WASWE, iu savve long prea wea Jesus teachim long olketa follower bilong hem?— Sapos nomoa, iumi savve readim datwan tugeta from Bible long Matthew 6:9-13. Staka kolem diswan Lord’s Prea wea garem disfala toktok: “Mekem kingdom bilong iu kam.” Waswe, iu savve wanem nao Kingdom bilong God?—

Wanfala king hem ruler long wanfala kantri. And olketa kolem gavman bilong hem wanfala kingdom. Samfala kantri garem rul wea president nao hem leader bilong kantri. Wanem nao olketa kolem Ruler bilong gavman bilong God?— Olketa kolem hem King. Hem nao why olketa kolem gavman bilong God, Kingdom.

Waswe, iu savve hu nao Jehovah God chusim for King long gavman bilong Hem?— Son bilong hem, Jesus Christ. Why nao Jesus hem wanfala ruler wea winim eniwan wea olketa man savve chusim?—  Hem bikos Jesus barava lovem Dadi bilong hem, Jehovah. So hem evritaem duim olketa samting wea stret.

Longfala taem bifor Jesus born long Bethlehem, Bible story abaotem wei wea hem bae born and sei hem bae kamap Ruler wea God chusim. Iumi readim diswan long Isaiah 9:6, 7, from King James Version. Hem sei: “Wanfala pikinini hem born for iumi, iumi kasem wanfala son; and datfala gavman bae stap long shoulder bilong hem: and hem bae garem nem . . . Prince Bilong Peace. Rul bilong gavman bilong hem and peace bae no savve finis.”—Italic raeting hem bilong mifala.

Waswe, iu savve why Ruler long Kingdom bilong God garem nem “Prince”?— Disfala prince hem son bilong wanfala king. And Jesus hem Son bilong Bigfala King, Jehovah. Bat Jehovah mekem Jesus King long gavman bilong Hem tu, wea bae rulim disfala earth for wan thousand year. (Revelation 20:6) Bihaen Jesus baptaes, hem “start for preach and sei: ‘Iufala repent, from kingdom bilong heven hem kam klosap nao.’”—Matthew 4:17.

Long tingting bilong iu, why nao Jesus sei Kingdom kam klosap?— Hem talem datwan bikos datfala King, wea bihaen bae rul long heven, hem stap long there witim olketa! Hem nao why Jesus talem pipol: “Kingdom bilong God hem stap midolwan long iufala.” (Luke 17:21) Waswe, bae iu laekem King bilong Jehovah for stap barava klosap long iu mekem iu savve tasim hem?—

So talem mi, wanem important waka nao Jesus kam for duim long earth?— Jesus ansarem datfala kwestin, and sei: “Long olketa nara taon tu mi mas talemaot gud nius bilong kingdom bilong God, bikos hem nao why hem sendem mi kam.” (Luke 4:43) Jesus savve hao hem hard for hemseleva duim evribit datfala preaching waka. So wanem nao hem duim?—

Jesus tekem pipol witim hem and showim olketa hao for duim preaching waka.  Twelvfala wea hem chusim for kamap olketa aposol, olketa first wan wea hem teachim. (Matthew 10:5, 7) Bat waswe, Jesus trainim nomoa olketa aposol for duim disfala waka? Nomoa, Bible sei Jesus trainim tu plande narawan for preach. Gogo, hem sendem 70 nara disaepol wea go firstaem long olketa ples wea bae hem go long hem bihaen. And wanem nao olketa teachim pipol?— Jesus sei: “Talem olketa, ‘Kingdom bilong God hem kam klosap long iufala.’” (Luke 10:9) Long wei olsem pipol lane abaotem gavman bilong God.

Longfala taem bifor long Israel, olketa niu king savve raedem donkey go long taon mekem pipol lukim olketa. Datwan nao samting Jesus duim long lastfala taem wea hem go long Jerusalem. Iu savve, Jesus bae kamap Ruler long Kingdom bilong God. Waswe, pipol laekem hem for King bilong olketa?—

Taem hem raedem donkey, plande pipol putim kaleko bilong olketa long road front long hem. Olketa narawan katem olketa branch from olketa tree and putim long road. Wei wea olketa duim diswan hem showimaot olketa laekem Jesus for kamap King bilong olketa. Olketa singaot olsem: “Blessim Datwan wea kam olsem King long nem bilong Jehovah!” Bat no evriwan hapi. Samfala bigman bilong religion sei olsem long Jesus, ‘Talem olketa disaepol bilong iu for kwaet.’—Luke 19:28-40.

