SAMFALA taem Jehovah duim olketa samting long nambawan wei for protectim olketa young wan wea no savve protectim olketa seleva. Sapos iu go wakabaot long bush, maet iu lukim wanfala wei wea Jehovah duim diswan. Bat firstaem maet iu no minim wanem nao gohed.

Iu lukim wanfala bird flae kam daon long graon klosap long iu. Luk olsem hem garekil. Hem pullim wanfala wing bilong hem and muv awe taem iu trae for go klosap long hem. Taem iu go for trae holem hem, hem ranawe. Then, seknomoa hem flae go. Wing bilong hem nating garekil nomoa! Waswe, iu savve wanem nao datfala bird duim?—

Klosap long ples wea bird flae kam daon, olketa baby bilong hem stap haed insaed bush. Datfala mami bird hem fraet nogud iu faendem and spoelem olketa baby bird. So hem act olsem hem garekil mekem hem leadim iu go farawe from olketa baby bird. Waswe, iu savve hu nao savve protectim iumi olsem wanfala mami bird protectim olketa baby bilong hem?— Insaed Bible, Jehovah hem olsem bird wea olketa kolem eagle, wea helpem olketa smol pikinini bilong hem.—Deuteronomy 32:11, 12.

 Barava spesol pikinini bilong Jehovah nao hem Son bilong hem, Jesus. Taem Jesus stap long heven, hem wanfala spirit person wea garem bigfala paoa olsem Dadi bilong hem. Hem savve lukaftarem hemseleva. Bat taem Jesus born olsem wanfala baby long earth, hem no savve helpem hemseleva. Hem needim samwan for protectim hem.

For fulfillim wanem God laekem Jesus for duim long earth, hem mas growap and kamap wanfala perfect man. Bat, Satan trae for killim dae Jesus bifor hem kamap full grown. Olketa wei wea Satan trae for killim dae Jesus taem hem smol and olketa wei wea Jehovah protectim hem, hem wanfala interesting story. Waswe, iu laek herem?—

No longtaem bihaen Jesus hem born, Satan mekem wanfala star shaen long skae long East. Datfala star hem muv, and olketa man for studyim olketa star followim datwan go long Jerusalem wea hem plande handred kilometer from ples wea olketa lukim firstaem. Long there olketa ask wea nao datwan wea bae kamap king bilong olketa Jew hem bae born. Taem olketa askem olketa man wea savve abaotem wanem Bible talem, olketa sei: “Long Bethlehem.”—Matthew 2:1-6.

 Bihaen Herod, datfala nogud king long Jerusalem, herem hao disfala niu king hem just born long taon bilong Bethlehem wea stap klosap, hem talem olketa man wea studyim olketa star: ‘Go lukaotem and faendem datfala pikinini, and then kam bak and talem mi.’ Waswe, iu savve why Herod laek for savve wea for faendem Jesus?— Hem bikos Herod hem jealous and laek for killim hem dae!

Hao nao God protectim Son bilong hem?— Taem olketa man for studyim star faendem Jesus, olketa givim hem olketa present. Bihaen, God warnim olketa man hia long wanfala dream for no go bak long Herod. So olketa followim difren road for go bak long hom and no go long Jerusalem. Taem Herod herem hao olketa man for studyim star go finis, hem barava kros tumas. From hem laek killim dae Jesus, Herod killim dae evri pikinini boy long Bethlehem wea age bilong olketa no winim tu year! Bat Jesus no stap long there nao.

Waswe, iu savve hao nao Jesus ranawe?— Bihaen olketa man for studyim star lusim long there for go bak long hom, Jehovah talem warning long hasband bilong Mary, Joseph, for ranawe go long Egypt wea stap farawe. Long there Jesus hem sef from datfala nogud man Herod. Plande year bihaen, taem Mary and Joseph go aot from Egypt witim Jesus, God talem nara warning moa long Joseph. Hem talem hem long wanfala dream for go long Nazareth, wea Jesus bae stap sef.—Matthew 2:7-23.

Waswe, iu lukim hao Jehovah protectim Son bilong hem?— Long tingting bilong iu, hu nao olsem olketa baby bird wea mami bilong olketa haedem long bush or olsem Jesus taem hem smol pikinini?  Waswe, iu olsem olketa?— Samfala pipol stap wea laek for spoelem iu tu. Waswe, iu savve hu nao olketa?—

Bible sei Satan hem olsem wanfala lion wea singaot and wea laek for kaikaim iumi. And long sem wei wea olketa lion laek targetim olketa smol animal, Satan and olketa demon plande taem targetim olketa pikinini. (1 Peter 5:8) Bat Jehovah hem strong winim Satan. Jehovah savve protectim olketa pikinini bilong hem or stretem eni nogud samting wea Satan duim long olketa.

Waswe, iu rememberim from Chapter 10 bilong disfala buk wanem Devil and olketa demon bilong hem trae for mekem iumi duim?— Ia, olketa trae for mekem iumi duim kaen sex wea God sei hem rong. Bat hu nomoa shud duim sex?— Ia, man and woman wea marit.

Bat sorre samting, samfala bigman laek for duim sex witim olketa pikinini. Taem olketa duim olsem, olketa boy and girl start for duim olketa nogud samting wea olketa lanem from olketa bigman hia. Olketa pikinini hia start for iusim tu private part bilong olketa long rong wei. Datwan nao wanem hem happen longfala taem bifor long taon bilong Sodom. Bible sei “olketa boy and olketa olo man” long there trae for duim sex witim olketa man wea visitim Lot.—Genesis 19:4, 5.

So olsem Jesus needim protection, iu tu needim protection from olketa bigman—and tu from olketa nara pikinini—wea maet trae for duim sex witim iu. Plande taem pipol hia bae act olsem olketa fren bilong iu. Olketa maet givim iu samting sapos iu promis for no storyim long narawan olketa samting olketa laek duim long iu. Bat pipol hia selfish, olsem Satan and olketa demon bilong hem, and olketa laek nomoa for olketa seleva feel gud. And olketa trae for kasem diskaen wei for feel gud long wei for duim sex witim olketa pikinini. Diswan hem barava rong!

Waswe, iu savve wanem nao maet olketa duim for mekem olketa seleva feel gud?— Maet olketa trae for rabem private part bilong iu.  Or olketa maet mekem private part bilong olketa tasim private part bilong iu. Bat iu shud no letem eniwan plei witim private part bilong iu. Nomata brata or sista or mami or dadi bilong iu. Olketa part bilong body hia hem private.

Hao nao iu savve protectim body bilong iu from pipol wea duim olketa nogud samting olsem?— Firstfala samting, no letem eniwan plei witim private part bilong iu. Sapos samwan trae for duim diswan, tok strong witim bigfala voice: “No duim datwan! Bae mi reportim iu ia!” And sapos datfala man sei iu nao rong, no bilivim datwan. Hem no tru. Iu go reportim datfala man nomata hu nao hem! Iu shud reportim hem nomata sapos hem sei wanem iutufala duim tugeta hem secret bilong iutufala nomoa. Nomata sapos hem trae stopem iu for talem samwan long wei for givim iu olketa naes present or long wei for sei hem bae duim nogud samting long iu, iu shud ranawe and go reportim hem.

No eni samting for iu fraet long hem, bat iu mas careful. Taem dadi and mami warnim iu abaotem pipol or olketa ples wea hem maet danger, iu mas lisin long tufala. Sapos iu lisin, iu no givim eni chance long nogud man for spoelem iu.