SAMFALA taem hem hard for savve hu nao iumi shud obeyim. Mami or dadi maet talem iu for duim wanfala samting. Bat teacher long skul or policeman maet talem iu for duim samting wea difren from datwan. Sapos olsem, hu nao bae iu obeyim?—

Long Chapter 7 bilong disfala buk, iumi readim Ephesians 6:1-3 from Bible. Hem sei olketa pikinini shud obeyim parents. Datfala scripture sei “iufala wan mind witim Lord long wei for obeyim parents bilong iufala.” Waswe, iu savve wanem nao “wan mind witim Lord” hem minim?— Parents wea wan mind witim Lord teachim olketa pikinini for obeyim olketa law bilong God.

Bat samfala full-grown man no biliv long Jehovah. So, waswe sapos wanfala sei hem olraet nomoa for copy long test long skul, or for tekem samting long stoa wea iu no peim? Waswe, hem olraet nomoa for pikinini copy or steal?—

Remember hao wantaem King Nebuchadnezzar komandim evriwan for baodaon long image wea hem wakem from gold. Bat Shadrach, Meshach, and Abednego nating willing for baodaon. Waswe, iu savve why nao olsem?— Bikos Bible sei pipol shud worshipim Jehovah nomoa.—Exodus 20:3; Matthew 4:10.

Bihaen Jesus dae, olketa tekem olketa aposol bilong Jesus go long Sanhedrin, main kot bilong Jew religion. Caiaphas wea hem Hae Priest hem sei: “Mifala komandim iufala for no gohed  for teach long disfala nem [Jesus], bat, iufala fulimap Jerusalem witim teaching bilong iufala.” Why nao olketa aposol no obeyim Sanhedrin?— Peter, wea talem toktok for evri aposol, ansarem Caiaphas olsem: “Mifala mas obeyim God olsem ruler winim olketa man.”—Acts 5:27-29.

Long datfala taem, olketa bigman bilong Jew religion garem bigfala paoa. Bat, gavman bilong Rome nao rulim kantri bilong olketa. Olketa kolem bigman bilong datfala gavman, Caesar. Nomata olketa Jew no laekem Caesar for rulim olketa, gavman bilong Rome duim staka gud samting for pipol. And olketa gavman distaem tu duim staka gud samting for pipol. Waswe, iu savve wanem nao samfala gud samting hia?—

Olketa gavman wakem road and for protectim iumi olketa peim olketa policeman and olketa man for killim dae fire. Maet olketa provaedem tu skul for olketa young wan and olketa samting for lukaftarem olo pipol. Gavman needim selen for duim olketa samting hia. Waswe, iu savve wea nao gavman tekem selen?— From pipol. Selen wea pipol peim long gavman olketa kolem tax.

 Taem datfala Nambawan Teacher stap long earth, staka Jew no laek peim tax long gavman bilong Rome. So wanday olketa priest peim samfala man for askem Jesus wanfala kwestin for trae trikim hem. Kwestin hem olsem, ‘Waswe, iumi mas peim tax long Caesar or nomoa?’ Diswan hem kwestin for trikim Jesus. Sapos Jesus ansa, ‘Ia, iu mas peim tax,’ staka Jew bae no laekem wanem Jesus talem. Bat Jesus no savve sei, ‘Nomoa, iu no need for peim tax.’ Hem no stret for talem datwan.

So, wanem nao Jesus duim? Hem sei: ‘Showim mi wanfala coin.’ Taem olketa givim hem wanfala coin, Jesus askem olketa: ‘Piksa and nem bilong hu nao stap long hem?’ Olketa man hia sei: “Bilong Caesar.” So Jesus hem sei: “So, peim bak olketa samting bilong Caesar long Caesar, bat olketa samting bilong God long God.”—Luke 20:19-26.

No eniwan savve tok againstim datfala ansa. Sapos Caesar duim olketa samting for pipol, hem stret nomoa for iusim selen wea Caesar mekem for peim hem for olketa samting hia. So long  wei olsem, Jesus showim hao hem stret for peim tax long gavman for olketa samting wea iumi kasem.

Distaem, maet iu no big yet for peim tax. Bat wanfala samting stap wea iu shud givim long gavman. Waswe, iu savve wanem nao datwan?— Obeyim olketa law bilong gavman. Bible hem sei: ‘Obeyim pipol wea garem bigfala paoa.’ Olketa hia nao pipol wea garem paoa long gavman. So God nao sei iumi shud obeyim olketa law bilong gavman.—Romans 13:1, 2.

Maet wanfala law stap for no torowem pepa or eni nara samting long road. Waswe, iu shud obeyim datfala law?— Ia, God laekem iu for obeyim. Waswe, iu shud obeyim olketa policeman tu?— Gavman peim olketa policeman for protectim pipol. For obeyim olketa hem semsem olsem iu obeyim gavman.

So sapos iu redi for akrosim road and wanfala policeman sei “Weit!” wanem nao iu shud duim?— Waswe, from olketa narawan ran akros, iu shud ran akros tu?— Iu shud weit, nomata iuseleva nomoa weit. God talem iu for obey.

Maet trabol kamap long area bilong iu, and maet wanfala policeman sei: “No go aotsaed.” Bat iu herem pipol shout and iu laek for savve wanem nao happen. Waswe, iu shud go aotsaed for lukluk?— Waswe, diswan minim iu obeyim olketa wea garem ‘bigfala paoa’?—

Long staka kantri, gavman buildim tu olketa skul, and peim olketa teacher. So waswe, iu ting God laekem iu for obeyim teacher?— Ting abaotem datwan. Gavman peim teacher for teach, olsem tu hem peim policeman for protectim pipol. So for obeyim policeman or teacher hem olsem for obeyim gavman.

Bat waswe sapos teacher sei iu mas worshipim wanfala image? Wanem nao bae iu duim?— Thrifala Hebrew nating baodaon  long datfala image, nomata King Nebuchadnezzar talem olketa for duim datwan. Waswe, iu rememberim why nao olsem?— Bikos olketa laek obeyim God.

Wanfala man for raet abaotem history, William Durant, raet abaotem olketa firstfala Christian and hem sei hao ‘wan wea olketa Christian mas barava loyal long hem nao, hem no Caesar.’ Olketa mas barava loyal long Jehovah! So remember, God shud firstfala samting long laef bilong iumi.

Iumi obeyim gavman bikos hem nao wanem God laekem iumi for duim. Bat sapos olketa talem iumi for duim samting wea God sei iumi shud no duim, wanem nao iumi shud talem?— Iumi shud talem sem toktok olketa aposol talem long datfala hae priest: “Mifala mas obeyim God olsem ruler winim olketa man.”—Acts 5:29.