WINIM tu thousand year bifor, wanfala barava spesol baby hem born wea growap for kamap nambawan man wea winim eni nara man wea stap long earth. Diswan hem longtaem bifor, taem no eniwan garem aeroplane or trak. No eni samting olsem television and radio tu stap.

Nem bilong disfala baby hem Jesus. Hem kamap man wea moa wise winim eni nara man long earth. Jesus kamap teacher wea winim evri nara teacher tu. Hem savve storyim olketa hard samting long wei wea mekem hem isi for man minim.

Jesus teachim pipol long eni ples wea hem meetim olketa. Hem teachim olketa long saedsea and taem hem sidaon insaed long boat. Hem teachim olketa long haos and taem hem travel. Jesus no garem car, and hem no travel long bas or trak. Jesus wakabaot go long olketa difren ples for teachim pipol.

Iumi lanem plande samting from nara pipol. Bat iumi savve lanem olketa barava important samting from datfala Nambawan Teacher, Jesus. Insaed Bible nao iumi savve faendem toktok bilong Jesus. Taem iumi readim or lisin long toktok hia from Bible, hem olsem Jesus nao story long iumi.

Why nao Jesus hem barava Nambawan Teacher? Wanfala reason hem bikos samwan teachim Jesus. And hem savve hem barava important for lisin. Bat hu nao Jesus lisin long hem? Hu nao teachim hem?— Dadi bilong hem nao teachim hem. And Dadi bilong Jesus hem God.

Jesus stap witim God long heven bifor hem kam long earth olsem wanfala man. So Jesus difren from olketa nara man bikos no eni man stap long heven firstaem bifor hem born long earth. Taem Jesus stap  long heven, hem Son wea obeyim and lisin long Dadi bilong hem. Dastawe Jesus fit for teachim pipol olketa samting hem lanem from God. Iu savve followim example bilong Jesus long wei for lisin long dadi and mami bilong iu.

Narafala reason why Jesus hem wanfala Nambawan Teacher hem bikos hem lovem pipol. Hem laek helpem pipol for lane abaotem God. Jesus lovem olketa bigman, bat hem lovem tu olketa pikinini. And olketa pikinini laek stap witim Jesus bikos hem savve story and lisin long olketa.

Wanday samfala dadi and mami tekem go long Jesus olketa smol pikinini bilong olketa. Bat olketa fren bilong hem tingse datfala Nambawan Teacher no garem taem for story witim olketa smol pikinini bikos hem busy tumas. So olketa talem olketa for go. Bat wanem nao Jesus talem?— Jesus sei: “Letem olketa smol pikinini kam long mi; no trae for stopem olketa.” Jesus barava laekem olketa smol pikinini for kam long hem. So nomata hem man wea wise tumas and important, Jesus markem taem for teachim olketa smol pikinini.—Mark 10:13, 14.

 Waswe, iu savve why nao Jesus teachim and lisin long olketa smol pikinini? Wanfala reason hem bikos hem laek mekem olketa hapi taem hem storyim olketa samting abaotem God, Dadi bilong hem wea stap long heven. Wanem nao iu savve duim for mekem pipol hapi?— Iu savve storyim long pipol olketa samting wea iu lanem abaotem God.

Wantaem, Jesus iusim wanfala smol pikinini for teachim olketa fren bilong Hem wanfala important leson. Hem tekem pikinini hia and mekem hem standap midol long olketa disaepol bilong Hem. Then Jesus sei olketa bigman hia mas changem fasin bilong olketa and kamap olsem disfala smol pikinini.

Wanem nao Jesus minim taem hem talem datwan? Waswe, iu savve hao nao wanfala bigman, or wanfala big pikinini, shud kamap olsem wanfala smol pikinini?— Wanfala smol pikinini no savve long staka samting olsem wanfala bigman bat hem willing for lane. So Jesus sei olketa disaepol need for hambol, olsem olketa smol pikinini. Iumi evriwan savve lanem plande samting from nara pipol. And iumi evriwan shud luksavve hao olketa samting wea Jesus teachim hem moa important winim tingting bilong iumiseleva.—Matthew 18:1-5.

