1, 2. (a) Start kam lo bifor, wanem nao pipol blo Jehovah hapi tumas for duim? (b) Wanem nao Jehovah tinghae lo hem?

 START kam lo bifor, pipol blo Jehovah wea faithful hapi tumas for buildim olketa ples for mekhae lo nem blo hem. Olsem example, olketa Israelite hapi tumas for tekpart lo waka for wakem tabernacle and willing for givim samting for wakem datfala tabernacle.—Eksodas 35:30-35; 36:1, 4-7.

² Jehovah no ting lo olketa material samting olsem main samting wea mekhae lo hem, and hem no ting lo olketa samting hia hem important tumas. (Matt. 23:16, 17) Wanem Jehovah tinghae lo hem winim evri nara samting nao, hem worship wea olketa servant blo hem givim lo hem, insaed diswan hem wei wea olketa willing and olketa waka hard. (Eksodas 35:21; Mark 12:41-44; 1 Tim. 6:17-19) Datwan hem barava important. Why nao olsem? Bikos olketa building no savve stap for olowe. Olsem example, distaem tabernacle and temple no stap nao, bat Jehovah no forgetim kaenfala fasin and hard waka wea olketa faithful servant blo hem duim for sapotim waka hia.—Readim 1 Corinth 15:58; Hebrew 6:10.

3. Wanem nao bae iumi storyim lo disfala chapter?

³ Olketa servant blo Jehovah distaem tu waka hard for buildim olketa ples for worship. And bigfala waka wea King Jesus Christ leadim iumi for duim hem barava spesol samting! Tru nao, Jehovah hem blessim bigfala waka wea iumi duim. (Sams 127:1) Lo disfala chapter, bae iumi storyim samfala lo olketa waka wea pipol blo Jehovah duim finis and hao waka wea olketa duim mekhae lo Jehovah. And bae iumi storyim tu wanem samfala wea duim waka hia olketa talem.

4. (a) Why nao iumi need for wakem staka ples for worship? (b) Why nao olketa klosim samfala branch office and olketa nara branch nao lukaftarem waka? (Lukim box “ Branch Construction—Change Fitim Olketa Need wea Kamap.”)

⁴ Olsem iumi storyim lo Chapter 16, Jehovah laekem for iumi hipap tugeta for worship. (Heb. 10:25) Olketa meeting blo iumi helpem iumi for garem strongfala faith, and hem helpem iumi for laek duim moa samting lo preaching waka. Lo olketa last day distaem, Jehovah gohed speedim waka hia. From datwan, staka handred thousand pipol kam insaed organization  blo hem evri year. (Isa. 60:22, NW) From staka pipol kam insaed organization, bigfala need hem stap for wakem olketa ples for printim olketa Bible literature. And iumi needim tu olketa ples for worship.

5. Why nao nem Kingdom Hall hem barava fitim? (Lukim tu box “ Niu Laet Church.”)

⁵ Lo taem blo Olketa Bible Student bifor, olketa start for luksavve olketa need for garem ples for worship. Luk olsem first ples for worship wea olketa buildim hem lo West Virginia, U.S.A., lo 1890. Kam kasem olketa year blo 1930, pipol blo Jehovah buildim or renovatim staka ples for worship, bat olketa no givim eni nem lo olketa ples hia. Lo 1935, Brata Rutherford go visit lo Hawaii, lo there olketa brata wakem wanfala hall wea olketa wakem lo semtaem witim wanfala niu branch office. Taem olketa brata askem Brata Rutherford wanem nem nao olketa bae kolem lo building hia, hem sei: “Iufala tingse hem olraet for iumi kolem building hia lo ‘Kingdom Hall,’ from waka wea iumi duim hem for preachim gud nius abaotem  Kingdom?” (Matt. 24:14) Start lo datfala taem, olketa kolem staka lo olketa ples for worship wea pipol blo Jehovah evriwea lo world iusim hem Kingdom Hall.

6, 7. Wanem nao kamaot from olketa Kingdom Hall construction wea olketa brata kwiktaem buildim?

⁶ Lo olketa year blo 1970, staka niu kongregeson kamap and bigfala need stap for wakem staka Kingdom Hall. So olketa brata lo United States kamap witim wanfala plan for buildim olketa naes Kingdom Hall wea olketa savve wakem insaed tu-thri day nomoa. Gogo kasem 1983, olketa wakem samting olsem 200 Kingdom Hall lo United States and lo Canada. For lukaftarem waka hia, olketa brata startim olketa regional building committee. Plan hia barava gohed gud, so lo 1986 Governing Body appruvim arrangement hia and lo 1987, lo United States, olketa garem 60-fala Regional Building Committee (RBC). a Kasem 1992, staka kantri garem tu RBC, olsem lo Argentina, Australia, France, Germany, Japan, Mexico, South Africa, and Spain. Hem barava fitim for iumi sapotim olketa brata blo iumi wea waka hard for buildim olketa Kingdom Hall and Assembly Hall, from waka hia hem join witim holy waka for God.

