WASWE, enitaem eniwan duim rong samting long iu?— Waswe, hem mekem iu sorre or talem toktok wea no kaen long iu?— Waswe, iu shud changem bak witim semkaen samting wea hem duim long iu?—

Plande pipol bae pei bak sapos samwan duim rong samting long olketa. Bat Jesus teachim hao iumi shud forgivim pipol wea duim rong samting long iumi. (Matthew 6:12) Waswe sapos wanfala man no kaen long iumi staka taem? Haomas taem nao iumi shud forgivim hem?—

Datwan nao samting Peter laek for savve. So wanday hem askem Jesus: ‘Waswe, mi mas forgivim hem sevenfala taem?’ Bat sevenfala taem hem no inaf. Jesus hem sei: ‘Iu mas forgive seventi-seven taems’ sapos datwan nao haomas taem hem sin againstim iu.

Datwan hem barava staka taem! Bae hem hard for rememberim sapos samwan duim rong samting long iumi staka taem olsem, iaman? And diswan nao samting Jesus talem iumi: Iumi shud no trae for rememberim staka rong samting wea nara pipol maet duim long iumi. Sapos olketa askem iumi for forgivim olketa, iumi shud forgivim olketa.

Jesus laek showim olketa disaepol hao hem barava important for forgive. So  bihaen hem ansarem kwestin bilong Peter, hem talem olketa disaepol wanfala story. Waswe, iu laek herem?—

Long wanfala taem bifor, wanfala gud king hem stap. Hem barava kaen. Hem savve givim selen long olketa slave for kaonem taem olketa needim help. Bat gogo datfala king laekem olketa slave wea kaonem selen for peim bak kaon bilong olketa. Olketa tekem kam wanfala slave front long king wea kaonem 60 million denarii. Datwan barava staka selen!

 Bat datfala slave iusim finis evri selen bilong king and hem no savve peim bak king. So king sei for olketa salem datfala slave. Datfala king sei tu for olketa salem waef, pikinini, and evri samting wea hem garem. Then, selen from wanem olketa salem nao mas changem bak kaon bilong datfala king. Long tingting bilong iu, diswan mekem datfala slave feel hao?—

Hem nildaon front long king and barava ask strong: ‘Plis, givim mi moa taem, and bae mi peim bak evri samting mi kaonem long iu.’ Sapos iu nao datfala king, wanem nao bae iu duim witim datfala slave?— Datfala king sorre long slave bilong hem. So king forgivim hem. Hem talem datfala slave hem no need for peim bak nomata wanfala coin bilong datfala 60 million denarii. Masbi datwan mekem datfala slave barava hapi fogud!

Bat wanem nao datfala slave duim bihaen? Hem go and faendem nara slave wea kaonem nomoa wan handred denarii long hem. Hem skwisim nek bilong slave hia mekem hem no savve brith, and hem sei: ‘Peim bak wan handred denarii wea iu kaonem long mi!’ Waswe, iu tingse eni man bae duim kaen samting olsem, especially bihaen king sei hem no need for peim bak bigfala kaon bilong hem?—

Datfala slave wea kaonem nomoa wan handred denarii hem poor. Hem no savve peim bak datfala selen kwiktaem. So hem nildaon front long nara slave and barava ask strong: ‘Plis, givim mi moa taem, and mi bae peim bak wanem mi kaonem long iu.’ Waswe, datfala man shud givim moa taem long nara slave?— Sapos iu nao datfala man, wanem nao bae iu duim?—

Disfala man hem no kaenfala man olsem datfala king. Hem laek kasem bak selen bilong hem kwiktaem. And bikos nara slave no savve peim bak, hem putim hem insaed prison. Olketa nara slave lukim evri samting hia wea happen, and olketa no laekem. Olketa sorre long slave wea stap insaed prison. So olketa go and talem king abaotem diswan.

 Datfala king tu no laekem samting wea happen. Hem kros tumas long slave wea no forgive. So hem kolem hem kam and sei: ‘Hao nao iu no tingim hao mi finisim kaon bilong iu? Why nao iu no forgivim nara slave?’

Datfala slave wea no forgive shud lanem leson from datfala gud king. Bat hem no lanem datfala leson. So king putim datfala slave insaed prison go kasem taem hem savve peim bak 60 million denarii. And from hem stap insaed prison hem bae no savve waka for kasem selen for peim bak datfala king. So hem bae stap long there go kasem taem hem dae.

Taem Jesus talem finis disfala story, hem sei long olketa follower bilong hem: “Dadi bilong mi long heven bae deal witim iufala long sem wei tu sapos iufala wanwan no forgivim brata bilong iufala from heart bilong iufala.”—Matthew 18:21-35.

Iumi evriwan garem bigfala kaon witim God. Tru samting nao, laef wea iumi garem hem kam from God! So taem iumi markem bigfala  kaon wea iumi garem long God, kaon wea nara pipol garem long iumi hem smol nomoa. Wanem olketa kaonem long iumi hem olsem wan handred denarii wea nara slave kaonem long narawan. Bat wanem iumi kaonem long God from olketa rong samting iumi duim hem olsem datfala 60 million denarii wea datfala slave kaonem long king.

God hem kaen tumas. Nomata iumi duim olketa rong samting, hem forgivim iumi. Hem no panisim iumi long wei for aotem laef bilong iumi for olowe. Bat iumi need for rememberim leson hia: God forgivim iumi only sapos iumi forgivim pipol wea duim rong samting long iumi. Datwan hem important samting for tingim, iaman?—

So sapos samwan duim samting wea no kaen long iu bat then hem tok sorre, wanem nao bae iu duim? Waswe, bae iu forgivim hem?— Waswe sapos diswan happen staka taem? Waswe, bae iu still forgivim hem?—

Sapos iumi nao askem samwan for forgivim iumi, iumi bae laekem hem for duim datwan for iumi, iaman?— So iumi shud duim sem samting for hem tu. Iumi shud no sei iumi forgivim hem nomoa, bat iumi shud barava forgivim hem from heart bilong iumi. Taem iumi duim datwan, iumi showimaot iumi barava laek kamap olketa follower bilong datfala Nambawan Teacher.