1-3. (a) Wanem nao iumi savve lanem abaotem fasin bilong man taem iumi lukim wei wea parents deal witim baby bilong olketa? (b) Wanem samting nao happen taem samwan showimaot love long iumi, and wanem important kwestin nao iumi shud askem long iumiseleva?

 PARENTS hapi tumas for lukim niuborn baby bilong olketa hem smile. Planti taem olketa putim feis bilong olketa klosap long datfala baby, and smile and mekem enikaen noise. Olketa lukluk long baby hia for smile bak. And then, feis bilong baby hem change—lips hem muv, and naes smile hem kamap. Long spesol wei, datfala smile hem showimaot feeling, hem start bilong love wea baby hia garem wea hem lanem from love wea hem kasem from parents bilong hem.

² Smile bilong baby hia mekem iumi tingim wanfala important samting abaotem fasin bilong man. Hem wei bilong man for taem samwan showimaot love long hem, for hem mas showimaot love go bak. Datwan hem samting wea iumi born witim. (Psalm 22:9) Taem iumi grow, wei wea iumi showimaot love hem bae kamap mature. Maet iu tingim hao taem iu pikinini, parents, relative, or fren olketa showimaot love long iu. Insaed heart bilong iu wanfala naes feeling hem start, grow, and muvim iu for duim samting. Iu showimaot love go bak long olketa. Waswe, semkaen samting hem go ahed for happen taem iu fren witim Jehovah God?

³ Bible hem sei: “Iumi showimaot love bikos God hem lovem iumi firstaem.” (1 John 4:19) Long Sekson 1 go kasem Sekson 3 bilong disfala buk, iumi storyim wei wea Jehovah God showimaot paoa, justice, and wisdom bilong hem long olketa loving wei wea helpem iumi. And long Sekson 4, iumi lukluk long hao hem showimaot love bilong hem for olketa man​—and for  iuseleva—​long olketa spesol wei. Distaem, iumi tingim wanfala kwestin. Maet iumi fit for sei diswan hem kwestin wea important winim eni narawan iu savve askem long iuseleva: ‘Wanem nao love bilong Jehovah muvim mi for duim?’

4. Wanem nao mekem pipol konfius abaotem mining bilong wei for lovem God?

⁴ Jehovah, Man wea Startim love, savve hao love hem garem strongfala paoa for muvim pipol for showimaot gudfala fasin bilong olketa. So nomata olketa man go ahed for no faithful, Jehovah hem barava sure dat love bilong hem bae muvim samfala man. And tru nao, planti million pipol duim datwan finis. Bat sorre tumas, olketa religion bilong disfala world wea wicked mekem pipol konfius abaotem wanem hem minim for lovem God. Planti pipol sei olketa lovem God, bat olketa ting kaen love olsem hem wanfala feeling wea man talem long toktok nomoa. Long firstaem, man maet showimaot love wea hem garem for God long toktok, long sem wei wea firstaem love wea baby garem for parents maet showaot long smile nomoa. Bat, for olketa full-grown man, wei for showimaot love hem minim moa samting.

5. Hao nao Bible showimaot mining bilong wei for lovem God, and why nao iumi shud laekem datwan?

⁵ Jehovah talemaot mining bilong wei for lovem hem. Bible sei: “Samting wea showimaot iumi lovem God, hem taem iumi obeyim olketa law bilong hem.” So, man need for duim samting for showimaot hem lovem God. Hem tru, planti pipol no laek for acceptim wei for obey. Bat datfala verse go ahed for sei: “And olketa law bilong [God] no hard tumas for obeyim.” (1 John 5:3) Olketa law and principle bilong Jehovah stap for helpem iumi, no for givim hevi long iumi. (Isaiah 48:17, 18) Word bilong God hem fulap witim olketa principle wea helpem iumi for kam moa klos long hem. Hao? Bae iumi lukluk long thrifala wei wea iumi savve fren witim God. Thrifala hia nao wei for story witim God, worship, and wei for followim hem.

