1, 2. Lo wanem wei nao Jesus hem olsem tour guide wea wise tumas?

 TINGIM diswan, iu wakabaot lo wanfala taon wea luk naes tumas. Tour guide wea helpem iufala savve gud lo datfala ples. Hem firstaem for iu and olketa narawan for kasem datfala ples, so iu barava interest lo wanem tour guide storyim. Iu and olketa nara tourist maet laek for savve abaotem samfala samting lo datfala taon wea iufala no lukim yet. So taem iu askem tour guide abaotem datwan, hem no storyim stretawe, bat hem weit go kasem taem wanfala samting hem start for showaot, or iufala kasem datfala ples, then hem bae storyim. Gogo, iu luksavve tour guide hia savve tumas lo staka samting, from hem talem iu samting wea iu laek for savve, and lo barava taem wea iu fit for savve lo hem.

² Iumi olketa tru Christian olsem olketa tourist hia. Iumi barava laek for gohed lane abaotem “datfala taon wea garem strongfala faondeson,” wea hem Kingdom blo God. (Heb. 11:10) Taem Jesus lo earth, hem helpem olketa disaepol blo hem for minim gud datfala Kingdom. Waswe, hem ansarem evri kwestin blo olketa disaepol blo hem and lo semtaem hem storyim evri samting abaotem datfala Kingdom? Nomoa. Hem sei: “Mi laek for talem iufala staka samting bat hem hard for iufala minim long distaem.” (John 16:12) Olsem tour guide wea savve tumas, Jesus no storyim evri samting lo olketa, bat hem storyim nomoa wanem olketa fit for herem lo datfala taem.

3, 4. (a) Wanem nao Jesus iusim for gohed helpem pipol wea faithful for savve abaotem Kingdom blo God? (b) Wanem nao bae iumi storyim lo disfala chapter?

³ Lo naet bifor Jesus dae, hem talem datfala toktok wea stap lo John 16:12. Bihaen hem dae, hao nao bae hem gohed for teachim olketa faithful pipol for savve abaotem Kingdom blo God? Hem promisim olketa aposol blo hem olsem: “Holy spirit . . . bae hem helpem iufala for barava minim gud olketa samting wea tru.” a (John 16:13) Iumi maet tingim holy spirit olsem datfala tour guide wea patient. Jesus iusim holy spirit for helpem olketa disaepol blo hem for savve abaotem Kingdom blo God lo taem wea olketa fit for savve abaotem.

 ⁴ Iumi bae storyim hao holy spirit blo Jehovah gohed for helpem olketa tru Christian for minim gud staka samting abaotem datfala Kingdom. Firstaem, iumi bae storyim hao iumi minim taem wea Kingdom blo God start for rul. Then bae iumi storyim hu nao olketa wea bae rul lo Kingdom, and olketa wea bae stap anda lo Kingdom, and wanem nao hope blo olketa. Bihaen, bae iumi storyim hao olketa follower blo Christ minim gud wanem olketa mas duim for faithful lo Kingdom.

5, 6. (a) Wanem tingting wea no stret nao Olketa Bible Student garem abaotem taem wea Kingdom start for rul, and abaotem taem blo harvest? (b) Waswe, olketa tingting olsem wea no stret showimaot Jesus no leadim olketa follower blo hem?

⁵ Olsem iumi storyim lo Chapter 2 blo disfala buk, for staka year nao Olketa Bible Student talem wanfala important Bible profesi wea kamap tru lo 1914. Bat lo datfala taem olketa tingse, taem wea Christ hem stap hem start lo 1874, Christ start for rul lo heven lo 1878, and lo October 1914, namba blo evriwan wea bae rul lo Kingdom hem complete. And tu, olketa tingse taem blo harvest bae start lo 1874 go kasem 1914, and bae finis taem evri anointed wan go lo heven. Waswe, olketa tingting olsem wea no stret showimaot Jesus no iusim holy spirit for helpem olketa hia wea faithful?

⁶ Nomoa! Tingim wanem iumi storyim lo firstfala paragraf. From tour guide no stretawe followim tingting blo olketa tourist and no ansarem kwestin blo olketa, diswan minim olketa bae daotem tour guide? Nomoa! Diswan hem semsem tu witim pipol blo God. Jesus hem leadim olketa, nomata samfala taem olketa laek for stretawe savve abaotem plan blo Jehovah, bat hem no taem yet for holy spirit helpem olketa for minim. From diswan, olketa faithful wan hia willing for change and hambol for stretem tingting blo olketa.—Jas. 4:6.

