1, 2. (a) Wanem nao Jesus duim mekem staka pipol herem wanem hem storyim? (b) Wanem nao olketa disaepol blo Christ duim for followim example blo hem, and why nao olsem?

 STAKA pipol hipap raonem Jesus lo saedsea, so hem go insaed wanfala boat and hem muv go aot lelebet lo sea. Why nao hem duim olsem? Hem duim olsem mekem voice blo hem laod for staka pipol wea hipap herem klia message wea hem preachim.—Readim Mark 4:1, 2.

² Lo olketa year bifor and bihaen Kingdom hem rul, olketa faithful disaepol blo Christ followim example blo hem. Olketa iusim olketa difren wei for talemaot gud nius abaotem Kingdom lo staka pipol. Distaem King hem leadim pipol blo God for gohed iusim olketa difren wei for gud nius kasem pipol nomata laef blo pipol change, and olketa niu samting saed lo technology kamap. Iumi laekem gud nius for kasem staka pipol moa bifor end hem kam. (Matt. 24:14) Bae iumi story raonem samfala difren wei for gud nius hem kasem pipol nomata wea nao olketa stap. Bae iumi storyim tu hao iumi savve followim example blo olketa wea talemaot gud nius lo olketa year lo taem blo Olketa Bible Student.

3. Wanem nao mekem olketa wea againstim truth for kros tumas taem iumi iusim olketa niuspepa?

³ Olketa Niuspepa. Start lo 1879, Brata Russell and olketa fren blo hem gohed for pablisim Watch Tower wea storyim message abaotem Kingdom for kasem staka pipol. Bat lo tenfala year bifor 1914, Christ mek sure gud nius hem kasem staka pipol moa. Start lo 1903, staka samting start for happen. Lo datfala year, Doctor Ephraim Eaton, man for story for olketa bigman blo Protestant church lo Pennsylvania, talem Charles Taze Russell for olketa debate abaotem olketa teaching lo Bible. Lo leta wea Eaton raetem for Russell, hem sei: “Mi laekem for iumi debate abaotem samfala biliv wea iumi tufala no agree lo hem . . . mi savve staka pipol lo pablik bae barava interest  for herem.” Russell and olketa fren blo hem tu garem sem tingting, so olketa arrange for pablisim olketa debate hia lo The Pittsburgh Gazette, wanfala main niuspepa lo datfala taem. Staka pipol nao interest for read abaotem hao Russell explainim olketa Bible truth lo niuspepa, so datfala niuspepa pablisim olketa tok blo Russell evri week. Datwan mekem olketa enemy blo truth barava kros!

4, 5. Wanem fasin nao Russell showimaot, and wanem nao olketa wea lead lo organization savve duim for followim example blo hem?

⁴ Gogo, staka nara niuspepa company tu laek for pablisim olketa tok blo Russell. Lo 1908, Watch Tower sei “elevenfala niuspepa” nao gohed pablisim olketa sermon blo Russell. So olketa brata wea garem savve saed lo niuspepa talem Russell, sapos hem muvim office blo Society from Pittsburgh go lo wanfala big taon, bae staka niuspepa moa pablisim olketa tok blo hem. Bihaen Russell ting raonem wanem olketa talem, and samfala nara samting, hem muvim office go lo Brooklyn, New York, lo 1909. Wanem nao kamaot? Samfala month bihaen, samting olsem 400 niuspepa company nao pablisim olketa tok hia, and staka nara niuspepa tu duim sem samting. Gogo, lo 1914 taem Kingdom hem start for rul, winim 2,000 niuspepa company lo fofala languis nao pablisim olketa tok blo Russell.  

⁵ Wanem leson nao olketa wea lead lo organization lanem from diswan? Olketa wea lead distaem savve lane from example blo Russell for hambol. Lo wanem wei? Bifor olketa mekem olketa important disison, hem gud for herem advaes blo olketa narawan.—Readim Provebs 15:22.

6. Wanem nao happen bihaen wanfala sista readim olketa truth abaotem Kingdom lo niuspepa?

⁶ Olketa truth abaotem Kingdom wea olketa pablisim lo olketa niuspepa hia changem laef blo staka pipol. (Heb. 4:12) Wanfala lo olketa hem Ora Hetzel, wea baptaes lo 1917. Hem sei: “Bihaen mi marit, mi go lukim mami blo mi lo Rochester, Minnesota. Taem mi arrive, mi lukim hem katemaot from wanfala niuspepa olketa tok blo Russell. Mami storyim olketa samting wea hem lanem from olketa tok hia.” Ora acceptim olketa tru samting wea hem lanem and for winim sixti year hem faithful for preach abaotem Kingdom blo God.

