CHAPTER 10
King Hem Klinim Pipol blo Hem lo Spiritual Wei
1-3. Wanem nao Jesus duim taem hem lukim pipol mek dirty lo temple?
JESUS tinghae tumas lo temple lo Jerusalem bikos hem savve datfala temple hem piksarem tru worship lo disfala earth. Bat datfala worship for holy God, Jehovah hem mas klin and hem mas tru. Tingim hao Jesus feel taem hem kam lo Nisan 10, 33 C.E., and lukim olketa mek dirty lo datfala temple. Wanem nao olketa duim?—Readim Matthew 21:12, 13.
2 Lo Courtyard Bilong Olketa wea No Jew, olketa greedy man wea baem and salem samting and olketa man wea changem difren selen, olketa ravem pipol wea kam for givim offering lo Jehovah. a So Jesus “raosem olketa wea salem and baem samting insaed long temple. Hem kapsaetem tu olketa tebol bilong olketa wea changem olketa difren selen.” (Comparem Nehemaea 13:7-9.) Hem raosem olketa selfish man hia bikos olketa mekem haos blo Dadi blo hem “olsem cave bilong olketa man for steal.” Taem Jesus duim datwan, hem showimaot respect for temple and wanem datfala temple piksarem. Worship wea go lo Dadi blo hem mas klin!
3 Samfala 100 year bihaen, taem Jesus kamap King lo Kingdom blo God, hem klinim moa wanfala temple. Hem temple wea pipol blo God distaem worshipim God lo hem lo wei wea hem acceptim. Wanem kaen temple nao hem klinim?
Klinim “Olketa Son bilong Levi”
4, 5. (a) Lo year 1914 go kasem start blo 1919, hao nao olketa anointed follower blo Jesus kamap klin? (b) Waswe, bihaen datfala taem, God stop nao for klinim pipol blo hem? Explainim datwan.
4 Olsem iumi storyim lo Chapter 2 blo disfala buk, bihaen Jesus kamap king lo 1914, hem kam witim Dadi blo hem for chekim olketa wea waka insaed spiritual temple, wea hem arrangement for tru worship. b Bihaen King chekim olketa, hem luksavve olketa anointed Christian wea hem “olketa son bilong Levi,” olketa need for kamap klin. (Mal. 3:1-3, NW) Start lo 1914 go kasem start lo 1919, Jehovah klinim pipol blo hem taem hem letem olketa for kasem olketa difren kaen test and hard taem, and from olketa gohed faithful datwan mekem olketa klin. Bihaen olketa anointed wan hia kamaot from olketa test wea olsem fire, olketa klin nao, olketa redi for showim olketa sapotim King lo Kingdom blo God!
5 Waswe, God stop nao for klinim pipol blo hem? Nomoa. Lo olketa last day, Jehovah iusim King lo Kingdom blo hem for gohed helpem olketa follower blo hem for klin mekem olketa gohed stap insaed spiritual temple. Lo chapter 11 and 12, iumi bae storyim hao Jehovah klinim olketa saed lo fasin blo olketa, and insaed lo organization. Firstaem, bae iumi storyim wanem nao hem minim for klin lo spiritual wei. Hem barava strongim faith blo iumi taem iumi storyim olketa samting wea Jesus duim wea iumi lukim, and wea iumi no savve lukim, for helpem olketa follower blo hem kamap klin lo spiritual wei.
“Yufala Mas No Tasim Enisamting wea Hemi No Klin”
6. Komand wea Jehovah talem lo olketa Jew wea lusim Babylon helpem iumi for luksavve lo wanem samting abaotem wei for klin lo spiritual wei?
6 Wanem nao hem minim for klin lo spiritual wei? For ansarem datwan, iumi bae lukluk gud lo toktok lo profesi wea Jehovah talem, taem olketa Jew redi for lusim Babylon lo 537 B.C.E. (Readim Aesaea 52:11.) Main reason wea olketa Jew hia go bak lo Jerusalem hem for buildim moa temple, and startim moa tru worship. (Esra 1:2-4) Jehovah laekem pipol blo hem for lusim eni samting wea hem part lo false worship lo Babylon. Hem talem olketa komand for olketa followim: “Yufala mas no tasim enisamting wea hemi no klin,” “yufala mas kamaot from datfala ples,” and “yufala mas kamap klin.” Worship blo iumi for Jehovah mas no kamap dirty from eni samting wea join witim false worship. Wanem nao iumi lanem? For klin lo spiritual wei hem minim for stap klia lo olketa teaching and eniting wea join witim false religion.
