1, 2. Wanem important waka nao Jesus storyim, and wanem important kwestin nao kamap?

 OLKETA bigman blo politik savve mekem olketa promis bat no duim wanem olketa promisim. Nomata olketa wea maet garem gudfala idea bat no savve mekem olketa promis for kamap tru. Bat Messiah King blo iumi, Jesus Christ hem difren, hem evritaem duim wanem hem promisim.

² Bihaen hem kamap King lo 1914, Jesus redi for fulfillim wanfala profesi wea hem talem samting olsem 1,900 year bifor. Bifor Jesus hem dae, hem sei: “Olketa disaepol bilong mi bae talemaot disfala gud nius abaotem Kingdom long evri ples long world.” (Matt. 24:14) Wei wea disfala profesi kamap tru hem part lo saen wea showimaot Kingdom hem start for rul. Bat, wanfala important kwestin hem kamap: Hao nao bae King hipimap olketa man olsem army wea willing for preach lo olketa last day, lo taem wea pipol no tingim narawan, no lovem narawan, and olketa no laek for worshipim God? (Matt. 24:12; 2 Tim. 3:1-5) Iumi laek for savve lo ansa bikos diswan hem waka wea iumi olketa tru Christian mas duim.

3. Wanem nao Jesus sure lo hem taem hem sei olketa ‘bae talemaot,’ and wanem nao mekem hem barava sure?

³ Lukim moa toktok lo profesi wea Jesus talem. Datfala toktok olketa “bae talemaot” showimaot wanem? Toktok hia showimaot Jesus sure hem bae garem pipol wea willing for duim datfala waka lo olketa last day. Wanem nao mekem hem barava sure? Hem lukim wanem dadi blo hem duim. (John 12:45; 14:9) Taem Jesus stap lo heven, hemseleva lukim hao Jehovah barava trustim pipol blo Hem wea willing for duim wanem hem laekem. Bae iumi storyim wanem Jehovah duim wea showimaot datwan.

4. Wanem waka nao Jehovah askem olketa Israelite for sapotim, and wanem nao olketa duim?

⁴ Tingim wanem happen taem Jehovah talem Moses for wakem tabernacle or tent, wea hem ples for nation lo Israel worship lo hem. Jehovah talem Moses for askem evri pipol for sapotim datfala waka. Moses talem olketa: “Eniwan wea willing  for givim samting savve tekem kam contribution for Jehovah.” Wanem nao happen? Olketa Israelite “gohed for tekem kam olketa voluntary offering evri morning.” Olketa tekem kam staka samting gogo Moses “stopem olketa pipol for no tekem kam eni samting moa”! (Ex. 35:5; 36:3, 6, NW) Wanem olketa Israelite duim showimaot Jehovah fit for trustim pipol blo hem.

5, 6. Olsem Psalm 110:3 NW, talem, Jehovah and Jesus expectim olketa tru Christian for duim wanem lo taem blo end?

⁵ Jehovah savve pipol blo hem bae willing for duim wanem hem laekem lo olketa last day. Winim 1,000 year bifor Jesus born, Jehovah iusim David for raet abaotem taem wea Messiah bae start for rul. (Readim Psalm 110:1-3, NW) Olketa enemy bae againstim Jesus, datfala niu King. Nomata olsem, hem bae garem staka wakaman. Olketa bae willing for sapotim datfala King. Olketa young wan tu bae willing for givim olketa seleva, olketa bae kamap staka tumas olsem dew wea foldaon lo graon lo morning wea no eniwan savve kaontem. a

⁶ Jesus savve, profesi lo Psalm 110 story abaotem hem. (Matt. 22:42-45) Dastawe, hem barava sure olketa wea faithful for sapotim hem bae willing for preachim gud nius evriwea lo world. Olketa samting wea happen pruvim wanem? Waswe, King hipimap finis pipol wea willing for preach lo olketa last day?