7. Why nao olketa brata wea lead ting raonem sapos olketa bae gohed iusim niuspepa for talemaot gud nius?

⁷ Lo 1916, tufala samting happen wea mekem olketa wea lead for ting raonem sapos olketa bae gohed iusim niuspepa for talemaot gud nius. First samting, World War I wea gohed lo datfala taem mekem hem no isi for kasem pepa for duim printing. Wanfala report from niuspepa department blo iumi lo Britain lo 1916, storyim challenge wea olketa feisim, hem sei: “Winim 30-fala niuspepa company nomoa pablisim olketa Sermon. Luk olsem no longtaem namba hia bae go daon bikos price blo pepa hem expensive tumas.” Mek-tu samting, lo  October 31, 1916, Brata Russell hem dae. So The Watch Tower blo December 15, 1916, hem sei: “From Brata Russell hem dae, olketa sermon [lo olketa niuspepa] bae hem stop.” Nomata disfala wei for preach hem stop, olketa difren wei moa for preach, olsem datfala “Photo-Drama of Creation,” mekem staka pipol moa herem gud nius.

8. Hao nao olketa wakem “Photo-Drama of Creation”?

⁸ Olketa movie piksa. For samting olsem thrifala year, Russell and olketa fren blo hem wakem datfala “Photo-Drama of Creation,” wea release lo 1914. (Prov. 21:5, NW) Lo datfala Photo-Drama hem niu samting, wea olketa putim tugeta olketa piksa witim staka kala glass slide, wea olketa pleim semtaem witim saond wea olketa recordim. Staka handred pipol nao actim olketa story lo Bible and olketa animal tu insaed lo diswan. Wanfala report lo 1913 sei: “Olketa iusim staka animal lo  wanfala big zoo for actim story blo Noah. Lo datfala movie piksa, olketa man muvmuv witim olketa animal and toktok lo semtaem.” Staka artist lo London, New York, Paris, and Philadelphia nao kalam staka handred piksa hia wea stap lo glass.

9. Why nao olketa spendem staka taem and selen for mekem datfala “Photo-Drama”?

⁹ Why nao olketa spendem staka taem and selen for mekem datfala “Photo-Drama”? Lo olketa convention lo 1913, wanfala resolution wea olketa mekem hem sei olsem: “Olketa cartoon and piksa lo olketa niuspepa lo America, olketa garem paoa for pullim and changem tingting blo man. And tu, olketa man laek lukim tumas olketa piksa wea muvmuv. From diswan, hem gud for iumi wea preach and teach for iusim olketa movie piksa olsem wea muvmuv witim olketa piksa lo slide for preach lo olketa man and teachim olketa abaotem Bible.”

10. Olketa showim “Photo-Drama of Creation” lo olketa wanem kantri?

¹⁰ Lo year 1914, evriday olketa showim datfala “Photo-Drama” lo 80-fala difren taon. Klosap eit million pipol lo United States and Canada nao lukim datfala Photo-Drama. Lo sem year, olketa showim “Photo-Drama” hia lo Australia, Britain, Denmark, Finland, Germany, New Zealand, Norway, Sweden, and lo Switzerland.” Olketa wakem tu nara drama wea olketa kolem lo “Eureka Drama,” wea hem no garem olketa movie piksa wea muvmuv, and olketa savve iusim for showim lo olketa smol taon nomoa. Hem isi for muv raon witim and hem no expensive. Lo 1916 olketa transleitim finis wanfala lo tufala drama hia, “Photo-Drama” or “Eureka Drama,” lo languis lo Armenian, Dano-Norwegian, French, German, Greek, Italian, Polish, Spanish, and Swedish.

11, 12. Bihaen wanfala young man lukim “Photo-Drama,” hao nao diswan affectim hem, and wanem example nao hem showim?

¹¹ “Photo-Drama” wea olketa transleitim lo French languis barava kasem heart blo Charles Rohner wea hem 18-year. Hem sei: “Olketa showim datwan lo Colmar lo France, taon wea mi stap lo hem. Lo start blo drama go kasem end mi barava laekem hao olketa explainim klia olketa Bible teaching.”

