TINGIM, wanday iu preach from haos tu haos, then iu herem siren blo police trak hem krae and kakam klosap. Taem iu story lo next haosholder, wanfala police trak kam stop and pablisa wea iu partner witim lukluk strong lo hem. Wanfala policeman kamaot and sei: “Waswe, iutufala nao gogo raon for storyim Bible lo pipol? Staka komplenim iufala!” Iu story kaen lo hem and sei, iutufala Olketa Jehovah’s Witness. Wanem nao bae happen bihaen?

Bae iumi lukim samting wea happen lo history. Lo olketa year wea go pas, hao nao gavman lo kantri wea iu stap treatim Olketa Jehovah’s Witness? Waswe, pipol garem freedom for worship? Sapos olsem, diswan hem bikos olketa brata and sista blo iu waka hard lo staka year wea go pas for “iusim law for defendim datfala gud nius and for kasem raet for preachim datwan.” (Phil. 1:7) Nomata wea iu stap, wei for ting raonem olketa kot case wea Olketa Jehovah’s Witness winim, savve barava strongim faith blo iu. Lo disfala sekson, iumi bae storyim samfala lo olketa kot case hia. Olketa kot case hia wea iumi winim barava pruvim Kingdom hem real bikos iumi no savve duim diswan witim strong blo iumiseleva!