7. Bihaen hem kamap King, olketa wanem samting nao Jesus duim for redyim olketa wea sapotim hem for waka wea bae kamap?

⁷ No longtaem bihaen Jesus kamap King, hem duim samting for redyim olketa follower blo hem for bigfala waka wea bae kamap. Olsem iumi storyim lo Chapter 2, start lo 1914 go kasem 1919, Jesus duim waka for chekim and klinim pipol blo God. (Mal. 3:1-4, NW) Then lo 1919, hem markem wakaman wea faithful for leadim pipol blo hem. (Matt. 24:45) Start lo  datfala taem, datfala wakaman wea faithful givimaot spiritual kaikai lo olketa convention and olketa pablikeson lo pipol blo God, wea evritaem encouragem evri Christian for share lo preaching waka.

8-10. Wanem nao olketa convention encouragem olketa brata and sista for duim saed lo preaching waka? Storyim example. (Lukim tu box “ Olketa Convention wea Strongim Olketa Brata for Duim Preaching Waka.”)

⁸ Olketa tok lo convention. Olketa Bible Student laek for savve wanem for duim, so lo September 1 go kasem 8, lo year 1919 lo Cedar Point, Ohio, lo U.S.A., olketa hipap for first big convention wea olketa garem bihaen World War I. Lo mek-tu day blo convention, Brata Rutherford givim wanfala tok and talem olketa wea hipap: “Waka blo wanfala Christian lo earth . . . hem for talemaot message blo Kingdom blo Lord.”

⁹ Lo mek-faev day blo convention, Brata Rutherford givim wanfala tok wea garem title, “Address to Co-laborers,” wea olketa pablisim lo The Watch Tower lo article wea garem title “Announcing the Kingdom.” Lo datfala tok hem sei: “Wanfala Christian maet ting olsem, Mi stap lo earth for wanem? Ansa blo hem shud olsem, Lord laekem mi for kamap wakaman blo hem for talemaot message wea kam from God for mekem pipol fren bak witim hem, and hem privilege and responsibility blo mi for preach.”

¹⁰ Lo datfala tok, Brata Rutherford announcem olketa bae pablisim wanfala niu magasin, The Golden Age (wea distaem hem Wekap!), wea bae helpem pipol for savve Kingdom nomoa bae stretem problem blo evriwan. Then hem askem audience hu lo olketa nao laek for share for givimaot datfala magasin. Wanfala report from datfala convention sei: “Staka nao agree. Six thousand wea attend, evriwan standap for showimaot olketa willing for share lo datfala waka. Diswan hem big samting!” b Hem klia, King garem staka wea willing for sapotim hem for talemaot Kingdom blo hem!

11, 12. The Watchtower blo 1920 talem wanem taem nao bae olketa duim waka wea Jesus talem?

¹¹ Olketa pablikeson. Olketa article insaed The Watch Tower, isisi showimaot klia important waka wea Jesus talem lo profesi, hem nao for preachim gud nius abaotem Kingdom. Tingim samfala example start lo olketa year blo 1920.

¹² Wanem message nao bae olketa talemaot for mekem Matthew 24:14 kamap tru? And wanem taem nao olketa bae duim datwan? The Watch Tower blo July 1, 1920, hem garem wanfala article wea garem title “Gospel of the Kingdom.” Article hia storyim datfala message and sei: “Gud nius hia hem abaotem end blo disfala nogud world, and taem wea Kingdom wea Christ rulim hem start.” Datfala article storyim klia wanem taem olketa bae preachim datfala message, and sei: “Disfala message olketa mas talemaot start lo World War I go kasem taem blo ‘bigfala trabol.’” And tu, article hia sei: “Distaem nao  hem taem for talemaot disfala gud nius evriwea lo world, lo olketa religion wea sei olketa Christian.”