¹² Gogo, Charles hem baptaes lo 1922 and hem start for duim full-taem service. First assignment wea hem kasem hem for help for showim datfala “Photo-Drama” lo olketa difren taon lo France. Charles storyim waka wea hem duim, hem sei: “Mi kasem samfala assignment olsem for pleim violin, account servant, and literature servant. Waka blo mi tu for talem olketa lo audience for stap kwaet bifor program start. Taem mifala rest, mifala givimaot olketa literature. Mifala assignim wanfala brata or sista for standap lo ples wea mifala markem lo datfala hall. Each wan holem olketa literature and story lo evriwan lo ples wea mifala markem for hem. And tu, front lo datfala hall, mifala garem olketa tebol wea fulap witim olketa literature.”  Lo 1925, Charles kasem invitation for go waka lo Brooklyn Bethel, lo New York. Hem kasem assignment for leadim olketa wea pleim music lo niufala radio station, WBBR. Example blo Brata Rohner wea iumi storyim mekem iumi for tingim disfala kwestin, ‘Waswe, mi willing for acceptim eni assignment wea mi kasem for helpem staka pipol herem gud nius abaotem Kingdom?’—Readim Aesaea 6:8.

13, 14. Hao nao olketa iusim radio for spredim gud nius? (Lukim tu box “ Olketa Program lo WBBR” and “ Wanfala Spesol Convention.”)

¹³ Radio. Lo olketa year blo 1920, olketa no iusim tumas “Photo-Drama,” bat radio nao kamap wanfala important wei for spredim gud nius abaotem Kingdom. Lo April 16, 1922, hem firstaem lo history for Brata Rutherford givim tok blo hem lo radio lo Metropolitan Opera House wea hem lo Philadelphia, lo Pennsylvania. Samting olsem 50,000 pipol herem datfala tok wea garem title “Millions Now Living Will Never Die.” Then lo 1923, hem firstaem for wanfala session blo convention for kamaot lo radio. Lo datfala taem wea olketa gohed iusim olketa difren radio station, olketa brata wea lead disaed sapos hem gud for iumi garem wanfala radio station blo iumiseleva, wea olketa wakem lo Staten Island, lo New York, and olketa kolem lo WBBR. Lo February 24, 1924, first program hem kamaot lo radio station hia.

¹⁴ The Watch Tower blo December 1, 1924, explainim waka blo WBBR taem hem sei: “Mifala sure radio hem sevem staka selen and hem gudfala wei for spredim message blo truth wea iumi no iusim bifor.” Hem sei moa: “Sapos Lord lukim hem fitim for iumi wakem moa olketa nara radio station for spredim message blo truth, hem bae mekem wei for iumi kasem selen lo taem wea fitim.” (Ps. 127:1, NW) Lo 1926, pipol blo Jehovah ownim sixfala radio station. Lo United States, hem garem tufala radio station, WBBR lo New York, and WORD wea stap klosap lo Chicago. Nara fofala stap lo Canada, lo Alberta, British Columbia, Ontario, and Saskatchewan.

15, 16. (a) Wanem nao olketa bigman lo religion lo Canada duim taem olketa herem gud nius lo radio? (b) Hao nao olketa tok wea kamaot lo radio hem helpem haos tu haos preaching waka?

¹⁵ From disfala radio mekem staka pipol for kasem olketa truth lo Bible, olketa bigman blo olketa religion wea sei olketa Christian no hapi lo diswan. Albert Hoffman wea bin waka lo wanfala radio station lo Saskatchewan lo Canada, hem sei: “Staka pipol moa start for savve abaotem hu nao Olketa Bible Student [bifor hem nem blo Olketa Jehovah’s Witness]. Pipol herem gud nius from olketa program wea kamaot lo radio, bat lo 1928, olketa bigman blo olketa religion wea sei olketa Christian putim hevi lo olketa bigman lo gavman, for no givim license lo olketa radio station blo Olketa Bible Student lo Canada.”

¹⁶ Nomata olketa radio station blo iumi lo Canada stop, olketa gohed for iusim olketa nara radio station for givim olketa  Bible tok. (Matt. 10:23) For mekem staka pipol lisin lo olketa program lo radio, The Watch Tower magasin and The Golden Age (Wekap!) garem list blo olketa radio station hia wea storyim olketa Bible truth, mekem olketa pablisa wea preach from haos tu haos savve talem pipol for lisin lo olketa tok wea kamaot lo radio lo ples blo olketa. Wanem nao kamaot from datwan? Bulletin blo January 1931 sei: “Disfala wei for iusim radio barava muvim olketa brata and sista for waka hard moa for preach lo haos tu haos. Mifala kasem staka report wea talem hao staka pipol nao lisin lo radio, and from olketa herem tok blo Brata Rutherford, datwan mekem staka nao willing for tekem olketa buk.” Datfala Bulletin storyim wei for iusim radio and for preach lo haos tu haos, hem tufala main samting wea organization blo Lord iusim for spredim gud nius.

17, 18. Nomata samfala change kamap, hao nao radio hem still wanfala main wei for spredim gud nius?

