Jairus savve Jesus healim datfala woman wea garem sik wea blood ran olowe. So hem tingse Jesus savve helpem tu gele bilong hem, nomata hem savve maet ‘gele bilong hem dae finis.’ (Matthew 9:18) Waswe, Jesus fit for duim eni samting?

Taem Jesus story yet witim datfala woman, samfala man wea stap kam long haos bilong Jairus kam long hem and sei: “Gele bilong iu dae finis! Iu no mekem Teacher hia hard waka moa for go long hem.”—Mark 5:35.

Datfala nius hem mekem Jairus sorre fogud! Hem man wea pipol barava respectim and hem garem bigfala paoa, bat hem no savve duim eni samting nao. Gele bilong hem dae nao, wea hem nomoa pikinini bilong hem. Bat Jesus herem wanem olketa talem, and hem sei long Jairus: “Iu no wari, garem faith nomoa.”—Mark 5:36.

So Jesus go witim Jairus long haos bilong hem. Taem olketa kasem haos, olketa lukim pipol wea hipap long there olketa krae and singaot big. Jesus go insaed haos and sei long olketa: “Smol pikinini hia hem no dae, hem sleep nomoa ia.” (Mark 5:39) Taem olketa herem datwan olketa laf long Jesus, bikos olketa savve datfala gele hem dae finis. Bat Jesus iusim paoa wea God givim long hem for showimaot hem savve mekem pipol for laef bak, olsem iumi savve wekapem man wea deepim sleep.

Jesus talem evriwan for go aot bat hem tekem Peter, James, John, and dadi and mami bilong datfala gele and olketa go long hem. Jesus holem hand bilong datfala gele and sei long hem, “‘Talʹi·tha cuʹmi,’ wea minim: ‘Smol gele, “Iu getap!”’” (Mark 5:41) Semtaem nomoa, hem getap and wakabaot. Masbi Jairus and waef bilong hem barava hapi narawe! Jesus talem olketa for givim kaikai long gele hia for pruvim hem laef bak nao.

Jesus talem disfala dadi and mami for no storyim wanem hem duim long eniwan, olsem hem talem olketa narawan long bifor wea hem healim olketa. Bat nius abaotem datwan kasem “evri taon and vilij long datfala ples.” (Matthew 9:26) Sapos samwan wea iu lovem hem laef bak, bae iu tu barava laek for storyim long evriwan! Diswan hem mek-tu taem wea Jesus mekem samwan laef bak wea Bible storyim.