13. Lo 1921, The Watch Tower encouragem olketa anointed Christian for duim wanem?

¹³ Waswe, eniwan forcem pipol blo God for duim disfala waka wea Jesus talem? Nomoa. Lo article “Be of Good Courage,” lo The Watch Tower blo March 15, 1921, hem encouragem olketa anointed Christian for willing for duim datfala waka. Datfala article encouragem each wan for askem hemseleva: “Waswe, hem bigfala privilege and responsibility for mi share insaed disfala waka?” Article hia sei moa: “Mifala barava sure taem iu ting lo waka hia olsem wanfala privilege, iu bae olsem Jeremiah wea insaed lo heart blo hem toktok blo God ‘hemi olsem faea hemi bone insaet evri bon blong hem,’ wea mekem hem for no hol bak for story.” (Jeremaea 20:9) Olketa encouraging toktok hia showimaot Jehovah and Jesus trustim olketa wea faithful for sapotim Kingdom.

14, 15. Lo 1922, wanem nao The Watch Tower encouragem olketa anointed Christian for duim wanem for preach lo pipol?

¹⁴ Wanem nao olketa tru Christian duim for talemaot Kingdom message lo pipol? Lo The Watch Tower, blo August 15, 1922, hem garem wanfala article wea garem title: “Service Essential.” Article hia encouragem olketa anointed Christian for share for “tekem olketa pablikeson lo pipol and story witim olketa lo haos blo olketa, and storyim hao Kingdom lo heven hem rul finis.”

¹⁵ Hem klia, start lo 1919 kam kasem distaem, Christ iusim wakaman wea faithful and wise, for gohed talem hao privilege and responsibility blo wanfala Christian hem for talemaot message abaotem Kingdom. Wanem nao Olketa Bible Student duim taem olketa kasem encouragement for share lo waka for talemaot gud nius abaotem Kingdom?

16. Wanem nao samfala elder duim taem olketa herem olketa mas preach?

¹⁶ Lo olketa year blo 1920 and 1930, samfala no sapotim idea wea sei evri anointed Christian mas preach. Lo November 1, 1927, Watch Tower storyim wanem hem happen, hem sei: “Samfala elder wea stap witim iumi distaem lo church [kongregeson] wea garem waka for lead . . . no laek for encouragem olketa brata for preach, and olketa seleva tu no laek for preach. . . . Olketa mekfani abaotem taem olketa herem olketa bae go lo haos tu haos for preachim message blo God, King blo hem, and kingdom blo hem lo pipol.” Article sei moa: “Taem hem kam nao for olketa wea faithful for no associate witim olketa, and talem olketa hia hao mifala bae no appointim olketa man olsem for kamap elder.” c

17, 18. Wanem nao olketa brata and sista duim for followim direction wea kam from wakaman wea faithful, and wanem nao staka million pipol duim winim 100 year wea go pas?

¹⁷ Iumi hapi, klosap evriwan lo kongregeson hapi for followim direction wea kam from wakaman wea faithful. Olketa  tingim hem wanfala privilege for talemaot message abaotem Kingdom. The Watch Tower blo March 15, 1926, sei olsem: “Pipol blo God bae willing for volunteer . . . for talemaot disfala message lo olketa pipol.” Olketa faithful wan hia followim profesi wea Psalm 110:3 NW, storyim and showimaot olketa willing for sapotim King blo olketa.

¹⁸ Winim 100 year wea go pas, staka million pipol willing for talemaot message abaotem Kingdom. Lo olketa next chapter, bae iumi storyim hao olketa duim preaching waka, olketa tul wea olketa iusim, and gud samting wea kamaot. Firstaem bae iumi storyim, why staka million pipol willing for duim preaching waka nomata iumi stap lo world wea pipol tingim olketa seleva nomoa. Taem iumi storyim why nao olsem, hem gud for askem iumiseleva, ‘Why nao mi preachim gud nius lo olketa narawan?’

19. Why nao iumi laek for followim kaonsel blo Jesus for “Kingdom . . . mas first samting long laef”?

¹⁹ Jesus kaonselem olketa follower blo hem for “Kingdom . . . mas first long laef.” (Matt. 6:33) Why nao iumi laek for followim datfala kaonsel? Bikos iumi luksavve Kingdom hem important, and Kingdom nao God bae iusim for mekem plan blo hem kamap tru. Olsem iumi storyim lo chapter wea just finis, holy spirit isisi showimaot klia olketa truth abaotem Kingdom. Taem olketa tru samting wea iumi lanem abaotem Kingdom kasem heart blo iumi, datwan mekem iumi laek for Kingdom mas first samting lo laef.

