1. Taem olketa disaepol hipap tugeta, wanem help nao olketa kasem, and why nao olketa needim datwan?

 NO LONGTAEM bihaen Jesus laef bak, olketa disaepol hipap tugeta for encouragem each other. Bat from olketa fraetem olketa enemy, olketa lokim olketa door. Olketa no fraet nao taem Jesus kam lo olketa and sei: “Iufala kasem holy spirit”! (Readim John 20:19-22.) Bihaen olketa disaepol hipap tugeta moa, and Jehovah givim holy spirit lo olketa. Lo datfala taem, olketa kasem strong for duim preaching waka wea olketa bae duim!—Acts 2:1-7.

2. (a) Wanem nao Jehovah provaedem for strongim iumi, and why nao iumi needim datwan? (b) Why nao Famili Worship arrangement hem barava important? (Lukim footnote and box “ Famili Worship”.)

² Iumi tu feisim olketa semkaen challenge wea olketa brata lo first century feisim. (1 Pet. 5:9) Samfala taem, samfala lo iumi savve fraetem man. And iumi needim strong wea Jehovah givim for helpem iumi for no givap for duim preaching waka. (Eph. 6:10) Iumi kasem strong from olketa meeting wea Jehovah provaedem. Evri weekend iumi garem tufala meeting wea iumi savve lanem staka samting, wanfala hem Pablik Tok and narawan hem Wastaoa Study. And lo midol week iumi garem nara meeting wea iumi kolem lo Christian Laef and Ministry blo Iumi. a Iumi enjoyim tu fofala spesol meeting evri year, wea hem nao regional convention, tufala circuit assembly, and Memorial blo dae blo Christ. Why nao hem important for iumi attendim evri meeting hia? Hao nao olketa change kamap lo olketa meeting blo iumi distaem? And hao iumi ting lo olketa meeting showimaot wanem abaotem iumi?

3, 4. Wanem nao Jehovah laekem pipol blo hem for duim? Storyim samfala example.

³ Lo taem bifor, Jehovah talem pipol blo hem for hipap tugeta for worshipim hem. Olsem example, lo 1513 B.C.E., Jehovah givim Law lo nation blo Israel. Insaed Law hia hem for olketa keepim Sabbath evri week, mekem each famili savve worshipim hem and for teachim Law blo hem. (Diutronomi 5:12; 6:4-9) Taem olketa Israelite followim komand hia, olketa famili stap gud, and full nation strong for worshipim Jehovah and worship blo olketa hem klin. Taem olketa no followim datfala  Law and no hipap tugeta for worshipim Jehovah, hem no hapi lo olketa.—Lev. 10:11; 26:31-35, NW; Mektu Kronikols 36:20, 21.

⁴ Tingim tu example wea Jesus showimaot. Hem wei blo Jesus for go evri week lo sinagog lo taem blo Sabbath. (Luke 4:16) Bihaen Jesus dae and laef bak, olketa disaepol blo hem gohed hipap tugeta evritaem nomata olketa no stap anda lo law blo Sabbath. (Acts 1:6, 12-14; 2:1-4; Rome 14:5; Col. 2:13, 14) Lo olketa hipap hia, olketa Christian lo first century no kasem instruction and encouragement nomoa, bat olketa savve givim sakrifaes lo God tu lo wei for prea, givim koment, and for singsing.—Col. 3:16; Heb. 13:15.

5. Why nao iumi attendim olketa meeting evri week, and olketa assembly and convention evri year? (Lukim tu box “ Olketa Hipap wea Mekem Pipol blo God Wan Mind.”)

⁵ Distaem tu, taem iumi attendim olketa meeting blo iumi evri week and attendim olketa assembly and convention, iumi showimaot iumi sapotim Kingdom blo God, iumi kasem strong from holy spirit, and encouragem olketa narawan lo olketa koment wea iumi givim. And barava important samting nao taem iumi prea, givim koment, and singsing, iumi worshipim Jehovah. Hao iumi conductim olketa meeting blo iumi distaem maet hem difren from olketa Israelite and olketa Christian lo first century, bat olketa hipap blo iumi hem semsem nomoa. Hao nao olketa change kamap lo olketa meeting blo iumi distaem?

