1, 2. Wanem nao bigfala samting wea happen lo history, and why nao olketa man no lukim?

 ENITAEM iu tingim, laef hem hao taem samfala big change happen lo history? Staka savve ting raonem. Bat tingim, sapos iu nao stap lo olketa important taem olsem, waswe bae iu lukim olketa main samting wea mekem olketa change hia kamap? Maet nomoa. Olketa samting wea spoelem olketa gavman wea rul, and wea fulap lo olketa history buk, staka taem pipol nating savve. Staka change wea happen lo history, hem lo haos blo olketa wea rul, lo olketa council meeting, or lo olketa office blo gavman. Nomata olsem, olketa change hia affectim staka pipol.

² Waswe lo bigfala samting wea happen lo history blo world? Datfala samting hem affectim staka million pipol. Nomata olsem, staka pipol no lukim. Iumi story abaotem taem Kingdom blo God start for rul lo heven, datfala gavman wea Christ rul insaed wea God promisim wea klosap nao for finisim olketa gavman lo world. (Readim Daniel 2:34, 35, 44, 45.) From iumi olketa man no lukim taem wea datfala important rul hem start, waswe iumi fit for sei Jehovah haedem datwan from iumi? Or waswe, hem redyim faithful pipol blo hem bifor datwan happen? Bae iumi lukim.

3-5. (a) Hu nao datfala “man wea . . .  talemaot spesol agrimen” wea Malakae 3:1 storyim? (b) Wanem nao bae happen firstaem, bifor “man wea . . . . talemaot spesol agrimen” hem kam lo temple?

³ Start bifor kam yet, Jehovah plan for redyim pipol blo hem for taem wea Kingdom wea Christ rulim hem start. Olsem example, lukim profesi lo Malakae 3:1: “Bae mi sendem mesenja blong mi fastaem fo redim rod blong mi. Seknomoa, Masta blong yufala wea yufala weitem, hemi kam nao long Tambuhaos blong hem. Ya, disfala man wea yufala barava laek fo lukim, bae hemi kam, an hemi talemaot spesol agrimen blong mi.”

⁴ Lo disfala taem wea profesi hia kamap tru, wanem taem nao Jehovah datfala “Masta” kam for chekim olketa wea waka insaed spiritual temple blo hem lo earth? Profesi gohed for talem hao Jehovah bae kam witim “man wea . . . talemaot spesol agrimen.” Hu nao datfala man? Hem nao Jesus Christ, King lo  Kingdom blo God! (Luke 1:68-73) Olsem wanfala niu ruler, hem bae chekim and klinim pipol blo God lo earth.—1 Pet. 4:17.

⁵ So hu nao datfala “mesenja” wea Malakae 3:1 story abaotem? Disfala “mesenja” wea profesi storyim bae kam firstaem bifor King lo Kingdom blo God hem stap. Lo olketa year bifor 1914, waswe, eniwan “redim rod” firstaem bifor King lo Kingdom blo God?

6. Hu nao duim waka olsem datfala “mesenja” wea kam firstaem for redyim pipol blo God for olketa samting wea bae happen?

⁶ For ansarem olketa kwestin olsem, iumi bae storyim lo disfala buk olketa nambawan samting wea happen lo history blo pipol blo Jehovah distaem. History showim, lo olketa year blo 1870, wanfala smol grup blo olketa faithful pipol kamaot from olketa laea Christian. Datfala grup nao hem Olketa Bible Student. Olketa wea leadim datfala smol grup, hem Charles Russell and olketa fren blo hem duim waka olsem datfala “mesenja” for givim olketa spiritual kaikai lo pipol blo God and redyim olketa for olketa samting wea bae happen. Bae iumi storyim fofala samting wea “mesenja” hia duim.

7, 8. (a) Lo olketa year blo 1800, olketa hu nao start for talemaot laea teaching wea sei soul no savve dae? (b) Charles Russell and olketa fren blo hem talemaot olketa wanem kaen laea teaching?

