TAEM Saul duim olketa nogud samting, hu nao hapi?— Satan. Bat olketa bigman bilong Jew religion hapi tu. Taem Saul kamap disaepol bilong datfala Nambawan Teacher and pipol kolem hem Paul, olketa bigman bilong religion start for heitim hem. So, waswe, iu minim why hem hard for wanfala disaepol bilong Jesus for duim gud samting?—

Wantaem hae priest Ananias talem olketa man for hitim feis bilong Paul. Ananias trae tu for putim Paul insaed prison. Paul kasem staka nogud samting taem hem kamap disaepol bilong Jesus. Olsem example, nogud pipol whipim Paul and trae for sutim hem dae witim olketa big ston.—Acts 23:1, 2; 2 Corinthians 11:24, 25.

Plande pipol bae trae mekem iumi duim olketa samting wea God no hapi long hem. So ting raonem diswan: Waswe, iu barava lovem gud samting? Waswe, iu laekem tumas for duim gud samting nomata nara pipol heitim iu taem iu duim diswan? Man need for no fraet for duim datwan, iaman?—

 Maet iu ting, ‘Why nao pipol heitim iumi from iumi duim gud samting? Olketa shud hapi.’ Plande taem pipol laekem Jesus from hem duim olketa gud samting. Wantaem, evri pipol long wanfala taon hipap front long haos wea hem stap. Olketa kam from Jesus hem healim pipol wea sik.—Mark 1:33.

Bat samfala taem pipol no laekem samting Jesus teachim. Nomata evritaem hem teachim tru samting, olketa no laekem datwan. Samfala barava heitim hem bikos hem talem tru samting. Hem nao samting wea happen wantaem long Nazareth, taon wea Jesus growap long hem. Hem go long synagogue, ples wea olketa Jew hipap for worshipim God.   

 Long there Jesus givim wanfala barava naes tok from olketa scripture. Firstaem pipol laekem datwan. Olketa sapraes long olketa naesfala toktok wea hem talem. Olketa hard for tingim hao hem nao young boy wea growap long taon bilong olketa.

Bat Jesus talem nara samting moa. Hem story abaotem olketa taem wea God helpem pipol wea no Jew. Taem Jesus talem diswan, pipol insaed synagogue kamap kros. Waswe, iu savve reason for diswan?— Olketa tingse God favorim nomoa olketa Jew. Olketa tingse olketa gud winim nara pipol. So olketa heitim Jesus from hem talem diswan. And waswe, iu savve wanem nao olketa trae for duim long hem?—

Bible hem sei: ‘Olketa kasholem Jesus and kwiktaem tekem hem go aot from datfala taon. Olketa tekem hem go long wanfala maunten and laek torowem hem go daon for killim hem dae! Bat Jesus ranawe from olketa.’—Luke 4:16-30.

Waswe sapos diswan happen long iu, bae iu go bak long pipol hia for story abaotem God?— For duim datwan iu bae needim fasin for no fraet, iaman?— Bat, bihaen samting olsem wan year, Jesus go bak long Nazareth. Bible hem sei: “Hem start for teachim olketa insaed long synagogue bilong olketa.” Jesus no letem wei for fraetem olketa man wea no lovem God mekem hem stop for storyim truth.—Matthew 13:54.

Long nara day, long wanfala sabbath, Jesus stap long ples wea hem lukim wanfala man wea hand bilong hem cripple. Jesus garem paoa from God for healim datfala man. Bat samfala man long there trae for mek trabol for Jesus. Wanem nao bae datfala Nambawan Teacher duim?— Firstaem hem ask: ‘Sapos iu garem wanfala sheep wea foldaon insaed wanfala big hol long Sabbath, waswe, bae iu liftim hem aot?’

 Olketa bae duim datwan for wanfala sheep, nomata hem long Sabbath, wea hem day wea olketa shud rest. So Jesus hem sei: ‘Hem moabeta for helpem wanfala man long Sabbath, from man hem important winim wanfala sheep!’ Hem barava klia hao Jesus shud helpem disfala man long wei for healim hem!

Jesus talem man hia for stretem hand bilong hem. Long semtaem nomoa hand bilong hem gud bak. Man hia hapi tumas! Bat waswe long olketa nara man? Waswe, olketa hapi?— Nomoa. Olketa heitim go moa Jesus. Olketa go from datfala ples and mekem plan for killim hem dae!—Matthew 12:9-14.

Hem semsem tu distaem. Nomata wanem iumi duim, iumi no savve mekem evriwan hapi. So iumi mas disaed hu nao iumi laek for barava mekem hem hapi. Sapos iumi laek mekem Jehovah God and Son bilong hem Jesus Christ hapi, then iumi mas evritaem duim wanem tufala teachim. Bat sapos iumi duim olsem, hu nao bae heitim iumi? Hu nao bae mekem hem hard for iumi duim gud samting?—

Satan. Bat hu moa?— Pipol wea Devil laea long olketa for mekem olketa bilivim olketa samting wea no tru. Jesus talem olketa bigman bilong religion long taem bilong hem: “Iufala kam from dadi bilong iufala datfala Devil, and iufala laek duim samting wea dadi bilong iufala laekem.”—John 8:44.

Devil laekem plande pipol. Jesus kolem olketa “world.” Long tingting bilong iu, wanem “world” nao Jesus story abaotem?— For savve long diswan, iumi readim John chapter 15, verse 19. Jesus sei olsem: “Sapos iufala part bilong world, world savve laekem samting bilong hemseleva. Bat, from iufala no part bilong world, bat mi chusim iufala aot from world, from diswan nao world hem heitim iufala.”

So world wea heitim olketa disaepol bilong Jesus hem evri pipol wea no follower bilong hem. Why nao world heitim olketa disaepol  bilong Jesus?— Tingim. Hu nao rulim world?—Bible hem sei: “Full world hem stap long paoa bilong wicked wan.” Datfala wicked wan hem Satan.—1 John 5:19.

Waswe, iu savve nao why hem hard tumas for duim gud samting?— Satan and world bilong hem mekem hem hard. Bat nara reason stap tu. Waswe, iu rememberim wanem nao datwan?— Long Chapter 23, iumi lanem hao iumi evriwan garem sin taem iumi born. Hem bae naes tumas taem sin, Devil, and world bilong hem no stap moa, iaman?—

Bible talem disfala promis: “World hem gogo for finis.” Diswan minim evriwan wea no follower bilong datfala Nambawan Teacher bae no stap. God bae no letem olketa for stap laef olowe. Waswe, iu savve hu nao bae laef olowe?— Bible hem sei moa: “Man wea duim will bilong God bae stap olowe.” (1 John 2:17) Ia, only pipol wea duim gud samting, wea duim “will bilong God” bae laef olowe long niu world bilong God. So nomata hem hard, iumi laek for duim gud samting, iaman?—