1, 2. (a) Wanem nao maet pipol ting hem hard for duim, bat wanem nao Bible talem long iumi abaotem datwan? (b) Wanem kaen wei for fren witim God nao Abraham hem garem and why nao olsem?

 HAO nao bae iu feel sapos Creator bilong heven and earth sei abaotem iu, “Diswan hem fren bilong mi”? Planti pipol maet ting datwan bae hem hard for happen. Bikos, hao nao wanfala man savve fren witim Jehovah God? Nomata olsem, Bible talem klia dat iumi savve really kam klos long God.

² Abraham wea laef bifor hem wanfala man wea klos long God. Jehovah kolem hem “fren bilong mi.” (Isaiah 41:8) Tru nao, Jehovah ting long Abraham olsem wanfala klos fren. Abraham garem wei for fren olsem bikos hem “showimaot faith long Jehovah.” (James 2:23) Distaem tu Jehovah luk aotem olketa chance for “kam klos” long pipol wea servem hem and for showimaot hem lovem olketa. (Deuteronomy 10:15) Word bilong hem sei: “Kam klos long God, and hem bae kam klos long iufala.” (James 4:8) Toktok hia invaetem man and tu hem wanfala promis.

3. Wanem nao Jehovah invaetem iumi for duim, and wanem promis nao join witim datwan?

³ Jehovah invaetem iumi for kam klos long hem. Hem redy and willing for acceptim iumi olsem fren bilong hem. Long semtaem hem promis sapos iumi duim samting for kam klos long hem, hem bae duim sem samting tu. Hem bae kam klos long iumi. Then bae iumi kam insaed long wanfala barava spesol samting​—“klos wei for fren witim Jehovah.” (Psalm 25:14) “Klos wei for fren” hem minim wei for story private witim wanfala spesol fren.

4. Wanfala klos fren hem wanem kaen person, and hao nao Jehovah fren long wei olsem long olketa wea kam klos long hem?

⁴ Waswe, iu garem wanfala klos fren wea iu savve storyim evri  tingting bilong iu long hem? Fren olsem mas wan wea kea for iu. Iu trustim hem, bikos hem loyal long iu. Hapi bilong iu kamap moa big taem iu sharem datfala hapi witim hem. Kaenfala wei wea hem lisin long iu helpem iu karem olketa hevi wea mekem iu sorre. Nomata sapos no eniwan minim iu, hem nao minim iu. Olsem tu, taem iu kam klos long God, iu garem wanfala spesol Fren wea really tingim iu, barava kea for iu, and minim iu evribit. (Psalm 103:14; 1 Peter 5:7) From iu savve hem loyal long olketa wea loyal long hem, diswan mekem iu trustim hem and iu savve talemaot deep feeling bilong iu long hem. (Psalm 18:25) Bat, iumi savve kasem disfala wei for fren witim God only bikos hem nao openem wei for duim datwan.

5. Wanem nao Jehovah duim wea openem wei for iumi kam klos long hem?

⁵ Sapos iumi no kasem help, iumi kanduit for kam klos long God bikos iumi man wea sin. (Psalm 5:4) Aposol Paul hem raet olsem: “Bat Christ hem dae for iumi taem iumi sin yet, wea diswan showimaot God hem lovem iumi.” (Romans 5:8) Tru nao, Jehovah arrange for Jesus “givim laef bilong hem, wea datwan hem price for baem bak staka pipol.” (Matthew 20:28) Faith bilong iumi long datfala ransom sakrifaes mekem iumi fit for kam klos long God. From God “lovem iumi firstaem,” hem nao putim faondeson for openem wei for iumi fren witim hem.​—1 John 4:19.

6, 7. (a) Hao nao iumi savve Jehovah hem no God wea haed and man no fit for savve long hem? (b) Hao nao Jehovah showim hemseleva?

