GOD putim Adam and Eve insaed garden bilong Eden. Nomata tufala no obey and dae, God mekem wei for olketa pikinini bilong tufala wea datwan minim iumi tu, for laef olowe long Paradaes. Bible promis olsem: “Olketa wea raeteous bae kasem earth olsem present, and olketa bae stap olowe long hem.”—Psalm 37:29.

Bible story abaotem “niu skae” and “niu earth.” (Isaiah 65:17; 2 Peter 3:13) Datfala “skae” distaem hem gavman bilong olketa man, bat Jesus Christ and olketa wea rul witim hem long heven nao datfala “niu skae.” Hem bae naes tumas taem disfala niu skae, wea hem nao raeteous gavman bilong God wea bae mekem peace kamap, hem rulim full earth!

Bat, wanem nao datfala “niu earth”?— Datfala niu earth hem bae olketa gud pipol wea lovem Jehovah. Iu need for minim hao taem Bible story abaotem “datfala earth,” samfala taem hem minim pipol wea stap long earth, no disfala barava earth iumi stap antap long hem. (Genesis 11:1; Psalm 66:4; 96:1) So pipol bilong datfala niu earth bae stap long disfala planet earth.

World bilong wicked pipol distaem bae nomoa nao. Remember hao Flood long taem bilong Noah finisim world bilong nogud pipol. And, olsem iumi lanem finis, disfala nogud world distaem bae distroe long Armageddon. Iumi laek lukim wanem kaen living nao bae kamap long niu world bilong God bihaen Armageddon.

 Waswe, iu laek for laef olowe long Paradaes long niu world bilong God wea garem peace?— No eni doctor savve mekem iumi laef olowe. No eni medicine savve stopem iumi for dae. Only wei iumi savve laef olowe hem for fren gud witim God. And datfala Nambawan Teacher talem iumi hao for duim datwan.

Iumi openem Bible bilong iumi long John chapter 17, verse 3. Long hia hem toktok bilong datfala Nambawan Teacher, wea hem sei: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.”

So, wanem nao Jesus sei iumi need for duim for laef olowe?— First samting, iumi mas kasem savve abaotem Dadi bilong iumi long heven, Jehovah, and tu, abaotem Son bilong hem, wea givim laef bilong hem for iumi. Diswan minim iumi need for studyim Bible. Disfala buk, Lane From Datfala Nambawan Teacher, hem helpem iumi for duim datwan.

Bat hao nao wei for lane abaotem Jehovah bae helpem iumi for laef olowe?— Long sem wei wea iumi mas kaikai evriday, iumi need for lane abaotem Jehovah evriday tu. Bible hem sei: “Man mas laef, no from bred nomoa, bat from evri toktok wea kamaot from mouth bilong Jehovah.”—Matthew 4:4.

Iumi need for kasem savve abaotem Jesus Christ tu bikos God sendem Son bilong hem for finisim sin bilong iumi. Bible hem sei: “Salvation no kam thru long eni narawan.” And Bible sei tu: “Man wea showimaot faith long Son bae laef olowe.” (Acts 4:12; John 3:36) Wanem nao hem minim for “showimaot faith” long Jesus?— Hem minim iumi barava biliv long Jesus and iumi savve hao only wei for iumi laef hem thru long hem. Waswe, iu bilivim datwan?— Sapos iumi garem faith long datwan, iumi bae gohed for lane from datfala Nambawan Teacher evriday, and iumi bae duim wanem hem talem.

 Wanfala gud wei for lane from datfala Nambawan Teacher hem for readim disfala buk staka taem and for lukluk and ting raonem olketa piksa. Trae for ansarem olketa kwestin wea stap witim olketa piksa hia. And tu, readim disfala buk witim mami or dadi. Sapos dadi or mami no stap, readim witim olketa bigman and witim olketa nara pikinini. Hem bae naes sapos iu savve helpem nara pipol for lane from datfala Nambawan Teacher wanem olketa need for duim for laef olowe long niu world bilong God, iaman?—

Bible hem talem iumi: “World . . . hem gogo for finis.” Bat Bible explainim tu wanem iumi mas duim for laef olowe long niu world bilong God. Hem sei: “Man wea duim will bilong God bae stap olowe.” (1 John 2:17) So hao nao iumi savve laef olowe long niu world bilong God?— Ia, iumi savve laef olowe thru long wei for kasem savve abaotem Jehovah and Son wea hem lovem, Jesus. Bat iumi mas followim tu samting iumi lanem. Wei wea iu studyim disfala buk bae helpem iu for duim datwan.