⁷ Olketa Bible Student hia prea taem olketa studyim Bible. Olketa disaedem samting, putim tugeta and pablisim olketa truth wea stap lo Bible. For staka year nao olketa religion wea sei olketa Christian teachim samting wea no tru, staka lo olketa teaching hia followim olketa kastom blo man. Wanfala example lo diswan hem teaching wea sei soul blo man no savve dae. Lo olketa year blo 1800, samfala student blo Bible studyim gud datfala teaching and lukim datfala teaching hem no insaed lo Bible. Olketa man olsem Henry Grew, George Stetson, and George Storrs raetem and no fraet for talemaot datfala laea teaching blo Satan. a Samting wea olketa talem barava affectim Charles Russell and olketa fren blo hem.

⁸ Smol grup blo Olketa Bible Student hia luksavve olketa nara teaching wea religion teachim wea join witim soul wea no savve dae hem no tru and hem mekem man konfius. Olsem example, datfala teaching wea sei evri gud pipol bae go lo heven and God bae panisim nogud pipol for safa lo hellfire. Russell and olketa fren blo hem no fraet for talemaot olketa laea teaching hia lo staka article, olketa buk, olketa smol pepa, olketa tract, and lo olketa tok wea olketa pablisim lo niuspepa.

9. Wanem nao Zion’s Watch Tower talem abaotem laea teaching abaotem Trinity?

⁹ Olketa Bible Student hia showim tu teaching wea staka pipol bilivim abaotem Trinity hem no tru. Zion’s Watch Tower lo 1887 sei: “Olketa Scripture talem klia hao Jehovah hem hae winim Lord blo iumi Jesus and tufala no semsem.” Samting wea interesting hem disfala teaching abaotem Trinity, wea olketa sei “thrifala God hem wanfala nomoa, and wanfala God lo thrifala  evriwan, hem samting wea staka pipol nao bilivim and acceptim. From staka pipol bilivim and acceptim olketa laea teaching hia showimaot church no duim eni samting for aotem olketa laea teaching blo enemy.”

10. Wanem nao main samting wea Watch Tower story abaotem wea showim 1914 hem important year?

¹⁰ Title lo disfala magasin, Zion’s Watch Tower and Herald of Christ’s Presence showimaot main samting wea hem story abaotem hem olketa profesi wea join witim taem Christ stap. Olketa faithful anointed brata wea raetem samfala article lo datfala magasin luksavve profesi blo Daniel abaotem “sevenfala taem” hem join witim plan blo God abaotem taem wea Christ bae rul lo Kingdom. Lo olketa year start lo 1870, olketa anointed brata luksavve 1914 nao hem year wea sevenfala taem bae finis. (Dan. 4:25, NW; Luke 21:24) Nomata olketa brata blo iumi lo datfala taem no minim gud why datfala year hem important, olketa gohed talemaot wanem olketa savve lo hem lo evri farawe ples and iumi tu kasem gud samting from wanem olketa duim.

11, 12. (a) Hu nao Brata Russell mekhae lo hem for olketa samting wea hem teachim? (b) Wanem gud samting nao kamaot from waka wea Russell and olketa fren blo hem duim lo olketa year bifor 1914?

¹¹ Russell and olketa faithful brata hia no enitaem laek for mekhae lo olketa seleva bikos olketa minim and talemaot olketa  important spiritual truth hia. Russell praisem olketa narawan wea talemaot truth firstaem lo hem. And tu, Russell mekhae lo Jehovah God wea teachim pipol blo Hem olketa samting wea olketa need for savve and lo taem wea olketa need for savve lo datwan. So Jehovah blessim hard waka wea Russell and olketa fren blo hem duim for separatem truth from olketa laea teaching. Lo olketa year bihaen, olketa gohed for kamap difren from olketa religion wea sei olketa Christian.

¹² Waka wea olketa faithful brata hia duim for sapotim olketa tru teaching lo olketa year bifor 1914 hem barava interesting! Taem iumi ting bak lo The Watch Tower and Herald of Christ’s Presence, lo November 1, 1917, hem sei: “Staka million pipol distaem kamap free from olketa laea teaching blo hellfire and olketa nara laea teaching and olketa no fraet nao . . . Insaed foti-fala year wea go pas Truth gohed for grow and hem bae gohed for kamap big go kasem taem hem kasem evriwea lo earth. And olketa wea againstim Truth bae trae for stopem mekem hem no kasem evriwea lo earth bat wanem olketa duim hem olsem olketa trae iusim brum for stopem bigfala wave lo sea.”