⁶ Jehovah duim nara samting tu: Hem showimaot hemseleva long iumi. Taem iu fren witim samwan, wei for feel klos hem kamap taem iu savve gud long hem, and tinghae long olketa fasin and wei bilong hem. So sapos Jehovah hem wanfala God wea haed and no eniwan fit for savve long hem, iumi bae nating savve kam klos long hem. Bat bikos hem laekem iumi for savve long hem, hem no haedem hemseleva. (Isaiah 45:19)  Nara samting tu, evriwan nao fit for savve long hem, nomata pipol wea world ting long olketa olsem man nating.​—Matthew 11:25.

⁷ Hao nao Jehovah showim hemseleva long iumi? Olketa samting wea hem creatim showimaot samfala difren part long fasin bilong hem—hao big nao paoa bilong hem, hao deep nao wisdom bilong hem, and barava bigfala love bilong hem. (Romans 1:20) Bat Jehovah no showim hemseleva thru long samting wea hem creatim nomoa. From hem Nambawan Man for Story, hem provaedem Word bilong hem Bible for showim hemseleva long iumi.

8. Why nao iumi savve sei Bible pruvim Jehovah hem lovem iumi?

⁸ Bible seleva pruvim dat Jehovah lovem iumi. Insaed Word bilong hem, hem showim hemseleva long wei wea iumi savve minim—wea pruvim hem lovem iumi and laekem iumi for savve and lovem hem tu. Insaed disfala spesol buk iumi savve readim samting wea mekem iumi fit for lukim hao for iumi kam klos long hem. (Psalm 1:1-3) Iumi bae storyim samfala wei wea Jehovah showim hemseleva insaed long Word bilong hem wea bae muvim heart bilong iumi.

9. Wanem nao samfala example bilong toktok insaed Bible wea showimaot olketa fasin bilong God?

⁹ Bible garem planti toktok wea showimaot klia olketa fasin bilong God. Samfala example nao olsem. “Jehovah hem lovem justice.” (Psalm 37:28) God hem “garem bigfala paoa.” (Job 37:23) “‘Mi loyal,’ hem nao toktok bilong Jehovah.” (Jeremiah 3:12) “Heart bilong hem wise.” (Job 9:4) Hem “God wea garem bigfala mercy, hem tingim man, hem no savve kros kwiktaem, loyal love bilong hem big tumas, hem talem tru samting evritaem.” (Exodus 34:6) “Iu, O Jehovah, nao gud and redy for forgive.” (Psalm 86:5) And olsem iumi storyim long first chapter, wanfala fasin nao main wan: “God hem love.” (1 John 4:8) Taem iu ting raonem olketa naes fasin hia,  waswe, iu feel klos long disfala God wea winim evri narawan?

10, 11. (a) For helpem iumi lukim klia fasin bilong hem, wanem nao Jehovah putim insaed long Word bilong hem? (b) Wanem Bible example nao helpem iumi for piksarem wei wea God iusim paoa bilong hem?

¹⁰ Bible no just talem iumi wanem nao olketa fasin bilong Jehovah, bat tu hem showim olketa example long hao olketa fasin hia hem insaed wanem hem duim. Olketa hia helpem iumi for lukim klia olketa difren saed long fasin bilong hem. Then datwan helpem iumi for kam klos long hem. Tingim wanfala example.

¹¹ Iumi savve readim hao God hem “iusim bigfala paoa.” (Isaiah 40:26) Bat hem difren taem iumi readim hao hem sevem Israel thru long Red Sea and then lukaftarem datfala nation insaed wilderness for 40 year. Piksarem long mind bilong iu, hao datfala big wata hem divaed long haf. Iu savve piksarem datfala nation​—maet 3,000,000 pipol—wakabaot long datfala drae graon wea hem botom bilong datfala sea, olketa wata hia standap tufala saed olsem barava haefala wall. (Exodus 14:21; 15:8) Iu savve lukim pruv hao God protectim and kea long olketa taem olketa insaed long wilderness. Wata hem ran kamaot from ston. Kaikai wea olsem white seed foldaon long graon. (Exodus 16:31; Numbers 20:11) Evri samting hia showimaot no just paoa bilong Jehovah bat hao hem iusim datwan for pipol bilong hem. Iumi barava kasem comfort taem iumi savve iumi garem wanfala strongfala God olsem wea herem prea bilong iumi, wea hem “wanfala ples for haed and wea hem strongim iumi, wanfala help wea isi for faendem long taem bilong trabol.”​—Psalm 46:1.