6-8. (a) Thru long wanem nao iumi savve lisin long Jehovah? (b) Hao nao iumi savve mekem Bible garem laef taem iumi readim?

⁶ Chapter 1 hem start witim disfala kwestin, “Hao sapos enitaem iu story witim God?” Iumi lukim hao diswan hem no samting wea man tingim long mind nomoa. Moses hem story witim God. Waswe long iumi? Long distaem, Jehovah no sendem olketa angel bilong hem for story witim olketa man. Bat Jehovah garem nambawan wei for story witim iumi distaem. Hao nao iumi savve lisin long Jehovah?

⁷ From “evri toktok insaed long olketa Holy Raeting,” iumi lisin long Jehovah taem iumi readim Word bilong hem Bible. (2 Timothy 3:16) Man wea raetem psalm encouragem olketa servant bilong Jehovah for readim Bible “day and naet.” (Psalm 1:1, 2) Iumi mas waka hard for duim diswan. Bat datwan bae helpem iumi. Olsem iumi lukim long Chapter 18, Bible hem olsem wanfala spesol leta from Dadi bilong iumi long heven. So for readim hem shud no olsem wanfala hevi. Iumi mas mekem Bible garem laef taem iumi readim. Hao nao iumi savve duim datwan?

⁸ Mekem olketa story bilong Bible kamap olsem piksa insaed mind taem iu read. Trae for piksarem olketa man wea insaed Bible olsem really pipol. Trae for lukim ples bilong olketa, kaen living, and samting wea muvim olketa. Then, barava ting raonem wanem iu readim, askem iuseleva olketa kwestin olsem: ‘Wanem nao disfala story teachim mi abaotem Jehovah? Olketa wanem fasin bilong hem nao mi lukim? Wanem fasin nao Jehovah laekem mi for lanem from diswan, and hao nao mi savve followim disfala principle long living bilong mi?’ Readim, ting raonem, and followim​—taem iu duim olsem, iu bae lukim hao Word bilong God garem laef.​—Psalm 77:12; James 1:23-25.

9. Hu nao “datfala wakaman wea faithful and wise,” and why nao hem important for iumi lisin gud long datfala “wakaman”?

⁹ Jehovah story long iumi tu thru long “datfala wakaman wea faithful and wise.” Olsem profesi bilong Jesus talem, wanfala smol grup bilong olketa anointed Christian kasem waka for provaedem spiritual ‘kaikai long barava taem’ long olketa last day  distaem wea fulap witim trabol. (Matthew 24:45-47) Taem iumi readim olketa pablikeson wea olketa redyim for helpem iumi kasem stretfala savve bilong Bible and taem iumi attendim olketa Christian meeting and convention, iumi kaikaim spiritual kaikai wea kam from datfala faithful wakaman. From hem slave bilong Christ, iumi wise sapos iumi followim disfala toktok bilong Jesus for iumi: “Mas herehere gud.” (Luke 8:18) Iumi lisin gud bikos iumi acceptim datfala wakaman olsem wanfala wei wea Jehovah story witim iumi.

10-12. (a) Why nao prea hem nambawan present from Jehovah? (b) Hao nao iumi savve prea long wei wea mekem Jehovah hapi, and why nao iumi sure hem tinghae long olketa prea bilong iumi?

¹⁰ Waswe long wei for story long God? Waswe, iumi savve story long Jehovah? Maet just for tingim datwan hem mekem man fraet. Sapos iu mas go for story witim maeti ruler long kantri bilong iu abaotem samfala problem bilong iuseleva, waswe, bae hem isi for iu kasem appointment for tok long hem? For samfala, datwan maet danger samting! Long taem bilong Esther and Mordecai, sapos man no kasem invitation from king bilong Persia bat hem go lukim hem, bae olketa killim hem dae. (Esther 4:10, 11) So tingim wei for kam front long Sovereign Lord bilong universe, wea sapos iumi markem hem witim olketa man wea garem barava bigfala paoa, olketa “olsem grashopa” nomoa. (Isaiah 40:22) Waswe, fitim iumi for feel fraet for go long hem? Nomoa nao!

