EVRIWAN savve wari samfala taem, and pipol bilong God savve olsem tu. Man wea raetem psalm hem sei: “Plande samting mekem mi wari tumas.” (Psalm 94:19) And Jesus sei long olketa last day “wei for wari abaotem olketa samting wea [iumi] needim” savve mekem hem no isi for gohed worshipim Jehovah. (Luke 21:34) Waswe long iu? Waswe, famili problem, sik, or selen, mekem iu wari tumas? Wanem nao Jehovah savve duim for helpem iu deal witim olketa samting hia?

Iumi needim help for deal witim olketa samting wea mekem iumi wari. Aposol Paul sei: “Staka hard taem kasem mifala.” Hem sei tu: “Mifala konfius” and “mifala sorre.” Nomata olsem, hem sei “datwan no stopem mifala” and “mifala gohed nomoa.” Wanem nao helpem iumi for no givap? Iumi kasem “strong wea winim strong bilong man,” wea hem nao paoa wea iumi kasem from olmaeti God bilong iumi, Jehovah.—2 Corinth 4:7-9.

Ting go bak long olketa taem wea iu kasem “strong wea winim strong bilong man.” Waswe, wanfala tok helpem iu for barava minim gud love wea Jehovah garem for iu? Waswe, taem iu teachim narawan abaotem Paradaes datwan strongim faith bilong iu long olketa promis bilong Jehovah? Taem iumi go long olketa meeting and talemaot gud nius, iumi kasem strong for no givap long olketa hard taem. Datwan helpem iumi tu for no wari tumas mekem iumi savve gohed hapi taem iumi worshipim Jehovah.

Maet iu feel olsem iu no garem staka taem and strong for duim evri samting wea iu mas duim. Olsem example, Jehovah laekem iumi for mek sure Kingdom hem first samting long laef bilong iumi and for iumi duim olketa spiritual samting evritaem. (Matthew 6:33; Luke 13:24) Bat waswe sapos iu no fit for duim staka samting bikos pipol againstim iu, iu sik, or iu garem famili problem? Or waswe sapos waka bilong iu for selen mekem iu taed and spoelem taem wea iu shud iusim for go long olketa meeting and duim preaching waka? From iu no garem taem and strong for duim evri samting wea iu mas duim, maet datwan mekem iu wikdaon. Maet iu tingse Jehovah askem tumas samting from iu.

Jehovah hem minim iumi. Hem no savve askem iumi for duim samting wea iumi no fit for duim. And hem luksavve hem tek taem for iumi kamap gud moa bihaen iumi kasem hard taem wea affectim tingting and health bilong iumi.—Psalm 103:13, 14.

Olsem example, tingim wanem Jehovah duim for lukaftarem profet Elijah. Taem Elijah ranawe long wilderness from hem barava wikdaon and fraet, waswe, Jehovah tok strong long hem and talem hem for go bak long assignment bilong hem? Nomoa. Jehovah sendem angel long hem tufala  taem for wekapem hem and for givim kaikai long hem. Nomata olsem, bihaen 40 day, Elijah hem wari and fraet yet. Wanem moa Jehovah duim for helpem hem? First samting, Jehovah showimaot hem savve protectim hem. Mek-tu samting, Jehovah comfortim Elijah taem hem story long hem long kaenfala wei. Gogo, Jehovah helpem Elijah for luksavve staka thousand narawan tu faithful and gohed worshipim God. No longtaem bihaen, Elijah hem wanfala strong profet moa. (1 Kings 19:1-19) Wanem nao iumi lanem? Taem Elijah hem wikdaon, Jehovah patient and kaen long hem. Jehovah hem no change. Hem bae lukaftarem iumi long sem wei tu.

Taem iu ting raonem wanem iu savve duim for Jehovah, iu mas luksavve long wanem iu fit for duim. Iu mas no comparem wanem iu savve duim distaem witim wanem iu fit for duim bifor. Olsem example, tingim wanfala man wea savve ranran wea stop for duim datwan for samfala month or year. Then hem start for ranran moa. Hard tumas for hem stretawe ran moa olsem bifor. Firstaem hem markem olketa smol goal wea bae helpem hem for strong moa and no givap. Olketa Christian olsem man wea ranran, and olketa garem goal tu. (1 Corinth 9:24-27) Hem gud for iu markem goal wea iu fit for kasem. Olsem example, maet iu markem goal for go long wanfala meeting. Askem Jehovah for helpem iu kasem datfala goal. Taem iu kamap strong moa long spiritual wei, bae iu “lukim wei wea [Jehovah] hem gud tumas.” (Psalm 34:8) And no forget, Jehovah barava tinghae long eni samting wea iu duim for showimaot iu lovem hem, nomata maet hem smol samting nomoa.—Luke 21:1-4.

Hao nao Jehovah strongim June for kam bak long hem? June sei: “Mi gohed prea long Jehovah and askem hem for helpem mi. Then dota-in-law bilong mi talem mi wanfala assembly bae kamap long taon wea mi stap. Mi disaed for go long wanfala day nomoa. Mi barava hapi tumas for stap moa witim pipol bilong Jehovah! Mi kasem encouragement wea mi barava needim from datfala assembly. Mi barava hapi for worshipim Jehovah moa distaem, and laef bilong mi garem mining. Distaem mi luksavve mi needim olketa brata and sista and mi mas acceptim help bilong olketa. Mi hapi tumas hem no tu leit for mi kam bak.”