12. Long wanem wei nao Jehovah helpem iumi for “lukim” hem taem hem iusim toktok wea iumi savve minim?

 ¹² For helpem iumi savve Jehovah hem wanfala Spirit, hem duim samfala samting moa. From iumi olketa man, iumi savve lukim nomoa olketa physical samting and no savve luk go insaed long world bilong olketa spirit. Sapos God story abaotem hemseleva long iumi long wei wea fitim olketa angel, diswan bae olsem wei for iu trae explainim lukluk bilong iu, saed long hair kala or kaen skin iu garem, long samwan wea blind from taem hem born. Bat, for helpem iumi “lukim” Hem, Jehovah kaen tumas for iusim toktok wea iumi savve minim. Samfala taem hem iusim tokpiksa, taem hem sei hem olsem olketa samting wea iumi savve long hem. Hem story abaotem hemseleva olsem wanfala man tu. a

13. Wanem piksa nao kam long mind bilong iu taem iu readim Isaiah 40:11, and hao nao diswan affectim iu?

¹³ Lukim wei wea Isaiah 40:11 story abaotem Jehovah: “Olsem wanfala shepherd hem bae lukaftarem olketa sheep bilong hem. Hem bae hipimap olketa pikinini sheep long hand bilong hem; and hem bae karem olketa klosap long heart bilong hem.” Disfala scripture storyim Jehovah olsem wanfala shepherd wea liftimap pikinini sheep “long hand bilong hem.” Diswan hem piksarem wei wea God protectim and saportim pipol bilong hem, insaed diswan hem olketa wea wik tu. Iumi savve feel sef long strongfala hand bilong hem, bikos sapos iumi loyal long hem, bae hem nating lusim iumi. (Romans 8:38, 39) Datfala Nambawan Shepherd karem olketa pikinini sheep “klosap long heart bilong hem”—toktok wea minim ples wea shepherd hem karem niu born baby sheep insaed kaleko bilong hem. So iumi sure hao Jehovah lovem and keepim iumi gud. Dastawe iumi want for klos long hem.

14. Why nao iumi savve sei Jesus nomoa savve showimaot Jehovah long wei wea klia winim eni nara wei?

¹⁴ Insaed Bible, Jehovah givim iumi wei for lukim hem long wei wea moa klia thru long Son bilong hem, Jesus. Jesus nomoa man wea savve showimaot and explainim tingting and feeling bilong God. Datwan hem fitim, bikos datfala firstborn Son stap witim Dadi bilong hem bifor tufala creatim olketa nara angel and universe wea iumi lukim. (Colossians 1:15) Jesus hem fren long barava klos wei witim Jehovah. Dastawe hem fit for sei olsem: “No eniwan savve hu nao Son bat Dadi nomoa; and no eniwan savve hu nao Dadi, bat Son nomoa, and datwan wea Son hem willing for showim datfala Dadi long hem.” (Luke 10:22) Taem Jesus stap long earth, hem showimaot Dadi bilong hem long tufala important wei.

15, 16. Wanem nao tufala wei wea Jesus showimaot Dadi bilong hem?

