WASWE, enitaem eniwan askem iu for duim rong samting?— Waswe, hem pokem iu for duim? Or waswe, hem sei hem bae naes tumas for duim datwan and hem bae no barava rong nomoa for duim?— Taem samwan duim diswan long iumi, hem traem iumi.

Wanem nao iumi shud duim taem iumi kasem wanfala temptation? Waswe, iumi shud letem datwan pullim iumi and duim rong samting?— Datwan bae no mekem Jehovah God hapi. Bat waswe, iu savve hu nao bae hapi?— Ia, Satan nao bae hapi.

Satan hem enemy bilong God, and Satan hem enemy bilong iumi tu. Iumi no savve lukim hem bikos hem wanfala spirit. Bat hem savve lukim iumi. Wanday Devil story witim Jesus, datfala Nambawan Teacher, and hem trae for testim hem. Iumi lukim wanem Jesus duim. Then iumi bae savve long stret samting for duim taem iumi kasem temptation.

Jesus evritaem laek duim wanem God laekem. Hem showimaot diswan taem hem baptaes long Jordan River. Satan trae for testim Jesus stretawe bihaen hem baptaes. Bible sei, “heven hem open” for Jesus. (Matthew 3:16) Diswan savve minim hao Jesus start nao for rememberim evri samting abaotem laef bilong hem witim God long heven bifor.

 Bihaen Jesus baptaes hem go long desert for ting raonem olketa samting wea hem start for rememberim. Foti day and naet go pas. Long full taem hia Jesus no kaikaim eni samting, so hem hangre fogud. Long taem hia nao Satan trae testim Jesus.

Devil hem sei: “Sapos iu wanfala son bilong God, talem olketa ston hia for kamap bred.” Hem bae teist naes tumas for kaikaim bred! Bat waswe, Jesus savve changem olketa ston for kamap bred?— Ia, hem savve duim. Hao nao olsem? Bikos Jesus, wea hem Son bilong God, garem spesol paoa.

Waswe, bae iu changem wanfala ston for kamap bred sapos Devil askem iu for duim?— Jesus hem hangre fogud. So waswe, iu tingse hem bae olraet for duim datwan wanfala taem nomoa?— Jesus savve hem rong for hem iusim paoa bilong hem long datfala wei. Jehovah givim hem paoa hia for pullim pipol go long God, no for hem kasem gudfala samting for hemseleva.

So, Jesus talem Satan disfala toktok wea stap insaed Bible: ‘Man mas laef, no long bred nomoa, bat long evri toktok wea kam from mouth bilong Jehovah.’ Jesus savve hao wei for mekem Jehovah hapi hem moa important winim wei for garem kaikai.

Bat Devil traem Jesus moa. Hem tekem Jesus go long Jerusalem and mekem hem standap long barava hae part bilong datfala  temple. Then Satan sei: ‘Sapos iu son bilong God, torowem iuseleva go daon, from olketa raetem finis hao olketa angel bilong God bae protectim iu.’

Why nao Satan talem diswan?— Hem talem for mekem Jesus duim samting wea krangge. Bat long datfala taem tu, Jesus nating lisin long Satan. Hem talem Satan: “Olketa raetem finis, ‘Iu mas no testim God bilong iu Jehovah.’” Jesus savve hem rong for testim Jehovah long wei for putim laef bilong hem long danger.

Nomata olsem, Satan no givap. Next samting hem tekem Jesus go long wanfala barava hae maunten. Long there hem showim evri gavman bilong world and glory bilong olketa. Then Satan sei long Jesus: “Evri samting hia mi bae givim iu sapos iu baodaon and worshipim mi.”

Tingim samting wea Devil laek givim long Jesus. Waswe, evri gavman bilong man hia, hem barava bilong Satan?— Jesus no talem hao Satan no ownim olketa hia. Hem bae talem datwan sapos olketa gavman hia no bilong Satan. So hem klia, Satan nao barava ruler bilong evri kantri long world. Bible kolem hem “ruler bilong disfala world.”—John 12:31.

Wanem nao bae iu duim sapos Devil promis for givim iu wanfala samting sapos iu worshipim hem?— Jesus savve hem rong for worshipim Devil nomata sapos Hem bae kasem reward. So Jesus hem sei: ‘Iu go from mi, Satan! From Bible sei God bilong iu Jehovah nomoa iu mas worshipim and hem nomoa iu mas servem.’—Matthew 4:1-10; Luke 4:1-13.

Iumi tu kasem temptation. Waswe, iu savve long samfala temptation hia?— Wanfala example hem olsem. Maet mami bilong iu mekem wanfala naes pudding. Hem talem iu for no kaikaim bat weit for taem bilong kaikai. Bat iu hangre tumas, so maet iu kasem test for kaikaim datwan. Waswe, bae iu obeyim mami bilong iu?— Satan laekem iu for no obeyim hem.

 Rememberim Jesus. Hem barava hangre tumas tu. Bat hem savve hao wei for mekem God hapi hem moa important winim wei for kaikai. Iu showimaot iu olsem Jesus taem iu duim wanem mami talem long iu.

Maet samfala pikinini talem iu for smokem marijuana. Maet olketa sei diswan bae mekem iu feel gud. Bat marijuana hem wanfala drug. Hem savve barava spoelem health bilong iu. Or maet samwan givim iu wanfala smoke, wea hem  wanfala drug tu, and pokem iu for sei sapos iu win iu smokem datwan. Wanem nao bae iu duim?—

Rememberim Jesus. Satan trae for mekem Jesus putim laef bilong hem long danger taem hem talem hem for jamp daon from temple. Bat Jesus nating willing for duim datwan. Wanem nao bae iu duim sapos samwan pokem iu for duim samting wea hem danger?— Jesus nating lisin long Satan. Iu tu shud no lisin long eniwan wea trae switim iu for duim rong samting.

Maet samwan askem iu for worshipim image, wea hem samting Bible sei iumi mas no duim. (Exodus 20:4, 5) Maet hem part long wanfala ceremony long skul. Maet olketa talem tu hao iu bae no go long skul moa sapos iu les for duim diswan. Wanem nao bae iu duim?—

Hem isi for duim stret samting taem evriwan duim. Bat for duim stret samting savve barava hard taem olketa narawan trae mekem iumi duim rong samting. Maet olketa sei wanem olketa duim hem olraet nomoa. Bat important kwestin nao, Wanem nao God talem abaotem datwan? Hem nao savve long best samting for iumi.

So nomata wanem olketa narawan talem, iumi shud no duim olketa samting wea God sei hem rong. Long wei olsem iumi bae evritaem mekem God hapi, and iumi bae no enitaem mekem Devil hapi.