1-3. Wanem nao Jesus duim for mekem preaching waka kamap moa big, and datwan mekem olketa wanem kwestin nao kamap?

 JESUS preach lo evri ples lo Galilee for tufala year. (Readim Matthew 9:35-38.) Hem kasem staka taon and vilij, and teach lo olketa sinagog and preachim gud nius abaotem Kingdom. Evri ples hem preach staka pipol followim hem. Jesus luksavve “staka samting nao stap for harvestim,” and hem needim staka wakaman.

² Wanem nao Jesus duim for mekem preaching waka kamap big? Hem sendem 12-fala aposol blo hem for “preach abaotem Kingdom bilong God.” (Luke 9:1, 2) Maet olketa aposol laek for savve hao nao bae olketa duim waka hia. Bifor Jesus sendem olketa go, hem givim sem samting wea Dadi blo hem lo heven givim lo hem, hem nao for trainim olketa lo kaenfala wei.

³ Diswan mekem staka kwestin kamap: Wanem training nao Jesus kasem from Dadi blo hem? Wanem training nao Jesus givim lo olketa aposol blo hem? And waswe distaem, Jesus trainim olketa follower blo hem tu for duim ministry blo olketa? Sapos olsem, wanem nao hem duim?

4. Wanem taem and lo wea nao Jehovah teachim Jesus?

⁴ Jesus talem klia Dadi blo hem nao teachim hem. Taem hem duim ministry blo hem, hem sei: “Mi storyim nomoa samting wea Dadi teachim long mi.” (John 8:28) Wanem taem and lo wea nao Jehovah teachim Jesus? Stretawe bihaen God creatim firstborn Son blo hem, hem start nao for trainim hem. (Col. 1:15) Taem Jesus stap witim Dadi blo hem lo heven, hem spendem staka taem witim Hem so hem lisin and lukim evri samting wea datfala “Nambawan Teacher” duim. (Isa. 30:20, NW) From datwan, Son kasem nambawan training abaotem olketa wei, waka, and plan blo Dadi blo hem.

5. Wanem instruction nao Dadi givim lo Son abaotem wanem hem bae duim lo ministry blo hem lo earth?

⁵ Gogo, Jehovah teachim Son blo hem ministry wea hem bae duim lo earth. Tingim profesi wea storyim hao datfala Nambawan Teacher and firstborn Son fren gud tugeta. (Readim  Isaiah 50:4, 5, NW) Profesi hia sei Jehovah wekapem Son blo hem “evri morning.” Datwan mekem iumi tingim teacher wea wekapem student blo hem early lo morning for teachim hem. Wanfala buk wea story abaotem Bible hem sei: “Jehovah . . . teachim hem lo sem wei wea wanfala teacher teachim student blo hem. Hem teachim Jesus wanem for talem and hao for preach.” Lo heven, Jehovah teachim Son blo hem evri samting wea “hem laekem [Jesus] for talem.” (John 12:49) And tu, Dadi trainim Son blo hem hao for teach. a Taem Jesus lo earth, hem no iusim training wea hem kasem for duim ministry blo hem nomoa, bat hem trainim tu olketa follower blo hem for duim gud ministry blo olketa.

6, 7. (a) Wanem training nao Jesus givim lo olketa aposol blo hem, and datwan helpem olketa for duim wanem? (b) Jesus mek sure olketa follower blo hem distaem kasem wanem kaen training?

⁶ Lo start blo disfala chapter, wanem training nao Jesus givim lo olketa aposol blo hem? Lo Matthew chapter 10, Jesus storyim olketa instruction for duim ministry. Olketa instruction hia nao: wea for preach (verse 5, 6), wanem message for storyim (verse 7), olketa mas trustim Jehovah (verse 9, 10), wanem for talem taem olketa meetim haosholder (verse 11-13), wanem for duim taem man no laek lisin (verse 14, 15), and wanem for duim taem pipol persecutim olketa (verse 16-23). b Gudfala training wea Jesus givim lo olketa, hem helpem olketa for leadim waka for preachim gud nius lo first century C.E.

⁷ Waswe, lo taem blo iumi? Jesus, King lo Kingdom blo God, hem givim barava important assignment lo olketa follower blo hem, wea hem nao for “talemaot disfala gud nius abaotem Kingdom long evri ples long world mekem pipol long evri kantri mas herem.” (Matt. 24:14) Waswe, King trainim iumi for duim datfala important waka? Yes, hem duim! Nomata King stap lo heven, hem mek sure olketa follower blo hem kasem training lo hao for preach and hao for duim gud olketa spesol responsibility insaed kongregeson.

