WANFALA taem datfala Nambawan Teacher askem wanfala kwestin wea mekem man sapraes. Kwestin hem olsem: “Hu nao mami bilong mi, and hu nao olketa brata bilong mi?” (Matthew 12:48) Waswe, iu savve ansarem datfala kwestin?— Maet iu savve finis hao Mary nao hem mami bilong Jesus. Bat waswe, iu savve long nem bilong olketa brata bilong hem?— Waswe, hem garem eni sista tu?—

Bible sei olketa brata bilong Jesus nao “James and Joseph and Simon and Judas.” And taem Jesus preach olketa sista bilong hem laef yet. From Jesus nao firstborn, olketa evriwan hia young winim hem.—Matthew 13:55, 56; Luke 1:34, 35.

Waswe, olketa brata bilong Jesus kamap disaepol bilong hem tu?— Bible talem hao firstaem olketa “no showimaot faith long hem.” (John 7:5) Bat bihaen, James and Judas (wea nem bilong hem Jude tu) kamap olketa disaepol, and tufala raetem tufala buk bilong Bible tu. Waswe, iu savve olketa wanem buk nao tufala raetem?— Ia, tufala raetem James and Jude.

Nomata Bible no talem nem bilong olketa sista bilong Jesus, iumi savve hem garem tufala sista, or maet winim tufala. Waswe, tufala sista hia kamap follower bilong hem?— Bible no talem, so iumi no savve. Bat waswe, iu savve why nao Jesus askem datfala kwestin, “Hu nao mami bilong mi, and hu nao olketa brata bilong mi?”— Iumi laek for savve.

Jesus gohed teachim olketa disaepol bilong hem taem samwan tok kam and sei: “Mami bilong iu and olketa brata bilong iu standap  long aotsaed, and olketa laek for story witim iu.” So Jesus iusim datfala chance for teachim wanfala important leson taem hem askem disfala kwestin wea mekem man sapraes: “Hu nao mami bilong mi, and hu nao olketa brata bilong mi?” Hem point go long olketa disaepol bilong hem and hem sei: “Lukim! Mami bilong mi and olketa brata bilong mi!”

Then Jesus explainim wanem hem minim, taem hem sei: “Man wea duim will bilong Father bilong mi wea stap long heven, datwan nao brata, and sista, and mami bilong mi.” (Matthew 12:47-50) Diswan showimaot Jesus lovem tumas olketa disaepol bilong hem. Hem teachim iumi hao olketa disaepol bilong hem nao, olsem olketa really brata, sista, and mami long hem.

Long datfala taem olketa really brata bilong Jesus—James, Joseph, Simon, and Judas—no bilivim hao Jesus hem Son bilong God. Luk olsem olketa nating bilivim samting angel Gabriel talem long mami bilong olketa. (Luke 1: 30-33) So maet olketa no kaen long Jesus. Eniwan wea act olsem hem no wanfala trufala brata or sista. Waswe, iu savve long eniwan wea no kaen long brata or sista bilong hem?—

Bible storyim Esau and Jacob. From Esau kamap kros tumas hem sei: “Mi bae killim dae brata bilong mi Jacob.” Mami bilong tufala, Rebekah, hem wari tumas, so hem sendem Jacob go long nara ples mekem Esau no killim hem dae. (Genesis 27:41-46) Bat, staka year bihaen Esau changem fasin bilong hem, and hem holem and kissim Jacob.—Genesis 33:4.

Gogo, Jacob garem 12-fala son. Bat olketa firstfala son bilong Jacob no lovem Joseph, young brata bilong olketa. Olketa jealous long hem bikos hem favorite son bilong dadi bilong olketa. So olketa salem hem go long pipol for salem slave wea gogo for Egypt. Then olketa talem dadi bilong olketa hao wanfala wild animal killim dae Joseph. (Genesis 37:23-36) Samting wea olketa duim hem nogud tumas, iaman?—

Bihaen, olketa brata bilong Joseph sorre long samting wea olketa duim. So Joseph forgivim olketa. Waswe, iu lukim hao Joseph hem olsem Jesus?—  Olketa aposol bilong Jesus ranawe from hem taem hem kasem trabol, and Peter tu sei hem no savve long hem. Bat olsem Joseph, Jesus forgivim olketa evriwan.

Nara example hem Cain and Abel wea tufala brata. Iumi savve lanem wanfala leson from tufala tu. God lukim long heart bilong Cain hao hem no really lovem brata bilong hem. So God talem Cain hem shud changem fasin bilong hem. Sapos Cain barava lovem God, hem bae lisin long hem. Bat hem no lovem God. Wanday Cain sei long Abel: “Iumi go long field.” Abel go witim Cain. Taem tufala long field seleva, Cain hitim brata bilong hem, and from hem barava hitim hem strong, Abel dae nao.—Genesis 4:2-8.

Bible sei iumi shud lanem wanfala spesol leson from datwan. Waswe, iu savve wanem nao datwan?— ‘Diswan hem message wea iu herem bifor kam: Iumi shud lovem each other and no olsem Cain, wea kam from datfala wicked wan.’ So olketa brata and sista shud lovem each other. Olketa shud no olsem Cain.—1 John 3:11, 12.

Why nao iumi no laek for olsem Cain?— Bikos Bible sei hem ‘kam from datfala wicked wan,’ Devil. From Cain duim samting wea olsem Devil, hem olsem Devil nao dadi bilong Cain.

Waswe, iu savve why nao hem important for lovem olketa brata and sista bilong iu?— Sapos iu no lovem olketa, iu followim olketa pikinini bilong hu?— Olketa pikinini bilong Devil. Iu no laek for olsem, iaman?— So hao nao iu savve showimaot iu laek for wanfala pikinini bilong God?— Thru long wei for barava lovem olketa brata and sista bilong iu.

Bat wanem nao love?— Love hem wanfala feeling insaed long iumi wea mekem iumi laek for duim olketa kaen and gudfala samting for nara pipol. Iumi showimaot iumi lovem nara pipol taem iumi kea for olketa and duim olketa gud samting for olketa. And  hu nao olketa brata and sista wea iumi shud lovem?— Remember, Jesus teachim iumi hao hem olketa wea insaed bigfala Christian famili bilong iumi.

Waswe, hem barava important for lovem olketa Christian brata and sista?— Bible sei: “Hard for man lovem God wea hem no savve lukim, sapos hem no lovem brata [or sista bilong hem] wea hem savve lukim.” (1 John 4:20) So iumi kanduit lovem samfala nomoa insaed long Christian famili. Iumi mas lovem evriwan. Jesus sei: “From diswan evriwan bae savve iufala nao olketa disaepol bilong mi, sapos iufala lovem each other.” (John 13:35) Waswe, iu lovem evri brata and sista?— Remember, sapos iu no lovem olketa, hard for iu sei iu lovem God.

Hao nao iumi savve showimaot iumi barava lovem olketa brata and sista?— Sapos iumi lovem olketa, iumi bae no stap klia long olketa from iumi no laek story witim olketa. Iumi bae kaen long evriwan. Iumi bae evritaem duim gud samting for olketa and willing for share witim olketa. And sapos olketa kasem trabol, iumi bae helpem olketa from iumi wanfala big famili.

Taem iumi barava lovem evri brata and sista, wanem nao diswan showimaot?— Hem showimaot iumi olketa disaepol bilong Jesus, datfala Nambawan Teacher. And iumi laek olsem, iaman?—