⁷ Olketa Kingdom Hall hia wea olketa brata kwiktaem buildim, hem givim bigfala witness lo pipol wea stap raon lo area wea waka gohed lo hem. Olsem example, wanfala niuspepa lo Spain hem garem wanfala article “Faith Muvim Olketa Maunten.” Taem niuspepa storyim construction waka lo kaen Kingdom Hall olsem lo taon lo Martos, hem garem disfala kwestin: “Lo world wea fulap witim pipol wea tingim olketa seleva, hao nao  olketa volunteer from staka difren ples [lo Spain] go lo Martos for wakem wanfala building wea kwiktaem finis, strong, and olketa organize gud?” Niuspepa hia ansarem datfala kwestin taem hem quotem toktok blo wanfala Witness volunteer wea sei: “Waka hia hem gohed olsem from Jehovah nao hem teachim mifala.”

8. Start lo 1999, wanem niu arrangement nao Governing Body appruvim, and why nao olsem?

⁸ Lo olketa year bifor 2000, staka pipol lo olketa kantri wea poor kam insaed organization blo Jehovah. Olketa kongregeson traem best blo olketa for buildim olketa ples for worship. Bat lo samfala kantri, pipol againstim and tok spoelem olketa Witness bikos olketa Kingdom Hall no luk naes tumas taem olketa comparem witim olketa ples for worship blo olketa nara lotu. So start lo year 1999, Governing Body appruvim wanfala niu arrangement for kwiktaem wakem olketa Kingdom Hall lo olketa poor kantri. Olketa savve iusim selen from samfala rich kantri for helpem olketa narawan ‘mekem olketa garem samting wea olketa needim.’ (Readim 2 Corinth 8:13-15.) And olketa brata and sista from olketa nara kantri volunteer for buildim olketa Kingdom Hall.

9. Wanem waka nao luk olsem hem big tumas, bat wanem nao kamaot from datwan?

⁹ Lo firstaem luk olsem waka hem big tumas. Wanfala report lo 2001 showimaot 88-fala poor kantri olketa needim winim 18,300 Kingdom Hall. Bat from spirit blo God and King blo iumi Jesus Christ helpem iumi, no eni samting hem hard. (Matt. 19:26)  Insaed samting olsem 15-fala year nomoa, start lo 1999 go kasem 2013, pipol blo God buildim 26,849 Kingdom Hall followim niu arrangement hia. b Jehovah gohed for blessim preaching waka, dastawe lo year 2013, need hem stap for buildim moa 6,500 Kingdom Hall lo olketa kantri wea poor, and distaem iumi needim staka Kingdom Hall evri year.

10-12. Hao nao wei for buildim olketa niu Kingdom Hall mekhae lo nem blo Jehovah?

¹⁰ Hao nao wei for buildim olketa niu Kingdom Hall mekhae lo nem blo Jehovah? Wanfala report from branch office lo Zimbabwe sei: “Insaed wan month bihaen olketa buildim wanfala niu Kingdom Hall, attendance lo olketa meeting hem dabol.” Lo staka kantri, luk olsem pipol hol bak for hipap witim olketa Witness from olketa no garem gudfala ples for worship. Taem olketa wakem wanfala Kingdom Hall finis, kwiktaem nomoa hem fulap and then olketa needim niu wan moa. Bat hem no from olketa Kingdom Hall luk naes nomoa dastawe hem muvim staka pipol for kam lo Jehovah. Trufala love wea olketa Christian showimaot taem olketa buildim olketa Kingdom Hall tu hem affectim hao pipol ting abaotem organization blo hem. Iumi storyim samfala example.

¹¹ Indonesia. Taem wanfala man hem lukluk lo taem olketa Witness buildim wanfala Kingdom Hall, and hem faendaot evriwan wea waka olketa volunteer, hem sei: “Iufala barava difren! Mi lukim iufala hapi and willing for waka nomata iufala no kasem pei. Mi no lukim eni religion hem olsem religion blo iufala!”

¹² Ukraine. Wanfala woman wea savve go pas evriday lo ples wea olketa buildim wanfala Kingdom Hall, hem luksavve olketa wea waka Olketa Jehovah’s Witness, and building wea olketa wakem hem wanfala Kingdom Hall. Hem sei: “Mi herem story abaotem Olketa Jehovah’s Witness from sista blo mi wea hem tu wanfala Witness. Taem mi lukim waka olketa duim, mi disaed mi tu laek for joinim disfala spiritual famili. Mi lukim olketa lovem each other.” Woman hia acceptim wanfala Bible Study and lo 2010 hem baptaes.

13, 14. (a) Wanem nao iu lanem from samting wea wanfala marit couple duim bihaen tufala lukim building waka wea gohed lo wanfala Kingdom Hall? (b) Wanem nao iu savve duim for help mekem ples for worship mekhae lo nem blo Jehovah?