¹¹ Jehovah hem provaedem wanfala isi wei wea simpol and fitim eniwan for story long hem​—prea. Nomata smol pikinini savve prea long Jehovah witim faith, and long nem bilong Jesus. (John 14:6; Hebrews 11:6) And tu, prea hem mekem iumi fit for talemaot deep tingting and feeling bilong iumi​—nomata olketa hard problem wea hem hard for faendem olketa word for talemaot datwan. (Romans 8:26) Hem iusles for trae for iusim enikaen stael word or toktok or longfala prea for mekem Jehovah tinghae long iumi. (Matthew 6:7, 8) Long narasaed, Jehovah hem no putim spialaen long hao long or haomas taem nao iumi story long hem. Word bilong hem invaetem iumi for “prea evritaem” tu.​—1 Thessalonians 5:17.

 ¹² Remember dat Jehovah nomoa hem garem nem “Datwan wea herem prea,” and hem barava tingim feeling bilong iumi taem hem lisin. (Psalm 65:2) Waswe, hem herehere nating nomoa long prea bilong olketa faithful servant bilong hem? Nomoa, hem hapi for herem olketa. Word bilong hem storyim hao olketa prea hia olsem incense, wea sapos man bonem hem smel naes tumas taem hem smoke go ap. (Psalm 141:2; Revelation 5:8; 8:4) Waswe, iumi kasem comfort taem iumi tingim hao prea bilong iumi wea kam from heart hem go ap and mekem Sovereign Lord hapi? So sapos iumi want for kam klos long Jehovah, prea long hambol wei long hem evritaem, long evriday. Talemaot evribit feeling bilong iu; no haedem eniting. (Psalm 62:8) Sharem wari, hapi, thankiu, and praise bilong iu witim Dadi bilong iu long heven. Samting wea bae kamaot from diswan hem hao wei for klos midolwan long iu and hem bae kamap moa strong.

13, 14. Wanem nao hem minim for worshipim Jehovah, and why nao iumi shud duim olsem?

¹³ Taem iumi story witim Jehovah God, iumi no lisin nomoa and tok olsem taem iumi story witim wanfala fren or wantok. Diswan hem worship long Jehovah, wea givim hem honor wea hem barava fit for kasem. Tru worship hem full laef bilong iumi. Hem wei wea iumi showimaot love long Jehovah and worship wea kam from full soul, and diswan mekem evri faithful wan bilong Jehovah long heven or long earth garem wan mind. Long wanfala vision, aposol John herem wanfala angel talemaot disfala toktok: “Worshipim God wea wakem skae and graon and sea and olketa springwata.”​—Revelation 14:7

¹⁴ Why nao iumi shud worshipim Jehovah? Tingim olketa fasin wea iumi storyim insaed disfala buk, olsem holy fasin, paoa, for kontrolem seleva, justice, for no fraet, mercy, wisdom, hambol, love, wei for kea, loyal, and gudfala fasin. Iumi lukim hao Jehovah nao showimaot long perfect wei wea moa hae evri spesol fasin hia. Taem iumi trae for luksavve long evri fasin bilong hem tugeta, hem klia hem no just wanfala nambawan Person  nomoa. Glory bilong hem barava moa hae winim iumi. (Isaiah 55:9) No eni daot stap, Jehovah nomoa fit for Sovereign ovarem iumi, and fitim hem nomoa for iumi worshipim. Bat, hao nao iumi shud worshipim Jehovah?

15. Hao nao iumi savve worshipim Jehovah witim “holy spirit and followim samting wea tru,” and olketa Christian meeting givim iumi chance for duim wanem?