6, 7. (a) Wanem nao goal blo olketa meeting blo iumi? (b) Hao nao wei wea olketa brata bifor organizem olketa meeting hem no semsem?

⁶ Taem Brata Charles Taze Russell start lukaotem truth from Bible, hem luksavve hem important for hipap witim  olketa wea garem sem goal. Lo 1879, Russell hem sei: “Mi witim olketa narawan lo Pittsburgh organize for hipap tugeta and garem wanfala class for studyim Bible evri Sunday.” Hem encouragem olketa wea savve readim Zion’s Watch Tower for hipap tugeta, and lo 1881, olketa garem meeting evri Sunday and Wednesday lo Pittsburgh, Pennsylvania. Watch Tower blo November 1895 sei goal blo olketa meeting hia hem for mekem “Olketa Christian hipap tugeta, showimaot love,” and givim chance for olketa wea attend for encouragem each other.—Readim Hebrew 10:24, 25.

⁷ For staka year, hao each grup blo Olketa Bible Student organizem olketa meeting hem difren from nara grup blo Olketa Bible Student. Olsem example, wanfala Watchtower lo 1911 pablisim leta blo wanfala grup blo Olketa Bible Student lo United States. Hem sei: “Insaed wanfala week, mifala garem samting olsem faevfala meeting.” Grup hia garem meeting lo Monday, Wednesday, Friday, and tufala lo Sunday. Lo 1914, Watchtower pablisim nara leta blo wanfala grup blo Olketa Bible Student lo Africa. Hem sei: “Mifala garem meeting tufala taem lo month, hem start lo Friday and hem finis lo Sunday.” Bat gogo, olketa change kamap lo olketa meeting blo iumi. Bae iumi storyim history blo each meeting.

8. Wanem nao samfala title blo olketa pablik tok bifor?

⁸ Pablik Tok. Lo 1880, wanfala year bihaen Brata Russell start for pablisim Zion’s Watch Tower, hem followim example blo Jesus and hem start for duim preaching waka lo olketa difren ples. (Luke 4:43) Gogo, Brata Russell startim wei for duim Pablik Tok wea iumi garem distaem. Taem Watch Tower storyim gogo blo Russell, hem sei Russell “hapi for givim olketa pablik tok wea storyim ‘Plande Samting Abaotem Kingdom Bilong God.’” Lo 1911, bihaen olketa class or kongregeson start for kamap lo staka kantri, each class kasem instruction for sendem olketa brata wea fit for givim tok, for givim sixfala pablik tok wea storyim olketa topic olsem judgment, and abaotem ransom lo olketa kongregeson wea stap klosap. Lo end blo tok, olketa announcem nem blo brata and title blo tok wea bae kamap lo week bihaen.

9. Lo olketa year wea go pas, olketa wanem change nao kamap lo Pablik Tok, and hao nao iu savve sapotim meeting hia?

⁹ Lo 1945, The Watchtower talemaot olketa bae garem eitfala Pablik Tok wea bae kamap lo staka ples lo world, wea tok story abaotem “olketa problem wea kamap lo taem blo iumi.” For staka year, olketa brata for givim tok no givim nomoa olketa pablik tok wea wakaman wea faithful provaedem, bat olketa givim tu olketa pablik tok wea olketa seleva redyim. Bat lo 1981, evri brata wea givim olketa pablik tok kasem direction for givim olketa tok followim aotlaen wea kongregeson kasem. b Go kasem 1990, lo samfala pablik tok aotlaen, olketa  brata wea givim tok savve askem kwestin lo audience or duim olketa demonstration. Bat lo sem year, olketa instruction hem change, brata nomoa givim pablik tok. Lo January 2008 wanfala change kamap. Olketa pablik tok bae hem no 45 minute bat bae hem 30 minute nomoa. Nomata olketa change kamap lo hao olketa givim olketa pablik tok, olketa pablik tok wea olketa brata redyim gud savve strongim faith blo iumi lo Bible and teachim iumi staka difren samting abaotem Kingdom blo God. (1 Tim. 4:13, 16) Waswe, iu hapi for invaetem olketa return visit blo iu and olketa wea no Witness for kam lisin lo olketa important tok wea kam from Bible?