¹⁷ Lo olketa year blo 1930, staka pipol no laekem for iumi iusim olketa radio station hia. So gogo for end lo 1937, pipol blo Jehovah mas change for fitim samting wea happen. Olketa stop for iusim olketa radio station and busy moa for duim haos tu haos waka. a Nomata olsem, pipol blo Jehovah gohed iusim radio for storyim gud nius lo olketa farawe ples or ples wea iumi no free for preach. Olsem example, lo 1951 go kasem 1991, lo samfala ples wea bifor hem East Germany olketa savve evritaem herem olketa Bible tok from wanfala radio station lo West Berlin, lo Germany. Hem nao wanfala wei wea olketa savve herem gud nius insaed Bible. Start lo 1961, olketa blo Suriname, South America savve pleim wanfala 15-minute program abaotem olketa truth lo Bible lo main radio station blo olketa, diswan hem gohed for winim 30 year. Start lo 1969 go kasem 1977, organization recordim winim 350 radio program wea garem title “All Scripture Is Beneficial.” Lo United States, olketa pleim olketa program hia lo 291 radio station, wea datwan hem klosap full kantri. Lo 1996, lo Apia lo Samoa, evri week wanfala radio station savve pleim program wea garem title “Answers to Your Bible Questions.”

¹⁸ Klosap lo year 2000, pipol blo Jehovah no iusim radio nao for spredim gud nius. Bat nara niu technology kamap wea mekem hem isi for gud nius kasem staka pipol moa.

19, 20. Why nao pipol blo Jehovah iusim jw.org, and wanem gud samting nao kamaot? (Lukim tu box “ JW.ORG.”)

¹⁹ Internet. Start lo 2013, winim 2.7 billion pipol, diswan hem klosap haf lo population lo world iusim Internet. Samfala report sei samting olsem tu billion pipol iusim olketa laptop, mobile phone, and tablet for connect lo Internet. Namba blo olketa wea iusim Internet evriwea lo world hem go ap. Bat lo Africa nao namba blo olketa wea iusim Internet hem winim 90 million pipol, datwan hem winim olketa nara kantri.  Diswan hem olketa difren wei wea staka pipol savve kasem information.

²⁰ Start lo 1997, pipol blo Jehovah iusim disfala wei for kasem staka pipol. Lo 2013, samting olsem 300 languis stap lo jw.org Website, and olketa pablikeson for daonlodim hem stap lo winim 520 languis. Evriday winim 750,000 pipol go lo website. And evri month, pipol lukim video and daonlodim winim 3 million buk, 4 million magasin, and 22 million audio recording.

21. Wanem nao iu lanem from experience blo Sina wea visitim website blo iumi?

²¹ Website hem wanfala nambawan wei for spredim gud nius abaotem Kingdom blo God lo staka ples, nomata olketa ples wea gavman tambuim preaching waka tu. Olsem example, lo 2013, wanfala man wea nem blo hem Sina visitim jw.org website and ringim olketa lo world hedquarter lo United States, and ask for savve moa abaotem Bible. Why nao iumi interest lo diswan? Sina hem wanfala Muslim wea stap lo wanfala vilij wea stap farawe lo wanfala kantri wea gavman tambuim waka blo Olketa Jehovah’s Witness. From datwan, olketa brata mekem arrangement for Sina studyim Bible tufala taem insaed lo week, witim wanfala brata lo United States. Olketa iusim Internet for study.

22, 23. (a) Waswe, olketa difren wei for preach for kasem staka pipol hem changem waka for preach lo haos-tu haos? (b) Wanem nao showimaot King blessim waka blo iumi?

²² Olketa difren wei for preach wea iumi iusim for kasem staka pipol, olsem olketa niuspepa, “Photo-Drama,” olketa radio program, and Website, hem no changem wei for preach  from haos tu haos. Why nao olsem? Bikos pipol blo Jehovah followim example blo Jesus. Jesus no preach lo olketa big grup nomoa, bat hem preach lo man wanwan. (Luke 19:1-5) Jesus trainim tu olketa disaepol blo hem for duim sem samting, and hem storyim message wea olketa bae go talemaot. (Readim Luke 10:1, 8-11.) Olsem iumi storyim lo Chapter 6, olketa wea lead evritaem encouragem evri servant blo Jehovah for preach lo olketa man wanwan.—Acts 5:42; 20:20.

²³ Wan handred year bihaen Kingdom hem rul, winim 8 million pablisa nao gohed for teachim olketa narawan abaotem olketa plan blo God. Iumi sure, King blessim olketa difren wei wea iumi iusim for story abaotem Kingdom. Next chapter bae storyim olketa tul wea hem givim for helpem iumi spredim gud nius lo evri kantri, tribe, and languis.—Rev. 14:6.