1, 2. Olketa Israelite stap long wanem danger taem olketa go insaed long area bilong Sinai long 1513 B.C.E., and hao nao Jehovah comfortim olketa?

 OLKETA Israelite stap long danger taem olketa go insaed area bilong Sinai long start bilong 1513 B.C.E. Wanfala bigfala wakabaot hem stap front long olketa, hem wanfala gogo thru long “bigfala wilderness wea danger and wea fulap witim olketa poison snek and scorpion.” (Deuteronomy 8:15, The New English Bible) Olketa feisim danger tu from olketa nation wea no laekem olketa. Jehovah nao tekem kam pipol bilong hem for feisim evri samting hia. From hem God bilong olketa, waswe, bae hem savve protectim olketa?

² Toktok bilong Jehovah barava givim comfort: “Iufala seleva lukim samting wea mi duim long olketa Egyptian. And hao mi tekem iufala kam long mi olsem eagle wea karem pikinini bilong hem long tufala wing bilong hem.” (Exodus 19:4) Jehovah remindim pipol bilong hem hao hem sevem olketa from pipol bilong Egypt, hem olsem hem iusim olketa eagle for karem olketa go long sef ples. Bat olketa nara reason stap why ‘olketa wing bilong eagle’ hem tokpiksa wea fitim wei wea God givim protection.

3. Why nao ‘olketa wing bilong eagle’ hem tokpiksa wea barava fitim protection from God?

³ Eagle hem no iusim big and strongfala wing bilong hem for flae hae nomoa. Long midol day, mami eagle bae putim aot wing bilong hem—wea maet long olsem 2 meter—for olsem wanfala ambrela, wea protectim olketa pikinini bilong hem from hot sun. Samfala taem hem iusim wing bilong hem for haedem olketa pikinini from cold wind. Long sem wei wea eagle hem protectim olketa pikinini bilong hem, Jehovah tu haedem and protectim datfala young nation bilong Israel. Taem olketa insaed wilderness, pipol bilong hem bae go ahed  for faendem sef ples andanit long shadow bilong strongfala wing bilong hem sapos olketa go ahed for stap faithful. (Deuteronomy 32:9-11; Psalm 36:7) Bat waswe, hem stret for iumi distaem expectim God for protectim iumi?

4, 5. Why nao iumi trustim evribit promis bilong God for protectim iumi?

⁴ Jehovah barava fit for protectim olketa servant bilong hem. Hem nao “God Olmaeti”—wanfala title wea showimaot no eniwan savve stopem paoa bilong hem. (Genesis 17:1) Olsem wei wea no eni samting savve stopem hae taed or low taed, no eni samting savve stopem wei wea Jehovah iusim paoa bilong hem. From hem savve duim eni samting wea followim will bilong hem, iumi savve ask, ‘Waswe, hem will bilong Jehovah for iusim paoa bilong hem for protectim pipol bilong hem?’

⁵ Ansa hem, yes! Jehovah promisim iumi bae hem protectim pipol bilong hem. Psalm 46:1 sei: “God hem sef ples bilong iumi and strong bilong iumi, help wea isi for faendem long taem bilong trabol.” Bikos God “no savve laea,” iumi savve trustim evribit promis bilong hem for protectim iumi. (Titus 1:2) Iumi lukluk long samfala klia tokpiksa wea Jehovah iusim for storyim wei wea hem protectim pipol bilong hem.

6, 7. (a) Shepherd wea Bible storyim protectim sheep bilong hem long wanem wei? (b) Hao nao Bible storyim feeling bilong Jehovah for protectim and lukaftarem sheep bilong hem?

⁶ Jehovah hem Shepherd bilong iumi, and “iumi pipol bilong hem and sheep long land bilong hem.” (Psalm 23:1; 100:3) Sheep no savve lukaftarem olketa seleva. Shepherd wea Bible story abaotem mas no fraet for protectim sheep bilong hem from olketa lion, wolf, and bear, and tu from pipol for steal. (1 Samuel 17:34, 35; John 10:12, 13) Bat, samfala taem wei for protectim olketa sheep hia minim for kaen and isisi. Taem wanfala sheep bornem pikinini farawe from ples wea flock hem stap, loving shepherd bae helpem datfala mami sheep and then pikimap pikinini sheep and karem go long flock.

 ⁷ Taem Jehovah sei hem olsem shepherd, Hem talem wei wea hem garem strongfala feeling for protectim iumi. (Ezekiel 34:11-16) Tingim toktok bilong Jehovah wea stap long Isaiah 40:11, wea iumi storyim finis long Chapter 2 bilong disfala buk: “Olsem wanfala shepherd hem bae lukaftarem olketa sheep bilong hem. Hem bae hipimap olketa pikinini sheep long hand bilong hem; and hem bae karem olketa klosap long heart bilong hem.” Hao nao baby sheep stap “klosap long heart” bilong datfala shepherd—long kaleko bilong hem? Datfala pikinini sheep maet go long shepherd, and lelebet tasim leg bilong hem. Nomata olsem, datfala shepherd nao mas bendaon, pikimap datfala pikinini sheep, and putim klosap long heart bilong hem. Datwan hem piksarem loving wei wea Nambawan Shepherd bilong iumi hem willing for protectim iumi!

