Dear Kingdom Pablisa:

TINGIM iu wanfala member blo Bethel famili wea stap lo Brooklyn. Lo Friday morning October 2, 1914, iu sidaon lo tebol for kaikai, and weitim Brata Charles Russell for kam. Seknomoa door lo dining rum hem open and Brata Russell kam insaed. Hem stop lelebet, olsem hem savve duim evritaem and sei lo Bethel famili “Gud morning evriwan.” Then winim wei for hem go sidaon lo hed blo tebol, hem klapem hand blo hem and talem wanfala hapi announcement: “Taem blo olketa kantri wea rul hem finis nao. Taem blo olketa king blo olketa for rul hem finis!” Iu no haedem nao hapi blo iu from hem samting wea iu weitim for longtaem! Iu witim evriwan lo Bethel barava hapi lo datfala nius and iufala klap for longtaem.

 Staka year nao go pas from taem wea Brata Russell talem datfala hapi nius. Start lo datfala taem kam kasem distaem, olketa wanem samting nao Kingdom duim? Hem duim staka samting. Jehovah iusim Kingdom for gohed klinim and trainim pipol blo hem, and hem duim datwan lo tu-thri thousand nomoa start kam lo 1914, and kasem distaem, hem winim eit million pipol. Olketa wanem gud samting nao iu kasem from olketa training hia?

Staka taem iumi savve herem olketa brata blo iumi sei, “organization blo Jehovah hem muv fast tumas!” and datwan hem tru. For tok stret, start kam lo 1914, datfala chariot wea piksarem organization blo Jehovah lo heven muv fast tumas, and bae iu luksavve lo datwan taem iu readim gud disfala buk. Olketa Kingdom pablisa iusim staka difren wei for talemaot gud nius evriwea lo world. Olketa iusim olketa niuspepa, march witim olketa saen, movie piksa, testimony card, phonograph, radio, and Internet tu.

From Jehovah blessim waka blo iumi, datwan mekem iumi for pablisim olketa Bible literature blo iumi lo winim 1,000 languis and iumi givimaot free. Olketa brata and sista willing for help for wakem olketa Kingdom Hall, Assembly Hall, and olketa branch office lo olketa rich kantri and lo olketa poor kantri tu. And taem natural disaster happen, olketa brata and sista showimaot love and kwiktaem go lo olketa ples wea kasem disaster. Diswan pruvim olketa hia “brata wea iu savve depend lo [olketa] taem iu kasem hard taem.”—Prov. 17:17, NW.

Samfala taem olketa bigman lo religion and olketa wea againstim iumi “iusim law for mek trabol,” bat staka taem wanem olketa duim hem mekem “datfala waka for talemaot gud nius hem gohed gud,” and datwan strongim faith blo iumi.—Ps. 94:20, NW; Phil. 1:12.

Hem wanfala privilege for iumi evri “nara wakaman” for waka tugeta. Plis tingim, mifala lovem iufala evriwan. Mifala prea dat wanem iufala lanem lo disfala buk bae helpem iufala for tinghae lo olketa spiritual samting wea iufala kasem.—Matt. 24:45.

Mifala barava tingim iufala,

Olketa brata blo iufala,

Governing Body blo Olketa Jehovah’s Witness