7. Olketa hu nao Jesus iusim for helpem olketa follower blo hem for klin lo spiritual wei?
7 No longtaem bihaen Jesus kamap King, hem markem wanfala wakaman wea faithful and wise lo 1919, for helpem olketa follower blo hem for klin lo spiritual wei. Hem isi for luksavve lo disfala wakaman. (Matt. 24:45) Lo datfala year, Olketa Bible Student mekem olketa seleva kamap klin from olketa lusim finis staka laea teaching blo false religion. Nomata olsem, olketa need for gohed kamap klin lo spiritual wei. Christ iusim datfala wakaman wea faithful, for isisi helpem olketa follower blo Jesus for luksavve lo olketa difren kaen celebration and olketa nogud samting wea olketa need for lusim. (Provebs 4:18) Bae iumi storyim samfala example.
Waswe, Olketa Christian Shud Celebratem Christmas?
8. For longtaem, wanem nao Olketa Bible Student savve lo hem abaotem Christmas, and wanem nao olketa no luksavve lo hem yet?
8 For longtaem finis, Olketa Bible Student luksavve Christmas hem kam from heathen celebration, and Jesus hem no born lo December 25. Zion’s Watch Tower blo December 1881 sei: “Staka million pipol wea heathen change for kamap Christian. Bat change hia hem lo nem nomoa, and olketa no changem biliv blo olketa. Olketa heathen priest kamap olketa priest blo olketa religion wea sei olketa Christian, and olketa heathen celebration kamap Christian celebration, and Christmas hem wanfala lo olketa celebration hia.” Lo article blo Watch Tower 1883, wea garem title “When Was Jesus Born?” storyim maet Jesus hem born lo start blo October. c Nomata olsem, lo datfala taem Olketa Bible Student no luksavve why nao olketa shud stop for celebratem Christmas. Nomata Bethel famili lo Brooklyn tu gohed duim datwan. Bat bihaen 1926, olketa samting start for change. Why nao olsem?
9. Wanem nao mekem Olketa Bible Student start for luksavve lo hem abaotem Christmas?
9 Bihaen Olketa Bible Student studyim gud and ting raonem datfala subject, olketa luksavve Christmas and olketa laea biliv wea join witim, hem no mekhae lo God. Lo article blo The Golden Age blo December 14, 1927, wea garem title “The Origin of Christmas,” hem storyim Christmas hem wanfala heathen celebration, wea hem for mekem man hapi nomoa, and join witim idol worship.” Datfala article talem klia Christ no talem olketa Christian for celebratem Christmas, and sei olsem abaotem Christmas: “From olketa man lo world, and man wea no perfect no laekem celebration hia for stop, and Devil tu hapi lo hem . . . so from diswan olketa wea faithful for worshipim Jehovah mas no join insaed celebration hia.” So lo datfala December kam kasem distaem, Bethel famili no celebratem moa Christmas!
10. (a) Wanem samting abaotem Christmas nao kamaot klia lo December 1928? (Lukim tu box “ Start blo Christmas and Hem for Wanem.”) (b) Wanem nao helpem pipol blo God for luksavve olketa mas stap klia lo olketa nara holiday and olketa celebration? (Lukim box “ Showimaot Olketa Nara Holiday and Celebration No Stret.”)
10 Lo year bihaen, Olketa Bible Student kasem staka help moa for stop for celebratem Christmas. Lo December 12, 1928, Brata Richard Barber, wea waka lo hedquarter, hem givim wanfala tok lo radio wea storyim klia Christmas hem wanfala heathen celebration. Wanem nao pipol blo God duim taem olketa kasem datfala direction from hedquarter? Brata Charles Brandlein, tingim bak taem hem and famili blo hem stop for celebratem Christmas. Hem sei: “Waswe, hem hard for mifala lusim heathen celebration hia? Barava nomoa nao! . . . Hem olsem mifala aotem dirty kaleko wea mifala werem, and torowem.” Brata Henry Cantwell, wea bihaen hem wanfala traveling overseer tu garem sem tingting. Hem sei: “Mifala hapi for lusim celebration hia wea Jehovah no laekem. Diswan pruvim mifala lovem Jehovah.” Olketa faithful follower blo Christ willing for mekem olketa change, and for no tekpart lo celebration wea join witim false worship. d—John 15:19; 17:14.