8. (a) God hem promis for protectim hu, and hao nao Proverbs 18:10 hem showimaot diswan? (b) Wanem nao insaed long wei for faendem sef ples long nem bilong God?

⁸ Promis bilong God for givim protection hem depend long wanfala samting—only olketa wea kam klos long hem savve kasem datwan. Proverbs 18:10 hem sei: “Nem bilong Jehovah hem nao strongfala taoa. Man wea raeteous ran go long diswan and kasem protection.” Long taem bilong Bible, samtaem pipol buildim olketa taoa long wilderness olsem sef ples for haed. Bat hem depend long man wea stap long danger for ranawe go long taoa olsem for stap sef. Hem semsem tu saed long wei for stap sef long nem bilong God. Moa samting hem insaed long diswan winim wei for talem nomoa nem bilong God; datfala nem nomoa hem no garem magic paoa. Bat, iumi need for savve and trustim Datwan wea garem datfala nem and garem living wea followim olketa raeteous mark bilong hem. Jehovah hem kaen tumas for promisim iumi hao sapos iumi garem faith long hem, bae hem kamap wanfala taoa for protectim iumi!

9. Hao nao Jehovah duim moa samting winim wei for promis for protectim man?

⁹ Jehovah hem duim moa samting winim wei for promis for  protectim iumi. Long taem wea Bible storyim, hem showimaot long mirakol wei hao hem fit for protectim pipol bilong hem. Long history bilong Israel, maeti “hand” bilong Jehovah hem planti taem blokem olketa strongfala enemy. (Exodus 7:4) Nomata olsem, Jehovah iusim tu paoa bilong hem for protectim man wanwan.

10, 11. Wanem nao olketa Bible example wea showimaot wei wea Jehovah iusim paoa bilong hem for protectim man wanwan?

¹⁰ Taem thrifala young Hebrew​—Shadrach, Meshach, and Abednego​—no want for baodaon long gold image wea King Nebuchadnezzar wakem, datfala king wea kros fogud hem sei bae hem torowem olketa insaed long wanfala fire wea hot fogud. Nebuchadnezzar, king wea strong winim evri narawan long earth sei olsem for spoelem olketa: “Hu nao datfala god wea savve sevem iufala from hand bilong mi?” (Daniel 3:15) Thrifala young man hia trustim evribit paoa bilong God bilong olketa for protectim olketa, bat olketa no expectim hem for duim olsem. Dastawe olketa ansa olsem: “Sapos hem disaed for duim, God bilong mifala wea mifala servem hem fit for sevem mifala.” (Daniel 3:17) Tru nao, datfala barava hot fire, nomata taem olketa hotem sevenfala taem moa hot, hem samting nating long God bilong olketa wea garem bigfala paoa. Hem protectim olketa, and datfala king mas sei: “No eni god hem stap wea fit for sevem man olsem diswan.”​—Daniel 3:29.

¹¹ Jehovah showimaot tu long spesol wei paoa wea hem garem for protectim samting taem hem putim laef bilong only-born Son bilong hem go insaed long bele bilong datfala young Jew girl, Mary. Wanfala angel talem Mary hao hem bae “babule and bornem wanfala baby boy.” Datfala angel sei: “Holy spirit bae kam long iu and paoa bilong Barava Haefala God bae protectim iu.” (Luke 1:31, 35) Luk olsem diswan nao hem firstaem wea laef bilong Son bilong hem barava stap long danger. Waswe, sin and wei for no perfect bilong mami bilong hem bae spoelem datfala baby insaed long bele? Waswe, Satan bae fit for spoelem or killim dae datfala Son bifor Hem born? Nomoa nao! Hem olsem Jehovah putim wanfala wall raonem Mary for  protectim hem mekem no eni samting—no eni sin, no eni nogud paoa, no eni man for killim man dae, or eni demon—savve spoelem datfala pikinini from taem wea hem start for grow insaed bele. Jehovah go ahed for protectim Jesus taem hem young. (Matthew 2:1-15) Go kasem taem God markem, no eni samting savve attakim Son bilong hem.