13, 14. (a) Wanem nao “mesenja” duim for redyim road for King wea bae rul lo Kingdom blo God? (b) Wanem nao iumi savve lanem from olketa brata blo iumi bifor?

¹³ Tingim diswan, waswe, pipol blo God bae redi for taem wea Christ stap sapos olketa no luksavve Jesus hem difren from Dadi blo hem Jehovah? Nomoa nao! Bae olketa no redi tu sapos olketa tingse for laef olowe hem samting wea evriwan nao bae kasem, and hem no wanfala spesol present wea olketa wea followim example blo Jesus nomoa bae kasem. And tu, sapos olketa tingse God mekem pipol for safa lo hellfire and no eni hope stap for olketa! Tru nao, datfala “mesenja” barava redyim road for King wea bae rul lo Kingdom blo God!

¹⁴ Waswe, lo taem blo iumi distaem? Wanem nao iumi savve lanem from olketa brata blo iumi lo bifor? Olsem olketa brata hia, iumi shud interest for readim and studyim gud Bible. (John 17:3) Taem disfala world wea laekem tumas material samting hangre lo spiritual wei, for iumi gohed strong iumi laek gohed for kaikaim olketa spiritual kaikai!—Readim 1 Timothy 4:15.

15. Gogo, wanem nao Olketa Bible Student luksavve lo hem? (Lukim tu footnote.)

¹⁵ Olketa Bible Student lanem hao hem important for go aot from olketa church blo world. Lo 1879, Watch Tower kolem lo “church blo Babylon.” Waswe, diswan minim paoa blo pope? Hem minim Roman Catholic Church? Olketa nara church sei Babylon wea Bible storyim, hem minim Catholic Church. Bat gogo, Olketa Bible Student luksavve “Babylon” hem piksarem evri church wea sei olketa Christian distaem. Why nao iumi sei olsem? Bikos olketa church hia teachim olketa laea teaching olsem iumi bin storyim kam lo olketa paragraf antap. b Gogo  olketa pablikeson blo iumi start for talem stret wanem nao olketa member lo olketa church blo Babylon, wea garem gudfala heart shud duim.

16, 17. (a) Wanem nao Volume III blo Millennial Dawn and Watch Tower talem pipol mas duim for lusim false religion? (b) Why nao staka no followim olketa warning? (Lukim footnote.)

¹⁶ Olsem example, lo 1891, Volume III blo Millennial Dawn storyim God rejectim disfala Babylon finis, and sei: “Evri church wea sei olketa Christian God rejectim olketa.” Hem sei tu evriwan wea “no laekem and followim olketa laea teaching mas go aot distaem from hem.”

¹⁷ Lo January 1900, Watch Tower givim kaonsel lo olketa wea nem blo olketa still stap lo olketa church, and wea talem excuse for sei, olketa luksavve and sapotim truth, bat olketa no go staka taem lo lotu. Article hia sei: “Waswe, hem stret for joinim Babylon samfala taem and samfala taem nomoa? Waswe, kaen wei for obey olsem God hapi lo hem and acceptim? Barava nomoa nao. Taem hem [member blo church] joinim datfala church, hem mekem wanfala agreement for joinim datfala church, and hem shud faithful for followim evri samting wea insaed datfala agreement go kasem . . . taem hem talemaot hem no member blo datfala church nao or hem aot from datfala church.” For staka year finis, staka followim datfala message. c Olketa servant blo Jehovah mas lusim false religion.

18. Why nao pipol mas go aot from Bigfala Babylon?

¹⁸ Sapos olketa no talemaot staka taem disfala warning for go aot from Bigfala Babylon, waswe, Christ wea hem just King lo Kingdom bae garem wanfala grup blo anointed servant lo earth? Barava nomoa nao. Only olketa Christian wea no tekpart lo eni samting wea join witim Babylon savve worshipim Jehovah “followim holy spirit and followim samting wea tru.” (John 4:24) Waswe, iumi distaem tu strong for go aot from false religion? Iumi laek for gohed obeyim disfala komand: “Pipol bilong mi, . . . iufala mas go aot from hem”!—Readim Revelation 18:4.

19, 20. For encouragem pipol blo God for hipap tugeta for worship, wanem nao Watch Tower talem?

