WASWE, iu story long Jehovah God?— Hem laekem iu for story long hem. Taem iu story long God, diswan hem prea. Jesus staka taem story long Dadi bilong hem wea stap long heven. Samfala taem hem laek stap seleva taem hem story long God. Bible sei wanfala taem, “hemseleva go ap long maunten for prea. Nomata hem dark finis, hemseleva nomoa stap.”—Matthew 14:23.

Wea nao iu savve go for prea seleva long Jehovah?— Maet iu savve prea seleva long Jehovah bifor iu sleep long naet. Jesus hem sei: “Taem iufala prea, go insaed long rum bilong iufala and, bihaen iufala satem door, prea long Dadi bilong iufala.” (Matthew 6:6) Waswe, iu prea long Jehovah evri naet bifor iu sleep?— Iu shud duim datwan.

Jesus prea tu taem nara pipol stap witim hem. Taem fren  bilong hem Lazarus dae, Jesus prea witim nara pipol long ples wea olketa putim body bilong Lazarus. (John 11:41, 42) And Jesus prea tu taem hem hipap witim olketa disaepol. Waswe, iu go long meeting wea olketa savve prea?— Long there wanfala brata evritaem savve prea. Lisin gud long wanem hem talem bikos hem story long God for iu. Then bae iu fit for sei “Amen” long datfala prea. Waswe, iu savve wanem nao hem minim for sei “Amen” long end bilong wanfala prea?— Hem minim iu laekem datfala prea. Hem minim iu agree witim samting datfala man talem and iu laekem for datwan hem prea bilong iu tu.

Jesus prea tu long olketa taem for kaikai. Hem thankiu long Jehovah for kaikai. Waswe, iu evritaem prea bifor iu kaikai?— Hem gud for iumi thankiu long Jehovah for kaikai bifor iumi start kaikai. Samwan maet talem prea taem iufala kaikai tugeta. Bat waswe sapos iu kaikai seleva? Or waswe sapos iu kaikai witim pipol wea no thankiu long Jehovah?— Then iu need for prea seleva.

Waswe, evritaem iu mas prea big? Or waswe, Jehovah savve herem iu sapos iu prea kwaet?— For savve long ansa, iumi tingim samting wea happen long Nehemiah. Hem wanfala man wea worshipim Jehovah  wea waka long haos bilong king bilong Persia, King Artaxerxes. Wanday Nehemiah sorre tumas bikos hem herem nius hao olketa wall bilong Jerusalem, wea hem main taon bilong pipol bilong hem, foldaon finis.

Taem king askem Nehemiah why nao hem sorre, Nehemiah prea kwaet long God. Then Nehemiah talem king why nao hem sorre and askem hem sapos hem savve go long Jerusalem for buildim bak olketa wall. Wanem nao happen?—

God ansarem prea bilong Nehemiah. King sei hem savve go! King givim tu staka timba for buildim olketa wall. So God savve ansarem olketa prea bilong iumi, nomata taem iumi prea kwaet.—Nehemiah 1:2, 3; 2:4-8.

Waswe, iu shud bendim hed go daon taem iu prea? Waswe, iu shud nildaon? Wanem nao  tingting bilong iu?— Samfala taem Jesus nildaon taem hem prea. Long olketa narataem hem standap. And long samfala taem hem liftimap hed go long heven taem hem prea, olsem hem duim taem hem prea for Lazarus.

So, wanem nao diswan showimaot?— Ia, diswan showim hao wei wea iu chus for prea hem no important. Samfala taem hem gud for bendim hed go daon and satem eye. Long olketa narataem maet iu laek nildaon, olsem Jesus duim. Bat, remember, iumi savve prea long God long enitaem insaed day or naet, and hem bae herem iumi. Important samting abaotem prea nao hem for iumi barava sure hao Jehovah hem lisin. Waswe, iu bilivim hao Jehovah herem olketa prea bilong iu?—

Wanem nao iumi shud talem insaed prea bilong iumi for Jehovah?— Taem iu prea, wanem nao iu storyim long God?— Jehovah givim iumi staka gud samting, dastawe hem stret for iumi thankiu long hem for olketa samting hia, iaman?— Iumi savve thankiu long hem for kaikai bilong iumi. Bat waswe, iu enitaem thankiu long hem for blue skae, olketa green tree, and olketa flaoa wea luk naes?— Hem wakem olketa samting hia tu.

Wantaem olketa disaepol bilong Jesus askem hem for teachim olketa hao for prea. So datfala Nambawan Teacher teachim olketa, and hem talem olketa barava important samting for  prea abaotem. Waswe, iu savve wanem nao olketa samting hia?— Tekem Bible bilong iu, and openem long Matthew chapter 6. Long verse 9 go kasem 13, iumi faendem wanem staka pipol kolem Lord’s Prea. Iumi readim tugeta.

Long hia iumi lanem hao Jesus talem iumi for prea abaotem nem bilong God. Iumi prea for evriwan mas ting long nem bilong God olsem hem holy. Hu nao nem bilong God?— Hem Jehovah, and iumi shud lovem datfala nem.

Mek-tu, Jesus teachim iumi for prea for Kingdom bilong God for kam. Datfala Kingdom hem important bikos hem bae mekem peace kamap long earth and mekem hem kamap wanfala paradaes.

Mek-thri, datfala Nambawan Teacher sei for prea for will bilong God kamap long earth olsem hem kamap long heven. Sapos iumi prea for diswan, then iumi shud duim wanem God laekem iumi for duim.

Next samting, Jesus teachim iumi for prea for kaikai iumi needim each day. Hem sei tu iumi shud talem God iumi sorre taem iumi duim olketa rong samting. And iumi shud askem God for forgivim iumi. Bat bifor hem forgivim iumi, iumi mas forgivim nara pipol sapos olketa duim rong samting long iumi. Waswe, datwan hem isi samting for iu duim?—

Last samting, Jesus sei iumi shud prea for Jehovah protectim iumi from datfala wicked wan, Satan. So evri samting hia hem olketa gud samting for prea abaotem long God.

Iumi shud bilivim hao Jehovah herem olketa prea bilong iumi. Iumi savve askem hem for helpem iumi, and tu, iumi shud evritaem talem thankiu long hem. Hem hapi taem iumi talem tru samting long prea and taem iumi askem hem for olketa stret samting. And bae hem givim iumi olketa samting hia. Waswe, iu bilivim datwan?—