Long wanfala sinagog long Capernaum, Jesus teachim pipol hem nao datfala tru bred from heven. Hem explainim go moa wanem hem storyim long pipol wea kam bak from east saed long Sea long Galilee. Olketa nao pipol wea kaikaim bred and fish wea hem provaedem.

Jesus sei: “Long wilderness, olketa grani bilong iufala kaikaim manna bat gogo olketa dae nomoa.” Then hem sei: “Mi nao datfala bred wea kam daon from heven wea mekem man laef. Sapos eniwan kaikaim disfala bred bae hem laef olowe. Iu savve, bred wea bae mi givim hem body bilong mi wea mi givim for mekem pipol long world savve laef.”—John 6:48-51.

Long 30 C.E., Jesus talem Nicodemus God lovem tumas pipol long world dastawe hem givim kam Son bilong hem for sevem olketa. Distaem Jesus sei olketa mas kaikaim body bilong hem, wea minim olketa mas showimaot faith long sakrifaes bilong hem. Hem nao wanem man mas duim for kasem laef olowe.

Bat olketa pipol no agree long samting wea Jesus talem. Olketa sei: “Hao nao bae man hia givim body bilong hem long iumi for kaikaim?” (John 6:52) Jesus laekem olketa for savve diswan hem tokpiksa nomoa. Nara samting wea hem talem showimaot hard tumas for diswan minim really body and blood bilong hem.

“Sapos iufala no kaikaim body bilong Son bilong man and drinkim blood bilong hem, bae iufala no kasem laef. Man wea kaikaim body bilong mi and drinkim blood bilong mi bae kasem laef olowe . . . Body and blood bilong mi hem kaikai and drink wea helpem man winim eni nara kaikai and drink. Man wea kaikaim body bilong mi and drinkim blood bilong mi, mitufala wan mind.”—John 6:53-56.

Masbi datwan barava here nogud long olketa Jew! Maet olketa tingse Jesus talem olketa for kaikaim man or for brekem law bilong God abaotem blood. (Genesis 9:4; Leviticus 17:10, 11) Bat samting wea Jesus talem hem tokpiksa nomoa. Hem storyim diswan for showimaot olketa wea laek for laef olowe mas showimaot faith long sakrifaes wea hem bae givim, wea hem nao perfect body and blood bilong hem. Bat staka disaepol bilong hem tu no minim diswan. Samfala sei: “Disfala toktok hem here nogud tumas, bae hu nao laek herem?”—John 6:60.

From Jesus luksavve samfala disaepol komplenim hem, hem sei: “Hao, iufala feel nogud long diswan? Sapos olsem, bae iufala barava feel nogud sapos iufala lukim Son bilong man hem go ap long ples wea hem stap kam long hem firstaem. . . . Samting wea mi talem long iufala hem kam from holy spirit and hem mekem man laef. Bat samfala long iufala no bilivim mi.” Taem hem tok olsem, plande long olketa disaepol go and no laek followim hem nao.—John 6:61-64.

So Jesus sei long 12-fala aposol: “Waswe long iufala, iufala laek go tu?” Peter sei: “Lord, no eniwan moa for mifala followim. Toktok bilong iu nomoa savve mekem man laef olowe and mifala biliv and barava savve iu nao datfala Holy Man wea God sendem kam.” (John 6:67-69) Peter hem faithful tumas, nomata hem and olketa nara aposol no minim gud yet wanem Jesus trae for teachim olketa!

Nomata Jesus hapi long wanem Peter talem, hem sei: “Mi chusim iufala olketa twelvfala aposol bilong mi, iaman? Bat wanfala long iufala hem olsem devil nao.” (John 6:70) Jesus hem storyim Judas Iscariot. Maet Jesus luksavve Judas start for go rong nao.

Nomata olsem, Jesus hapi for savve Peter and olketa nara aposol no givap for followim hem and for duim waka wea hem duim for sevem pipol.