11. Wanem nao iumi savve duim for sapotim King lo Kingdom blo God?
11 Olketa Bible Student hia wea faithful showim nambawan example for iumi followim! Taem iumi ting raonem example blo olketa, hem gud for iumi askem iumiseleva: ‘Hao nao mi shud ting lo direction wea kam from wakaman wea faithful? Waswe, mi acceptim and followim wanem mi lanem?’ Taem iumi willing for obey, datwan showimaot iumi sapotim King lo Kingdom blo God, wea iusim wakaman wea faithful for provaedem spiritual kaikai lo barava taem.—Acts 16:4, 5.
Waswe, Olketa Christian Shud Iusim Cross?
Pin wea garem cross and crown lo hem (Lukim paragraf 12 and 13)
12. For staka year, wanem tingting nao Olketa Bible Student garem abaotem cross?
12 For staka year finis, Olketa Bible Student ting lo cross olsem symbol blo olketa Christian religion. Olketa luksavve hem no stret for worshipim cross bikos olketa savve hem rong for worshipim idol. (1 Cor. 10:14; 1 John 5:21) Lo start blo 1883, Watch Tower talem stret “evri difren wei for worshipim idol hem barava no stret lo eye blo God.” Nomata olsem, firstaem Olketa Bible Student tingse hem olraet for iusim cross lo olketa difren samting. Olsem example, olketa werem wanfala pin wea garem cross and crown olsem wanfala badge for showim hu nao olketa. Lo tingting blo olketa sapos olketa faithful go kasem taem olketa dae, bae olketa kasem crown blo laef. Start lo 1891, Watch Tower magasin garem nao piksa blo cross and crown lo kava blo hem.
13. Wanem stretfala savve abaotem cross nao olketa follower blo Christ kasem? (Lukim tu box “ Wei for Iusim Cross Hem Isisi Showaot Klia.”)
13 Olketa Bible Student laekem tumas pin hia wea garem cross and crown. Bat start lo olketa year blo 1920, olketa follower blo Christ isisi kasem stretfala savve abaotem wei for iusim cross. Brata Grant Suiter, wea bihaen hem kamap member blo Governing Body, ting go bak lo wanfala assembly lo 1928, lo Detroit, Michigan, U.S.A., and hem sei: “Lo datfala assembly olketa storyim hem rong for werem datfala pin wea garem cross and crown, and olketa no need for werem.” Samfala year bihaen, olketa kasem moa stretfala savve. Hem barava showaot klia hao cross hem no part lo trufala worship wea klin.
14. Wanem nao pipol blo God duim taem olketa isisi kasem stretfala savve abaotem cross?
14 Wanem nao pipol blo God duim taem olketa isisi kasem stretfala savve abaotem cross? Waswe, olketa gohed for werem pin wea garem cross and crown lo hem, wea olketa laekem tumas? Lela Roberts, wanfala sista wea worshipim Jehovah for longtaem hem sei: “Taem mifala luksavve wanem nao cross and crown hem piksarem, stretawe mifala stop nao for werem.” Nara faithful sista, Ursula Serenco, storyim feeling blo olketa narawan, taem hem sei: “Mifala luksavve nao samting wea firstaem mifala tingse hem piksarem dae blo Lord blo iumi and hem showim mifala faithful, batawea hem wanfala heathen biliv. Olsem Provebs 4:18 storyim, mifala barava hapi bikos laet hem isisi shaen braet go moa.” Olketa faithful follower blo Christ no laek tekpart lo eni samting wea join witim false religion!
15, 16. Wanem nao iumi savve duim for showimaot iumi disaed strong for keepim courtyard blo spiritual temple blo Jehovah lo earth for klin?
15 Distaem iumi tu disaed for duim sem samting. Iumi luksavve Christ iusim wakaman wea faithful and wise for helpem pipol blo hem for gohed klin lo spiritual wei. Dastawe, taem iumi kasem olketa spiritual kaikai wea warnim iumi abaotem olketa celebration, kastom, or wei for worship wea join witim false religion, iumi stretawe obeyim. Olsem olketa brata and sista blo iumi wea stap lo olketa year bihaen Christ hem start for rul, iumi tu disaed strong for keepim courtyard lo spiritual temple blo Jehovah lo earth for klin.
16 Lo olketa last day, Christ gohed for duim samfala samting wea iumi no lukim, for protectim olketa kongregeson from eniwan wea savve mekem pipol blo Jehovah for no klin lo spiritual wei. Wanem nao hem duim? Bae iumi storyim.
