling bilong pipol, and hem garem paoa tu for helpem olketa!