1, 2. (a) Why nao hem no isi samfala taem for tingim Paradaes bae kamap lo earth? (b) Wanem nao savve helpem iumi for strongim faith blo iumi lo olketa promis blo God?

 WANFALA faithful brata kam lo meeting nomata hem waka full day and hem taed. Hem kasem hard taem from boss treatim hem nogud, wari abaotem famili blo hem, and warim tu waef blo hem wea safa from sik blo hem. Taem hem herem music for startim meeting, hem brith big, hem feel gud and hapi for stap lo Kingdom Hall witim olketa brata and sista. Datfala song hem abaotem laef lo Paradaes, and olketa toktok lo datfala song talem hem for piksarem hemseleva lo Paradaes. Brata hia laekem tumas datfala song, and taem hem singsing witim famili blo hem, datfala hope for future comfortim hem.

² Waswe, enitaem iu feel olsem tu? Klosap iumi evriwan savve feel olsem. For tok stret, laef lo disfala world savve mekem hem no isi for iumi tingim hao laef lo Paradaes bae kamap tru. Lo disfala world, “evri samting hem hard tumas,” and laef distaem hem no olsem Paradaes. (2 Tim. 3:1) Wanem nao savve helpem iumi for tingim disfala hope hem tru samting? Hao nao iumi barava sure klosap nao Kingdom blo God bae rulim olketa man? Bae iumi lukim samfala lo olketa profesi wea Jehovah talem for pipol blo hem, and olketa lukim hem kamap tru lo taem bifor. And tu, bae iumi storyim hao olketa profesi hia gohed for kamap tru distaem. Then witim strongfala faith, bae iumi storyim hao olketa profesi hia bae kamap tru lo future.

3. Wanem promis nao comfortim olketa Jew wea prisoner lo Babylon?

³ Tingim, hao nao laef blo olketa Jew wea prisoner lo Babylon lo mek-six century B.C.E. Staka wea born kam olketa prisoner tu olsem parents blo olketa, and laef hem hard tumas. Olketa lo Babylon mekfani lo olketa from faith wea olketa garem lo Jehovah. (Sams 137:1-3) For staka year, olketa Jew wea faithful tingim evritaem promis wea Jehovah talem hao pipol blo hem bae go bak lo hom blo olketa. Jehovah sei laef bae hem gud tumas. And hem comparem datfala land blo Judah olsem garden blo Eden, wea hem wanfala paradaes. (Readim Aesaea 51:3.) Olketa promis hia helpem pipol blo God wea maet daot,  for barava sure wanem God talem bae kamap tru. Hao nao olketa promis hia helpem olketa? Bae iumi storyim samfala.

4. Wanem nao Jehovah promis for duim abaotem wei for stap sef lo olketa Jew wea go bak lo hom blo olketa?

⁴ Olketa stap sef. Olketa prisoner hia bae go bak no lo wanfala really paradaes, bat lo wanfala land wea stap emti for 70 year, and hem wanfala land wea staka lo olketa no lukim tu. Lo olketa ples wea Bible storyim bifor, hem garem staka lion, wild dog, leopard, and olketa nara wild animal. Man wea garem famili maet ting olsem, ‘Hao nao bae mi mekem waef and olketa pikinini blo mi stap sef? Hao nao bae mi protectim olketa sheepsheep and olketa buluka blo mi?’ Hem normal for man garem tingting olsem. Bat tingim promis blo God wea stap lo Aesaea 11:6-9 and hao datwan mas barava comfortim olketa. (Readim.) Witim olketa naesfala toktok hia, Jehovah promisim olketa prisoner hia, hao olketa bae stap sef and olketa animal blo olketa tu. Olketa lion bae kaikaim grass, wea minim bae olketa no kaikaim buluka blo olketa Jew. Olketa wea faithful no need for fraetem olketa wild animal. Jehovah promis hao pipol blo hem bae sef lo datfala land lo Judah, nomata lo drae ples and lo olketa forest.—Esikiel 34:25.