Separatem “Nogud Pipol From Pipol wea Raeteous”
17, 18. Lo tokpiksa abaotem net, wanem nao hem minim (a) putim wanfala net lo sea, (b) “olketa didifren kaen fish pas insaed lo hem,” (c) kolektem olketa gud fish from net and putim long olketa basket, and (d) torowem olketa rabis fish?
17 King Jesus Christ gohed lukaftarem olketa kongregeson blo pipol blo God evriwea lo world. Lo samfala wei wea iumi no barava minim, Christ and olketa angel gohed for duim waka for separatem olketa man. Jesus storyim waka hia lo tokpiksa abaotem net wea olketa putim lo sea. (Readim Matthew 13:47-50.) Datfala tokpiksa minim wanem?
Datfala net hem piksarem preaching waka wea kasem evri man lo world, wea olketa olsem sea (Lukim paragraf 18)
18 Putim “wanfala net . . . long sea.” Datfala net hem piksarem preaching waka wea kasem evri man lo world, wea olketa olsem sea. “Olketa didifren kaen fish pas insaed long hem.” Gud nius pullim kam evri difren kaen pipol. Samfala duim samting for kamap olketa tru Christian, and olketa narawan showim interest firstaem, bat no really disaed for followim tru worship. e Kolektem “olketa gud fish from net and putim long olketa basket.” Olketa wea laekem truth kam insaed lo kongregeson wea hem olsem basket, for worshipim Jehovah lo wei wea hem acceptim. Torowem “olketa rabis fish.” Lo olketa last day, Christ and olketa angel gohed for duim waka for separatem “nogud pipol from pipol wea raeteous.” f From datwan, olketa wea no laek for lusim olketa laea teaching and olketa kastom biliv no savve spoelem kongregeson. g
19. Wanem nao tingting blo iu abaotem wanem Jesus duim, for protectim spiritual saed blo pipol blo God and tru worship?
19 Taem iumi savve King Jesus Christ, lukaftarem pipol blo hem, datwan bae strongim iumi. Taem iumi savve Jesus strong for sapotim tru worship distaem olsem hem duim taem hem klinim temple lo first century C.E., datwan strongim faith blo iumi. Olketa wea followim tru worship olketa olsem tu. Iumi hapi tumas from Christ waka hard for protectim spiritual saed blo pipol blo God and tru worship! Iumi showimaot iumi sapotim King and Kingdom blo hem lo wei for stap klia from evri samting wea join witim false religion.
a Evri year olketa Jew wea stap lo olketa difren ples savve kam lo temple lo Jerusalem for peim tax. So olketa mas changem selen blo olketa. Sorre samting nao olketa wea changem olketa difren selen hia savve chargem hae fee for duim datwan. And tu, olketa bisnisman savve haem tumas price blo animal for sakrifaesim wea pipol hia wea kam savve peim. Masbi, diswan nao mekem Jesus kolem olketa, “olketa man for steal.”
b Pipol blo Jehovah lo earth worshipim hem lo courtyard blo bigfala spiritual temple.
c Disfala article sei Jesus hem born lo taem blo winter bat sapos olsem, “hem no fitim bikos lo datfala taem olketa shepherd savve stap aotsaed lo naet for lukaftarem sheepsheep.”—Luke 2:8.
d Lo wanfala leta wea Brata Frederick Franz raetem lo November 14, 1927, hem sei: “Disfala year iumi bae no celebratem Christmas. Evriwan lo Bethel vote for no celebratem Christmas moa.” Samfala month bihaen, Brata Franz raetem nara leta lo February 6, 1928, hem sei: “Lord blo iumi isisi mekem iumi klin from olketa laea teaching blo false religion.”
e Olsem example, lo 2013, namba blo olketa pablisa hem 7,965,954, and olketa wea attendim Memorial lo dae blo Christ hem 19,241,252.
f Waka for separatem olketa gudfala fish from olketa rabis fish hem difren from waka for separatem sheepsheep from olketa goat. (Matt. 25:31-46) Waka for separatem or judgem olketa sheepsheep from olketa goat, bae kamap lo taem blo bigfala trabol. Go kasem datfala taem, pipol wea olsem rabis fish maet change and kam bak lo Jehovah and kam insaed kongregeson wea olsem basket.—Malakae 3:7.
g Gogo sapos olketa man wea olsem rabis fish no change bae Jehovah torowem olketa insaed tokpiksa fire, wea minim olketa bae finis for olowe.
