IU GO insaed Kingdom Hall and iu lukim hem barava luk difren. Iu laekem tumas datfala ples. Maet iu tingim tu olketa naesfala memory wea iu garem taem iufala wakem Kingdom Hall hia samfala year bifor. Bat then iu hapi go moa for lukim olketa iusim Kingdom Hall hia olsem relief center. Bihaen wanfala cyclone kosim flood and spoelem ples wea iufala stap, Branch Komiti kwiktaem mekem arrangement for olketa brata and sista wea disaster spoelem olketa for kasem kaikai, kaleko, klin wata, and olketa nara samting. Olketa arrangem and putim stret olketa relief supply wea olketa brata and sista donatem. Olketa brata and sista go insaed Kingdom Hall for tekem wanem olketa needim, and iu lukim olketa draem tias lo eye bikos olketa hapi tumas.

Jesus sei pipol bae luksavve lo olketa disaepol blo hem bikos olketa showimaot love lo each other. (John 13:34, 35) Lo disfala sekson, bae iumi storyim love wea Olketa Jehovah’s Witness showimaot taem olketa buildim olketa ples for worship and sapotim relief waka. Kaen love hia barava showimaot iumi stap anda lo Kingdom wea Jesus rulim.