10-12. (a) Olketa wanem change nao kamap lo Wastaoa Study? (b) Olketa wanem kwestin nao hem gud for iumi askem lo iumiseleva?

¹⁰ Wastaoa Study. Lo 1922, Watch Tower Society savve sendem olketa brata wea olketa kolem olketa lo pilgrim, for go lo olketa kongregeson for givim olketa pablik tok and leadim kongregeson lo preaching. Olketa brata hia talem olketa kongregeson for garem wanfala meeting for studyim The Watch Tower. So olketa kongregeson followim direction hia. Lo firstaem, olketa kongregeson savve studyim Watch Tower lo midol week or lo Sunday.

¹¹ Lo Watchtower blo June 15, 1932, hem storyim wanfala direction lo hao for conductim meeting hia. Watchtower storyim wanfala brata bae conductim datfala meeting olsem hao olketa lo Bethel savve duim. Thrifala brata bae sidaon lo stage for read, bihaen wanfala read finis then narawan readim moa nara paragraf. Lo datfala taem olketa article no garem olketa study kwestin, from datwan brata wea conductim study savve talem audience for askem olketa kwestin lo datfala article. Bihaen datwan, hem savve askem audience for givim ansa lo  olketa kwestin. Sapos hem no klia yet, then conductor savve explainim lo short and kliafala wei.

¹² Lo firstaem, each kongregeson savve chusim seleva article lo Wastaoa wea staka lo kongregeson laek studyim. Bat Watchtower blo April 15, 1933, hem talem lo evri kongregeson for studyim Wastaoa wea just kamaot. Lo 1937, direction hem kamap for garem Wastaoa Study lo Sunday. Staka change lo hao for conductim meeting hia wea iumi followim kam kasem distaem, olketa pablisim lo Watchtower blo October 1, 1942. Firstaem, Watchower storyim olketa kwestin bae stap lo botom lo each page blo olketa study article and olketa kwestin hia nao conductor bae askem. Then, Watchtower storyim meeting hia bae gohed for wan hour. And tu, hem encouragem olketa wea givim koment for iusim toktok blo olketa seleva, winim wei for read nomoa from paragraf. Wastaoa Study hem main meeting wea wakaman wea faithful and wise gohed iusim for provaedem olketa spiritual kaikai lo barava taem. (Matt. 24:45) Hem gud for iumi askem iumiseleva: ‘Waswe, mi prepare for Wastaoa Study evri week? And waswe, mi traem best for givim koment?’

13, 14. Wanem nao olketa change wea kamap lo Kongregeson Bible Study, and wanem nao iu laekem abaotem disfala meeting?

¹³ Kongregeson Bible Study. Lo start lo olketa year blo 1890, bihaen staka volume blo Millennial Dawn release, Brata H. N. Rahn, wanfala Bible Student wea stap lo taon lo Baltimore, Maryland, U.S.A., sei for olketa garem “Dawn Circles” for study blo olketa. Firstaem olketa conductim meeting hia lo haos blo olketa brata, diswan hem for traem nomoa. Bat gogo, kasem September 1895, olketa conductim Dawn Circles lo staka taon lo United States. Watch Tower blo datfala month talem for evri Bible Student for garem meeting hia. Hem storyim brata wea conductim meeting mas savve read gud. Hem bae readim wanfala sentence then hem weit for olketa wea hipap for givim koment. Bihaen hem readim each sentence lo paragraf and story raonem, then hem readim olketa scripture wea stap lo paragraf. Lo end blo chapter, each wan lo audience savve talem lelebet koment lo wanem hem lanem lo datfala study.

