SEKSON 7
Olketa Promis blo Kingdom—Wakem Evri Niu Samting
IU AOTEM wanfala big apple from branch wea hem hange lo hem. Iu smelem firstaem bifor iu putim go insaed basket. Klosap full day nao iu waka, bat iu nating taed nomoa, iu redi for duim samfala waka moa. Mami blo iu harvestim nara tree klosap, and hapi tumas for waka and story witim olketa nara member lo famili and olketa fren wea help tu for harvest. Hem luk young fogud. Iu tingim bak lukluk blo hem taem iu pikinini yet staka year go finis. Iu hard for bilivim hem olo lo nogud world wea go pas finis. Iu lukim hao hem bin sik and body blo hem gogo daon. Iu holem hand blo hem taem hem brithim last brith blo hem, and iu krae saed lo grev taem olketa berem hem. Nomata olsem, hem lo hia nao witim staka narawan wea laef bak and healthy moa!
Taem olsem bae kam. Iumi sure lo datwan bikos olketa promis blo God hem evritaem kamap tru. Lo disfala sekson, bae iumi storyim samfala promis blo Kingdom wea klosap nao bae kamap tru bifor Armageddon hem start. Bae iumi storyim tu samfala nambawan promis blo Kingdom wea bae kamap tru bihaen datwan. Iumi bae hapi tumas for lukim taem Kingdom blo God rulim full earth, and wakem evri niu samting!
LO DISFALA SEKSON
CHAPTER 21
Kingdom blo God Finisim Olketa Enemy blo Hem
Iu savve redi distaem for war blo Armageddon.
CHAPTER 22
Kingdom Duim Samting God Laek for Duim lo Earth
Wanem nao mekem iu barava sure olketa promis blo Jehovah bae kamap tru?