Jesus stap yet long Jerusalem for datfala big hipap, and hem gohed for teachim pipol olketa tru samting. Samfala Jew long there sei long Jesus: “Mifala olketa pikinini bilong Abraham ia and no enitaem mifala slave bilong man.” Jesus sei: “Mi savve iufala olketa pikinini bilong Abraham, bat iufala laek killim mi dae bikos iufala no laek followim teaching bilong mi. Mi storyim samting wea mi lukim taem mi stap witim Dadi bilong mi, bat iufala duim nomoa samting wea iufala herem from dadi bilong iufala.”—John 8:33, 37, 38.

Samting wea Jesus storyim hem klia: Dadi bilong hem difren from dadi bilong olketa. Bat olketa no minim Jesus, so olketa sei moa: “Abraham nao hem dadi bilong mifala.” (John 8:39; Isaiah 41:8) Long tingting bilong olketa, from olketa kam from laen bilong Abraham, olketa worshipim sem God wea Abraham worshipim.

Bat Jesus tok stret long olketa and sei: “Sapos iufala olketa pikinini bilong Abraham, iufala mas duim sem samting wea hem duim.” Tru tumas, pikinini savve followim wei bilong dadi bilong hem. Jesus sei moa: “Bat iufala laek killim mi dae nomata mi talem iufala tru samting wea mi herem from God. Abraham no duim olsem.” Then Jesus sei long olketa: “Iufala duim sem samting wea dadi bilong iufala hem duim.”—John 8:39-41.

Olketa Jew no minim yet hu nao Jesus story abaotem. So olketa sei: “God nomoa hem Dadi bilong mifala, and mifala nao olketa really pikinini bilong hem.” Bat waswe, datwan hem tru? Jesus sei: “Sapos God nao hem Dadi bilong iufala, bae iufala lovem mi ia, bikos God sendem mi kam and mi stap long hia. Mi no followim tingting bilong miseleva for kam, bat God nao sendem mi kam. Iufala no minim samting wea mi storyim bikos iufala no laek herem toktok bilong mi.”—John 8:41-43.

Jesus trae for helpem olketa luksavve samting wea olketa bae kasem sapos olketa no biliv long hem. Distaem hem tok stret long olketa and sei: “Devil nao dadi bilong iufala and iufala laek for duim samting wea dadi bilong iufala laekem.” Wanem nao fasin bilong dadi bilong olketa? Jesus sei: “Start from taem wea hem laea abaotem God, hem man for killim man dae and hem no gohed followim samting wea tru.” Jesus sei moa: “Man wea hem bilong God hem herem toktok bilong God. Dastawe iufala no lisin, bikos iufala no bilong God.”—John 8:44, 47.

Datwan mekem olketa Jew kros fogud and sei: “Samting wea mifala talem hem barava fitim nao, iu man bilong Samaria and wanfala demon stap long iu.” Taem olketa kolem Jesus “man bilong Samaria,” datwan showimaot olketa les long hem. Bat Jesus sei long olketa: “No eni demon stap long mi ia. Mi mekhae long Dadi bilong mi, bat iufala no respectim mi.” Promis wea Jesus talem showimaot diswan hem serious samting. Hem sei: “Man wea followim teaching bilong mi bae nating savve dae.” Diswan no minim olketa aposol and olketa nara disaepol bae no dae, bat olketa bae no kasem “mek-tu dae.” Man wea kasem mek-tu dae hem dae for olowe and no savve laef bak.—John 8:48-51; Revelation 21:8.

Bat olketa Jew no savve samting wea Jesus storyim hem tokpiksa nomoa, so olketa sei: “Tru nao, demon barava stap long iu stret. Abraham hem dae and olketa profet tu dae, bat iu sei, ‘Man wea followim teaching bilong mi bae nating savve dae.’ Hao, iu winim grani bilong mifala Abraham? Hem dae finis . . . So iu sei iu hu nao ia?”—John 8:52, 53.

Samting wea Jesus talem showimaot klia hem nao datfala Messiah. Hem no ansarem kwestin bilong olketa abaotem hu nao hem, bat hem sei: “Sapos mi mekhae long miseleva, datwan hem iusles nomoa. Dadi bilong mi nao mekhae long mi, wea hem nao iufala sei hem God bilong iufala. Bat iufala no savve long hem. Mi savve long hem and sapos  mi sei mi no savve long hem, mi laea nomoa ia, olsem iufala.”—John 8:54, 55.

Jesus storyim moa example bilong grani bilong olketa wea faithful. Hem sei: “Grani bilong iufala, Abraham, barava luk forward long samting wea mi bae duim. Hem lukim datwan and hem hapi tumas nao.” Abraham bilivim promis bilong God, dastawe hem weitim datfala Messiah for kam. Olketa Jew sei long hem: “Iu no kasem fifti year yet ia, hao nao iu sei iu lukim Abraham?” Jesus sei long olketa: “Mi talem iufala tru samting, bifor Abraham hem born, mi stap finis.” Jesus storyim laef bilong hem bifor long heven taem hem wanfala angel wea garem bigfala paoa.—John 8:56-58.

Olketa Jew kros long Jesus bikos hem sei hem stap finis bifor Abraham, so olketa tekem ston for sutim long hem. Bat Jesus hem go from olketa.