¹⁵ Jesus sei: “God hem wanfala Spirit, and olketa wea worshipim hem mas worshipim hem followim holy spirit and followim samting wea tru.” (John 4:24) For worshipim God “witim spirit,” iumi mas garem holy spirit and letem holy spirit for leadim iumi. And tu, iumi mas worshipim God followim truth, datfala stretfala savve wea stap insaed Word bilong God. Iumi garem spesol chance for worshipim Jehovah witim “holy spirit and followim samting wea tru” long enitaem wea iumi hipap witim olketa narawan for worshipim hem. (Hebrews 10:24, 25) Taem iumi singim praise long Jehovah, join tugeta for prea long hem,  and lisin and tek part long olketa tok wea kam from Word bilong hem, klin worship bilong iumi showimaot love for hem.

16. Wanem nao wanfala main komandment wea olketa tru Christian mas followim, and why nao iumi want for obeyim datwan?

¹⁶ Iumi laek for worshipim Jehovah tu taem iumi story abaotem hem long nara pipol, praisem hem long pablik. (Hebrews 13:15) Tru nao, for preachim gud nius bilong Kingdom bilong Jehovah hem wanfala main komandment wea olketa tru Christian mas followim. (Matthew 24:14) Iumi willing for obey bikos iumi lovem Jehovah. Taem iumi tingim hao “god bilong disfala world,” Satan, datfala Devil hem “blindim mind bilong olketa” wea no biliv, and startim nogud laea abaotem Jehovah, waswe, diswan no muvim iumi for serve olsem olketa Witness bilong God, for stretem laea toktok olsem? (2 Corinthians 4:4; Isaiah 43:10-12) And taem iumi ting raonem olketa nambawan fasin bilong Jehovah, waswe, iumi garem feeling for laek talem nara pipol abaotem hem? Tru nao, no eni privilege hem moa big winim wei for helpem nara pipol for savve and lovem Dadi bilong iumi olsem iumi duim.

17. Wanem nao insaed long wei wea iumi worshipim Jehovah, and why nao iumi mas worshipim hem witim faithful fasin?

¹⁷ Moa samting hem insaed long wei wea iumi worshipim Jehovah. Hem affectim evri part long living bilong iumi. (Colossians 3:23) Sapos iumi really acceptim Jehovah olsem Sovereign Lord bilong iumi, then bae iumi aftarem wei for duim evriting followim will bilong hem​—long famili laef, waka for selen, wei wea iumi deal witim pipol, and taem iumi stap seleva. Iumi bae want for servem Jehovah “witim full heart,” long faithful wei. (1 Chronicles 28:9) For worship olsem man no savve garem heart wea divaed or garem dabol laef​—giaman wei for showimaot hem servem Jehovah bat long wei wea haed hem go ahed for duim bigfala rong. Man wea garem faithful fasin hem no savve olsem hypocrite; love mekem hem heitim datwan. Wei for fraet long God tu bae help. Bible hem joinim fraet and respect witim wei wea iumi go ahed for fren klos witim Jehovah.​—Psalm 25:14.

18, 19. Why nao hem fitim for sei olketa man wea no perfect savve followim wei bilong Jehovah God?

¹⁸ Each sekson bilong disfala buk hem garem wanfala chapter wea showimaot dat “from [iumi] olketa pikinini bilong God wea hem lovem, [iumi] mas followim wei bilong hem.” (Ephesians 5:1) So iumi mas remember hao nomata iumi no perfect, iumi savve followim perfect wei bilong Jehovah for iusim paoa, showimaot justice, duim samting followim wisdom, and for showimaot love. Hao nao iumi savve iumi really fit for followim wei bilong Olmaeti? Remember, mining bilong nem bilong Jehovah showim long iumi hao hem savve kamap eniting wea hem savve kamap for fulfillim olketa purpose bilong hem. Hem fitim iumi for tinghae tumas long wei wea hem duim datwan, bat waswe, hem hard tumas for iumi followim Jehovah long diswan? Nomoa.