8, 9. (a) Wanem nao main goal blo Theocratic Ministry Skul? (b) Hao nao midol week meeting helpem iu for duim gud ministry?

⁸ Insaed staka year wea go pas, organization blo Jehovah iusim olketa assembly, convention, and kongregeson meeting olsem Service Meeting for trainim pipol blo God for duim ministry. Bat start lo olketa year blo 1940, olketa brata wea lead lo hedquarter organizem samfala skul for givim training.

⁹ Theocratic Ministry Skul. Lo chapter bifor diswan, hem storyim olketa startim disfala skul lo 1943. Waswe, goal blo disfala skul hem for trainim nomoa olketa student for savve hao for givim olketa gudfala tok lo olketa kongregeson meeting? Nomoa. Main goal blo disfala skul hem for trainim pipol blo God for iusim wei wea olketa savve story wea God givim for praisem Jehovah lo ministry. (Sams 150:6) Skul hia helpem  evri brata and sista wea joinim for kamap olketa gudfala wakaman blo Kingdom. Distaem iumi savve kasem training hia lo midol week meeting.

10, 11. Hu nao savve joinim Gilead Skul, and wanem nao goal blo disfala skul?

¹⁰ Watchtower Bible Skul blo Gilead. Olketa startim skul hia lo Monday, February 1, 1943. Olketa designim skul hia for trainim olketa pioneer and olketa narawan wea duim full-taem service for duim missionary waka lo olketa difren ples lo world. Bat start lo October 2011, olketa wea kasem training lo Gilead hem olketa wea insaed spesol full-taem service nomoa. Diswan minim olketa spesol pioneer, traveling overseer and waef, olketa Bethelite, and olketa missionary lo field wea no attendim datfala skul yet.

¹¹ Wanem nao goal blo disfala skul? Wanfala instructor wea teachim disfala skul for longtaem finis hem sei: “Goal blo skul hem for strongim faith blo olketa student lo wei for duim deep study lo Bible, and for helpem olketa garem olketa gudfala fasin wea olketa needim for deal witim olketa challenge wea olketa bae feisim lo assignment blo olketa. And tu, wanfala important goal blo disfala skul hem for mekem olketa student garem strong feeling for share lo waka for talemaot gud nius.”—Eph. 4:11.

12, 13. Lo wanem wei nao Gilead Skul helpem preaching waka wea gohed evriwea lo world? Storyim example.

¹² Lo wanem wei nao Gilead Skul helpem preaching waka wea gohed evriwea lo world? Start kam lo 1943, winim 8,500 brata and sista kasem training lo Gilead, c and olketa missionary wea kasem training lo Gilead serve lo winim 170 kantri lo world. Olketa missionary iusim gud training wea olketa kasem, showim gudfala example for strong lo ministry, and trainim olketa narawan tu for duim sem samting. Lo staka ples wea no garem staka pablisa, olketa missionary nao leadim preaching waka.

¹³ Tingim wanem happen lo Japan. Taem World War II gohed preaching waka lo Japan hem klosap nao for stop. Lo August 1949, tenfala pablisa nomoa stap lo Japan. Kasem end lo datfala year, 13-fala missionary wea kasem training lo Gilead busy for preach lo Japan. Bihaen, staka missionary moa go lo Japan. Lo firstaem, olketa missionary preach nomoa lo olketa bigfala taon, bihaen olketa muv moa lo olketa nara taon. Olketa missionary encouragem olketa Bible student blo olketa and olketa nara brata and sista for pioneer. Gud samting kamaot from hard waka blo olketa missionary. Distaem, winim 216,000 Kingdom pablisa stap lo Japan, and winim 83,000 brata and sista nao pioneer! d

14. Olketa Theocratic skul wea organization provaedem hem pruvim wanem? (Lukim tu box “ Olketa Skul wea Trainim Olketa Wakaman blo Kingdom.”)

¹⁴ Olketa nara theocratic skul. Pioneer Service Skul, Bible Skul for Olketa Hasband and Waef, and Bible Skul for Olketa  Singol Brata hem helpem staka brata and sista for kamap mature Christian and strong for leadim waka for talemaot gud nius. e Olketa skul hia barava pruvim King blo iumi barava teachim gud olketa follower blo hem for duim gud ministry blo olketa.—2 Tim. 4:5.