20. Lo tokpiksa blo Jesus abaotem expensive samting wea stap haed, wanem nao olketa follower blo hem bae duim?

²⁰ Jesus savve wanem olketa follower blo hem bae duim taem hem talem olketa for Kingdom mas first lo laef blo olketa. Tingim tokpiksa abaotem expensive samting wea stap haed lo wanfala pis land. (Readim Matthew 13:44.) Lo datfala tokpiksa, wanfala wakaman faendem expensive samting wea stap haed and stretawe hem luksavve hem barava expensive. Wanem nao hem duim? “From hem hapi tumas hem go salem evri samting wea hem garem and baem datfala pis land.” Wanem nao iumi lanem? Taem iumi lanem truth abaotem Kingdom and iumi luksavve hem barava important, iumi bae hapi for sakrifaesim eni samting mekem iumi gohed putim Kingdom olsem first samting lo laef. d

21, 22. Wanem nao olketa wea sapotim Kingdom duim for showimaot Kingdom hem first samting lo laef blo olketa? Storyim example.

²¹ Olketa wea sapotim Kingdom showimaot lo toktok, and lo wanem olketa duim hao Kingdom hem first samting lo laef blo olketa. Olketa iusim laef blo olketa, savve blo olketa, and olketa material samting wea olketa garem for sapotim preaching waka. Staka mekem bigfala sakrifaes for duim full taem service. Olketa hia wea willing for preach, lukim hao Jehovah  blessim olketa wea Kingdom hem first samting lo laef. Tingim example blo samfala lo olketa hia.

²² Brata Avery and Lovenia Bristow, tufala duim waka olsem colporteur (pioneer) lo south part blo United States start lo olketa year blo 1920. Bihaen samfala year, Lovenia ting go bak and sei: “Start kam lo datfala taem, mitufala Avery hapi for pioneer tugeta for staka year. Staka taem mitufala no garem selen for baem petrol or kaikai. Bat Jehovah evritaem provaedem samting. Mitufala no stop for pioneer. Mifala evritaem garem wanem mifala needim.” Lovenia tingim wanfala taem, tufala no garem inaf selen and kaikai taem tufala pioneer lo Pensacola, Florida. Taem tufala go bak lo haos tufala lukim tufala big basket wea fulap lo kaikai witim wanfala note wea sei: “Kongregeson lo Pensacola lovem iutufala.” Taem Lovenia ting go bak lo staka year wea hem duim full taem service, hem sei: “Jehovah nating lusim mitufala. No enitaem hem laea.”

23. Hao nao iu ting lo truth abaotem Kingdom wea iu lanem, and wanem nao iu disaed for duim?

²³ Laef blo iumi evriwan no semsem, dastawe iumi evriwan no savve duim sem samting lo preaching waka. Nomata olsem, hem wanfala privilege for iumi evriwan talemaot gud nius witim full strong blo iumi. (Col. 3:23) From iumi tinghae lo nambawan truth abaotem Kingdom wea iumi kasem, iumi willing and laek for mekem eni sakrifaes mekem iumi savve duim best blo iumi lo preaching waka. Waswe, iu disaed for duim olsem?

24. Wanem nambawan samting nao Kingdom hem duim lo olketa last day?

²⁴ Insaed 100 year wea go pas, King gohed mekem toktok blo hem wea stap lo Matthew 24:14 kamap tru. And hem no forcem iumi for duim disfala waka. Bihaen olketa follower blo hem lusim disfala world wea pipol tingim olketa seleva, olketa willing for givim olketa seleva for preach. Disfala gud nius wea olketa preachim evriwea lo world hem part lo saen wea showim Jesus hem rul finis lo Kingdom, and hem wanfala lo olketa big samting wea Kingdom duim lo olketa last day.