7. Wanem stretfala savve wea olsem laet wea kamap moa braet nao God helpem pipol blo hem for kasem?

⁷ Lo olketa year bihaen 1919, God gohed for helpem pipol blo hem kasem stretfala savve, wea olsem laet wea kamap moa braet. (Readim Psalm 97:11, NW) Lo 1925, The Watch Tower garem wanfala important article wea title blo hem, “Birth of the Nation.” Datfala article storyim staka scripture wea pruvim Kingdom wea Christ rulim hem start for rul lo year 1914. Lo datfala taem, profesi lo Revelation chapter 12 abaotem woman blo God lo heven wea bornem pikinini, hem kamap tru. b Article hia gohed storyim olketa nogud samting and persecution wea pipol blo Jehovah feisim lo olketa year wea war gohed, diswan showimaot olketa torowem kam daon Satan from heven, and “hem kros fogud from hem savve hem garem lelebet taem nomoa.”—Rev. 12:12.

8, 9. (a) Hao nao gogo pipol luksavve Kingdom blo God hem important? (b) Olketa wanem kwestin nao bae iumi storyim?

⁸ Lo wanem wei nao Kingdom hem important? Lo 1928, The Watch Tower start for storyim Kingdom hem important winim laef olowe wea iumi kasem from dae blo Jesus. Tru nao, Jehovah  bae iusim Kingdom wea Christ rulim for mekem nem blo hem kamap holy, mekhae lo rul blo hem, and for mekem plan blo hem for olketa man kamap tru.

⁹ Hu nao bae rul witim Christ lo datfala Kingdom? Hu nao olketa wea bae stap anda lo datfala Kingdom? And wanem kaen waka nao olketa follower blo Christ bae busy for duim?

10. Bifor 1914, wanem nao pipol blo God savve lo hem abaotem 144,000?

¹⁰ Staka year bifor 1914, olketa tru Christian savve finis 144,000 wea faithful for followim Christ bae rul witim hem lo heven. c Olketa Bible Student hia luksavve disfala namba hem really namba, and lo first century C.E., holy spirit hem start for markem olketa.

11. Hao nao olketa wea bae rul witim Christ isisi savve lo waka wea olketa bae duim taem olketa lo earth?

¹¹ Wanem waka nao olketa hia wea bae rul witim Christ duim taem olketa stap yet lo earth? Olketa luksavve Jesus strongim need for duim preaching waka, and hem joinim datwan witim taem for harvest. (Matt. 9:37; John 4:35) Olsem iumi storyim lo Chapter 2, for lelebet taem olketa tingse harvest waka bae hem gohed for 40 year go kasem taem olketa anointed Christian go ap lo heven. Bat bihaen 40 year, datfala waka hem still gohed, so olketa luksavve datfala tingting hem no stret. Distaem iumi savve waka for separatem wheat from olketa rabis grass, and olketa faithful anointed Christian from olketa laea Christian hem start lo 1914. Hem taem for hipimap nao olketa last wan wea bae go lo heven!

12, 13. Lo wanem wei nao tokpiksa blo Jesus abaotem tenfala young gele and silver selen kamap tru lo olketa last day?

¹² Start lo 1919, Christ gohed for leadim wakaman wea faithful and wise for strongim need for duim preaching waka. Christ givim disfala waka lo olketa disaepol blo hem start kam lo first century. (Matt. 28:19, 20) And hem talem tu olketa fasin wea olketa anointed wan needim for duim preaching waka. Wanem nao hem talem? Lo tokpiksa blo hem abaotem tenfala gele, hem talem olketa anointed wan for mas gohed lukaot lo spiritual wei sapos olketa bae share insaed marit feast lo heven,  taem Christ bae join witim “gele wea redi for marit,” wea hem nao 144,000. (Rev. 21:2) Then lo tokpiksa abaotem olketa silver selen, Jesus teachim hao bae olketa anointed wan blo hem duim gud waka wea hem givim lo olketa.—Matt. 25:1-30.

¹³ Insaed 100 year wea go pas, olketa anointed wan gohed lukaot and waka hard. From datwan, olketa bae kasem reward! Waswe, harvest waka hia hem for hipimap 144,000 wea bae rul witim Christ nomoa?

14, 15. Wanem fofala grup nao The Finished Mystery buk hem storyim?

¹⁴ Start kam lo bifor, olketa faithful man and woman interest tumas for savve abaotem datfala “big crowd” (“big sekson,” King James Version) wea Revelation 7:9-14 storyim. Iumi no sapraes, from hem no taem yet for Christ showimaot hu nao olketa lo big crowd, bikos staka samting wea olketa talem bifor abaotem datwan, hem barava difren from wanem iumi savve distaem.