¹⁴ Olketa changem nem blo disfala meeting staka taem. Firstaem olketa kolem lo Berean Circles for Bible Study, for followim olketa Christian lo Beroea lo first century wea studyim gud olketa Scripture. (Acts 17:11) Gogo, nem hia change and kamap Kongregeson Buk Study. Distaem iumi kolem lo Kongregeson Bible Study, and full kongregeson hipap tugeta lo Kingdom Hall and no lo olketa smol grup lo haos blo samfala brata. Lo olketa year wea go pas, iumi studyim staka difren buk, brochure, and iumi studyim tu samfala article lo Wastaoa. Start lo bifor kam kasem distaem, evriwan wea attend kasem encouragement for tekpart lo meeting. Datfala meeting  helpem iumi for savve gud lo Bible. Waswe, iu evritaem prepare for meeting hia and traem best for tekpart?

15. Olketa designim Theocratic Ministry Skul for helpem pipol blo God for duim wanem?

¹⁵ Theocratic Ministry Skul. Carey Barber, wea bifor hem waka lo world hedquarter lo Brooklyn, New York, hem sei: “Lo Monday naet, February 16, 1942, olketa invaetem evri brata lo Brooklyn Bethel for joinim skul wea distaem iumi kolem lo Theocratic Ministry Skul.” Brata Barber, wea bihaen kamap member blo Governing Body hem storyim skul hia hem “wanfala lo olketa nambawan samting wea Jehovah duim for pipol blo hem lo taem blo iumi.” Skul hia helpem olketa brata for savve gud hao for teach and preach. Dastawe lo 1943 taem skul hia start, olketa iusim wanfala buklet Course in Theocratic Ministry wea gogo evri kongregeson raonem full world tu iusim disfala buklet. Lo Watchtower blo June 1, 1943, hem sei olketa designim Theocratic Ministry Skul for helpem pipol blo God for  kasem “training for kamap olketa gudfala wakaman wea talemaot Kingdom blo hem.”—2 Tim. 2:15.

16, 17. Waswe,Theocratic Ministry Skul hem trainim man for kasem savve nomoa? Explainim diswan.

¹⁶ Firstaem staka stragol taem olketa givim tok front lo wanfala big audience. Clayton Woodworth, wea dadi blo hem stap lo prison witim Brata Rutherford and olketa narawan lo 1918, hem storyim hao hem feel taem hem start joinim skul lo 1943. Hem sei: “Mi faendem hem barava no isi taem mi givim olketa tok. Mi feelim olsem tongue blo mi hem long, mouth hem drae fogud, and voice blo mi hem barava laod then hem go kwaet moa.” Bat gogo Clayton hem kamap gud lo wei for teach, hem kasem staka assignment for givim tok. Datfala skul helpem hem, no for savve hao for teach gud nomoa, bat helpem hem for hambol and barava depend lo Jehovah. Hem sei moa: “Mi start for luksavve man wea givim tok hem no important. Samting wea important nao hem mas prepare gud and  barava depend lo Jehovah. Then evriwan bae hapi for lisin lo hem and olketa bae lanem samting.”

¹⁷ Lo 1959, olketa invaetem olketa sista tu for joinim skul hia. Sista Edna Bauer storyim taem wea olketa announcem lo wanfala assembly wea hem attendim. Hem sei: “Mi tingim hapi wea olketa sista kasem taem olketa herem announcement hia. Olketa sista garem chance for duim samfala samting moa.” Lo olketa year wea go pas, staka brata and sista mekius lo chance for joinim Theocratic Ministry Skul and for Jehovah teachim olketa. Distaem iumi gohed kasem training olsem lo midol week meeting blo iumi.—Readim Aesaea 54:13.

18, 19. (a) Distaem, hao nao iumi kasem help for duim ministry? (b) Why nao iumi singsing lo olketa meeting? (Lukim box “ Singsing Abaotem Olketa Tru Samting.”)

¹⁸ Service Meeting. Start lo 1919, olketa garem meeting for organizem preaching waka. Lo datfala taem, no evriwan lo kongregeson savve attendim meeting hia, olketa wea garem waka for givimaot literature nomoa savve attend. Start lo year 1923, Service Meeting kamap wanfala taem lo month, and evriwan lo class or kongregeson savve attend. Gogo lo 1928, olketa talem evri kongregeson for garem Service Meeting evri week. Lo 1935, The Watchtower encouragem evri kongregeson for storyim information insaed lo Director (wea bihaen iumi kolem Informant, and bihaen moa hem, Kingdom Ministry Bilong Iumi) lo Service Meeting. Gogo evri kongregeson garem datfala meeting evri week.