¹⁵ First wei, olketa teaching bilong Jesus helpem iumi for savve long Dadi bilong hem. Jesus story abaotem Jehovah long wei wea muvim heart bilong iumi. Olsem example, for explainim  hao hem God wea garem mercy wea welkamim olketa sinner wea repent, Jesus sei Jehovah hem datkaen dadi wea forgive and taem hem lukim olabaot son kam bak, deep feeling muvim hem for ran and holem hem and kissim hem. (Luke 15:11-24) Jesus talem tu hao Jehovah hem God wea “leadim” pipol wea garem stretfala heart for kam long hem bikos hem lovem olketa wanwan. (John 6:44) Hem savve tu taem wanfala smol sparrow foldaon long graon. Jesus sei, “No fraet, bikos iufala barava important winim evri smol bird hia.” (Matthew 10:29, 31) Iumi barava laek for klos long God olsem wea barava kea.

¹⁶ Mek-tu wei, example bilong Jesus showim iumi wanem nao fasin bilong Jehovah. Jesus showimaot Dadi bilong hem long barava perfect wei dastawe hem fit for sei: “Man wea lukim mi hem lukim Dadi tu.” (John 14:9) So, taem iumi readim olketa Gospel abaotem Jesus​—olketa feeling wea hem showimaot and wei wea hem deal witim pipol—​hem olsem iumi really lukim wanfala laef piksa bilong Dadi bilong hem. No eni nara wei moa hem klia olsem disfala wei wea Jehovah iusim for showimaot olketa fasin bilong hem. Why nao olsem?

17. Storyim example wea showimaot samting wea Jehovah duim for helpem iumi minim wanem kaen man nao hem.

¹⁷ Olsem example: Sapos iu trae for explainim kaenfala fasin. Maet iu iusim samfala word for explainim. Bat sapos iu savve point go long samwan wea duim wanfala kaenfala samting and sei, “Datwan nao example bilong kaenfala fasin,” datfala word “kaenfala fasin” hem kasem moa mining and isi for man minim. Jehovah duim sem samting for helpem iumi minim wanem kaen man nao hem. Witim wei wea hem story abaotem hemseleva, hem point go long living bilong Son bilong hem olsem example. Thru long Jesus, iumi lukim hao olketa fasin bilong God showaot long living. Insaed olketa Gospel wea story abaotem Jesus, hem olsem Jehovah hem sei: “Hem nao wei bilong mi.” Hao nao Bible story abaotem Jesus taem hem stap long earth?

18. Hao nao Jesus showimaot olketa fasin olsem paoa, justice, and wisdom?

 ¹⁸ Jesus showimaot long nambawan wei fofala main fasin bilong God. Hem garem paoa ovarem sik, hangre, and dae tu. Nomata olsem, hem nating iusim paoa for duim mirakol for hemseleva or for spoelem nara pipol. Diswan difren tumas from olketa selfish man wea iusim paoa long rong wei. (Matthew 4:2-4) Hem lovem justice. Heart bilong hem fulap witim raeteous wei for kros taem hem lukim olketa raverave bisnisman spoelem olketa pipol. (Matthew 21:12, 13) Hem no teksaed againstim pipol wea poor and wea nara pipol spoelem, bat hem helpem olketa for “strongim” olketa. (Matthew 11:4, 5, 28-30) Olketa teaching bilong Jesus, wea “winim Solomon,” showimaot hem garem barava bigfala wisdom. (Matthew 12:42) Bat no enitaem Jesus show-off witim wisdom bilong hem. Toktok bilong hem kasem heart bilong olketa man nating bikos olketa teaching bilong hem klia, simpol, and fitim for man followim.

19, 20. (a) Hao nao Jesus hem nambawan example bilong love? (b) Taem iumi readim and ting raonem example bilong Jesus, wanem nao iumi mas tingim evritaem?