¹⁵ Lo 1917, datfala buk The Finished Mystery storyim “tufala grup bae go lo heven, and tufala grup bae stap lo earth.” Hu nao olketa insaed lo fofala grup hia wea garem olketa difren hope? First grup, hem 144,000 wea bae rul witim Christ lo heven. Mek-tu grup, hem datfala big crowd. Lo datfala taem, olketa tingse datfala big crowd hem olketa wea insaed olketa religion wea sei olketa Christian. Olketa garem faith, bat faith hia hem no strong mekem olketa savve gohed faithful. So olketa bae go lo heven bat bae kasem waka wea hem no important. Mek-thri grup, hem olketa faithful wan wea bae stap lo earth olsem Abraham, Moses, and samfala narawan. Olketa hia bae rul ovarem mek-foa grup, wea hem evri man lo earth.

16. Lo year 1923 and 1932, wanem spiritual laet blo truth nao kamap moa braet?

¹⁶ Hao nao holy spirit helpem olketa follower blo Christ for garem stretfala savve wea hem nao iumi distaem followim? Laet blo truth hem isisi kamap moa braet, and olketa start for kasem stretfala savve. Lo 1923, The Watch Tower storyim wanfala grup wea no garem hope for go lo heven, bat bae stap lo earth anda lo rul blo Christ. Lo 1932, The Watchtower story abaotem Jonadab (Jehonadab), wea join witim King Jehu blo Israel wea God anointim, for helpem hem faet againstim false worship. (Mektu Kings 10:15-17) Datfala article storyim samfala pipol distaem olketa insaed grup wea olsem Jonadab, wea Jehovah bae lukaftarem olketa lo taem blo trabol lo Armageddon and olketa bae stap lo disfala earth.

17. (a) Lo year 1935, wanem laet blo truth nao kamap braet go moa? (b) Wanem nao olketa faithful Christian duim taem olketa savve abaotem hu nao datfala big crowd? (Lukim box “ Olketa Barava Hapi.”)

¹⁷ Lo 1935, laet blo truth hem kamap braet go moa. Lo wanfala convention lo Washington, D.C., olketa luksavve datfala big crowd, hem grup wea bae stap lo earth. Olketa hia semsem witim sheepsheep wea Jesus storyim lo parabol blo sheepsheep and olketa goat. (Matt. 25:33-40) Disfala big crowd hem bae  part lo “olketa nara sheepsheep,” wea Jesus sei: “Mi mas tekem kam olketa hia tu.” (John 10:16) Taem speaker, Joseph Rutherford sei: “Evriwan wea garem hope for laef olowe lo earth, plis iufala savve standap!” Big haf lo audience standap. Then hem sei: “Lukim! Datfala big crowd!” Staka lo olketa hapi tumas bikos lo datfala taem olketa savve lo hope blo olketa for future.

18. Wanem nao olketa follower blo Christ waka hard for duim lo ministry, and wanem nao kamaot from datwan?

¹⁸ Start lo datfala taem, Christ hem leadim pipol blo hem for waka hard for hipimap olketa blo big crowd wea bae no dae lo bigfala trabol. Firstaem luk olsem olketa nating staka. Brata Rutherford sei: “Hem luk olsem datfala ‘big crowd’ maet hem no big tumas.” Bat distaem, iumi savve Jehovah barava blessim harvest waka wea start lo datfala taem! From Jesus and holy spirit nao leadim olketa anointed wan, and “olketa nara sheepsheep,” olketa kamap “wanfala sekson nomoa and wanfala man nao bae lukaftarem olketa,” olsem Jesus talem firstaem.

19. Wanem nao iumi savve duim for mekem datfala big crowd kamap big go moa?

¹⁹ Evriwan wea faithful bae laef olowe lo paradaes lo earth, and Christ and 144,000 bae rulim olketa. Taem iumi ting raonem hao Christ leadim pipol blo hem for kasem klia mining from olketa Scripture abaotem hope for future, diswan mekem iumi hapi. Iumi tinghae tu lo waka wea iumi garem for sharem hope blo iumi lo olketa wea iumi meetim lo ministry! Iumi mas gohed iusim taem blo iumi for helpem staka pipol moa mekem iumi evriwan savve praisem nem blo Jehovah!—Readim Luke 10:2.

20. Hu nao olketa wea insaed organization blo Satan, and wanem nao olketa Christian mas duim for faithful lo Kingdom?

²⁰ Taem pipol blo God gohed for lane abaotem Kingdom, olketa need for savve tu wanem olketa mas duim for faithful lo datfala gavman lo heven. From diswan, lo 1922, The Watch Tower storyim tufala organization nao stap, wanfala hem organization blo Jehovah, and narawan hem organization blo Satan. Organization blo Satan hem olketa big bisnis, olketa religion, and politik. Olketa wea faithful lo Kingdom blo God wea Christ rulim mas stap klia lo eni samting wea join witim eni part lo organization blo Satan. (2 Cor. 6:17) Wanem nao diswan minim?

