PART 3
Feel Nogud—Taem Iumi “Feel Nogud Long Narawan”
“Wanfala sista long kongregeson accusim mi and sei mi stealim selen bilong hem. Samfala long kongregeson herem diswan and saedem hem. Gogo, datfala sista sei hem faendaot mi no tekem datfala selen. Nomata hem sei sorre, mi feel olsem mi no savve forgivim hem bikos samting wea hem duim barava spoelem mi.”—Linda.
WASWE, iu savve minim feeling bilong Linda? Sorre samting nao, samfala barava feel nogud bikos long samting wea wanfala brata or sista duim, gogo, olketa wikdaon and no gohed for duim olketa spiritual samting. Waswe, hem nao samting wea happen long iu?
Waswe, Eniwan Savve ‘Stopem Iumi for No Kasem Love Bilong God’?
Maet hem no isi for iumi forgivim brata or sista wea mekem iumi feel nogud. Maet iumi tingse datwan shud no happen bikos iumi olketa Christian shud lovem iumi evriwan. (John 13:34, 35) So sapos nara Christian duim nogud samting long iumi, datwan savve mekem iumi barava sorre and feel nogud tumas.—Psalm 55:12.
Bible sei samfala taem olketa Christian bae “feel nogud long narawan.” (Colossae 3:13) Nomata olsem, taem samting olsem kasem iumi, maet hem hard tumas for iumi deal witim datwan. Wanem nao savve helpem iumi? Tingim thrifala Bible principle hia:
Dadi bilong iumi long heven hem lukim evri samting. Jehovah lukim evri samting wea happen. Hem lukim tu taem samting wea no stret hem kasem iumi and wei wea datwan spoelem feeling bilong iumi. (Hebrew 4:13) Taem iumi feel olsem, Jehovah hem sorre long iumi. (Isaiah 63:9) Hem no letem “hard taem or wei for safa,” or eni nara samting, or nara Christian tu, for stopem iumi for no kasem love bilong hem. (Rome 8:35, 38, 39) Sapos olsem, iumi tu mas no letem eni samting or eni man for mekem iumi lusim Jehovah.
Taem iumi forgive, datwan no minim iumi ting nating long samting wea happen. Taem iumi forgivim samwan, datwan no minim iumi mek excuse or ting smol long samting wea hem duim, or sei hem smol samting nomoa. No forget, Jehovah hem heitim sin, bat hem forgivim man wea sin sapos hem fitim. (Psalm 103:12, 13; Habakkuk 1:13) Taem Jehovah askem iumi for forgivim narawan, hem askem iumi for followim example bilong hem. Hem no “feel nogud olowe.”—Psalm 103:9; Matthew 6:14.
Iumi kasem gud samting taem iumi lusim wei for feel nogud. Hao nao olsem? Tingim sapos iu holem and liftim wanfala ston wea hevi bilong hem tu-thri kilo. Maet hem no hard for gohed holem olsem for tu-thri minute nomoa. Bat waswe sapos iu holem for longtaem lelebet? Gogo, bae hand bilong iu wik tumas! Hevi bilong datfala ston bae no change, bat sapos iu gohed for holem, bae hem hevi tumas long iu. Wei for feel nogud hem olsem tu. Taem iumi tingim olowe nogud samting wea samwan duim, nomata sapos hem smol samting nomoa, iumi spoelem iumiseleva. Dastawe Jehovah encouragem iumi for lusim wei for feel nogud, and iumi kasem gud samting taem iumi duim wanem Jehovah askem.—Proverbs 11:17.
Iumi kasem gud samting taem iumi lusim wei for feel nogud
“Mi Feel Olsem Jehovah Story Long Mi”
Wanem nao helpem Linda for lusim wei for feel nogud long datfala sista? Hem ting raonem wanem Bible sei abaotem why iumi shud forgivim narawan. (Psalm 130:3, 4) Hem savve sapos iumi forgivim narawan Jehovah bae forgivim iumi tu, and datwan nao barava helpem hem. (Ephesus 4:32–5:2) Hem sei: “Mi feel olsem Jehovah story long mi.”
Gogo, Linda lusim wei for feel nogud. Hem forgivim datfala sista, and distaem tufala barava gud fren. Linda hem gohed moa for worshipim Jehovah. Jehovah laek for helpem iu for duim sem samting tu.
