1, 2. Hu nao savve hapi tumas taem pipol baptaes?

SAPOS iu worshipim Jehovah for staka year finis, iu herem staka baptism tok long olketa assembly and convention. Bat nomata olsem, evritaem iu barava hapi moa for lukim olketa wea bae baptaes standap long front long Kingdom Hall for showimaot olketa redi for baptaes. Taem olketa standap evriwan wea hipap hapi tumas, and then bihaen olketa klap big. Maet iu krae tu from iu hapi tumas for lukim olketa chus for worshipim Jehovah. Long taem olsem iumi savve hapi fogud!

² Maet iumi savve lukim pipol baptaes tu-thri taem nomoa long year long ples wea iumi stap. Bat olketa angel garem privilege for lukim staka pipol baptaes long staka ples. Olketa long heven mas “barava hapi tumas” taem olketa lukim samting olsem faev thousand pipol joinim organization bilong Jehovah evri week. (Luke 15:7, 10) Masbi olketa angel barava hapi for lukim organization bilong Jehovah kamap big olsem!—Haggai 2:7.

3. (a) Why nao Satan raraon “olsem wanfala lion wea singaot big”? (b) Wanem nao hem laek for duim?

³ Bat olketa nogud spirit kros fogud taem olketa lukim pipol baptaes. Olketa hia nao Satan and olketa demon. Olketa kros tumas taem olketa lukim staka thousand pipol no followim disfala wicked world. Satan tokplas taem hem sei no eni man worshipim Jehovah bikos hem lovem Jehovah, and  no eni man bae gohed faithful long Jehovah taem hem kasem big test. (Readim Job 2:4, 5.) Evritaem samwan dedicate long Jehovah, datwan pruvim Satan no talem tru samting. Hem olsem staka thousand pipol slapem feis bilong Satan evri week. Dastawe hem “raraon olsem wanfala lion wea singaot big and hem laekem tumas for kaikaim eniwan”! (1 Peter 5:8) Datfala “lion” barava laek kaikaim iumi long spiritual wei. Hem laek mekem iumi spoelem wei wea iumi fren witim God or mekem iumi stop for fren witim hem.—Psalm 7:1, 2; 2 Timothy 3:12.

4, 5. (a) Wanem tufala important wei nao Jehovah markem spialaen long paoa bilong Satan? (b) Wanem nao tru Christian savve sure long hem?

⁴ Nomata iumi garem raf enemy, iumi shud no fraet tumas.  Why nao olsem? Bikos long tufala important wei wea Jehovah markem spialaen long paoa bilong “lion wea singaot big.” Firstfala wei nao, Jehovah talem finis “wanfala big crowd” bilong olketa tru Christian bae no dae long “big trabol” wea bae kam. (Revelation 7:9, 14) Olketa profesi wea God talem evritaem kamap tru. So God bae no letem Satan for spoelem evriwan wea worshipim hem. Masbi Satan luksavve long datwan tu.

⁵ Wanfala tru samting wea faithful profet Azariah talem helpem iumi for luksavve long mek-tu wei wea Jehovah putim spialaen long paoa bilong Satan. Hem sei long King Asa: “Jehovah bae faithful long iufala sapos iufala faithful long hem.” (2 Chronicles 15:2; readim 1 Corinth 10:13.) Staka story long Bible abaotem olketa faithful wakaman bilong God long bifor showimaot no enitaem Satan win for spoelem olketa wea gohed fren gud witim God. (Hebrew 11:4-40) Distaem tu, Christian wea gohed fren gud witim God savve againstim Devil and winim hem. Samting wea Bible talem mekem iumi trustim diswan, hem sei: “Againstim Devil mekem hem ranawe from iufala.”—James 4:7.

6. Hao nao Satan attakim olketa Christian wanwan?

⁶ Satan no savve finisim organization bilong Jehovah, bat hem savve spoelem iumi wanwan sapos iumi no keakea. Satan luksavve hem savve kaikaim iumi long tokpiksa wei sapos hem isisi spoelem wei wea iumi fren witim Jehovah. Hao nao hem savve duim datwan? Hem attakim iumi long bigfala wei, hem attakim iumi wanwan, and hem iusim olketa kleva trik. Iumi bae storyim thrifala main wei hia wea Satan attakim iumi.

7. Why nao Satan attakim pipol bilong Jehovah long bigfala wei?

⁷ Olketa bigfala attak. Aposol John sei: “Full world hem stap long paoa bilong Satan.” (1 John 5:19) Datfala scripture  talem warning for evri tru Christian. Satan kontrolem finis full world bilong pipol wea againstim Jehovah, so distaem hem attakim nomoa olketa wea worshipim Jehovah and hem attakim olketa long bigfala wei. (Micah 4:1; John 15:19; Revelation 12:12, 17) Hem kros fogud from hem savve hem garem lelebet taem nomoa. So hem attakim olketa long bigfala wei moa. Iumi insaed taem wea Satan iusim last chance bilong hem for attakim iumi long barava raf wei for mekem iumi no fren witim God.