¹⁹ Olketa Bible Student lanem hao hem important for hipap tugeta for worship lo eni ples wea hem fitim. Hem no inaf for olketa tru Christian go aot from false religion. Bat hem important for olketa mas duim samting tu for tru worship. Start from olketa first Watch Tower magasin, hem encouragem olketa wea readim for hipap tugeta for worship. Olsem example, lo July 1880, Brata Russell storyim samting wea happen taem hem tour for givim olketa tok, hem storyim hao staka lo olketa meeting hia barava encouragem staka. Then hem askem olketa for raetem report abaotem hao olketa gohed lo spiritual wei and sendem go. Samfala lo olketa report hia olketa pablisim lo Watch Tower. Why nao olketa duim olsem? Hem “for mifala  evriwan savve . . . hao nao Lord helpem iu and sapos iu gohed for hipap witim olketa wea garem sem faith.”

²⁰ Lo 1882, olketa raetem wanfala article lo Watch Tower wea garem title “Assembling Together.” Article hia encouragem olketa Christian for garem olketa meeting “for helpem olketa kasem gud samting, kasem encouragement, and for strongim olketa.” Hem sei: “Sapos eniwan lo iufala no skul or no garem bigfala savve hem olraet nomoa. Letem olketa tekem kam Bible, pepa, and pencil blo olketa and iusim olketa nara tul olsem Bible Concordance for helpem iufala. Chusim wanfala subject. Prea for Holy Spirit helpem iufala for minim, then iufala readim, ting raonem, comparem wanfala scripture witim nara scripture and iufala bae minim gud truth.”

21. Kongregeson lo Allegheny, Pennsylvania showim wanem kaen example for attendim olketa meeting and duim shepherding kol?

²¹ Hedquarter blo Olketa Bible Student hem lo Allegheny lo Pennsylvania, wea hem lo U.S.A. Lo there olketa showim gud example for hipap tugeta for followim kaonsel blo God wea stap lo Hebrew 10:24, 25. (Readim.) Bihaen staka year, wanfala olo brata wea nem blo hem Charles Capen tingim taem hem young  and hem attendim olketa meeting hia. Hem raet olsem: “Mi tingim yet wanfala verse lo Bible wea olketa paintim lo wall lo wanfala assembly hall blo Society. ‘Wanfala hem Lord blo iufala, nomata Christ tu, and iufala evriwan olketa brata.’ Mi tingim datfala verse evritaem. Pipol blo Jehovah no eniwan hem hae winim narawan.” (Matt. 23:8) And tu, Brata Capen storyim olketa gudfala tok lo olketa meeting, olketa encouragem narawan, and hao Brata Russell waka hard for evritaem duim shepherding kol lo each wan lo kongregeson.

22. Wanem nao olketa faithful wan duim taem olketa kasem encouragement for attendim olketa meeting, and wanem nao iumi savve lanem from olketa?

²² Olketa faithful wan followim disfala example and olketa instruction wea olketa kasem. Olketa kongregeson start lo olketa nara ples olsem lo Ohio, and Michigan, then lo evri nara ples lo North America and lo olketa nara kantri. Tingim diswan, waswe, olketa faithful wan bae redi for taem wea Christ hem stap, sapos olketa no kasem training for obeyim kaonsel for hipap tugeta for worship? Barava nomoa nao! So waswe lo iumi distaem? Iumi tu need for barava waka hard for evritaem attendim olketa Christian meeting, mekius lo evri chance wea iumi garem for worship tugeta and for strongim narawan.

23. Wanem nao Watch Tower talem for showimaot evri anointed wan mas preach abaotem truth?

²³ Olketa Bible Student lanem hao evri anointed wan mas preach abaotem truth. Watch Tower lo 1885 sei: “Iumi mas tingim, evri member blo olketa anointed wan kasem anointing for preach and for duim ministry.” (Aesaea 61:1) Watch Tower lo  1888, talem disfala encouragement: “Waka wea God givim lo iumi hem klia . . . Sapos iumi no duim and excuse, hem showim iumi olketa servant wea lesy and hem pruvim iumi no fit for kasem anointing.”

24, 25. (a) Wanem nao Russell and olketa fren blo hem duim? (b) Wanem nao wanfala pioneer talem abaotem waka blo hem lo taem wea no garem “eni trak”?