12. Why nao Jehovah duim mirakol for protectim samfala man long taem wea Bible storyim?

¹² Why nao Jehovah protectim samfala long olketa mirakol wei olsem? Planti taem Jehovah protectim samfala man mekem hem protectim samting wea moa important: wei wea purpose bilong hem fulfill. Olsem example, wei for baby Jesus stap laef hem important tumas for fulfillim purpose bilong God, and then diswan bae helpem evri man. Record abaotem wei wea hem iusim paoa bilong hem planti taem for protectim man hem part long Bible, wea “olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.” (Romans 15:4) Tru nao, olketa example hia strongim faith bilong iumi long God wea garem evri paoa. Bat wanem protection nao iumi savve expectim from God distaem?

13. Waswe, Jehovah mas duim mirakol for iumi evriwan? Explainim diswan.

¹³ Promis bilong God for protectim iumi hem no minim Jehovah mas duim mirakol for iumi. Nomoa, God no promis hao laef bilong iumi insaed disfala old system bae no garem eni problem. Planti faithful servant bilong Jehovah feisim barava hard taem, olsem poor living, war, sik, and dae. Jesus talem stret long olketa disaepol bilong hem hao olketa wanwan maet dae bikos long faith bilong olketa. Dastawe Jesus mekhae long need for go ahed strong kasem end. (Matthew 24:9, 13) Sapos Jehovah hem iusim paoa bilong hem for duim mirakol for sevem evri servant bilong hem, Satan bae garem reason for tok spoelem Jehovah and kwestinim really love wea iumi garem for God bilong iumi.​—Job 1:9, 10.

14. Wanem nao olketa example wea showimaot Jehovah no evritaem protectim evri servant bilong hem long semsem wei?

 ¹⁴ Nomata long taem wea Bible storyim, Jehovah no iusim paoa bilong hem for protectim evri servant bilong hem from dae. Olsem example, Herod killim dae aposol James long samting olsem 44 C.E.; bat no longtaem bihaen datwan, God sevem Peter from hand bilong “Herod.” (Acts 12:1-11) And John, brata bilong James, hem laef longtaem winim Peter and James. Tru nao, iumi no savve expectim God for protectim evri servant bilong hem long semsem wei. And tu, “taem and samting wea iumi no expectim hem kasem” iumi evriwan. (Ecclesiastes 9:11) So, hao nao Jehovah protectim iumi distaem?

15, 16. (a) Wanem samting nao pruvim Jehovah hem protectim olketa worshiper bilong hem olsem wanfala grup? (b) Why nao iumi savve sure Jehovah bae protectim olketa servant bilong hem distaem and long taem bilong “datfala big trabol”?

¹⁵ Tingim firstaem wei wea hem protectim iumi long physical wei. From iumi olketa worshiper bilong Jehovah, iumi expectim hem for protectim iumi olsem wanfala sekson. Sapos nomoa, bae hem isi for Satan finisim iumi. Tingim diswan: Satan, “ruler bilong disfala world,” hem laekem tumas for finisim tru worship evribit. (John 12:31; Revelation 12:17) Samfala barava strong gavman long earth tambuim preaching waka bilong iumi and trae for finisim iumi evribit. Nomata olsem, pipol bilong Jehovah go ahed strong and no givap for preach! Why nao olketa strongfala nation no savve stopem waka bilong disfala sekson bilong olketa Christian wea luk smol and luk olsem isi for spoelem olketa? Bikos Jehovah protectim iumi witim tokpiksa wing bilong hem!​—Psalm 17:7, 8.

¹⁶ Waswe long physical wei for protectim iumi long “datfala big trabol” wea klosap kam? Iumi no need for fraetem olketa judgment bilong God. Tru nao, “Jehovah hem savve hao for sevem pipol wea faithful long hem. Hem bae sevem olketa from olketa hard taem, and bae hem finisim pipol wea no raeteous long taem wea hem judgem evriwan.” (Revelation 7:14;  2 Peter 2:9) Go kasem datfala taem, iumi evritaem savve sure long tufala samting. First samting, Jehovah bae nating letem olketa loyal servant bilong hem for finis from disfala earth. Mek-tu samting, bae hem givim reward long olketa wea go ahed faithful, hem laef olowe insaed raeteous niu world bilong hem—for samfala, diswan hem thru long resurrection. For olketa wea dae, no eni ples hem moa sef winim wei for stap insaed memory bilong God.​—John 5:28, 29.

17. Hao nao Jehovah protectim iumi thru long Word bilong hem?

¹⁷ Nomata distaem, Jehovah protectim iumi thru long “word” bilong hem, wea garem paoa for muvim pipol, healim heart and changem laef bilong olketa. (Hebrews 4:12) Taem iumi followim principle bilong hem, long samfala wei diswan protectim iumi long physical wei. Isaiah 48:17 sei: “Mi, Jehovah, mi . . . teachim iufala for kasem gud samting for iufala seleva.” No eni daot stap, wei for live followim Word bilong God savve mekem health bilong iumi kamap moabeta and iumi laef longfala taem. Olsem example, bikos iumi followim kaonsel bilong Bible for stap klia from wei for durong and no mekem iumiseleva kamap dirty long eni wei, iumi savve missim olketa nogud wei and fasin wea barava spoelem laef bilong planti pipol wea no followim God. (Acts 15:29; 2 Corinthians 7:1) Iumi tinghae tumas long wei wea Word bilong God protectim iumi!