5. Olketa wanem profesi nao helpem olketa Jew wea go bak lo hom blo olketa, for barava sure Jehovah bae provaedem staka samting wea olketa needim?

⁵ Olketa garem staka samting. Olketa maet warim tu samfala nara samting. ‘Waswe, bae mi garem kaikai for famili blo mi taem mi go bak lo hom? Waswe, bae mi garem waka, and waswe, bae hem gud for no stap prisoner lo Babylon?’ Lo olketa profesi, Jehovah talem tu hao hem bae provaedem olketa samting hia for olketa. Jehovah promis lo pipol blo hem wea obey, hao hem bae sendem rain for mekem garden blo olketa for grow gud and garem staka kaikai. (Aesaea 30:23) Lo saed blo ples for stap and waka, Jehovah promisim olketa: “Bae olketa pipol save bildim olketa haos blong olketa, an olketa seleva nao bae i stap insaet. An bae no eniwan save tekova moa long olketa haos ya. An bae olketa save plantem olketa plantesin long grep, an olketa seleva tu bae i dringim waen long hem. Olketa narafala pipol no save kam moa fo tekem from olketa.” (Aesaea 65:21, 22) Tru nao, laef bae hem gud tumas winim taem olketa stap prisoner lo Babylon. Bat waswe lo main problem wea olketa garem, wea mekem olketa for go stap prisoner lo Babylon?

6. Pipol blo God safa from wanem kaen health problem for longtaem finis, and Jehovah promisim wanem for olketa Jew wea go bak lo hom blo olketa?

⁶ Fren gud witim Jehovah. Longtaem bifor olketa go prison, pipol blo God wiki finis lo spiritual wei. Jehovah iusim profet Isaiah for sei olsem abaotem pipol blo hem: “Full hed hem sik, and full heart hem wik.” (Isa. 1:5, NW) Lo spiritual wei, olketa blind and earpas, bikos olketa satem ear blo olketa for no herem kaonsel blo Jehovah and olketa klosim eye blo olketa for no luksavve lo help wea hem givim. (Aesaea 6:10; Jeremaea 5:21; Esikiel 12:2) Sapos olketa sem problem kasem olketa Jew wea go  bak, waswe, bae olketa stap gud? Waswe, Jehovah bae no hapi moa witim olketa? Promis hia blo Jehovah barava comfortim olketa: “Long datfala taem, olketa hu i iapas bae i heresave long olketa toktok insaet long buk ya. An olketa hu i blaen an bin stap long tudak, bae i save lukluk moa.” (Aesaea 29:18) Tru nao, lo spiritual wei, Jehovah bae healim pipol blo hem wea hambol and wea repent. Sapos olketa gohed for lisin and obey, hem bae givim direction and savve wea bae leadim olketa.

7. Hao nao olketa promis blo God for pipol blo hem wea prisoner kamap tru, and why nao datwan strongim faith blo iumi?

⁷ Waswe, Jehovah duim wanem hem promisim? Olketa samting wea happen bifor showimaot hem duim datwan. Olketa Jew wea go bak lo hom blo olketa, olketa stap sef, garem staka samting and fren gud witim Jehovah. Olsem example, Jehovah protectim olketa from olketa nation wea strong and wea staka winim olketa. Olketa wild animal no finisim sheepsheep and buluka blo olketa. Hem tru, olketa Jew lukim lelebet nomoa lo olketa profesi wea Isaiah, Jeremiah, and Ezekiel raetem abaotem paradaes, bat wanem olketa lukim hem encouragem olketa, and hem samting wea olketa needim lo datfala taem. Taem iumi ting raonem olketa samting wea Jehovah duim for pipol blo hem lo taem bifor, datwan savve strongim faith blo iumi. Tingim smol part blo olketa profesi nomoa olketa Jew lukim wea kamap tru and hem gud tumas, bat tingim sapos evri profesi nao kamap tru? Tingim samting wea Jehovah hem duim for iumi distaem.

