Taem Jesus and olketa disaepol bilong hem savve olketa Pharisee and olketa wea sapotim Herod plan for killim hem dae, olketa go long Sea long Galilee. Staka pipol kam long hem from Galilee, and from Tyre and Sidon wea stap long saedsea. Samfala moa kam from narasaed long Jordan River, Jerusalem, and Idumea wea stap long south. Jesus healim staka long olketa. From diswan, olketa wea garem nogud sik pushpush kam long hem bikos olketa laekem tumas for tasim hem.—Mark 3:9, 10.

Jesus talem olketa disaepol for tekem kam wanfala smol boat, mekem hem savve go insaed and go aot lelebet from shore bikos pipol staka tumas and olketa pushpush kam long hem. And tu, hem savve teachim pipol hia wea standap long sandbis or muv go long nara ples for helpem samfala moa.

Matthew sei samting wea Jesus duim hem “mekem toktok bilong profet Isaiah hem kamap tru.”—Matthew 12:17.

Isaiah hem sei: “Disfala man nao wakaman bilong mi wea mi chusim. Hem nao man wea mi lovem, and mi barava hapi long hem. Mi bae givim hem spirit bilong mi, and hem bae showimaot long evri didifren kaen pipol stretfala wei for duim samting. Hem bae no raoa witim eniwan. Hem bae no tok big, and pipol long olketa main road bae no herem toktok bilong hem tu. Bae hem no brekem eni longfala grass wea bend finis, and bae hem no killim dae eni laet wea wick bilong hem no laet gud and wea klosap for dae. Bae hem gohed olsem go kasem taem hem win for stretem evri samting. Tru tumas, evri didifren kaen pipol bae hope long nem bilong hem.”—Matthew 12:18-21; Isaiah 42:1-4.

Jesus nao datfala wakaman wea God lovem and hapi long hem. Jesus showimaot wanem hem stret, wea kastom bilong religion bilong olketa Jew haedem from pipol. Olketa Pharisee no helpem pipol wea sik long Sabbath bikos olketa twistim Law bilong God for fitim tingting bilong olketa seleva! Jesus pruvim spirit bilong God stap long hem, and showimaot tu tingting bilong God abaotem wanem hem stret taem hem helpem pipol for lusim olketa kastom wea putim hevi long olketa. Dastawe olketa bigman laek for killim hem dae. Wei bilong olketa hem barava nogud!

Wanem nao Bible minim taem hem sei: “Hem  bae no raoa witim eniwan . . . no tok big, and pipol long olketa main road bae no herem toktok bilong hem”? Taem Jesus healim pipol or raosem olketa demon, hem stopem olketa for “mas no talem eniwan hu nao hem.” (Mark 3:12) Hem no laekem pipol for herem olketa story wea gogo raon abaotem hem wea no stret.

Message wea Jesus talemaot tu hem comfortim pipol wea olsem longfala grass wea bend finis. Olketa olsem wick bilong laet wea no laet gud and wea klosap for dae. Jesus no brekem longfala grass hia wea bend finis, and hem no killim dae datfala laet wea klosap for dae. Bat hem kaen and showimaot love taem hem helpem pipol hia wea safa. Tru tumas, evri didifren kaen pipol savve hope long Jesus!