Stretawe bihaen John baptaesim Jesus, spirit bilong God leadim Jesus go long wilderness long Judea. Taem hem baptaes “skae hem open.” (Matthew 3:16) Diswan minim hem savve rememberim samfala samting wea hem lanem and duim long heven. So Jesus garem staka samting for ting raonem!

Jesus stap long wilderness for 40 day and 40 naet and hem no kaikaim eni samting. Long taem hia wea Jesus barava hangre nao Devil traem hem, and sei: “Sapos iu wanfala son bilong God, talem olketa ston hia for kamap bred.” (Matthew 4:3) Jesus savve hem no stret for iusim paoa bilong hem for duim mirakol for kasem samting for hemseleva, so hem no duim datwan.

Devil hem no givap bat hem traem narafala wei moa. Hem mekem Jesus standap long wall bilong temple and talem hem for jamp go daon. Bat Jesus no laek jamp go daon and mekem olketa angel sevem hem. Hem talem toktok from olketa Holy Raeting for showimaot hem no stret for testim God long wei olsem.

Long mek-thri taem wea Devil traem Jesus hem “showim hem evri kantri long world and olketa nambawan samting wea olketa garem,” and sei: “Evri samting hia mi bae givim long iu sapos iu baodaon and worshipim mi distaem.” Long taem hia tu Jesus les for duim wanem Devil hem laekem, and hem sei: “Iu go nao Satan!” (Matthew 4:8-10) Jesus savve finis iumi mas worshipim Jehovah nomoa, so hem no foldaon long datfala test. Hem laek for gohed faithful long God.

Iumi savve lane from wei wea Devil hem traem Jesus and hao Jesus hem deal witim olketa test hia. Devil hem wanfala really man wea iumi no savve lukim, and disfala story showimaot tu Devil nao kontrolem olketa gavman long disfala world. Sapos nomoa, hard tumas for hem iusim olketa samting hia for traem Christ.

Devil sei tu hem willing for givim Jesus evri kantri long world sapos hem baodaon and worshipim hem. Maet Devil switim iumi tu for kasem riches, paoa, or hae position long disfala world. Taem iumi followim example bilong Jesus for gohed faithful long God nomata long wanem kaen test iumi kasem, datwan showimaot iumi garem gudfala tingting! Bat no forget, bihaen Devil hem lusim Jesus, “hem weitim eni chance for hem savve traem hem moa.” (Luke 4:13) Maet hem duim sem samting long iumi, so iumi mas gohed lukaot.