MI SURE iu agree hao samfala, olketa moa hae, or moa strong winim iu and mi. Hu nao iu ting hem barava hae winim iumi?— Jehovah God. Waswe long Son bilong hem, datfala Nambawan Teacher? Waswe, hem hae winim iumi?— Hem barava winim iumi.

Firstaem, Jesus stap witim God long heven. Hem wanfala spirit Son, wanfala angel. Waswe, God wakem olketa nara angel, or olketa spirit son?— Ia, hem wakem plande million long olketa. Olketa angel hia tu moa hae and garem bigfala paoa winim iumi.—Psalm 104:4; Daniel 7:10.

Waswe, iu rememberim nem bilong angel wea story witim Mary?— Hem Gabriel. Hem talem Mary hao baby bilong hem bae kamap Son bilong God. God putim laef bilong spirit Son bilong hem insaed long Mary mekem Jesus savve born olsem wanfala baby long earth.—Luke 1:26, 27.

Waswe, iu bilivim datfala mirakol? Waswe, iu bilivim hao firstaem, Jesus stap witim God long heven?— Jesus talem hem stap long there. Hao nao Jesus savve abaotem olketa samting olsem? Maet taem hem boy yet, Mary talem hem wanem Gabriel talem. And tu, hem luk olsem Joseph maet talem Jesus hao God nao really Dadi bilong hem.

Taem Jesus baptaes, God tok kam from heven, and sei: “Diswan nao Son bilong mi.” (Matthew  3:17) And long naet bifor hem dae, Jesus prea: “Father, givim mi glory saed long iu witim glory wea mi garem taem mi stap witim iu bifor world hem start.” (John 17:5) Tru nao, Jesus askem God for tekem hem bak for stap moa witim hem long heven. Hao nao hem savve stap long there moa?— Only sapos Jehovah God mekem hem kamap wanfala spirit moa, wanfala angel.

Distaem mi laek askem iu wanfala important kwestin. Waswe, evri angel gud? Wanem nao tingting bilong iu abaotem diswan?— Long wanfala taem bifor evriwan long olketa gud. Hem olsem bikos Jehovah creatim olketa, and evri samting wea hem wakem hem gud. Bat then wanfala angel kamap nogud. Hao nao hem kamap nogud?

For savve long ansa, iumi mas ting go bak long taem wea God creatim firstfala man and woman, Adam and Eve. Samfala pipol sei story abaotem tufala hem mekap story nomoa. Bat datfala Nambawan Teacher savve hem tru.

Taem God wakem Adam and Eve, hem putim tufala insaed wanfala barava naes garden long ples wea olketa kolem Eden. Hem wanfala paradaes. Tufala savve garem staka pikinini, wanfala big famili, and stap insaed Paradaes for olowe. Bat tufala need for lanem wanfala important leson. Hem leson wea iumi storyim finis. Hao, iu rememberim datwan?

 Jehovah talem Adam and Eve olketa savve kaikaim eni frut from olketa tree long garden. Bat wanfala tree stap wea tufala mas no kaikaim frut bilong hem. God talem tufala wanem bae happen sapos tufala kaikaim. Hem sei: “Bae iu dae.” (Genesis 2:17) So, wanem leson nao Adam and Eve need for lanem?—

Olketa mas obey. For stap laef hem depend long wei for obeyim Jehovah God! Hem no inaf for Adam and Eve talem nomoa hao olketa bae obeyim hem. Tufala mas showimaot olketa bae obey long olketa samting wea tufala duim. Sapos tufala obeyim God, tufala bae showimaot hao tufala lovem hem and laekem hem for Ruler bilong tufala. From diswan, tufala savve laef olowe insaed Paradaes. Bat sapos tufala kaikai from datfala tree, wanem nao bae diswan showimaot?—

Hem bae showimaot hao tufala no barava thankiu long God for wanem hem givim long tufala. Sapos iu stap long there, waswe, bae iu obeyim Jehovah?— Long firstaem, Adam and Eve obey. Bat samwan wea hae winim tufala laea long Eve. Hem mekem hem for no obeyim Jehovah. Hu nao datwan?—

 Bible sei wanfala snek story long Eve. Bat iu savve wanfala snek no savve toktok. So hao nao hem fit for toktok?— Wanfala angel mekem hem luk olsem datfala snek hem toktok. Bat really, datfala angel nao toktok. Datfala angel start tingim olketa nogud samting. Hem laekem Adam and Eve for worshipim hem. Hem laekem tufala for obeyim hem. Hem laekem for hem nao God.

So datfala nogud angel mekem Eve for garem olketa rong tingting. Thru long datfala snek, hem sei long hem: ‘God no talem iu tru samting. Bae iu no dae sapos iu kaikai from datfala tree. Bae iu kamap wise olsem God.’ Waswe sapos iu long there, bae iu bilivim samting wea datfala voice talem?—

Eve start laekem samting wea God no givim hem. Hem kaikaim frut from datfala tambu tree. Then hem givim samfala long Adam. Adam no bilivim wanem datfala snek talem. Bat strongfala feeling bilong hem for stap witim Eve hem barava winim love bilong hem for God. So hem kaikai from datfala tree tu.—Genesis 3:1-6; 1 Timothy 2:14.

Wanem nao kamaot from datwan?— Adam and Eve lusim wei for perfect and tufala  kamap olo and dae. And from tufala no perfect, evri pikinini bilong tufala tu no perfect, and gogo olketa kamap olo and dae. God nating laea! Laef hem depend evribit long wei for obeyim hem. (Romans 5:12) Bible kolem datfala angel wea laea long Eve, Satan and Devil, and hem kolem olketa nara angel wea kamap nogud, olketa demon.—James 2:19; Revelation 12:9.

So, waswe, iu minim why nao datfala gud angel wea God wakem hem kamap nogud?— Hem bikos hem start for tingim olketa nogud samting. Hem laek for kamap important winim evriwan. Hem savve God talem Adam and Eve for garem pikinini, and hem laekem evriwan hia for worshipim hem. Devil laek mekem evriwan no obeyim Jehovah. So hem trae for putim olketa tingting wea no stret insaed mind bilong iumi.—James 1:13-15.

Devil sei no eniwan really lovem Jehovah. Hem sei iu and mi no lovem God and iumi no barava laek for duim wanem God talem. Hem sei only taem iumi obeyim God nao hem taem evri samting gohed fitim wanem iumi laekem. Waswe, Devil tok tru? Waswe, iumi olsem?

Datfala Nambawan Teacher sei Devil hem man for laea! Jesus pruvim hem barava lovem Jehovah thru long wei for obeyim Hem. And Jesus no obeyim God long taem wea hem isi nomoa. Hem evritaem obey, nomata taem nara pipol mekem datwan hard for hem. Hem faithful long Jehovah go kasem taem hem dae. Dastawe God mekem hem laef bak for stap olowe.

So long tingting bilong iu, hu nao main enemy bilong iumi?— Ia, hem Satan. Waswe, iu savve lukim hem?— Barava nomoa nao! Bat iumi savve hem stap and hem moa hae and garem bigfala paoa winim iumi. Bat, hu nao hae winim Devil?— Jehovah God. So iumi savve God savve protectim iumi.