MI LAEK savve, wanem kaen buk nao iu laekem tumas?— Samfala pikinini bae chusim buk wea story abaotem olketa animal. Olketa nara pikinini bae chusim buk wea garem staka piksa. Hem naes tumas for readim olketa buk olsem.

Bat olketa buk wea gud winim eni nara buk long full world talem iumi olketa tru samting abaotem God. Wanfala long olketa buk hia hem barava nambawan. Waswe, iu savve long nem bilong disfala buk?— Hem Bible.

Why nao Bible barava important?— Hem from God nao givim for iumi. Hem story abaotem hem and abaotem olketa gud samting wea hem bae duim for iumi. And hem showim wanem iumi shud duim for mekem hem hapi. Hem olsem wanfala leta from God.

God savve raetem full Bible long heven and then givim long olketa man. Bat hem no duim datwan. Nomata olketa information insaed kam from God, hem iusim olketa servant bilong hem long earth for raetem Bible.

Hao nao God duim datwan?— For minim, tingim diswan. Taem iumi herem voice bilong samwan long radio, datfala voice kam from wanfala man wea stap farawe. Taem iumi lukluk long television, iumi savve lukim tu piksa bilong pipol long olketa nara kantri long world, and iumi savve herem wanem olketa talem.

Olketa man savve go farawe insaed olketa spesol rocket for kasem moon, and long there olketa savve sendem olketa message kam bak long earth. Waswe, iu savve long datwan?— Sapos olketa man savve duim datwan, waswe, God savve sendem kam toktok from heven?— Ia, hem savve duim! And hem duim diswan longfala taem bifor olketa man garem radio or television.

 Moses nao man wea herem God toktok. Moses no savve lukim God, bat hem savve herem voice bilong God. Plande million pipol stap long there taem God toktok. Long datfala day God sekem maunten, and hem thunder and laetning. Pipol savve God nao toktok, bat olketa fraet fogud. So olketa talem Moses: “No letem God story witim mifala nogud mifala dae.” Bihaen, Moses raetem olketa samting wea God talem. And samting wea Moses raetem hem stap insaed long Bible.—Exodus 20:18-21.

Moses raetem first faevfala buk bilong Bible. Bat no hemseleva nomoa raetem samfala part bilong Bible. God iusim samting olsem 40-fala man for raetem samfala part bilong Bible tu. Olketa man hia stap laef longfala taem bifor, and hem tekem plande year nao for olketa finis  raetem Bible. Olketa raetem Bible insaed samting olsem 1,600 year! Samting wea mekem iumi sapraes nao hem nomata samfala man hia no savve long each other, evri samting olketa raetem hem barava stret.

Samfala man wea God iusim for raetem Bible, staka pipol savve long olketa. Nomata Moses hem wanfala shepherd, hem kamap man for leadim pipol bilong Israel. Solomon hem wanfala king wea wisdom and olketa rich samting bilong hem barava winim evri nara man long world. Bat olketa nara man wea raetem Bible staka pipol no savve long olketa. Amos lukaftarem olketa fig tree.

Nara man moa wea raetem Bible hem wanfala doctor. Waswe, iu savve long nem bilong hem?— Hem Luke. Nara man wea raetem Bible hem garem waka for kolektem tax bifor. Nem bilong hem Matthew. And nara man moa hem wanfala lawyer, wea hem savve tumas abaotem law long lotu bilong olketa Jew. Hem raetem plande buk long Bible winim eni nara man. Waswe, iu savve long nem bilong hem?— Hem Paul. And tufala disaepol bilong Jesus wea share for raetem Bible hem Peter and John, wea bifor tufala man for fishing.

Plande man wea raetem Bible raet abaotem olketa samting wea God bae duim long future. Hao nao olketa savve long olketa samting hia bifor olketa happen?— God nao talem diswan long olketa. Hem talem olketa wanem bae happen.

Kasem taem wea Jesus, datfala Nambawan Teacher stap long earth, olketa raetem finis bigfala haf bilong Bible. Tingim hao datfala Nambawan Teacher stap long heven bifor. Hem savve long wanem God duim finis. Waswe, hem bilivim hao Bible kam from God?— Ia, hem bilivim datwan.

Taem Jesus story long pipol abaotem olketa samting wea God duim, hem read from Bible. Samfala taem, hem talem long olketa samfala toktok from Bible wea hem baeheartim. Jesus talem iumi tu plande moa samting from God. Jesus sei: “Olketa samting wea mi herem from hem nao mi talem long world.” (John 8:26) Jesus herem plande samting  from God bikos hem stap witim God bifor. And long wea nao iumi savve readim olketa samting wea Jesus talem?— Insaed long Bible. Olketa raetem for iumi readim.

Bat, taem God iusim olketa man for raetem Bible, olketa iusim languis bilong datfala taem. Dastawe olketa raetem bigfala haf bilong Bible long Hebrew languis, lelebet long Aramaic languis, and plande samting long Greek languis. From distaem staka pipol no savve readim olketa languis hia, olketa raetem Bible long olketa nara languis. Distaem pipol savve readim samfala part bilong Bible long winim 2,260 languis. Datwan hem staka tumas! Bible hem leta bilong God for pipol evriwea. Bat nomata olketa raetem long plande difren languis, message bilong hem still kam from God.

Wanem Bible talem hem important for iumi. Olketa  raetem longfala taem bifor. Bat hem story abaotem olketa samting wea happen distaem. And hem talem iumi wanem God bae duim long future wea klosap. Wanem hem talem mekem iumi barava hapi tumas! Hem givim iumi wanfala nambawan hope.

Bible talem iumi tu olketa wanem kaen fasin iumi shud garem. Hem talem iumi wanem hem stret and wanem hem rong. Iu need for savve long diswan and mi tu. Bible story abaotem pipol wea duim olketa nogud samting and samting wea kasem olketa, mekem iumi savve stap klia from trabol wea olketa kasem. Hem storyim tu pipol wea duim stret samting and olketa gudfala samting wea olketa kasem from datwan. Olketa raetem evri samting hia for helpem iumi.

Bat for iumi kasem plande gud samting from Bible, iumi need for savve long ansa for wanfala kwestin. Kwestin hem olsem: Hu nao givim iumi Bible? Wanem nao ansa bilong iu?— Tru nao, full Bible kam from God. Wanem nao iumi savve duim for showimaot iumi barava wise?— Hem nao for iumi lisin long God and duim wanem hem talem.

So iumi need for markem taem for readim Bible tugeta. Taem iumi kasem leta from samwan wea iumi lovem tumas, iumi readim no wantaem nomoa bat staka taem. Hem spesol long iumi. Bible shud barava spesol long iumi tu bikos hem wanfala leta from Datwan wea lovem iumi winim eni nara man. Hem wanfala leta from God wea lovem iumi.