8. Pipol blo God distaem enjoyim laef lo wanem kaen “land”?

⁸ Pipol blo Jehovah olketa no wanfala really nation, and evriwan lo olketa no stap lo wanfala ples. Bat olketa anointed Christian nao mekem ap wanfala spiritual nation, wea olketa nao “Israel bilong God.” (Gal. 6:16) And “olketa nara sheepsheep” joinim olketa lo wanfala spiritual “land” wea evriwan wan mind for worshipim Jehovah God. Datfala wei for worship hem part lo laef blo olketa. (John 10:16; Isa. 66:8, NW) Wanem kaen “land” nao Jehovah givim lo iumi? Hem wanfala spiritual paradaes. God promisim wanfala gudfala laef wea olsem lo garden blo Eden wea kamap tru lo spiritual wei. Tingim samfala example.

9, 10. (a) Hao nao profesi lo Aesaea 11:6-9 kamap tru distaem? (b) Wanem nao showimaot pipol blo God garem peace?

⁹ Olketa stap sef. Profesi wea stap lo Aesaea 11:6-9, hem showim olketa wild animal stap lo peace tugeta. And olketa man and olketa animal wea pipol keepim lo haos bae stap lo peace tu. Waswe, samting wea datfala scripture storyim kamap tru distaem? Ia! Lo verse 9, iumi lanem why nao olketa bae nating savve spoelem olketa samting: “Bikos disfala wol bae hemi fulap long pipol hu i barava savegud long [Jehovah], olsem wata hemi  fulap long solwata.” Waswe, savve blo Jehovah savve changem wei blo olketa animal? Nomoa, pipol nao savve changem wei blo olketa taem olketa lane abaotem Barava Haefala God and lane for followim olketa gudfala wei blo hem. Dastawe lo spiritual paradaes wea iumi insaed distaem, iumi savve lukim datfala profesi kamap tru. Olketa wea stap anda lo rul blo Christ lane for lusim olketa wei wea olsem olketa animal, and olketa stap lo peace and wan mind witim olketa brata and sista blo olketa.

¹⁰ Olsem example, lo disfala buk iumi bin storyim reason from Bible why olketa Christian no teksaed, and from olketa no teksaed olketa kasem persecution. Lo disfala world wea raf fasin hem kamap big, iumi lukim wanfala grup blo pipol no join insaed eni raoa blo disfala world, nomata laef blo olketa stap lo danger. Diswan hem nambawan pruv wea showim olketa wea stap anda lo Kingdom blo God, olketa enjoyim peace wea Isaiah storyim! Jesus sei pipol bae luksavve lo olketa follower blo hem from love wea olketa garem for each other. (John 13:34, 35) Lo olketa kongregeson, Christ hem patient for iusim datfala “wakaman wea faithful and wise” for teachim olketa tru Christian for stap lo peace, showimaot love, and for kaen lo narawan.—Matt. 24:45-47.

11, 12. Wanem kaen hangre nao spoelem staka pipol lo world distaem, nomata olsem, hao nao Jehovah provaedem staka samting for pipol blo hem?

 ¹¹ Olketa garem staka samting. Staka pipol lo world hangre lo spiritual wei. Bible talem stret: “Hem ya mesij blong Lod [Jehovah], ‘Mi nao bae mi mekem bikfala taem blong hanggre fo kasem yufala, bat hemi no fo kaikai o wata. Long datfala taem, bae yufala hanggre tumas fo herem olketa toktok blong mi [Jehovah.]’” (Emos 8:11) Waswe, olketa citizen blo Kingdom blo God tu hangre lo spiritual wei? Jehovah sei olsem abaotem pipol blo hem and olketa enemy blo hem: “Bae olketa wakaman blong mi i kaikai, bat bae yufala hanggre nomoa. Bae olketa wakaman blong mi i dring, bat bae yufala dae nomoa fo wata. Bae olketa wakaman blong mi i hapi tumas, bat bae yufala i sem fogud.” (Aesaea 65:13) Waswe, iu lukim diswan kamap tru?

