WASWE, iu hapi taem samwan duim wanfala naes samting for iu?— Nara pipol tu hapi taem samwan duim wanfala naes samting for olketa. Iumi evriwan laekem datwan. Datfala Nambawan Teacher savve long datwan, and hem evritaem duim olketa samting for pipol. Hem sei: ‘Mi kam, no for pipol servem mi, bat for mi servem olketa.’—Matthew 20:28.

So sapos iumi laek kamap olsem datfala Nambawan Teacher, wanem nao iumi mas duim?— Iumi mas servem nara pipol. Iumi mas duim olketa gud samting for olketa. Hem tru, staka pipol no duim diswan. Klosap evri pipol laekem nara pipol for servem olketa. Wanfala taem nomata olketa follower bilong Jesus tu garem diskaen tingting. Each wan laek for important winim narawan.

Wanday Jesus travel witim olketa disaepol bilong hem. Bihaen olketa kasem taon bilong Capernaum, wea stap klosap long Sea bilong Galilee, evriwan go long wanfala haos. Long there Jesus askem olketa wanfala kwestin: “Wanem nao iufala argue abaotem long road?” Olketa stap kwaet bikos long road olketa argue midolwan olketa seleva abaotem hu nao important.—Mark 9:33, 34.

 Jesus savve hem no stret for eni disaepol ting hem nao important. So, olsem iumi lanem long first chapter, hem tekem kam wanfala smol pikinini and talem olketa hao olketa shud hambol olsem datfala smol pikinini. Nomata olsem, olketa no tinghae long wanem olketa lanem. So klosap long taem bifor hem dae, Jesus teachim olketa wanfala leson wea olketa bae no savve forgetim. Wanem nao hem duim?—

Taem evriwan kaikai tugeta, Jesus standap from tebol, tekem wanfala towel, and taemap raonem bele bilong hem. Hem tekem wanfala dish and fulimap witim wata. Olketa disaepol maet tingting wanem nao hem bae duim. Taem olketa lukluk, Jesus go long each wan long olketa, hem bendaon, and wasim leg bilong olketa. Then hem draem leg bilong olketa witim towel. Tingim datwan! Waswe sapos iu stap long there? Bae iu feel hao?—

Olketa disaepol ting hem no stret for datfala Nambawan Teacher servem olketa long disfala wei. Olketa feel shame. Peter barava no laekem Jesus for duim disfala lowfala waka for hem. Bat Jesus sei hem important for hem duim.

Distaem hem no wei bilong iumi for wasim leg bilong each other. Bat olketa savve duim diswan taem Jesus stap long earth. Waswe, iu savve why nao olketa duim olsem?— Long kantri wea Jesus and olketa disaepol stap, pipol werem olketa sandol. So taem olketa wakabaot long road, leg bilong olketa fulap witim dust. Pipol ting long wei for wasim leg bilong man wea visit kam long haos olsem kaenfala fasin.

Bat long datfala taem no eniwan long olketa disaepol willing for wasim leg bilong olketa narawan. So Jesus seleva duim. Taem hem duim diswan, Jesus teachim olketa disaepol wanfala important leson. Olketa need for lanem disfala leson. And hem wanfala leson wea iumi distaem tu need for lanem.

 Waswe, iu savve wanem nao datfala leson?— Bihaen Jesus go sidaon bak long tebol, hem explainim: “Waswe, iufala savve long samting wea mi duim long iufala? Iufala kolem mi, ‘Teacher,’ and, ‘Lord,’ and iufala tok stret, bikos datwan hem tru. So, sapos mi, nomata mi Lord and Teacher, wasim leg bilong iufala, iufala tu shud wasim leg bilong narawan.”—John 13:2-14.

Datfala Nambawan Teacher showim hem laekem olketa disaepol for servem each other. Hem no laekem olketa for tingim olketa seleva nomoa. Hem no laekem olketa for tingse olketa important tumas dastawe olketa narawan shud evritaem servem olketa. Hem laekem olketa for willing for servem nara pipol.

Datwan hem wanfala gud leson, iaman?— Waswe, bae iu olsem datfala Nambawan Teacher and servem nara pipol?— Iumi evriwan savve duim olketa samting for nara pipol. Diswan bae mekem olketa hapi. Bat winim evri nara samting, hem bae mekem Jesus and Dadi bilong hem hapi.

Hem no hard for servem nara pipol. Sapos iu lukluk raon, iu bae lukim staka samting wea iu savve duim for nara pipol. Waswe, iu  savve duim eni samting for helpem mami bilong iu? Iu savve hem duim staka samting for iu and evriwan long famili. Waswe, iu savve helpem hem?— Waswe sapos iu askem hem?

Maet iu savve redim pleit long tebol bifor famili kaikai. Or maet iu savve kolektem olketa dirty pleit bihaen famili kaikai finis. Samfala pikinini go torowem rabis evriday. Nomata wanem samting iu savve duim, iu servem nara pipol, olsem Jesus duim.

Waswe, iu garem olketa young brata and sista wea iu savve servem olketa? Remember, Jesus, datfala Nambawan Teacher willing for servem olketa disaepol bilong hem. Taem iu servem olketa young brata and sista bilong iu, iu followim Jesus. Wanem nao iu savve duim for olketa?— Maet iu savve helpem olketa for klinim olketa seleva gud taem olketa swim. Or maet iu savve helpem olketa for werem kaleko. Or maet iu savve  helpem olketa for stretem bed bilong olketa. Waswe, iu savve tingim eni samting moa wea iu savve duim for olketa?— Olketa bae lovem iu from iu duim olketa samting hia, olsem wei wea olketa disaepol lovem Jesus.

Long skul tu iu savve servem nara pipol. Maet iu fit for servem olketa skulfren or teacher bilong iu. Sapos samwan foldaonem olketa buk bilong hem, iu bae showimaot kaenfala fasin sapos iu helpem hem for pikimap. Maet iu ask for klinim blakboard or duim eni nara samting for teacher bilong iu. Nomata wei for openem door for samwan hem kaenfala samting for duim.

Long samfala taem, maet iumi lukim pipol no sei thankiu taem iumi servem olketa. Waswe, iu ting diswan shud stopem iumi for duim gud samting?— Nomoa! Staka pipol no thankiu long Jesus for olketa gud waka wea hem duim. Bat datwan no stopem hem for duim gud samting.

So iumi mas no hol bak for servem nara pipol. Iumi laek rememberim datfala Nambawan Teacher, Jesus, and evritaem trae followim example bilong hem.