¹³ Argentina. Wanfala marit couple story witim brata wea lukaftarem waka for buildim wanfala Kingdom Hall. Hasband sei: “Mifala bin lukluk followim building waka wea iufala duim lo hia and . . . mifala disaed mifala laek kam lane abaotem God lo disfala ples.” Then hem ask: “Wanem nao mifala mas duim mekem mifala fit for attendim olketa meeting lo hia?” Couple hia acceptim Bible study, bat tufala laekem olketa Witness for study witim full famili. Olketa brata hapi for study witim full famili.

¹⁴ Maet iu no garem privilege for help for buildim Kingdom Hall wea iufala iusim, bat staka samting stap wea iu savve duim for help mekem ples for worship mekhae lo nem blo Jehovah.  Olsem example, no hol bak for invaetem olketa Bible study blo iu, return visit, and olketa wea no Witness for attendim olketa meeting lo Kingdom Hall. Iu garem chance tu for help for klinim and lukaftarem ples for worship. Maet iu savve putim selen mekem iu savve givim donation for help lukaftarem Kingdom Hall wea iufala iusim, or givim donation for buildim olketa ples for worship lo olketa nara ples lo world. (Readim 1 Corinth 16:2.) Evri samting hia hem for mekhae lo nem blo Jehovah.

15-17. (a) Hu nao duim staka lo olketa waka for buildim olketa ples for worship? (b) Wanem nao iu lanem from koment blo olketa couple wea waka lo olketa international construction project?

¹⁵ Staka lo olketa waka hia for buildim olketa Kingdom Hall, Assembly Hall, and branch office, olketa brata and sista nao duim. Staka taem olketa brata and sista from olketa nara kantri wea garem experience lo construction waka savve helpem olketa. Samfala lo olketa volunteer hia mas changem samfala samting lo living blo olketa, mekem olketa savve go waka for samfala week lo wanfala project lo nara kantri. Samfala narawan olketa willing for duim waka hia for staka year lo olketa didifren ples.

¹⁶ For waka lo international construction hem garem samfala challenge tu, bat olketa wea waka lo olketa project hia savve kasem staka blessing. Olsem example, Timo and Lina travel lo staka kantri lo Asia, Europe, and South America for buildim olketa Kingdom Hall, Assembly Hall, and olketa branch office. Timo sei: “Insaed 30 year wea mi waka, klosap evri tufala year mi change lo wanfala ples go lo nara ples.” Lina wea maritim Timo for 25 year finis hem sei: “Mi waka witim Timo lo tenfala difren kantri. Mifala mas iusim strong blo mifala for waka, and  hem tek taem for getius lo kaikai, weather, lanem niu languis, and difren ples for preach and olketa niu fren.” c Waswe, tufala kasem eni gud samting? Lina sei: “Taem mitufala trae hard for winim olketa challenge hia, mitufala kasem bigfala blessing. Olketa brata and sista showimaot love and kaen and mifala feelim wei wea Jehovah kea for mitufala. Mitufala lukim tu promis wea Jesus talem lo olketa disaepol blo hem wea stap lo Mark 10:29, 30, hem kamap tru. Mifala garem staka handred spiritual brata and sista, and mami lo olketa difren ples lo world.” Timo sei, “Mifala hapi tumas for iusim savve wea mifala garem for duim barava important waka hia, and help for mekem olketa samting blo King kamap big.”

¹⁷ Darren and Sarah, wea help lo olketa construction project lo Africa, Asia, Central America, Europe, South America, and lo South Pacific, storyim hao tufala kasem staka samting winim wanem tufala givim. Nomata tufala feisim samfala challenge, Darren sei: “Hem wanfala privilege for waka witim olketa brata from olketa difren part lo world. Mi lukim love wea iumi garem for Jehovah hem olsem wanfala rope wea go raonem full world wea joinim tugeta evri Witness blo Jehovah.” Sarah sei: “Mi lanem staka samting from olketa brata and sista wea garem difren culture! Taem mi lukim sakrifaes wea olketa mekem for servem Jehovah datwan muvim mi for gohed duim best blo mi.”

18. Hao nao profesi lo Psalm 110:1-3 hem kamap tru?

¹⁸ King David profesi hao nomata olketa wea stap anda lo Kingdom blo God feisim olketa challenge, olketa bae “willing for givim olketa seleva” for sapotim Kingdom waka. (Readim Psalm 110:1-3, NW.) Evriwan wea duim waka for sapotim Kingdom olketa share for mekem profesi hia kamap tru. (1 Cor. 3:9) Distaem iumi garem staka branch office, staka handred Assembly Hall, and staka thousand Kingdom Hall raonem full world, hem barava pruvim Kingdom blo God hem real samting, and hem rul finis lo heven. Hem bigfala privilege for iumi sapotim King Jesus Christ lo waka for mekhae lo nem blo Jehovah wea hem barava fit for kasem!