WEI for feel guilty savve barava spoelem man. King David hem sei: “Olketa mistek bilong mi mekem mi feel nogud tumas. Hem olsem samting wea hevi tumas for mi karem.” (Psalm 38:4) Samfala Christian wea wikdaon from olketa sorre tumas tingse Jehovah no savve forgivim olketa. (2 Corinth 2:7) Waswe, hem stret for garem tingting olsem? Sapos iu duim bigfala sin, waswe, datwan minim iu barava farawe from Jehovah and bae hem no forgivim iu nao? Nomoa!

Jehovah hem tingim olketa wea repent. Hem duim samting for helpem olketa. Long tokpiksa abaotem datfala olobaot son, Jesus sei Jehovah hem olsem datfala dadi wea son bilong hem go from famili and duim olketa barava rabis samting. Gogo, datfala son hem disaed for kam bak long haos. “Taem hem lelebet farawe yet, dadi bilong hem lukim hem and barava sorre long hem. Hem ran go long hem, and hem holem and kissim hem.” (Luke 15:11-20) Waswe, iu laek for kam bak long Jehovah bat iu feel olsem iu “farawe yet” from hem? Jehovah hem olsem datfala dadi long tokpiksa bilong Jesus. Hem lovem and sorre long iu. Hem weitim iu nomoa for iu kam bak long hem.

Bat waswe sapos iu tingse hard for Jehovah forgivim iu bikos sin wea iu duim hem big tumas or hem staka tumas? Plis tingim invitation bilong Jehovah long Isaiah 1:18. Hem sei: “Kam distaem, and iumi stretem evri samting midolwan long iumi. Nomata olketa sin bilong iufala hem barava red, olketa bae kamap white olsem snow.” So nomata olketa sin wea iumi tingse hem big tumas wea olsem red mark long white kaleko wea no savve aot, Jehovah savve forgivim tu.

Jehovah no laekem iu for gohed feel guilty. So wanem nao iu savve duim mekem iu kasem forgiveness and for iu garem gudfala konsens moa? Tingim tufala samting wea King David duim. First samting, hem sei: “Mi bae talemaot rong bilong mi long Jehovah.” (Psalm 32:5) No forget, Jehovah invaetem iu finis for prea long hem and “stretem evri samting” witim hem. Duim datwan. Talemaot olketa sin bilong iu long Jehovah, and talemaot feeling bilong iu long hem tu. David duim datwan dastawe hem savve prea olsem: “Plis mekem mi klin from olketa sin bilong mi. . . . Iu no rejectim man wea barava feel nogud and heart bilong hem brek.”—Psalm 51:2, 17.

Mek-tu samting, David kasem help from Nathan, wea hem profet bilong God. (2 Samuel 12:13) Distaem Jehovah iusim olketa elder long kongregeson wea kasem training for helpem olketa wea sin and repent for fren bak witim  Jehovah. Taem iu go story witim olketa elder, olketa bae iusim Bible and prea witim iu for strongim iu, helpem iu for no ting daonem iuseleva, and helpem iu for kamap strong moa long spiritual wei.—James 5:14-16.

Maet iu feel olsem hem hard samting for iu talemaot olketa sin bilong iu long Jehovah God and for iu go story witim olketa elder. Luk olsem David feel olsem tu. For longtaem lelebet hem “stap kwaet” and no talemaot olketa sin bilong hem. (Psalm 32:3) Bat bihaen, David tinghae long gud samting wea hem kasem taem hem talemaot olketa sin bilong hem and duim moa stretfala samting.

Gud samting wea David kasem nao hem hapi moa. Hem sei: “Man wea God forgivim sin bilong hem and samting wea hem duim wea no stret, bae hapi.” (Psalm 32:1) Hem prea olsem tu: “Plis Jehovah, letem mi for toktok mekem mi savve praisem iu.” (Psalm 51:15) From David tinghae long wei wea God forgivim hem and hem kasem bak gudfala konsens, hem laekem tumas for story abaotem Jehovah long nara pipol.

Jehovah laekem iu for garem gudfala konsens. And tu, hem laekem iu for hapi and feel free for story long nara pipol abaotem hem and plan bilong hem. (Psalm 65:1-4) No forget, Jehovah laekem iu for kam long hem mekem hem savve “forgivim olketa sin bilong [iu]” and “strongim” iu.—Acts 3:19.

Hem nao samting wea happen long Martha. Hem sei: “Son bilong mi evritaem sendem olketa Wastaoa and Awake! magasin long mi. Isisi mi start for lane moa abaotem Jehovah. Taem mi laek kam bak, samting wea hard tumas for mi duim nao hem for mi askem Jehovah for forgivim mi for olketa sin bilong mi. Bat gogo, mi prea long God and askem hem for forgivim mi. Mi sorre nao mi weit for 40 year bifor mi just kam bak long Jehovah. Samting wea happen long mi showimaot nomata samwan lusim Jehovah for staka year, hem savve worshipim Jehovah moa and kasem love bilong hem.”