Bihaen faevfala day, olketa arrestim Jesus and tekem hem go insaed palace for standap front long Pontius Pilate wea hem governor. Olketa enemy bilong Jesus sei Jesus seleva talem hem wanfala king and hem againstim gavman bilong Rome. So Pilate askem Jesus abaotem diswan. Jesus showim hao hem no trae for tekova long gavman. Hem talem Pilate: “Kingdom bilong mi hem no part bilong disfala world.”—John 18:36.

Pilate go aotsaed and talem pipol hao long tingting bilong hem, Jesus no duim eni rong samting. Bat pipol no laekem Jesus for kamap King bilong olketa. Olketa no laekem hem for kamap free. (John 18:37-40) Bihaen hem story moa witim Jesus, Pilate feel sure hao hem  no duim eni rong samting. So, bihaen hem tekem Jesus go aotsaed for last taem, Pilate hem sei: “Lukim! King bilong iufala!” Bat pipol shout olsem: “Tekem hem go! Tekem hem go! Nilam hem long post!”

Pilate hem ask: “Waswe, bae mi nilam king bilong iufala long post?” Olketa chief priest ansa olsem: “Only king wea mifala garem hem Caesar.” Tingim datwan! Olketa wicked priest hia win for mekem pipol rejectim Jesus!—John 19:1-16.

Distaem hem semsem tu olsem long taem bilong Jesus. Klosap evri pipol no laekem Jesus for King bilong olketa. Maet olketa sei olketa bilivim God, bat  olketa no laekem God or Christ for talem olketa wanem for duim. Olketa laekem gavman bilong olketa seleva hia long earth.

Wanem nao tingting bilong iumi abaotem diswan? Taem iumi lane abaotem Kingdom bilong God and evri nambawan samting wea hem bae duim, hao nao feeling bilong iumi for God?— Iumi lovem hem, iaman?— So, hao nao iumi savve showim God iumi lovem hem and laekem Kingdom bilong hem for rulim iumi?—

Iumi savve showim God feeling bilong iumi from heart taem iumi followim example bilong Jesus. And wanem nao Jesus duim for showimaot hem lovem Jehovah?— Jesus sei: “Mi evritaem duim olketa samting wea mekem hem hapi.” (John 8:29) Tru nao, Jesus kam long earth ‘for duim will bilong God’ and “for finisim waka bilong hem.” (Hebrews 10:7; John 4:34) Tingim wanem Jesus duim bifor hem startim preaching waka bilong hem.

Jesus go long John Baptaesa long Jordan River. Bihaen tufala go insaed long wata, John putim Jesus andanit long wata and then apim hem aot from wata. Waswe, iu savve why nao John baptaesim Jesus?—

Jesus nao askem John for duim datwan. Bat hao nao iumi savve God laekem Jesus for baptaes?— Iumi savve bikos taem Jesus kamaot from wata,  hem herem voice bilong God from heven wea sei: “Iu nao Son bilong mi, datwan wea mi lovem; mi acceptim iu.” God sendem tu holy spirit wea kam daon olsem wanfala kurukuru antap long Jesus. So wei wea Jesus askem John for baptaesim hem showim hao hem laek servem Jehovah for full laef bilong hem, for olowe.—Mark 1:9-11.

Distaem iu pikinini yet. Bat wanem nao bae iu duim taem iu big?— Waswe, bae iu followim example bilong Jesus and baptaes?— Iu shud followim example bilong hem, from Bible sei hem leavim “wanfala example for iufala followim long klos wei.” (1 Peter 2:21) Taem iu baptaes, iu showim hao iu barava laekem Kingdom bilong God for rul ovarem iu. Bat hem no inaf for baptaes nomoa.

Iumi need for obeyim evri samting wea Jesus teachim. Jesus talem hao iumi shud “no part bilong disfala world.” Waswe, iumi obeyim hem sapos iumi duim olketa samting bilong world? Jesus and olketa aposol stap klia long olketa samting bilong world. (John 17:14) Wanem nao olketa duim?— Olketa story long pipol abaotem Kingdom bilong God. Datwan nao important waka long laef bilong olketa. Waswe, iumi savve duim datfala sem waka tu?— Ia, and iumi bae duim datfala waka sapos iumi laek for lukim samting iumi prea for hem taem iumi prea for Kingdom bilong God for kam.