¹⁹ God wakem iumi long image bilong hem. (Genesis 1:26) So, olketa man difren from eni nara creation long earth. Savve wea man born witim, gene bilong hem, or living, hem no only samting wea kontrolem man. Jehovah givim iumi wanfala spesol present—free for chus. Nomata iumi garem olketa wik point and no perfect, iumi free for chusim wanem kaen person iumi bae kamap. And tu, iumi mas rememberim dat nem bilong God hem minim tu dat hem laekem olketa wea worshipim hem for duim samting followim wanem hem laekem. Waswe, iu laek for kamap person wea showimaot love, wea wise, raeteous and iusim paoa long stretfala wei? Witim help bilong spirit bilong Jehovah iu savve kamap kaen man olsem! Tingim olketa gud samting wea iu savve kasem from iu duim datwan.

20. Wanem gud samting nao iumi duim taem iumi followim wei bilong Jehovah?

²⁰ Iu bae mekem heart bilong Dadi bilong iu long heven hem hapi. (Proverbs 27:11) Iu savve “mekem [Jehovah] hapi” bikos hem minim olketa wik point bilong iu. (Colossians 1:9, 10) And taem iu go ahed for buildimap olketa gud fasin for followim Dadi wea iu lovem, bae iu kasem wanfala spesol privilege. Long  dark world wea stap farawe from God, iu bae kamap man wea garem laet. (Matthew 5:1, 2, 14) Iu bae help for showimaot long earth samfala part long nambawan fasin bilong Jehovah. Datwan hem bigfala honor!

21, 22. Wanem gogo wea no garem end nao stap front long evriwan wea lovem Jehovah?

²¹ Simpol toktok wea encouragem man long James 4:8 hem no just wanfala goal. Hem wanfala gogo. Taem iumi go ahed for faithful, datfala gogo bae nating end. Iumi bae nating stop for kam moa klos long Jehovah. Tru nao, iumi evritaem bae garem samting moa for lane abaotem hem. Iumi shud no tingse disfala buk hem teachim iumi evriting abaotem Jehovah. For tok stret, iumi storyim lelebet samting nomoa long evriting wea Bible talem abaotem God bilong iumi! And Bible seleva tu no talem iumi evriting abaotem Jehovah. Aposol John sei sapos man raetem evriting wea Jesus duim insaed ministry bilong hem long earth, “ating full world bae no garem inaf spes fitim olketa scroll hia.” (John 21:25) Sapos datwan hem tru saed long Son, diswan hem moa tru for Dadi bilong hem!

 ²² Nomata iumi laef olowe bae iumi no savve stop for lane abaotem Jehovah. (Ecclesiastes 3:11) So, tingim future wea stap front long iumi. Bihaen iumi bae laef for planti handred, million, and billion year tu, iumi bae savve moa samting abaotem Jehovah God winim distaem. Bat bae iumi feel dat iumi still need for lanem planti nara nambawan samting. Iumi bae want for lanem moa samting, bikos iumi bae evritaem garem reason for feel olsem man wea raetem psalm wea sing: “Wei for kam klosap long God hem gudfala samting for mi.” (Psalm 73:28) Laef olowe bae fulap witim difren samting and interesting tumas​—and wei for kam moa klos long Jehovah bae hem best samting wea iumi kasem.

23. Wanem nao iu kasem encouragement for duim?

²³ Letem love bilong Jehovah muvim iu distaem, for lovem hem witim full heart, soul, mind, and strong. (Mark 12:29, 30) Letem love bilong iu go ahed loyal and strong. Letem olketa disison bilong iu evriday, from smol wan go kasem big wan, showimaot disfala principle nao leadim iu​—iu bae evritaem chusim datfala road wea leadim iu for fren moa strong witim Dadi bilong iu long heven. Winim evriting, kam moa klos long Jehovah, and letem hem kam moa klos long iu​—for olowe!