15. Olketa wea garem responsibility laek for followim example blo Jesus lo wanem wei?

¹⁵ Tingim bak profesi blo Isaiah wea storyim Jehovah teachim Jesus. Lo heven, Son lane “hao for story gud, mekem [hem] savve wanem for talem long man wea taed.” (Isa. 50:4, NW) Taem Jesus stap lo earth, hem followim datfala instruction, hem strongim olketa wea “waka hard and wea karem hevi samting.” (Matt. 11:28-30) Olketa brata wea garem olketa responsibility savve followim example blo Jesus for strongim olketa brata and sista. Dastawe, organization provaedem staka skul for helpem olketa brata wea fit for duim gud waka for lukaftarem olketa brata and sista.

16, 17. Wanem nao goal blo Kingdom Ministry Skul? (Lukim tu footnote.)

 ¹⁶ Kingdom Ministry Skul. First class blo disfala skul hem start lo March 9, 1959, lo South Lansing, New York. Olketa traveling overseer witim olketa elder lo kongregeson savve kasem invitation for attendim course hia for wanfala month. Bihaen, olketa transleitim course hia from English go lo staka languis, and gogo olketa brata evriwea lo world kasem training from datfala course. f

¹⁷ Lo 1962 Yearbook of Jehovah’s Witnesses, hem storyim goal blo disfala skul, hem sei: “Lo disfala world wea pipol busy tumas, elder wea lukaftarem kongregeson blo olketa witness blo Jehovah hem mas man wea savve hao for organize gud, mekem hem garem taem for lukaftarem evriwan lo kongregeson, and for olketa kasem gud samting. Lo semtaem hem mas balance and no letem olketa waka lo kongregeson for mekem hem no lukaftarem famili blo hem. Olketa elder lo kongregeson raonem world garem bigfala privilege for attendim Kingdom Ministry Skul for kasem training wea bae helpem olketa for  barava followim wanem Bible talem for olketa overseer duim!”—1 Tim. 3:1-7; Titus 1:5-9.

18. Hao nao evri pipol blo God kasem gud samting from Kingdom Ministry Skul?

¹⁸ Evri pipol blo God kasem gud samting from Kingdom Ministry Skul. Lo wanem wei? Taem olketa elder and ministerial servant followim wanem olketa lanem lo skul, olketa savve strongim olketa brata and sista olsem Jesus hem duim. Waswe, iu tinghae lo taem wanfala elder or ministerial servant talem kaenfala toktok lo iu, lisin lo iu, or visitim iu for encouragem iu? (1 Thess. 5:11) Olketa brata olsem olketa bigfala blessing lo kongregeson!

19. Wanem nao olketa nara skul wea Teaching Komiti lukaftarem, and olketa skul hia for wanem?

¹⁹ Olketa nara theocratic skul. Teaching Komiti blo Governing Body nao lukaftarem olketa nara skul wea trainim olketa brata wea garem olketa responsibility insaed lo organization. Olketa designim olketa skul hia for trainim olketa kongregeson elder, traveling overseer, and Branch Komiti member for duim gud waka blo olketa. Olketa training hia wea kam from Bible helpem olketa brata for strongim spiritual saed blo olketa, and for followim olketa Bible principle taem olketa lukaftarem olketa sheepsheep wea Jehovah trustim olketa for lukaftarem.—1 Pet. 5:1-3.

20. Why nao Jesus sei Dadi blo hem nao ‘tisim yumi evriwan,’ and wanem nao iu disaed strong for duim?

²⁰ Tru nao, King blo iumi Christ Jesus hem mek sure olketa follower blo hem mas kasem gudfala training. Evri training hia hem start kam from antap: Jehovah trainim Son blo hem, then bihaen, Son trainim olketa follower blo hem. Nomata olsem, Jesus sei Dadi blo hem ‘Jehovah nao tisim yumi evriwan.’ (John 6:45; Aesaea 54:13) Iumi disaed strong for iusim gudfala training wea King blo iumi givim. And hem gud for iumi tingim main goal blo evri training hia hem for helpem iumi strong lo spiritual wei mekem iumi fit for barava duim gud ministry blo iumi.