SAMFALA pipol sei olketa bilivim nomoa samting wea olketa savve lukim. Bat datwan hem krangge tingting. Staka samting stap wea iumi no savve lukim witim eye bilong iumi. Waswe, iu savve talem nem bilong wanfala?—

Waswe air wea iumi brithim? Waswe, iumi savve feelim?— Holemap hand bilong iu, and blowim. Waswe, iu feelim eni samting?— Iu feelim samting, bat iu no savve lukim datfala air, iaman?—

Iumi story finis abaotem olketa spirit wea iumi no savve lukim. Iumi lanem hao samfala gud bat olketa narawan nogud. Talem nem bilong samfala gud spirit wea iumi no savve lukim.— Ia, Jehovah God, Jesus, and olketa gud angel. Waswe, olketa nogud angel stap tu?— Bible sei olketa stap. Wanem nao iu lanem abaotem olketa?—

Iumi savve hao olketa gud and nogud angel strong winim iumi. Datfala Nambawan Teacher savve long staka samting abaotem olketa angel. Diswan hem bikos hem wanfala angel firstaem bifor hem born olsem wanfala baby long earth. Hem stap witim olketa nara angel long heven. Hem savve long staka million long olketa. Waswe, evri angel hia garem nem?—

Iumi lanem finis hao God givim nem long olketa star. So iumi savve sure evri angel garem nem tu. And iumi savve hao olketa savve story witim each other bikos Bible talem iumi abaotem ‘languis bilong olketa angel.’ (1 Corinthians 13:1) Long tingting bilong iu, wanem nao olketa angel story abaotem? Waswe, olketa story abaotem iumi long earth?—

Iumi savve hao olketa angel bilong Satan, olketa demon, trae for mekem iumi no obeyim Jehovah. So masbi olketa story abaotem hao  for duim diswan. Olketa laekem iumi for olsem olketa mekem Jehovah no laekem iumi tu. Bat waswe long olketa angel bilong God wea faithful? Long tingting bilong iu, waswe, olketa tu story abaotem iumi?— Ia, olketa story abaotem iumi. Olketa laek helpem iumi. Mi laek storyim long iu samfala angel bilong God wea helpem pipol wea lovem Jehovah and servem hem.

Olsem example, wanfala man wea nem bilong hem Daniel stap long Babylon. Staka pipol long there no lovem Jehovah. Olketa mekem tu wanfala law wea bae panisim eniwan wea prea long Jehovah God. Bat Daniel gohed nomoa for prea long Jehovah. Waswe, iu savve wanem nao olketa duim long Daniel?—

Olketa nogud pipol torowem Daniel insaed hol witim olketa lion. Long there Daniel stap seleva witim samfala hangre lion. Waswe, iu savve wanem nao happen?— Daniel hem sei, “God sendem kam angel bilong hem and satem  mouth bilong olketa lion.” Olketa lion nating baetem hem! Olketa angel savve duim olketa nambawan samting for pipol wea servem Jehovah.—Daniel 6:18-22.

Long narataem, Peter stap insaed prison. Bae iu rememberim hao Peter hem fren bilong datfala Nambawan Teacher, Jesus Christ. Samfala pipol no laekem taem Peter sei Jesus hem Son bilong God. So olketa putim Peter insaed prison. Olketa soldia gardim Peter for mek sure hem no ranawe. Waswe, eniwan stap wea savve helpem hem?—   

Peter sleep midolwan tufala gard, and olketa putim chain long hand bilong hem. Bat Bible hem sei: ‘Lukim! Angel bilong Jehovah  hem kam, and laet shaen insaed long prison. Datfala angel tasim Peter long saed, wekapem hem, and sei, “Standap kwiktaem!”’

Semtaem nomoa, olketa chain aot from hand bilong Peter! And datfala angel sei long hem: ‘Werem kaleko, and sandol bilong iu, and followim mi.’ Olketa gard no savve stopem olketa bikos datfala angel helpem Peter. Tufala kasem wanfala iron gate, and then wanfala samting happen wea mekem man sapraes nao. Datfala gate open seleva! Datfala angel aotem Peter from prison mekem hem savve gohed long waka for preach.—Acts 12:3-11.

Waswe, olketa angel bilong God savve helpem iumi tu?— Ia, olketa savve help. Waswe, diswan minim olketa bae no letem eni nogud samting kasem iumi?— Nomoa, olketa angel no stopem iumi for kasem nogud samting sapos iumi duim olketa krangge samting. Bat nomata sapos iumi no duim olketa krangge samting, maet iumi still kasem nogud samting. God no talem olketa angel for stopem kaen samting olsem for kasem iumi. Bat hem givim spesol waka for olketa duim.

Bible story abaotem wanfala angel wea talem pipol evriwea for worshipim God. (Revelation 14:6, 7) Long wanem wei nao angel hia talem datwan? Waswe, hem shout kam from heven mekem evriwan herem hem?— Nomoa, olketa follower bilong Jesus long earth story long nara pipol abaotem God, and olketa angel leadim olketa long disfala waka. Olketa angel mek sure pipol wea barava laek savve abaotem God garem chance for herem datfala message. Iumi savve share insaed datfala waka for preach, and olketa angel bae helpem iumi.

Bat, waswe sapos pipol wea no lovem God mek trabol for iumi? Waswe sapos olketa putim iumi insaed prison? Waswe, olketa angel bae kam aotem iumi from prison?— Olketa savve duim. Bat datwan hem no samting wea olketa evritaem duim.

Wantaem, Paul, wea hem follower bilong Jesus, hem wanfala prisoner. Hem insaed wanfala boat taem wind hem barava strong and sea  hem raf tumas. Bat olketa angel no stretawe sevem hem long datfala taem. Diswan hem bikos nara pipol need for savve abaotem God. Wanfala angel sei: “Paul, iu no fraet. Iu mas standap front long Caesar.” Olketa mas tekem Paul go long man wea rulim world, Caesar, mekem Paul savve preach long hem. Olketa angel evritaem savve long ples wea Paul stap, and olketa helpem hem. Olketa bae helpem iumi tu sapos iumi tru for servem God.—Acts 27:23-25.

Nara important waka stap tu for olketa angel duim, and klosap nao olketa bae duim. Taem bilong God for finisim nogud pipol hem barava klosap nao. Evriwan wea no worshipim tru God bae finis. Long datfala taem, pipol wea sei olketa no bilivim olketa angel bikos olketa no savve lukim olketa bae just savve tingting bilong olketa barava rong.—2 Thessalonians 1:6-8.

Wanem nao bae happen long iumi?— Sapos iumi saed witim olketa angel bilong God, olketa bae helpem iumi. Bat waswe, iumi saed witim olketa?— Iumi saed witim olketa sapos iumi servem Jehovah. And sapos iumi servem Jehovah, iumi bae talem nara pipol tu for servem hem.