¹⁹ Distaem midol week meeting blo iumi helpem iumi for duim gud ministry. (Matt. 10:5-13) Sapos iu garem copy blo meeting buk, waswe, iu studyim and followim olketa idea wea stap insaed taem iu duim ministry?

20-22. (a) Why nao iumi rememberim dae blo Jesus? (b) Wanem gud samting nao iu kasem from wei for attendim Memorial evri year?

²⁰ Jesus talem olketa follower blo hem for rememberim dae blo hem go kasem taem hem kam. Olsem Pasova celebration, Memorial blo dae blo Christ hem kamap wantaem lo year. (1 Cor. 11:23-26) Evri year staka million pipol kam lo disfala meeting. Meeting hia remindim olketa anointed Christian lo privilege wea olketa garem for rul witim Christ lo Kingdom blo God. (Rome 8:17) And tu, hem for remindim olketa nara sheepsheep for showimaot respect and for faithful lo King lo Kingdom blo God.—John 10:16.

²¹ Brata Russell and olketa fren blo hem luksavve hem important for celebratem Evening Kaikai blo Lord, and olketa shud duim datwan wantaem nomoa lo year. Watch Tower blo April 1880, hem sei: “Staka year finis mifala lo Pittsburgh savve celebratem evri year . . . Pasova [Memorial] and kaikaim bred and drinkim wine wea hem piksarem body and blood blo Lord blo iumi.” Gogo olketa convention savve kamap lo taem blo  Memorial. Firstaem for kaen hipap olsem kamap hem lo 1889, wea 225 attend and 22 nao olketa baptaes.

²² Distaem, Memorial celebration hem no part lo convention program, bat iumi savve invaetem pipol for hipap witim iumi lo Kingdom Hall or lo eni ples wea iumi rentim. Lo 2013, winim 19 million pipol hipap for rememberim dae blo Jesus. Hem wanfala privilege for iumi attendim Memorial, and for invaetem olketa narawan for hipap witim iumi lo disfala barava important naet! Waswe, iu waka hard for invaetem staka pipol for kam lo Memorial evri year?

23. Hao nao tingting blo iu lo wei for hipap tugeta lo olketa meeting?

²³ Olketa faithful servant blo Jehovah no ting lo wei for hipap tugeta olsem wanfala hevi. (Heb. 10:24, 25; 1 John 5:3) Olsem example, King David laekem tumas for go lo haos blo Jehovah for worship. (Sams 27:4) Hem enjoyim tumas for hipap tugeta witim olketa narawan wea lovem God. (Sams 35:18) And tingim example blo Jesus. Nomata taem hem pikinini, hem laekem tumas for stap lo haos blo Dadi blo hem for worship.—Luke 2:41-49.

24. Taem iumi attendim olketa meeting, hao nao datwan helpem iumi?

²⁴ Taem iumi attendim olketa meeting, iumi showim iumi lovem Jehovah and iumi laek for strongim olketa brata and sista. Iumi showimaot tu iumi laek for lanem wanem iumi shud duim for stap anda lo Kingdom blo God, bikos iumi kasem training olsem lo olketa meeting, assembly, and lo olketa convention blo iumi. And tu, olketa meeting training iumi for savve hao for teach and hem strongim iumi for no givap for duim wanfala lo olketa barava important waka wea Kingdom blo God duim distaem. Datfala waka hem for mek-disaepol and teachim pipol for kamap olketa disaepol blo King blo iumi, Jesus Christ. (Readim Matthew 28:19, 20.) Tru nao, taem iumi hipap tugeta lo olketa meeting hem showimaot Kingdom blo God hem real samting lo iumi each wan. Iumi laek for evritaem tinghae lo olketa meeting blo iumi!