¹² Iumi kasem staka spiritual kaikai olsem river wea gohed for ran big. Iumi garem olketa Bible pablikeson, olketa recording, olketa video, olketa meeting, olketa convention, and olketa article from Website blo iumi. Evri samting hia, hem olketa spiritual kaikai wea iumi kasem distaem nomata world hem hangre lo spiritual wei. (Esikiel 47:1-12; Joel 3:18) Waswe, iu hapi for lukim promis blo Jehovah for givim staka spiritual kaikai lo iu evritaem kamap tru? Waswe, iu mek sure for kaikai evritaem lo tebol blo Jehovah?

13. Wanem nao iu lukim hem kamap tru abaotem promis blo Jehovah for olketa wea blind bae lukluk and olketa wea earpas bae herehere?

¹³ Fren gud witim Jehovah. Staka pipol distaem olketa blind and earpas lo spiritual wei. (2 Cor. 4:4) Bat lo evri ples lo world, Christ hem gohed for healim pipol lo spiritual wei. Waswe, iu lukim pipol wea blind olketa lukluk, and pipol wea earpas olketa herehere? Sapos iu lukim olketa wea kasem stretfala savve lo Bible, olketa lusim olketa laea teaching wea mekem olketa blind and earpas lo spiritual wei, iu lukim finis disfala promis kamap tru: “Long datfala taem, olketa hu i iapas bae i heresave long olketa toktok insaet long buk ya. An olketa hu i blaen an bin stap long tudak, bae i save lukluk moa.” (Aesaea 29:18) Evriwea lo world, staka thousand pipol wea sik lo spiritual wei kasem spiritual healing. Evriwan wea lusim Bigfala Babylon and kam worship witim iumi insaed spiritual paradaes barava pruvim olketa promis blo Jehovah hem kamap tru!

14. Wanem nao hem gud for ting raonem mekem hem strongim faith blo iumi?

¹⁴ Olketa chapter lo disfala buk garem strongfala pruv hao Christ hem leadim olketa follower blo hem insaed spiritual paradaes lo olketa last day distaem. Iumi laek for gohed ting raonem staka blessing wea iumi kasem insaed disfala spiritual paradaes. Taem iumi duim olsem, faith blo iumi lo olketa promis blo Jehovah for future bae gohed for kamap strong.

15. Why nao iumi savve sure earth bae kamap wanfala paradaes?

¹⁵ Plan blo Jehovah hem for disfala full earth hem wanfala paradaes. Hem putim Adam and Eve lo wanfala paradaes  garden, and hem talem tufala for garem pikinini for fulimap disfala earth and for lukaftarem evri animal. (Jenesis 1:28) Bat Adam and Eve followim Satan for againstim Jehovah, from datwan, evri pikinini blo tufala sin and olketa dae. Nomata olsem, plan blo God hem no change. Taem hem talem samting, hem evritaem mas kamap tru. (Readim Aesaea 55:10, 11.) Iumi savve sure, evri pikinini blo Adam and Eve bae fulimap disfala earth, and lukaftarem gud evri samting wea Jehovah creatim lo paradaes wea bae kamap evriwea lo earth. Lo datfala taem, olketa profesi wea Jehovah talem firstaem for olketa Jew wea prisoner abaotem gudfala laef lo paradaes bae hem kamap tru evriwea lo earth! Tingim olketa example hia.

16. Hao nao Bible storyim wei for stap sef wea iumi bae enjoyim lo Paradaes?

¹⁶ Olketa stap sef. Bae iumi lukim olketa samting Aesaea 11:6-9 storyim wea bae kamap tru lo full earth. Olketa man, woman, and olketa pikinini bae feel sef, and no fraetem eni samting lo eni ples lo earth olketa go lo hem. No eni animal or man bae spoelem olketa. Tingim taem wea iu bae lukim full earth olsem hom blo iu, iu bae swim lo olketa river, olketa lake, and lo sea, wakabaot lo olketa maunten, and olketa grass land and iu no fraetem eni samting. And taem hem naet, iu bae no warim eni samting. Olketa toktok lo Esikiel 34:25 bae kamap tru, mekem pipol blo God ‘save stap gud long olketa open ples, an save slip gud long bus.’