8. Wanem nao aposol Paul minim taem hem sei iumi mas “faet” againstim olketa demon?

⁸ Attakim iumi wanwan. Aposol Paul warnim olketa Christian olsem: “Iumi faetem . . . bigfala sekson bilong olketa demon wea stap long heven.” (Ephesus 6:12) Why nao Paul iusim datfala word “faet”? Long Greek languis datfala word minim kaen faet wea tufala wea faet grabim each other. So taem Paul iusim datfala word hem strongim point hao iumi wanwan insaed wanfala faet againstim olketa demon. Nomata staka pipol long kantri bilong iumi biliv strong long olketa wicked spirit or nomoa, iumi shud no forgetim taem iumi dedicate long Jehovah, iumi go insaed wanfala faet. Start kam long taem Christian dedicate, and maet bifor datfala taem tu, hem no savve ranawe from datfala faet. Dastawe Paul luksavve hem mas talem olketa Christian long Ephesus for “faet strong” and “againstim” Devil!—Ephesus 6:11, 13, 14.

9. (a) Why nao Satan and olketa demon iusim olketa difren kaen “kleva trik”? (b) Why nao Satan trae for spoelem tingting bilong iumi, and hao nao iumi savve againstim hem? (Lukim box wea garem title “ Keakea Long Olketa Trik Bilong Satan!”) (c) Wanem nara kleva trik nao bae iumi storyim?

⁹ Olketa kleva trik. Paul talem olketa Christian for againstim “olketa kleva trik” bilong Satan. (Ephesus 6:11) Tingim, Paul sei “olketa” trik. Olketa demon iusim olketa difren kaen kleva trik and olketa garem gudfala reason for duim olsem. For staka year samfala Christian gohed faithful for winim wankaen test, bat gogo olketa foldaon long narakaen test. So Devil and olketa demon lukluk gud long wei bilong iumi  wanwan mekem olketa luksavve long wik point bilong iumi. Then olketa mekius long datwan for spoelem wei wea iumi fren witim God. Bat iumi hapi tumas bikos Bible helpem iumi for luksavve long staka kleva trik bilong Devil. (2 Corinth 2:11) Iumi storyim finis long disfala buk samfala trik bilong Satan, olsem for mekem iumi laekem tumas material samting, kaban witim nogud pipol, and wei for durong. Bat tingim nara kleva trik bilong Satan, wea hem nao for duim samting wea join witim devildevil.

10. (a) Wanem nao devildevil samting? (b) Hao nao tingting bilong Jehovah abaotem devildevil samting, and hao nao tingting bilong iu abaotem datwan?

¹⁰ Man wea duim devildevil samting hem waka tugeta witim olketa demon. Samfala devildevil samting nao hem wei for duim magic, cursim man, poisonim man, and wei for trae story witim olketa wea dae finis. Iumi savve finis, Jehovah “barava heitim” devildevil samting. (Deuteronomy 18:10-12; Revelation 21:8) From iumi tu mas “barava heitim olketa rabis samting,” hem nating fitim for iumi duim eni samting wea mekem iumi waka tugeta witim olketa wicked spirit. (Rome 12:9) Sapos iumi duim barava nogud samting olsem, iumi nating faithful long Dadi bilong iumi Jehovah!

11. Why nao Satan hem barava win sapos hem switim iumi for duim devildevil samting? Storyim tokpiksa.

¹¹ Satan savve sapos man duim devildevil samting hem barava nating faithful long Jehovah, so dastawe hem traem best bilong hem for mekem samfala duim datwan. Taem Satan switim Christian for duim devildevil samting, hem barava win nao. Why nao olsem? Tingim disfala tokpiksa: Sapos wanfala soldia disaed for lusim army bilong hem bikos army bilong enemy switim hem for joinim olketa, komanda bilong datfala enemy bae hapi fogud. Maet komanda hia tekem datfala soldia and showim hem olsem wanfala prize wea  hem tekem for mekem komanda bilong datfala soldia bifor feel shame. Long sem wei tu, sapos Christian duim devildevil samting, hem disaed for lusim Jehovah and letem Satan for kamap komanda bilong hem. Satan bae hapi tumas for showim datfala man wea lusim Jehovah olsem prize wea hem tekem! Waswe, iumi laekem Devil for win olsem? Barava nomoa nao! Iumi no laek joinim enemy bilong Jehovah.

