LONG chapter 34 and 35, haomas pipol nao iumi read abaotem wea laef bak moa?— Faevfala. Haomas nao pikinini?— Thrifala. And mek-foa hem wanfala young man. Long tingting bilong iu, wanem nao diswan showimaot?—

Hem showim hao God lovem young pipol. Bat hem bae mekem staka narawan laef bak moa tu. Waswe, God bae mekem gud pipol nomoa laef bak?— Maet iumi ting olsem. Bat staka pipol nating lanem tru samting abaotem Jehovah God and Son bilong hem. So olketa duim nogud samting bikos olketa lanem olketa rong samting. Waswe, iu ting Jehovah bae mekem pipol olsem laef bak moa?—

Bible hem sei “wanfala resurrection bae kamap for olketa wea raeteous and olketa wea no raeteous.” (Acts 24:15) Why nao olketa wea no raeteous bae laef bak moa?— Hem bikos olketa no garem chance for lane abaotem Jehovah and wanem hem laekem pipol for duim.

 Wanem taem nao iu ting pipol bae laef bak moa?— Tingim taem wea Lazarus dae and Jesus promisim sista bilong hem Martha: “Brata bilong iu bae laef bak.” Martha ansa olsem: ‘Mi savve hem bae laef bak long last day.’ (John 11:23, 24) Wanem nao Martha minim taem hem sei Lazarus bae laef bak long “last day”?—

Martha herem finis promis bilong Jesus: ‘Evriwan insaed grev bae kamaot.’ (John 5:28, 29) So “last day” hem taem wea evriwan wea God rememberim bae laef bak moa. Disfala last day hem no wanfala 24 hour day. Hem wan thousand year. Bible talem hao long datfala day, ‘God bae judgem pipol long earth.’ Hem bae judgem tu olketa wea laef bak moa.—Acts 17:31; 2 Peter 3:8.

Tingim hao datwan bae day for barava hapi! Insaed disfala wan thousand year, plande million pipol wea dae bae laef bak moa. Jesus kolem ples wea olketa bae laef bak long hem, Paradaes. So wea nao bae datfala Paradaes kamap and hao nao bae living long there?

Samting olsem thrifala hour bifor Jesus dae long post, hem story abaotem Paradaes long man wea hange long post saed long hem. Olketa panisim man hia from hem duim criminal fasin. Bat taem datfala criminal lukim Jesus and herem wanem pipol talem abaotem Hem, hem start for biliv long Jesus. So datfala criminal hem sei: “Rememberim mi taem iu kasem kingdom  bilong iu.” Jesus sei long hem: “Tru nao mi talem iu tuday, Iu bae stap witim mi long Paradaes.”—Luke 23:42, 43.

Wanem nao Jesus minim taem hem talem datwan? Wea nao Paradaes?— Ting abaotem datwan. Long firstaem, wea nao Paradaes?— Remember, God givim firstfala man, Adam, and waef bilong hem, wanfala paradaes hia long earth for tufala stap long hem. Nem bilong datwan hem garden bilong Eden. Olketa animal stap long datfala garden, bat olketa no spoelem eniwan. And staka tree stap wea garem olketa frut wea teist naes tumas, and wanfala big river tu. Hem barava naes ples for stap!—Genesis 2:8-10.

So taem iumi readim hao datfala criminal bae stap long Paradaes, long mind bilong iumi, iumi shud tingim disfala earth olsem wanfala ples wea luk naes for pipol stap long hem. Waswe, diswan minim Jesus bae barava stap hia long earth witim datfala man taem earth hem kamap Paradaes?— Nomoa. Waswe, iu savve why hem bae no stap long earth?—

Hem bikos Jesus bae King long heven and rul ovarem Paradaes long earth. So Jesus bae stap witim datfala man long wei wea Jesus bae mekem hem laef bak moa and givim samting hem needim. Bat why nao Jesus bae letem man wea criminal bifor for stap insaed Paradaes?— Iumi ting raonem diswan firstaem.

 Waswe, bifor datfala criminal story witim Jesus, hem savve long olketa plan bilong God?— Nomoa. Hem duim olketa nogud samting bikos hem no savve long tru samting abaotem God. Long Paradaes hem bae lane abaotem olketa plan bilong God. Then hem bae garem chance for pruvim hem barava lovem God taem hem duim samting wea God laekem.

Waswe, bae evriwan wea laef bak moa stap long Paradaes long earth?— Nomoa. Waswe, iu savve why nao olsem?— Bikos samfala bae laef bak for stap witim Jesus long heven. Olketa bae rul witim hem olsem olketa king ovarem Paradaes earth. Hao nao iumi savve long diswan?

Long naet bifor Jesus dae, hem sei olsem long olketa aposol: ‘Long haos bilong Dadi bilong mi long heven, staka ples hem stap, and mi go for redim ples for iufala.’ Then Jesus promisim olketa: “Mi bae kam bak moa and tekem iufala kam long mi, mekem ples wea mi stap iufala tu bae stap.”—John 14:2, 3.

 Wea nao Jesus go bihaen hem laef bak?— Ia, hem go bak long heven for stap witim Dadi bilong hem. (John 17:4, 5) So Jesus promisim olketa aposol and nara follower hao hem bae mekem olketa laef bak for stap witim hem long heven. Wanem nao olketa bae duim long there witim Jesus?— Bible sei olketa disaepol wea insaed long “first resurrection” bae stap long heven and rul ovarem earth “olsem olketa king witim hem for datfala wan thousand year.”—Revelation 5:10; 20:6; 2 Timothy 2:12.

Haomas pipol nao bae insaed long “first resurrection” and rul witim Jesus olsem olketa king?— Jesus talem olketa disaepol: “No fraet, smolfala sekson bilong sheep, from dadi bilong iufala hem disaed for givim kingdom long iufala.” (Luke 12:32) Bible talem barava namba bilong disfala “smolfala sekson bilong sheep,” wea laef bak for stap witim Jesus long Kingdom bilong hem long heven. Bible showimaot hao namba bilong olketa hia wea laef bak from earth hem “wan handred and foti-foa thousand.”—Revelation 14:1, 3.

Haomas pipol nao bae stap long Paradaes long earth?— Bible no talem. Bat God talem Adam and Eve taem tufala stap long garden bilong Eden for garem pikinini and fulimap earth. Tufala nating duim datwan. Bat God bae mek sure plan bilong hem for fulimap earth witim gudfala pipol bae fulfill.—Genesis 1:28; Isaiah 45:18; 55:11.

Tingim hao hem bae naes tumas for stap long Paradaes! Full earth bae barava luk naes tumas. Hem bae garem staka bird, animal, and olketa difren kaen tree and flaoa wea luk naes. No eniwan bae body soa from hem sik, no eniwan bae dae. Evriwan bae fren gud witim each other. Sapos iumi laek for laef olowe insaed Paradaes, distaem nao hem taem for reredi for datwan.