Narafala reason why Jesus hem barava Nambawan Teacher hem bikos hem savve hao for mekem olketa samting interesting for pipol. Hem explainim olketa samting long wei wea hem isi for minim, and klia. Hem story abaotem olketa bird, olketa flaoa, and olketa nara  samting wea pipol savve long hem for helpem olketa minim samfala samting abaotem God.

Wanday taem Jesus stap long maunten, plande pipol kam long hem. Jesus sidaon and givim wanfala tok, olsem iu lukim long disfala piksa. Olketa kolem disfala tok Sermon long Maunten. Hem sei: ‘Lukim olketa bird long skae. Olketa no plantim seed. Olketa no keepim kaikai long haos bilong olketa. Bat God wea stap long heven feedim olketa. Iu nao barava important winim olketa, iaman?’

Jesus sei tu: ‘Lanem leson from olketa lily. Olketa no waka bat olketa grow. And lukim hao olketa luk naes tumas! Nomata King Solomon wea rich no garem eni kaleko wea luk naes winim olketa lily. So sapos God lukaftarem olketa flaoa wea grow, waswe, hem bae no lukaftarem iu tu?’—Matthew 6:25-33.

Waswe, iu minim leson wea Jesus teachim?— Hem no laekem iumi for wari abaotem hao nao bae iumi kasem kaikai or kaleko. God savve  iumi needim evri samting hia. Jesus no sei iumi shud no waka for kasem kaikai and kaleko. Bat hem sei iumi shud tingim God firstaem. Sapos iumi duim datwan, God bae mek sure iumi garem kaikai and kaleko. Waswe, iu ting olsem tu?—

Taem Jesus finis for story, wanem nao tingting bilong pipol?— Bible sei olketa sapraes tumas long wei bilong hem for teach. Hem barava interesting for lisin long hem. Wanem hem storyim helpem pipol for duim stret samting.—Matthew 7:28.

 So hem barava important for iumi lane from Jesus. Waswe, iu savve hao nao iumi savve duim diswan?— Olketa raetem toktok bilong hem insaed wanfala buk. Waswe, iu savve long nem bilong datfala buk?— Hem Holy Bible. Diswan minim iumi savve lisin long Jesus taem iumi followim olketa samting iumi readim insaed long Bible. Bible garem interesting story abaotem hao God seleva talem iumi for lisin long Jesus. Wanem nao happen?

Wanday Jesus tekem thrifala fren bilong hem go ap long wanfala maunten. Nem bilong olketa nao James, John, and Peter. Bihaen, iumi bae lanem plande samting moa abaotem olketa man hia, from thrifala evriwan barava gud fren bilong Jesus. Bat long disfala spesol taem, feis bilong Jesus start for shaen braet fogud. And kaleko bilong hem shaen braet olsem laet, olsem iu savve lukim long disfala piksa.

Bihaen datwan, Jesus and olketa fren bilong hem herem wanfala voice from heven. Hem sei: “Diswan hem Son bilong mi, wea mi lovem, wea mi appruvim; lisin long hem.” (Matthew 17:1-5) Waswe, iu savve voice bilong hu nao datwan?— Hem voice bilong God! So God nao sei olketa shud lisin long Son bilong hem.

Waswe long iumi distaem? Waswe, bae iumi obeyim God and lisin long Son bilong hem, datfala Nambawan Teacher?— Hem nao samting iumi evriwan need for duim. Waswe, iu rememberim hao iumi savve duim datwan?—

Iumi savve lisin long Son bilong God taem iumi readim olketa story abaotem laef bilong hem insaed long Bible. Datfala Nambawan Teacher garem staka naesfala samting for talem iumi. Iu bae laek tumas for lanem olketa samting hia wea olketa raetem insaed long Bible. And iu bae kasem hapi tu sapos iu storyim olketa gud samting wea iu lanem long olketa fren bilong iu.