17. Why nao iumi savve sure Jehovah bae provaedem staka samting wea iumi needim taem Kingdom rulim full earth?

¹⁷ Olketa garem staka samting. Tingim taem wea no eniwan bae poor, no garem inaf kaikai, hangre, or short lo eni samting. Staka spiritual kaikai wea pipol blo God distaem garem mekem iumi for barava sure, Jesus bae givim evri samting for pipol wea stap anda lo rul blo hem. Taem Jesus stap lo earth, hem feedim staka thousand pipol wea hangre lo tu-thri bred and samfala fish. Olketa samting hia showim wanem Jesus bae duim for pipol evriwea lo earth. (Matt. 14:17, 18; 15:34-36; Mark 8:19, 20) Taem Kingdom blo God rulim full earth, olketa promis hia bae kamap tru: ‘Jehovah hemi sendem kamdaon ren for mekem olketa samting wea yufala i plantem long gaden for grou gudfala. Bae yufala garem plande kaikai, an olketa animol blong yufala bae i garem plande gras for kaikaim tu.’—Aesaea 30:23.

18, 19. (a) Wanem nao iu laekem abaotem profesi wea stap lo Aesaea 65:20-22? (b) Hao nao laef blo iumi bae ‘olsem wanfala tri wea stap for longtaem’?

¹⁸ Staka pipol distaem no garem gudfala haos, or duim waka wea olketa satisfae lo hem. Lo disfala rabis world, staka pipol waka hard for staka hour, bat olketa no kasem eni gud samting for olketa seleva or famili blo olketa. Bat olketa wea rich and greedy nao kasem staka gud samting. Tingim taem wea disfala profesi bae kamap tru lo full earth: “Bae olketa pipol save bildim olketa haos blong olketa, an olketa seleva nao bae i stap insaet. An bae no eniwan save tekova moa long olketa haos ya. An bae olketa save plantem olketa plantesin long grep, an olketa seleva tu bae i dringim  waen long hem. Olketa narafala pipol no save kam moa fo tekem from olketa. Olketa pipol wea mi siusim hu i stap long ples ya, bae i laef fo longtaem, olsem olketa tri wea hemi stap fo longtaem. Olketa samting wea olketa seleva i wakahad long hem, bae olketa seleva tu save yusim an hapi long hem.”—Aesaea 65:20-22.

¹⁹ Wanem nao disfala toktok ‘olsem tri wea hemi stap fo longtaem’ hem minim? Tingim iu standap andanit lo wanfala big tree and iu tingim hao long nao datfala tree hem stap, and datwan mekem iu feel smol tumas. And maet iu ting masbi hem stap finis bifor great-grani blo iu hem born. And iu maet tingim bae iu dae finis, bat tree hia bae gohed laef nomoa. Bat Jehovah hem kaen tumas for promisim lo iumi hao lo Paradaes bae iumi savve laef longtaem and garem peace! (Ps. 37:11, 29, NW) Taem bae kam wea olketa tree wea laef longtaem bae olsem grass wea laef for lelebet taem nomoa and dae, bat iumi bae laef for olowe!