18. Hao nao Jehovah protectim iumi long spiritual wei?

¹⁸ Samting wea moa important, Jehovah protectim iumi long spiritual wei. Loving God bilong iumi protectim iumi from samting wea savve spoelem spiritual saed bilong iumi taem hem givim wanem iumi needim for stand strong long olketa test and wea protectim wei wea iumi fren witim hem. So Jehovah hem duim samting for keepim iumi laef, no for lelebet taem nomoa bat for olowe. Tingim samfala arrangement wea God provaedem for protectim iumi long spiritual wei.

19. Hao nao spirit bilong Jehovah savve helpem iumi for deal witim eni test wea iumi maet feisim?

¹⁹ Jehovah hem “Datwan wea herem prea.” (Psalm 65:2) Taem  hem luk olsem olketa hevi long living hem big tumas, wei for talemaot evri samting insaed heart bilong iumi long hem, savve strongim iumi. (Philippians 4:6, 7) Maet hem no duim mirakol for aotem olketa test bilong iumi, bat hem savve ansarem prea bilong iumi long wei for givim iumi wisdom for deal witim olketa. (James 1:5, 6) Winim datwan, Jehovah givim holy spirit long olketa wea askem hem. (Luke 11:13) Datfala strongfala spirit savve mekem iumi fit for deal witim eni test or problem wea iumi feisim. Hem savve givim iumi paoa wea winim wanem iumi garem for stand strong go kasem taem Jehovah aotem evri nogud problem long niu world wea klosap tumas for kam.​—2 Corinthians 4:7.

20. Hao nao paoa bilong Jehovah for protectim iumi hem showaot thru long olketa wea worship witim iumi?

²⁰ Samfala taem, paoa wea Jehovah garem for protectim iumi savve kam thru olketa wea worship tugeta witim iumi. Jehovah mekem pipol bilong hem kamap wanfala “sekson bilong olketa brata” evriwea long world. (1 Peter 2:17; John 6:44) From love wea evri brata garem, iumi lukim pruv bilong paoa bilong holy spirit bilong God for muvim pipol long gudfala wei. Iumi showimaot olketa frut bilong datfala spirit—olketa spesol fasin wea iumi laekem olsem love, kaenfala fasin, and gudfala fasin. (Galatians 5:22, 23) So, taem iumi insaed trabol and wanfala  brata givim kaonsel wea helpem iumi or talem toktok for encouragem iumi, iumi thankiu long Jehovah for olketa toktok hia wea showimaot fasin for kea wea protectim iumi.

21. (a) Wanem spiritual kaikai long barava taem nao Jehovah provaedem thru long “faithful and wise slave”? (b) Long wanem wei nao iuseleva kasem help from olketa samting wea Jehovah provaedem for iumi long spiritual wei?

²¹ Jehovah givim nara samting tu for protectim iumi: spiritual kaikai long barava taem. For helpem iumi kasem strong from Word bilong hem, Jehovah markem “faithful and wise slave” for givimaot spiritual kaikai. Datfala faithful slave iusim olketa pablikeson, witim olketa Wastaoa and Wekap! magasin and tu website bilong iumi jw.org, olketa meeting, assembly, and convention for givim iumi “kaikai long barava taem”​—samting iumi needim, long taem iumi needim. (Matthew 24:45) Waswe, enitaem iu herem wanfala samting long wanfala Christian meeting​—insaed wanfala koment, wanfala tok, or maet wanfala prea tu—wea givim iu strong and encouragement wea iu needim? Waswe, enitaem wanfala article insaed long olketa magasin bilong iumi muvim iu long laef bilong iu? Remember, Jehovah hem provaedem evri samting hia for protectim iumi long spiritual wei.

22. Jehovah evritaem iusim paoa bilong hem long wanem wei, and why nao wei wea hem duim olsem hem for best samting for iumi?

²² Jehovah hem wanfala shield “for evriwan wea go long hem olsem sef ples.” (Psalm 18:30) Iumi luksavve hao hem no iusim paoa bilong hem for protectim iumi from evri trabol wea kamap distaem. Bat, hem evritaem iusim paoa bilong hem for protectim wei wea purpose bilong hem fulfill. Gogo, wei wea hem duim diswan bae best samting for pipol bilong hem. Sapos iumi kam klos long hem and go ahed for stap insaed love bilong hem, Jehovah bae givim iumi perfect laef for olowe. Sapos iumi tingim datwan, bae iumi ting long eni wei for safa long disfala system olsem “for lelebet taem nomoa.”​—2 Corinthians 4:17.