WASWE, iu rememberim why nao wanfala angel bilong God kamap datfala Devil?— Hem from hem selfish and hem laekem pipol for worshipim hem wea mekem hem againstim God. Waswe, olketa nara angel followim Satan?— Ia, olketa followim hem. Bible kolem olketa, ‘olketa angel bilong Satan’ or olketa demon.—Revelation 12:9.

Waswe, olketa nogud angel hia, olketa demon, biliv long God?— Bible sei ‘olketa demon biliv God hem stap.’ (James 2:19) Bat distaem olketa fraet. Diswan hem bikos olketa savve God bae panisim olketa for olketa nogud samting wea olketa duim. Wanem nao olketa duim wea hem nogud?—

Bible sei olketa angel hia lusim ples bilong olketa long heven and kam long earth for stap olsem olketa man. Olketa duim olsem bikos olketa laek sleep witim olketa woman long earth wea luk naes. (Genesis 6:1, 2; Jude 6) Waswe, iu savve long eni samting abaotem sex?—

 Diswan hem wei wea wanfala man and woman sleep barava klosap long each other long wanfala barava spesol wei. Bihaen, wanfala baby savve grow insaed mami. Bat for olketa angel sleep witim olketa woman hem rong. God laekem man and woman wea marit nomoa for sleep tugeta. Long wei olsem sapos wanfala baby born, dadi and mami savve lukaftarem hem.

Taem olketa angel mekem for olketa seleva body wea olsem bilong olketa man and sleep witim olketa woman long earth, olketa baby bilong olketa grow big olsem olketa giant. Olketa raf tumas, and savve spoelem pipol. So God mekem wanfala big flood for finisim olketa giant and evri nogud pipol. Bat hem talem Noah for buildim wanfala ark, wea datwan hem wanfala big boat, for sevem eitfala pipol nomoa wea duim stret samting. Datfala Nambawan Teacher sei hem important for iumi rememberim samting wea happen long Flood.—Genesis 6:3, 4, 13, 14; Luke 17:26, 27.

Taem Flood hem kam, waswe, iu savve wanem nao happen long olketa nogud angel?— Olketa no iusim moa body bilong man wea olketa mekem for olketa seleva, and olketa go bak long heven.  Bat olketa no savve kamap moa olketa angel bilong God, so olketa kamap olketa angel bilong Satan, olketa demon. And wanem nao happen long olketa pikinini bilong olketa, olketa giant?— Olketa dae long Flood. And tu evri nara pipol wea no obeyim God.

Start from taem bilong datfala Flood, God no letem olketa demon for kamap olsem olketa man moa. Bat nomata iumi no savve lukim olketa, olketa demon still trae mekem pipol for duim olketa barava nogud samting. Olketa kosim staka trabol winim enitaem bifor. Diswan hem bikos Jesus torowem olketa aot from heven kam long earth.

Waswe, iu savve why nao iumi no savve lukim olketa demon hia?— Hem bikos olketa garem spirit body. Bat iumi savve sure olketa laef. Bible sei Satan ‘trikim olketa man long full world,’ and olketa demon helpem hem.—Revelation 12:9, 12.

Waswe, Devil and olketa demon savve trikim, or laea long iumi tu?— Ia, olketa savve duim sapos iumi no careful. Bat iumi no need for fraet. Datfala Nambawan Teacher sei: ‘Devil no garem paoa ovarem mi.’ Sapos iumi fren gud witim God, hem bae protectim iumi from Devil and olketa demon.—John 14:30.

Hem important for iumi savve long olketa nogud samting wea olketa demon bae trae for mekem iumi duim. So ting raonem diswan. Olketa wanem nogud samting nao olketa demon duim taem olketa kam long earth?— Bifor datfala Flood, olketa sleep witim olketa woman, samting wea no stret for olketa angel duim. Distaem olketa demon hapi taem pipol no obeyim law bilong God abaotem wei for man and woman sleep tugeta. Mi laek askem iu, Hu nomoa shud sleep tugeta?— Ansa bilong iu hem stret, hem for pipol wea marit nomoa.

Distaem samfala young boy and young gele duim sex, bat diswan hem rong. Bible story abaotem “private part” bilong man. (Leviticus 15:1-3) Woman tu garem private part. Jehovah creatim olketa part bilong body hia for wanfala spesol reason wea marit pipol nomoa savve  enjoyim. Hem mekem olketa demon hapi taem pipol duim olketa samting wea Jehovah tambuim. Olsem example, olketa demon hapi taem wanfala boy and gele plei witim private part bilong each other. Iumi no laek for mekem olketa demon hapi, iaman?—

Nara samting tu wea olketa demon laekem bat Jehovah heitim. Waswe, iu savve wanem nao datwan?— Raf fasin. (Psalm 11:5) Raf fasin hem wei wea pipol no kaen and spoelem nara pipol. Remember, hem nao samting olketa giant, olketa son bilong olketa demon duim.

Olketa demon laek tu for mekem pipol fraet. Samfala taem olketa act olsem pipol wea dae finis. Maet olketa copyim tu voice bilong pipol wea dae finis. Long wei olsem olketa demon trikim plande pipol for bilivim pipol wea dae finis olketa laef and olketa savve story witim pipol wea laef. Olketa demon mekem staka pipol for biliv long olketa devildevil.

So iumi mas lukaot gud mekem Satan and olketa demon no trikim iumi. Bible talem disfala warning: ‘Satan trae for mekem hemseleva  luk olsem hem wanfala gud angel, and olketa servant bilong hem duim sem samting.’ (2 Corinthians 11:14, 15) Bat, tru samting nao, olketa demon barava nogud. Iumi bae lukim hao olketa maet trae mekem iumi for kamap olsem olketa.

Long wea nao pipol lanem staka samting abaotem raf fasin, sex, olketa spirit, and devil devil?— Diswan hem from wei for lukim samfala program long television, video, olketa nogud fren, or olketa nogud kaban long skul, iaman? Waswe, olketa samting hia mekem iumi fren gud witim God or fren gud witim Devil and olketa demon? Wanem nao tingting bilong iu?—

Hu nao iu ting hem laekem iumi for herem and lukim olketa nogud samting?— Ia, hem Satan and olketa demon. So, wanem nao iu and mi need for duim?— Iumi need for readim, herem, and lukim olketa samting wea bae mekem iumi kasem gudfala samting and wea bae helpem iumi for servem Jehovah. Waswe, iu savve tingim samfala gudfala samting hia wea iumi savve duim?—

Sapos iumi duim gudfala samting, no eni reason stap for iumi fraetem olketa demon. Jesus hem strong winim olketa, and olketa fraetem hem. Wanday olketa demon singaot go long Jesus: “Waswe, iu kam for finisim mifala?” (Mark 1:24) Iumi bae hapi taem Jesus finisim Satan and olketa demon, iaman?— Distaem, iumi savve sure Jesus bae protectim iumi from olketa demon sapos iumi fren gud witim hem and Dadi bilong hem wea stap long heven.