²⁴ Brata Russell and olketa fren blo hem encouragem pipol for preach, and tu, olketa start for wakem olketa tract wea olketa kolem lo Bible Students’ Tracts, wea bihaen hem kamap Old Theology Quarterly. Olketa wea readim Watch Tower magasin kasem olketa tract hia and givim free for olketa lo pablik.

²⁵ Samfala spendem staka taem blo olketa lo ministry. Wanfala lo olketa hem Charles Capen wea iumi storyim finis. Hem sei: “Mi iusim olketa map wea United States Government Geological Survey wakem, for duim full territory lo Pennsylvania. Olketa map hia showim evri road, datwan mekem hem isi for kasem evri part lo olketa smol taon hia nomata man wakabaot. Samfala taem mi wakabaot for thrifala day for faendem pipol wea orderim olketa volume lo buk Studies in the Scriptures, bihaen mi savve haerem horse and wagon wea horse pullim for go and givim order blo pipol. Staka taem mi savve sleep lo olketa farm. Lo datfala taem no eni trak.”

26. (a) Why nao pipol blo God mas duim preaching waka mekem olketa redi for taem wea Christ rul? (b) Olketa wanem kwestin nao iumi need for askem iumiseleva?

²⁶ For duim preaching waka olsem olketa brata hia, man mas strong and no fraet. Waswe, olketa tru Christian bae redi for taem wea Christ hem rul, sapos olketa no savve hao preaching waka hem important? Barava nomoa nao! Waka for preach hem wanfala part lo important saen wea showimaot Christ hem stap. (Matt. 24:14) Pipol blo God need for redi for mekem disfala waka for sevem laef hem main samting lo laef blo olketa. Distaem tu iumi need for askem iumiseleva: ‘Waswe, preaching waka hem main samting lo laef blo mi? Waswe, mi mekem samfala sakrifaes mekem mi savve spendem staka taem lo preaching waka?’

27, 28. Wanem nao aposol John lukim lo vision, and wanem nao Satan and olketa demon blo hem duim taem Kingdom blo God start for rul?

²⁷ Gogo, hem kasem nao year 1914. Olsem iumi storyim lo start blo chapter, no eniwan lukim olketa nambawan samting wea happen lo heven. Nomata olsem, aposol John lukim lo vision, olketa samting wea happen lo heven. Tingim diswan, John lukim “wanfala barava spesol saen” lo heven. “Woman” blo God, wea minim organization blo hem lo heven, hem babule and bornem wanfala boy. Disfala tokpiksa pikinini wea verse storyim, bae klosap “iusim wanfala iron stik for rulim evri kantri long world.” Bat taem pikinini hia born, “olketa kwiktaem tekem hem go long God and long throne bilong hem.” Wanfala voice lo skae singaot big olsem: “God bilong iumi hem sevem olketa man and paoa bilong hem showaot nao. Kingdom bilong  hem start for rul and Christ bilong hem start for iusim paoa bilong hem.”—Rev. 12:1, 5, 10.

²⁸ Iumi barava sure, wanem John lukim lo vision showimaot Kingdom start for rul. Nomata datwan hem nambawan samting bat no evriwan nao hapi lo hem. Satan and olketa demon blo hem faet againstim olketa faithful angel, wea Michael, or Christ nao leadim olketa. Wanem nao happen? Bible sei: “Olketa torowem go daon long earth datfala big snek witim olketa angel bilong hem. Hem nao datfala snek bilong bifor kam wea nem bilong hem Devil and Satan, wea hem laea long evriwan long earth.”—Rev. 12:7, 9.

29, 30. Bihaen Christ start for rulim Kingdom blo God, olketa wanem samting nao happen (a) lo earth? (b) lo heven?

²⁹ Staka year bifor 1914, Olketa Bible Student talem hao olketa trabol bae start lo datfala year. Bat olketa tu no savve hao nao olketa samting hia bae happen. Olsem vision wea John lukim showimaot, Satan bae start for mekem olketa bigfala trabol lo world: “Earth and sea bae kasem barava nogud samting bikos Devil hem kam daon long iufala and hem kros fogud from hem savve hem garem lelebet taem nomoa.” (Rev. 12:12) Lo 1914, World War I kamap and datfala saen wea showimaot Christ hem stap and hem rul, start for showaot lo full world. “Olketa last day” blo disfala world hem start.—2 Tim. 3:1.