21. (a) Wanem nao wakaman wea faithful duim for warnim pipol blo God abaotem olketa big bisnis? (b) Lo year 1963, The Watchtower storyim klia wanem abaotem “Bigfala Babylon”?

²¹ Wakaman wea faithful and wise gohed for provaedem spiritual kaikai wea showimaot klia olketa nogud samting wea olketa big bisnis duim, and for warnim pipol blo God for no aftarem olketa material samting. (Matt. 6:24) And tu, olketa pablikeson blo iumi gohed for storyim nara part lo organization blo Satan wea hem olketa religion. Lo 1963, The Watchtower storyim klia “Bigfala Babylon” hem nao olketa religion wea sei olketa Christian, and tu hem evri false religion. Olsem bae iumi storyim lo Chapter 10 blo disfala buk, pipol blo God lo evri kantri and culture kasem help for “go aot from hem,” lo wei for  stap klia from eni samting wea join witim false religion.—Rev. 18:2, 4.

22. Hao nao staka lo olketa pipol blo God minim Rome 13:1 lo World War I?

²² Waswe lo nara part lo organization blo Satan wea hem nao politik? Waswe, olketa tru Christian savve join insaed olketa war and raoa blo kantri? Lo World War I, Olketa Bible Student luksavve olketa wea followim Christ mas no killim dae narawan. (Matt. 26:52) Bat staka lo olketa tingse wanem Rome 13:1 storyim for obeyim olketa wea “garem paoa for rul,” hem minim olketa shud joinim army, werem uniform blo olketa soldia, and karem gun. Bat taem olketa mas sutim enemy, olketa bae sut nomoa lo air.

23, 24. Lo World War II, hao nao iumi minim toktok wea stap lo Rome 13:1, and lo 1962, wanem klia mining nao olketa follower blo Christ luksavve lo hem?

²³ Lo 1939, taem World War II hem start, The Watchtower hem explainim gud wanem hem minim for no teksaed. Datfala article storyim klia olketa Christian bae no join insaed olketa war, and raoa blo olketa kantri lo world blo Satan. Datwan kam lo barava taem! Olketa wea followim Christ no guilty lo blood olsem olketa narawan wea join insaed datfala war. Start lo year 1929, olketa pablikeson blo iumi storyim hao olketa wea garem paoa for rul wea Rome 13:1 storyim, hem no minim olketa gavman, bat hem minim Jehovah and Jesus. Bat olketa need for kasem moa stretfala savve abaotem datwan.

²⁴ Lo 1962, holy spirit helpem olketa follower blo Christ for changem wanem olketa tingim firstaem abaotem wanem  Rome 13:1-7 storyim. Datfala change hem kamap insaed tufala important article lo November 15 and December 1 issue blo The Watchtower. Then gogo, pipol blo God minim gud wanem Jesus talem taem hem sei: “Givim go bak long King samting wea hem bilong King, and givim go bak long God samting wea hem bilong God.” (Luke 20:25) Distaem olketa tru Christian luksavve olketa wea garem paoa hem olketa gavman blo man lo disfala world, and olketa Christian mas obeyim olketa. Bat diswan no minim iumi mas obeyim olketa evritaem. Taem olketa wea garem paoa for rul askem iumi for duim samting wea mekem iumi for no obeyim Jehovah God, then iumi bae talem sem samting wea olketa aposol talem: “God nao hem ruler wea mifala mas obeyim, no olketa man.” (Acts 5:29) Lo Chapter 13 and 14 blo disfala buk, iumi bae lane abaotem wanem pipol blo God duim for no teksaed.

25. Why nao iu tinghae lo wei wea Jesus iusim holy spirit for helpem iu for minim gud Kingdom blo God?

²⁵ Tingim evri samting abaotem Kingdom wea olketa follower blo Christ lanem insaed wan handred year wea go pas. Iumi lane abaotem taem wea Kingdom blo God hem start for rul lo heven, and why datfala Kingdom hem important. Iumi minim gud hope blo tufala grup blo olketa wea faithful, wanfala garem hope for go lo heven and narawan garem hope for stap lo earth. And iumi savve wanem nao iumi mas duim for showimaot iumi faithful lo Kingdom blo God, and lo semtaem obeyim olketa wea garem paoa for rul. Hem gud for askem iuseleva, ‘Waswe, bae mi savve lo olketa truth hia sapos Jesus Christ no leadim wakaman wea faithful and wise for minim and for teachim lo iumi?’ Iumi hapi tumas Christ and holy spirit helpem iumi for minim olketa truth hia!