¹⁹ Jesus hem nambawan example bilong love. Insaed ministry bilong hem, hem showimaot planti difren saed bilong love, insaed diswan hem wei for tingim feeling bilong narawan and fasin for kea long pipol. Taem hem lukim nara pipol safa hem sorre tumas. Evritaem datfala wei for luksavve long need bilong pipol muvim hem for duim samting. (Matthew 14:14) Nomata hem healim olketa wea sik and feedim olketa wea hangre, Jesus showimaot fasin for kea long wei wea moa important. Hem helpem nara pipol for savve, acceptim, and lovem truth abaotem Kingdom bilong God wea bae helpem olketa man for olowe. (Mark 6:34; Luke 4:43) Winim evri samting, Jesus showimaot love wea willing for sakrifaesim seleva taem hem givim laef bilong hem for nara pipol.​—John 15:13.

²⁰ Dastawe iumi nating sapraes taem pipol wea garem difren  age and living olketa laekem tumas disfala man wea garem love and deep feeling for pipol. (Mark 10:13-16) Bat, taem iumi read abaotem and ting raonem example bilong Jesus, iumi mas tingim evritaem hao thru long Son iumi lukim klia Dadi bilong hem.​—Hebrews 1:3.

21, 22. Wanem nao insaed long wei for luk aotem Jehovah, and wanem nao disfala study buk garem wea helpem iumi long diswan?

²¹ From Jehovah showim hemseleva klia insaed Word bilong hem, iumi no daotem hao hem laekem iumi for klos long hem. Long semtaem, hem no forcem iumi for fren witim hem. Iumi nao garem responsibility for luk aotem Jehovah ‘taem iumi savve faendem hem.’ (Isaiah 55:6) Insaed long wei for luk aotem Jehovah hem wei for savve long olketa fasin and wei bilong hem long wei wea Bible showimaot. Olketa wakem disfala study buk for helpem iu duim diswan.

²² Iu bae lukim hao disfala buk hem divaed long fofala sekson wea join witim fofala main fasin bilong Jehovah: paoa, justice, wisdom, and love. Each sekson hem start witim olketa main point bilong datfala fasin. Olketa chapter bihaen storyim hao Jehovah showimaot datfala fasin long olketa difren wei. Each sekson storyim example wea Jesus givim saed long  datfala fasin, and wanfala chapter storyim tu hao iumi savve showim datfala fasin long laef bilong iumi.

23, 24. (a) Explainim datfala spesol box “Olketa Kwestin for Ting Raonem.” (b) Hao nao wei for ting raonem samting hem helpem iumi for kam moa klos long God?

²³ Start long disfala chapter, wanfala spesol box garem title “Olketa Kwestin for Ting Raonem.” Olsem example, lukim  box long page 24. Olketa scripture and kwestin olketa no for reviewim disfala chapter. Bat, diswan hem for helpem iu ting raonem olketa nara important part bilong disfala subject. Hao nao iu savve iusim gud disfala sekson? Lukim olketa scripture hia and readim gud olketa verse. Then lukim kwestin wea stap witim each scripture. Ting raonem olketa ansa. Maet iu duim research. Askem iuseleva samfala moa kwestin: ‘Wanem nao disfala information talem mi abaotem Jehovah? Hao nao hem affectim laef bilong mi? Hao nao mi savve iusim for helpem nara pipol?’

²⁴ Kaen wei for ting raonem samting savve mekem iumi kam moa klos long Jehovah. Hao nao olsem? Bible joinim wei for ting raonem samting witim heart. (Psalm 19:14) Taem iumi ting raonem samting wea iumi lanem abaotem God witim wei for sei thankiu from heart, datfala information hem go insaed long tokpiksa heart bilong iumi, wea hem affectim tingting, apim feeling, and muvim iumi for duim samting. Love bilong iumi for God kamap moa deep, and datfala love muvim iumi for want for mekem hem hapi olsem barava klos Fren bilong iumi. (1 John 5:3) For fren long klos wei olsem, iumi mas savve long olketa fasin and wei bilong Jehovah. Bat firstaem, iumi storyim wanfala saed long fasin bilong Jehovah wea hem barava gudfala reason for kam klos long hem​—holy fasin bilong hem.