³⁰ Bat olketa lo heven barava hapi. Olketa torowem kam daon Satan and olketa demon blo hem. Buk blo John sei: “So iufala evriwan wea stap long heven, iufala mas hapi!” (Rev. 12:12.) From Satan and olketa demon blo hem no stap lo heven and Jesus hem kamap King, Kingdom wea hem rulim redi for duim samting for pipol blo God lo earth. Wanem samting nao bae Kingdom duim? Olsem iumi lukim lo start blo disfala chapter, Christ wea hem “man wea . . . talemaot spesol agrimen” bae duim samting firstaem for mekem pipol blo God lo earth for klin. Wanem nao datwan minim?

31. Wanem nao Malachi talem abaotem datfala taem for klinim pipol blo God, wanem nao showimaot disfala profesi hem kamap tru? (Lukim tu footnote.)

³¹ Profesi blo Malachi talem hao datfala taem for klinim olketa bae no isi. Hem sei: “Hu nao hemi fitim fo stanap strong long datfala de wea man ya hemi kam? Ya, no eniwan save stanap taem hemi lukim hem. Bae hemi olsem man hu hemi bonem silva fo aotem ravis blong hem, o olsem man hu hemi yusim sop fo aotem doti long kaleko.” (Malakae 3:2) Olketa toktok hia barava tru nao! Start lo 1914, pipol blo God lo earth feisim staka bigfala test and olketa hard taem. Taem World War I gohed, staka lo Olketa Bible Student kasem barava nogud persecution and go lo prison. d

32. Wanem hard taem nao pipol blo God feisim bihaen lo 1916?

³² Olketa hard taem kamap insaed lo organization tu. Lo 1916, Brata Russell hem dae taem hem 64 years, and staka brata  and sista barava seke fogud. Samfala lo olketa mekhae tumas lo example blo hem. Nomata Brata Russell no laekem eniwan for mekhae lo hem, samfala mekhae lo hem gogo hem olsem olketa worshipim hem. Staka tingse olketa change wea kamap abaotem truth hem finis nao taem hem dae, and samfala barava no laek for followim olketa change wea kamap. From datwan wei for apostate kamap and mekem organization hem divaed.

33. Wanem nao happen lo pipol blo God taem olketa samting wea olketa expectim hem no happen?

³³ Nara test wea olketa feisim hem taem samting wea olketa expectim hem no kamap tru. Nomata Watch Tower showimaot 1914 hem year wea olketa nara kantri rul bae finis, olketa brata no minim yet wanem nao bae happen lo datfala year. (Luke 21:24) Lo tingting blo olketa, Christ bae tekem olketa anointed wan for rul witim hem lo heven lo 1914. Olketa samting wea olketa expectim hem no happen. Klosap lo end blo 1917, The Watch Tower talem 40 year for harvest bae finis lo midol lo year 1918. Nomata olsem, preaching waka hem no finis, hem gohed for grow. Magasin hia sei taem blo harvest hem finis, bat taem for kolektem leftova kaikai bae gohed yet. Staka stop for worshipim Jehovah bikos wanem olketa expectim hem no happen.

34. Wanem kaen test nao kamap lo 1918 wea mekem olketa brata wari, and why nao olketa bigman lo religion tingse pipol blo God “dae” nao?

³⁴ Lo 1918 nara test kamap wea mekem olketa brata wari. Bihaen Charles Russell dae, olketa enemy arrestim Joseph Rutherford witim nara sevenfala brata wea leadim pipol blo God. Olketa accusim olketa brata and putim olketa for stap longtaem lo prison lo Atlanta, Georgia, U.S.A. For lelebet taem, luk olsem waka wea pipol blo God duim hem stop nao. Staka bigman lo olketa religion wea sei olketa Christian, barava hapi. Olketa tingse from “olketa brata wea lead” stap lo prison, hedquarter lo Brooklyn hem klos daon. And pipol againstim preaching waka lo America and Europe, datwan mekem olketa tingse Olketa Bible Student “dae” nao, or no mek-trabol moa. (Rev. 11:3, 7-10) Olketa barava rong!