20. Hao nao olketa wea stap anda lo Kingdom bae garem gudfala health?

²⁰ Gudfala health. Distaem sik and dae kasem evriwan lo world. Iumi evriwan sik and gogo iumi savve dae, bikos iumi evriwan sin. Bat sakrifaes blo Christ nomoa bae finisim datfala sik. (Rome 3:23; 6:23) Lo thousand year rul blo Jesus, hem and olketa wea bae rul witim hem bae helpem pipol for kasem gud samting from datfala sakrifaes, and isisi olketa bae aotem sin from olketa man wea faithful. Profesi blo Isaiah bae kamap tru: “No eniwan long kantri ya bae hemi talem dat hemi sik, bikos [Jehovah] nao bae hemi fogivim olketa pipol blong disfala ples, an tekemaot evri sin blong olketa.” (Aesaea 33:24) Tingim taem wea no eniwan bae hem blind, earpas, or kripol. (Readim Aesaea 35:5, 6.) No eni sik hem hard for Jesus healim, nomata lo saed lo body, tingting, or feeling. Olketa wea stap anda lo Kingdom bae garem gudfala health!

21. Wanem nao bae happen lo dae, and hao nao datfala promis comfortim iu?

²¹ Waswe lo dae wea iumi kasem from iumi sin? Datwan hem “lastfala enemy” blo iumi wea no eniwan savve winim. (1 Cor. 15:26) Bat waswe, hem hard for Jehovah finisim dae? Lukim wanem Isaiah talem: “Lod [Jehovah] nao bae hemi finisim dae, an draemap tias blong evriwan.” (Aesaea 25:8) Tingim taem wea no eni funeral, beregraon, and no eniwan krae from hem sorre! Bat evriwan bae krae from olketa hapi from Jehovah hem mekem kamap tru promis for pipol wea dae for laef bak! (Readim Aesaea 26:19.) Evri sorre feeling wea kamaot from dae bae finis for olowe.

22. Wanem nao bae happen taem Kingdom wea Jesus rulim hem duim finis wanem God laekem lo earth?

²² Lo end blo thousand year rul, Kingdom bae duim finis evri samting wea God laek for duim lo earth, and Christ bae givim paoa go bak lo Dadi blo hem. (1 Cor. 15:25-28) Evri man bae kamap perfect, and redi for lastfala test from Satan taem hem kamaot from datfala hol wea deep tumas. Bihaen datwan, Christ bae smasem hed blo datfala snek and evriwan wea sapotim hem. (Jenesis 3:15; Rev. 20:3, 7-10) Olketa wea lovem Jehovah bae luk  forward for wanfala nambawan laef. No eni toktok hem gud winim samting wea iumi lukim insaed lo Bible. Hem promisim hao olketa wea faithful bae “free olsem olketa pikinini bilong God, wea datwan hem nambawan samting.”—Rome 8:21.

23, 24. (a) Why nao iumi barava sure olketa promis blo God bae kamap tru? (b) Wanem nao iu disaed strong for duim?

²³ Olketa promis hia hem no samting wea man hope nating nomoa for hem, or wanfala dream nomoa. Olketa promis hia blo Jehovah bae kamap tru! Why nao olsem? Tingim toktok blo Jesus wea iumi storyim lo first chapter blo disfala buk. Hem teachim olketa follower blo hem for prea lo Jehovah olsem: “Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.” (Matt. 6:9, 10) Kingdom blo God hem no samting wea stap lo tingting blo man nomoa. Hem wanfala really gavman! Hem rul lo heven distaem. For wan handred year finis, Kingdom hem mekem olketa promis blo Jehovah kamap tru lo olketa difren wei wea iumi savve lukim klia insaed olketa Christian kongregeson. Iumi savve sure, hao evri promis blo Jehovah bae kamap tru taem Kingdom blo God hem kam for iusim full paoa blo hem lo disfala earth!

²⁴ Iumi savve Kingdom blo God bae kam. Iumi savve hao evri promis wea Jehovah talem bae kamap tru. Why nao olsem? Bikos KINGDOM BLO GOD HEM RUL! distaem. Kwestin wea iumi each wan mas ansarem hem olsem, ‘Waswe, wanem mi duim lo laef showimaot Kingdom hem rulim mi?’ Iumi laek for duim wanem iumi fit for duim, and faithful for stap anda lo datfala Kingdom distaem mekem iumi savve kasem gud samting from raeteous rul blo hem for olowe!