12. Wanem nao Satan iusim for changem tingting bilong iumi abaotem devildevil samting?

¹² Sapos iumi barava heitim devildevil samting, Satan bae no win for mekem iumi duim datwan. Dastawe, hem luksavve hem mas changem tingting bilong iumi. Hem traem olketa difren wei for mekem olketa Christian konfius, gogo maet samfala tingse “gud samting hem nogud and nogud samting hem gud.” (Isaiah 5:20) For duim olsem, Satan staka taem mekius long samting wea hem savve hem waka gud. Hem iusim olketa kwestin for mekem daot kamap.

13. Long bifor, hao nao Satan iusim olketa kwestin for mekem daot kamap?

¹³ Tingim hao Satan iusim datfala wei bifor. Long Eden, hem askem Eve: “Waswe, hem barava tru God talem iufala for no kaikai from evri tree long garden?” Long taem bilong Job, taem olketa angel hipap long heven long wanfala meeting, Satan askem disfala kwestin: “Waswe, Job bae fraet long God sapos hem no kasem eni gud samting from hem?” Taem Jesus start for duim ministry, Satan tok olsem long hem: “Sapos iu wanfala son bilong God, talem olketa ston hia for kamap bred.” Satan tok daonem wanem Jehovah talem samting olsem sixfala week bifor. Jehovah sei: “Diswan nao Son bilong mi wea mi lovem and wea mi hapi long hem”!—Genesis 3:1; Job 1:9; Matthew 3:17; 4:3.

14. (a) Satan mekem pipol for daotem wanem abaotem devildevil samting? (b) Wanem nao bae iumi storyim?

¹⁴ Distaem tu, Devil iusim semkaen wei for trae mekem  pipol daotem sapos devildevil samting hem nogud. Sorre samting nao, hem win for mekem samfala Christian daot tu. Olketa start for kwestinim sapos evri samting wea join witim devildevil hem nogud. (2 Corinth 11:3) Hao nao iumi savve helpem olketa hia for changem tingting bilong olketa? Hao nao iumi savve mek sure datfala trik bilong Satan no spoelem tingting bilong iumi? Iumi bae savve long ansa taem iumi storyim tufala samting wea Satan spoelem witim devildevil samting. Hem nao hapitaem and treatment wea iumi tekem for health bilong iumi.

15. (a) Wanem nao tingting bilong staka pipol long plande kantri abaotem devildevil samting? (b) Hao nao datkaen tingting affectim samfala Christian?

¹⁵ Long plande kantri, staka pipol isisi start for tingse no eniting rong witim samting wea join witim devildevil. Staka taem olketa movie, buk, television program, and computer game garem devildevil samting long hem. Bat olketa mekem datwan for luk olsem hem kleva samting nomoa wea no savve spoelem man and pipol savve enjoyim. Staka pipol distaem laekem tumas samfala movie and buk wea main story bilong olketa join witim devildevil samting. Tru tumas, olketa demon win for mekem pipol tingse no eniting rong witim devildevil samting. Waswe, samfala Christian start for tingting olsem tu? Ia. Tingim example wea showimaot tingting bilong samfala Christian. Bihaen wanfala Christian lukim movie wea join witim devildevil samting, hem sei: “Mi lukim movie nomoa ia, bat mi no duim eni samting wea join witim devildevil.” Hao nao tingting olsem savve spoelem iumi?

16. Why nao iumi mas no chusim hapitaem wea join witim devildevil samting?

¹⁶ Hem tru, wei for lukluk long devildevil samting hem no semsem witim wei for duim devildevil samting, bat hem  no minim wei for lukim nomoa bae no savve spoelem man. Bible showimaot Satan and olketa demon no savve long wanem nao stap long tingting bilong iumi. * So olsem iumi storyim finis, olketa demon lukluk gud long iumi mekem olketa savve long tingting bilong iumi and eni samting iumi duim wea savve spoelem wei wea iumi fren witim God. Wanfala samting wea olketa interest for lukim nao hem hapitaem wea iumi chusim. Taem Christian interest long movie or buk abaotem pipol wea trae story witim olketa wea dae finis, wei for duim magic, man wea demon stap long hem, and olketa nara samting wea join witim devildevil, olketa demon bae luksavve long datwan! Then olketa bae barava mekius long datwan for trae winim hem. Samfala Christian wea start for interest long devildevil samting bikos long olketa movie and buk, gogo olketa duim nao samting wea join witim devildevil.—Readim Galatia 6:7.

17. Wanem kleva trik nao Satan savve iusim for spoelem olketa wea sik?

¹⁷ Satan trae mekius no just long hapitaem wea iumi laek duim, bat hem mekius tu long need bilong iumi for kasem treatment long sik wea iumi garem. Hao nao hem duim datwan? Christian wea sik tumas nomata hem traem staka treatment for finisim sik bilong hem savve feel sorre tumas and wikdaon. (Mark 5:25, 26) Long taem olsem, hem chance nao for Satan and olketa demon trae spoelem hem. Olketa demon savve mekius long wei wea hem sik tumas for switim hem for iusim treatment wea “iusim magic,” wea hem nao devildevil samting. (Isaiah 1:13) Sapos olketa demon win for switim datfala Christian wea sik, datwan savve spoelem wei wea hem fren witim God. Long wanem wei?

