Iu savve hu nao gele long disfala piksa?— Hem dota bilong wanfala man wea nem bilong hem Jephthah. Bible no talem nem bilong disfala gele, bat iumi savve hem mekem dadi bilong hem and Jehovah God hapi. Wanem nao olketa nara samting iumi savve lanem abaotem hem and dadi bilong hem?

Jephthah hem wanfala gud man and hem teachim gele bilong hem for savve long Jehovah. Pipol respectim hem and hem wanfala strong man. So olketa Israelite laekem hem for leadim olketa for faetem olketa enemy.

Jephthah prea long God for helpem olketa winim wanfala faet. Jephthah promis long Jehovah sapos hem winim datfala faet, hem bae givim long Jehovah firstfala man wea kamaot from haos bilong hem  taem hem kam bak. Datfala man mas stap and waka long tabernacle bilong God for full laef bilong hem. Tabernacle hem wanfala big tent wea pipol long datfala taem go for worshipim God. So hu nao winim datfala faet? Jephthah nao win! Waswe, iu savve hu nao first wan wea kamaot from haos bilong hem taem hem kam bak?—

Dota bilong Jephthah nao kamaot! Hem nomoa wanfala pikinini bilong Jephthah, and hem mas sendem hem for go stap long tabernacle. Datwan mekem Jephthah barava sorre. Bat tingim, hem promis for duim datwan finis. Stretawe, gele bilong hem sei: ‘Dadi, iu promisim Jehovah finis, so iu mas duim wanem iu talem.’

Dota bilong Jephthah tu hem barava sorre. Hem bae no marit and garem pikinini taem hem stap long tabernacle. Bat hem laekem tumas for duim samting followim promis bilong dadi bilong hem and for mekem Jehovah God hapi. Datwan nao hem important long hem winim for marit and garem pikinini. So hem lusim famili bilong hem and go stap long tabernacle for full laef bilong hem.

Waswe, iu tingse wanem hem duim mekem dadi bilong hem and Jehovah God hapi?— Ia! Taem iu obeyim and lovem Jehovah, iu barava followim example bilong dota bilong Jephthah. Datwan bae mekem dadi and mami bilong iu and Jehovah barava hapi.