35. Why nao Jesus letem olketa hard samting for kasem pipol blo hem, and wanem nao hem duim for helpem olketa?

³⁵ Olketa enemy hia no savve hao Jesus letem olketa hard samting hia kasem pipol blo hem bikos lo datfala taem Jehovah nao hem “olsem man hu hemi bonem silva an gol fo hemi kamap klin.” (Malakae 3:3) Jehovah and Son blo hem tufala sure olketa wea faithful lo taem blo olketa test hia wea olsem fire, bae kamap klin, and redi for barava duim gud waka for King. Lo start blo 1919, hem klia hao spirit blo God duim samting wea olketa enemy tingse bae hard for happen. Olketa wea faithful olketa start moa! (Rev. 11:11) Lo datfala taem, Christ fulfillim wanfala main part lo saen blo olketa last day. Hem chusim “datfala wakaman wea faithful and wise,” wea hem wanfala smol  grup blo olketa anointed man wea bae leadim pipol blo God for givim olketa spiritual kaikai lo barava taem.—Matt. 24:45-47.

36. Wanem nao showim pipol blo God start moa lo spiritual wei?

³⁶ Lo March 26, 1919, Brata Rutherford and olketa nara brata release from prison. Stretawe olketa planim convention for kamap lo September blo datfala year. Olketa plan tu for start wakem mek-tu magasin wea olketa kolem The Golden Age. Disfala magasin olketa pablisa iusim lo ministry witim The Watch Tower. e Lo sem year, olketa printim firstfala Bulletin, wea distaem hem nao Christian Laef and Ministry blo Iumi—Meeting Buk. Start lo taem wea olketa printim, datwan barava help saed lo ministry. Tru nao, start lo 1919, main samting olketa pablisa kasem encouragement for duim hem haos-tu-haos ministry.

37. Lo olketa year bihaen 1919, wanem nao samfala wea lusim truth duim?

³⁷ Preaching waka gohed for mekem olketa servant blo Christ for klin. Olketa wea praod and wea lukdaonem narawan, no willing for duim disfala waka wea olketa hambol wan duim. Olketa wea no laek for duim disfala waka, lusim olketa faithful servant hia. Lo olketa year bihaen 1919, samfala wea lusim truth olketa no hapi so olketa tok spoelem and raetem olketa laea  samting, gogo olketa saed witim tu olketa wea persecutim olketa faithful servant blo Jehovah.

38. From olketa follower blo Christ lo earth gohed grow and winim evri hard taem, wanem nao datwan pruvim lo iumi?

³⁸ Nomata olketa hard taem hia gohed, namba blo olketa follower blo Christ lo earth gohed for grow and olketa kamap strong lo spiritual wei. From olketa gohed grow and winim evri hard taem wea olketa kasem start lo datfala taem, datwan barava pruvim lo iumi hao Kingdom blo God hem rul! Thru lo Son blo hem and Kingdom wea Son blo hem rulim, God gohed for sapotim and blessim disfala smol grup blo olketa hia wea no perfect for gohed win ovarem Satan and disfala nogud world.—Readim Aesaea 54:17.

39, 40. (a) Wanem nao samfala samting wea disfala buk story abaotem? (b) Wanem gud samting nao bae iu kasem taem iu studyim disfala buk?

³⁹ Lo olketa chapter wea bae kamap bihaen, iumi bae storyim wanem nao Kingdom blo God duim finis lo earth insaed handred year wea hem start for rul lo heven. Each sekson blo disfala buk bae storyim olketa spesol samting wea Kingdom duim lo earth. Wanfala review box hem stap lo evri chapter, diswan bae helpem iumi each wan for barava sure Kingdom hem rul distaem. Lo olketa lastfala chapter blo disfala buk, iumi bae story raonem wanem nao Kingdom bae duim lo future taem hem distroem olketa wicked pipol and mekem earth kamap paradaes. Taem iu studyim disfala buk, wanem gud samting nao bae iu kasem?

⁴⁰ From iu garem faith lo Kingdom blo God, Satan laek for distroem datwan. Bat Jehovah laek for strongim faith blo iu. Strongfala faith bae protectim and helpem iu for gohed strong. (Eph. 6:16) Dastawe, mifala barava laekem iu for studyim gud disfala buk. Gohed for askem, ‘Waswe, mi bilivim Kingdom blo God hem barava real?’ Sapos distaem iu bilivim Kingdom hem real, bae no eni samting savve spoelem faith blo iu. Bae iu stap lo taem evriwan bae lukim Kingdom blo God hem gohed for rul!