18. Wanem kaen treatment nao Christian bae no acceptim, and why nao olsem?

 ¹⁸ Jehovah warnim olketa Israelite wea start for “iusim magic.” Hem sei: “Taem iufala liftimap hand bilong iufala, mi no luk long iufala. Nomata iufala talem plande prea, mi no lisin.” (Isaiah 1:15) Iumi laek stap klia long eni samting wea maet stopem prea bilong iumi and wea savve mekem hem hard for Jehovah helpem iumi, especially taem iumi sik. (Psalm 41:3) So sapos tru Christian luksavve maet wanfala treatment join witim devildevil samting, nomata hem smol samting nomoa, hem shud no acceptim datfala treatment. * (Matthew 6:13) Sapos hem no acceptim, Jehovah bae gohed for helpem hem.—Lukim box wea garem title “ Waswe, Hem Really Devildevil Samting?”

19. (a) Devil trikim staka pipol taem hem mekem olketa for bilivim wanem abaotem paoa bilong hem? (b) Olketa wanem kaen story nao olketa tru Christian shud no storyim?

¹⁹ Iumi storyim finis pipol long plande kantri tingse olketa no need for warim paoa bilong Satan. Bat pipol long samfala nara kantri no ting olsem. Long olketa kantri hia, Devil trikim staka pipol taem hem mekem olketa for bilivim hem garem bigfala paoa wea winim really paoa wea hem garem.  Long evri samting wea pipol hia duim evriday, olketa barava fraet long olketa wicked spirit. Staka story gogo raon abaotem olketa big samting wea olketa demon duim. Pipol laekem tumas for storyim olketa samting hia, olketa barava interest long olketa story olsem. Waswe, iumi tu shud storyim kaen samting olsem? Nomoa. Olketa wea worshipim tru God garem tufala important reason why olketa no duim olsem.

20. Maet long wanem wei nao man savve mekem olketa laea story bilong Satan gogo raon?

²⁰ Firstfala reason, man wea storyim olketa samting wea demon duim hem sapotim waka bilong Satan. Long wanem wei nao hem sapotim Satan? Bible sei Satan savve duim bigfala samting, bat hem warnim iumi tu hao Satan iusim “olketa laea saen” and “olketa samting wea . . . trikim man.” (2 Thessalonica 2:9, 10) From Satan hem main man for laea, hem  savve tumas hao for mekem pipol wea interest long devildevil samting bilivim olketa samting wea no tru. Maet olketa barava tingse olketa lukim and herem wanfala samting, and hao olketa storyim savve mekem man for tingse datwan hem tru. Taem story hia gogo raon, gogo pipol extram tu. Sapos Christian talem story olsem long staka pipol, hem olsem hem duim nao wanem Devil laekem wea hem “dadi bilong wei for laea.” Hem mekem olketa laea story bilong Satan for gogo raon.—John 8:44; 2 Timothy 2:16.

21. Wanem nao main samting wea iumi laek storyim?

²¹ Mek-tu reason, nomata olketa demon duim samfala samting long wanfala Christian bifor, hem shud no evritaem storyim datwan long olketa nara Christian. Why nao olsem? Bible sei: “Iumi mas lukluk gud long Jesus, wea leadim faith bilong iumi and mekem faith bilong iumi perfect.” (Hebrew 12:2) Tru tumas, iumi mas lukluk gud nomoa long Christ, no long Satan. Nomata Jesus barava savve long wanem Satan fit for duim and no fit for duim, no enitaem hem talem olketa disaepol bilong hem olketa story abaotem Satan and olketa demon. Bat main samting Jesus storyim nao hem message abaotem Kingdom. So, iumi laek followim example bilong Jesus and olketa aposol mekem main samting wea iumi storyim nao hem “olketa nambawan samting wea God duim.”—Acts 2:11; Luke 8:1; Rome 1:11, 12.

22. Wanem nao iumi savve gohed for duim mekem olketa long heven “barava hapi tumas”?

²² Hem tru, Satan iusim enikaen kleva trik for mekem iumi stop for fren witim Jehovah, wea wanfala nao hem samting wea join witim devildevil. Bat taem iumi barava heitim rabis samting and hol strong long samting wea hem stret, Devil no savve changem disison wea iumi mekem for no duim eni samting wea join witim devildevil. (Readim Ephesus 4:27.) Tingim hao olketa long heven bae “barava hapi tumas” sapos iumi gohed for “againstim olketa kleva trik bilong Devil” go kasem taem wea Satan bae finis!—Luke 15:7; Ephesus 6:11.