WASWE, iu laek go long party?— Iumi savve barava enjoyim olketa party. Waswe, iu ting datfala Nambawan Teacher laekem iumi for go long party?— Hem go long wanfala marit feast wea olsem party, and samfala disaepol go witim hem. Jehovah hem “hapi God,” so hem hapi taem iumi enjoyim iumiseleva long party wea hem gud.—1 Timothy 1:11; John 2:1-11.

Page 29 bilong disfala buk talem iumi hao Jehovah divaedem Red Sea for letem olketa Israelite wakabaot go thru long hem. Waswe, iu still rememberim datwan?— Bihaen, olketa sing and dance and talem thankiu long Jehovah. Hem olsem wanfala party. Pipol hia hapi tumas, and iumi sure God hapi tu.—Exodus 15:1, 20, 21.

Klosap 40 year bihaen, olketa Israelite go long nara big party. Distaem pipol wea invaetem olketa no worshipim Jehovah. Pipol hia baodaon for worshipim olketa nara god and hem wei bilong olketa for sleep witim man or woman wea olketa no maritim. Waswe, iu ting hem olraet nomoa for go long party olsem?— Jehovah nating hapi, and hem panisim olketa Israelite.—Numbers 25:1-9; 1 Corinthians 10:8.

 Bible story tu abaotem tufala birthday party. Waswe, wanfala hem for celebratem birthday bilong datfala Nambawan Teacher?— Nomoa. Tufala birthday party hia hem for tufala man wea no servem Jehovah. Wanfala hem birthday party bilong King Herod Antipas. Hem ruler long distrik bilong Galilee taem Jesus stap long there.

King Herod duim staka nogud samting. Hem tekem waef bilong brata bilong hem. Nem bilong hem Herodias. Servant bilong God, John Baptaesa, talem Herod hem rong for hem duim datwan. Herod no laekem wanem John talem. So hem putim John insaed prison.—Luke 3:19, 20.

Taem John stap insaed prison yet, olketa celebratem birthday bilong Herod. Herod mekem bigfala party. Hem invaetem staka important pipol. Evriwan kaikai, drinkim wine, and barava hapi. Then gele bilong Herodias dance for olketa. Evriwan hapi tumas long dance bilong hem so King Herod laek givim hem wanfala spesol present. Hem sei long hem: “Eni samting wea iu askem long mi, mi bae givim long iu, nomata haf long kingdom bilong mi tu.”

 Wanem nao bae hem askem? Selen? olketa luk naes kaleko? wanfala big haos for hemseleva? Gele hia no savve wanem for talem. So hem go long mami bilong hem, Herodias, and sei: “Wanem nao bae mi askem?”

Herodias heitim tumas John Baptaesa. So hem talem gele bilong hem for askem hed bilong man hia. Gele go bak long king and sei: “Mi laekem iu for givim mi hed bilong John Baptaesa long wanfala pleit distaem.”

King Herod no laek for killim dae John bikos hem savve John hem wanfala gud man. Bat Herod promis finis, and hem warim wanem pipol long party bae tingim sapos hem no duim wanem hem talem. So hem sendem wanfala man go long prison for katemaot hed bilong John. No longtaem bihaen man hia kam bak. Hem putim hed bilong John long wanfala pleit, and givim long datfala gele. Then gele hia givim long mami bilong hem.—Mark 6:17-29.

Nara birthday party wea Bible story abaotem hem nogud tu. Hem for wanfala king bilong Egypt. Long taem bilong disfala party tu, king talem for olketa katemaot hed bilong samwan. Then, bihaen,  hem hangem man hia for olketa bird kaikaim! (Genesis 40:19-22) Waswe, iu tingse God laekem tufala party hia?— Sapos iu stap long datfala taem, waswe, bae iu laek go long tufala party hia?—

Iumi savve hao evri samting wea olketa raetem insaed Bible hem stap for wanfala reason. Bible hem story abaotem tufala birthday party nomoa. And long tufala evriwan, olketa nogud samting nao olketa duim. So, long tingting bilong iu, wanem nao God talem iumi abaotem olketa birthday party? Waswe, God laekem iumi for celebratem birthday?—

Hem tru hao long olketa party olsem distaem, pipol no katemaot hed bilong man. Bat wei for celebratem birthday start witim pipol wea no worshipim tru God. The Catholic Encyclopedia sei olsem abaotem olketa birthday party wea Bible storyim: “Olketa sinner nomoa . . . hapi tumas long day wea olketa born.” Waswe, iumi laek for olsem olketa?—

Waswe datfala Nambawan Teacher? Waswe, hem celebratem birthday bilong hem?— Nomoa, Bible no storyim eni samting abaotem birthday party for Jesus. Tru samting nao, olketa firstfala follower bilong Jesus no celebratem birthday bilong hem. Waswe, iu savve why bihaen pipol disaed for celebratem birthday bilong Jesus long December 25?—

Olketa chusim datfala date bikos, olsem The World Book Encyclopedia talem, “pipol long Rome celebratem diswan finis olsem Feast bilong Saturn, from olketa sei hem birthday bilong sun.” So pipol chus for celebratem birthday bilong Jesus long day wea heathen pipol garem finis wanfala holiday!

Waswe, iu savve why hem rong for sei Jesus hem born long December?— Bible sei taem Jesus born, olketa shepherd stap aotsaed long naet. (Luke 2:8-12) Bae hem hard for olketa stap aotsaed long December bikos long datfala ples hem cold and hem rain olowe long datfala month.

 Staka pipol savve hao Christmas hem no birthday bilong Jesus. Olketa savve tu hao long datfala day heathen pipol garem party wea no mekem God hapi. Bat nomata olsem, staka pipol celebratem Christmas. Olketa tingim nomoa for party and no laek for savve wanem nao barava tingting bilong God abaotem diswan. Bat iumi laek for mekem Jehovah hapi, iaman?—

So taem iumi mekem party, iumi laek for mek sure Jehovah hapi long datwan tu. Iumi savve garem party enitaem insaed long year. Iumi no need for weit for wanfala spesol day. Iumi savve kaikaim spesol kaikai and enjoyim wei for pleim olketa game. Waswe, iu laek duim datwan?— Maet iu savve story witim dadi and mami and olketa savve helpem iu for planim wanfala party. Datwan bae naes, iaman?— Bat bifor iu mekem party, iu mas mek sure God hapi long hem.